MAKANI AAYEEME AMUTWE UULI ACIVWUMBYO | NKAAMBO NZI NCOTWEELEDE KUZUMANANA KUPONA?
Akaambo Kakuti Kuli Lugwasyo
‘Kamuwaala makatazyo aanu oonse kuli Leza, nkaambo ulamubikkila maano.’—1 PETULO 5:7.
Ncuubauba kulombozya kufwa kuti mubuumi kakulibonya mbuli kuti kunyina cintu cikonzya kucinca bukkale bwanu. Pele amulange-lange twaambo tukonzya kumugwasya.
Mupailo. Mupailo tacili cintu cikonzya kumupa buyo kulimvwa kabotu, naa cintu ncotukonzya kucita ciindi notuyanda cintu cimwi, pele nkwaambaula a Jehova Leza kwini-kwini, walo uutulanganya. Jehova uyanda kuti mumwaambile zintu nzyomulibilika. Ibbaibbele litukulwaizya kuti: “Bika makani aako oonse mumaanza aa-Jehova, lino ulakutabilila.”—Intembauzyo 55:22.
Sena inga tiimwabandika a Leza mumupailo lino? Kamubelesya zina lyakwe lyakuti Jehova, alimwi akumwaambila kuzwa aansi aamoyo wanu. (Intembauzyo 62:8) Jehova uyanda kuti mumubone kuba mulongwe. (Isaya 55:6; Jakobo 2:23) Mupailo ncoolwe cilibedelede cakubandika a Jehova calo cikonzya kuboola kufwumbwa ciindi alimwi aabusena buli boonse.
Makani aakapegwa abamu cibeela ca American Foundation for Suicide Prevention, akatondezya kuti, “kanji-kanji mubuvwuntauzi kujanika kuti bantu bafwa akaambo kakulijaya mweelwe usika ku 90 pesenti naa kwiinda aawo, inga baciswa bulwazi bwamizeezo ciindi nobayanda kufwa. Nokuba boobo, malwazi aali boobu kanji-kanji inga taanazyibwa, nokuba kuti azyibwa inga taasilikwi kabotu.”
Bantu bamubikkila maano. Buumi bwanu bulayandika kapati kubantu bamwi, ibantu mbuli balongwe alimwi abanamukwasyi nkaambo balo balatondezya kale kuti balamuyanda. Bantu bambi bakonzya kumubikkila maano mbantu mbomutazyi. Mucikozyanyo, zimwi ziindi Bakamboni ba Jehova nobakambauka, balaswangana abantu batyompedwe, bamwi balalyaambilila kuti baliyandide kapati kugwasyigwa alimwi akuti bajisi makanze aakulijaya. Mulimo wabo ngobacita wakuŋanda aŋanda wabapa coolwe cilibedelede Bakamboni ba Jehova cakugwasya bantu bali boobu. Kabatobela cikozyanyo ca Jesu, Bakamboni ba Jehova balababikkila maano bantunyina. Andinywe balamubikkila maano.—Johane 13:35.
Kugwasyigwa abasyaazibwene. Mizeezo yakulijaya kanji-kanji itondezya kuti muntu ulaakabuko, mbuli bulwazi bwakutyompwa. Ikuti naa kamujisi kabuko, tamweelede kufwa nsoni nkaambo abwalo mbulwazi buya. Mubwini, kutyompwa kuzyibidwe kuti “ndipenzi lyamumizeezo.” Muntu uuli woonse ulakonzya kutyompwa, pele inga wasilikwa. *
KAMUYEEYA KUTI: Cilakatazya kusola kumana penzi lyakutyompwa nobeni. Pele kwiinda mukugwasyigwa abamwi, mulakonzya kuzwidilila.
NCOMUKONZYA KUCITA LINO: Amuyandaule syaazibwene mukusilika bulwazi bwakutyompwa.
^ par. 8 Ikuti mizeezo yakulijaya yazumanana, amujane lugwasyo luyandika ambweni kuzwa kucibbadela naa kulomba lugwasyo kutubunga tugwasya bantu bali mubukkale buli boobo. Mumasena aali boobu, kuli bantu bayiisyidwe kugwasya baabo bajisi mizeezo yakulijaya.
Andiza Inga Mwaakkomanina Ayaaya
SINSIMUKA!
Kuzumanana Kupona—Akaambo Kakuti Kuli Bulangizi
Mbubwenya mbuli mumuni, bulangizi bulakonzya kumugwasya kubona mumudima.
MIBUZYO YAMU BBAIBBELE YAINGULWA
Sena Leza Ulandigwasya Kuti naa Ndapaila?
Sena ncobeni Leza ulatulanganya kujatikizya mapenzi eesu?
