‘Nkaambo Leza ncayanda nceeci cakuti kamulilesya kubwaamu.’—1 Batesalonika 4:3.

NZYOBAAMBA BANTU

Mumasi amwi bantu bapati balazumizyigwa koonana nokuba kuti tabakwetene. Alimwi mumasi amwi bakubusi batakwetene balazumizyigwa kucita zyintu zyeelede kucitwa buyo abantu bakwetene.

NZYOLYAAMBA BBAIBBELE

Ibbaibbele libelesya bbala lyakuti “bwaamu” kwaamba micito imwi yakoonana iicitwa abantu batakwetene. Leza uyanda kuti babelesi bakwe ‘kabalilesya kubwaamu.’ (1 Batesalonika 4:3) Bwaamu ncibi cipati, mbubwenya buyo mbuli bumambe, kusyoma mizimu, bukolwi, kukomba mituni, bujayi, alimwi abubbi.—1 Bakolinto 6:9, 10; Ciyubunuzyo 21:8.

NKAAMBO NZI MAKANI AAYA NCAAYELEDE KUMUJATIKIZYA?

Kaambo kamwi nkakuti, Bbaibbele licenjezya kuti: “Leza uyoobabeteka basibwaamu abasimamambe.” (Bahebulayo 13:4) Kwiinda mukutobela milawo ya Leza yakulilemeka, tutondezya kuti tulamuyanda Jehova Leza. (1 Johane 5:3) Kumane Leza ulabalongezya aabo ibatobela milawo yakwe.—Isaya 48:18.

“Bwaamu abusofwaazi bwamusyobo uuli oonse naa busyaacivwulemwangu tazyeelede nokuba kwaambwa akati kanu pe.”—Baefeso 5:3.

NZYOBAAMBA BANTU Bantu banji basyoma kuti kunze lyakoonana, kunyina cilubide kuti bantu batakwetene kabacita zyintu zyeelede kucitwa buyo abantu bakwetene.

NZYOLYAAMBA BBAIBBELE

Ciindi Bbaibbele nolyaamba kujatikizya micito yakutalilemeka, talyaambi buyo bwaamu, pele lilaamba ‘abusofwaazi’ alimwi ‘abukkale busesemya.’ (2 Bakolinto 12:21) Kwaamba masimpe, kuli zyintu zimwi zyeelede kucitwa buyo abantu bakwetene, zyalo zimunyemya Leza kuti naa zyacitwa abantu batakwetene, nokuba kuti kunyina noboonana buya.

Mulumbe wamu Bbaibbele kujatikizya koonana ngwakuti, zyintu zimwi zyeelede kucitwa buyo abantu bakwetene. Bbaibbele alimwi lilakasya “luunyaunya lwabulyato.” (1 Batesalonika 4:5) Ino eeco caamba nzi? Amulange-lange cikozyanyo cikonzya kubeleka kumusankwa naa musimbi: Musimbi inga kajisi makanze aakutoonana amusankwa ngobasyabene limwi. Pele musimbi ooyu ulacita amusankwa wakwe zyintu zimwi zyeelede kucitwa buyo abantu bakwetene. Kwiinda mukucita boobo, bantu aaba banyomenena cintu citali cabo. Aboobo, balaba amulandu ‘waluunyaunya lwabulyato.’ Micito yabulyato iili boobu, ilakasyigwa mu Bbaibbele.—Baefeso 5:3-5.

“Amubutije bwaamu.”​—1 Bakolinto 6:18.

NKAAMBO NZI MAKANI AAYA NCAAYELEDE KUMUJATIKIZYA?

Kweelana ambolyaamba Bbaibbele, aabo boonana kabatakwetene bali muntenda yakusweekelwa cilongwe cabo a Leza.—Bakolose 3:5, 6.

NZYOLYAAMBA BBAIBBELE

Ibbaibbele lilailila bantu kuti “amubutije bwaamu.” (1 Bakolinto 6:18) Eeci caamba kuti muntu weelede kutantamuka cintu cili coonse cikonzya kusololela kukutalilemeka. (Tusimpi 22:3) Mucikozyanyo, kutegwa muntu atantamuke micito yakutalilemeka, weelede kutantamuka bantu batatobeli malailile aa Leza aamba zyakoonana. Bbaibbele licenjezya kuti: “Uuenda abasongo ulasongwaala, pele muzwalani wabafubafuba ulabisizigwa.”—Tusimpi 13:20.

Kuyeeya zyintu zibyaabi akwalo kulakonzya kusololela kumicito yakutalilemeka. (Baloma 8:5, 6) Aboobo, inga cagwasya kutantamuka nyimbo, mavidiyo, mabbuku alimwi azyintu zili zyoonse izitondezya micito yakutalilemeka naa eeyo iikulwaizya koonana ikumunyemya Leza.—Intembauzyo 101:3.