Amutwaambile kaambo ncomwakali kusyoma munjiisyo yakusanduka kwazintu.

Nokuba kuti ndakakomenena mumukwasyi mobakali kunjila cikombelo ca Katolika, ndakali kudooneka kujatikizya Leza. Mucikozyanyo, tiindakali kusyoma muli Leza uutenta bantu mumulilo wahelo. Aboobo, ciindi bamayi bangu bakuyunivesiti nobakandiyiisya kuti zintu zipona zyakasanduka buya alimwi akuti tiizyakalengwa buya a Leza, ndakauzumina muzeezo ooyo, kandiyeeya kuti wakalijisi bumboni. Alimwi buya cikombelo cangu cakali kwiisyoma njiisyo yakusanduka kwazintu alimwi akwiibona kuti yakazwa kuli Leza.

Ino ncinzi cakamupa kuyanda kuzyiba ncolyaamba Bbaibbele?

Bakaintu bangu ba Susana, bakatalika kwiiya Bbaibbele a Bakamboni ba Jehova, balo bakabatondezya kuzwa mu Bbaibbele kuti Leza kunyina nasubula bantu kwiinda mukubaumpa mumulilo wahelo. * Alimwi bakabatondezya acisyomezyo ca Leza cakupanga nyika kuba paradaiso. * Mu 1989, Kamboni wazyina lya Nick wakatalika kundiswaya. Notwakali kubandika kujatikizya mboubede alimwi ambowakapangwa mubili wamuntu, ndakakkomana kapati nindakamvwa majwi aajanika mu Bbaibbele mulugwalo lwa Bahebulayo 3:4 aakuti: “Iŋanda iili yoonse kuli wakaiyaka, pele ooyo wakayaka zyintu zyoonse ngu Leza.”

Sena kwiiya mubili wamuntu kwakamugwasya kuzumina kuti zintu zyakalengwa buya?

Inzya. Mubili wesu mboulibamba wini ncintu cakalengwa munzila iigambya kapati. Mucikozyanyo, zilonda mbozipona cilabikkilizya abubambe bone bubelekela aantoomwe, bwalo ibwakandiyeezya  kuti mbuli sikwaandula bantu, ndakali kubelekela antoomwe abubambe bwamumubili bulibambulula bulikke.

Amutwaambile, ncinzi cicitika mumibili yesu ciindi notwalicisa?

Kwainda buyo tuvwalu-vwalu tusyoonto, bubambe bwakusaanguna ibwakapangilwa kulesya kuzwa bulowa bulatalika kubeleka. Bubambe boonse oobu bone bulakatazya kapati kumvwisya mbobubeleka, pele bulagwasya. Alimwi inga ndayungizya kuti, mbobweenda bulowa mumibili yesu kwiinda munsinga zyabulowa zilampa makkilomita aali 100,000 kuti zyanungwa, kulabanyomenezya kapati basyaazibwene mukubamba mapaipi aameenda, mbwaanga bubambe oobu bulacikonzya kusinka tupulo alimwi akulibambulula.

Ino ncinzi cibikkilizyidwe mububambe bwabili?

Kuzwa bulowa kulaleka mumawoola masyoonto, mpoonya akutalika kuzimba. Kuzimba ooku kulacitika munzila zinji zigambya. Cakusaanguna, nsinga zyabulowa izyaangene kutegwa bulowa buleke kweenda, lino zilaangunuka. Mpoonya nsinga eezyi zilakwazamuka kutegwa bulowa kabucikonzya kweenda kutozya waawo aali cilonda. Kwamana, meenda aajisi ma protein manji apa kuti cilonda cizimbe. Meenda aaya alayandika kapati mukulwana tuzunda, kucesya bukali bwamisamu iikola, alimwi akugwisya maseelo aafwide. Mucibeela cimwi acimwi kulabambwa maseelo manji aakabambilwa mulimo ooyu cakuzumanana. Alimwi buya nozicitika zintu eezyi, inga zilibambila bubambe butobela, mpoonya kumamanino zilacileka.

Ino mbuti cilonda mbocizumanana kupona?

Kwainda buyo mazuba masyoonto kuzwa notwalicisa, mibili yesu ilatalika kupanga zibelesyo zyakulibambulula, calo icitalisya bubambe bwatatu bwakupona alimwi akupa kuti kwainda nsondo zyobilo cilonda cipone. Mpoonya maseelo aapanga lukanda alatalika kweenda kuya acilonda alimwi akuzyalana. Azyalo nsinga zyabulowa zisyoonto-syoonto zilatalika kukomena munsi-munsi acilonda, akugwisya tombe alimwi akuleta busani buyandika mukubambulula. Mubukkale bumwi bukatazya, maseelo aayeelela alapangwa kutegwa aswaanganye lukanda antoomwe.

Eelo kaka mulimo ooyo mupati! Ino citola ciindi cilamfwu buti kutegwa mulimo wakulibambulula umane?

Bubambe bwamamanino, nkokuti kulibambulula, bulatola myezi iili mbwiibede. Mafwuwa aakatyokede alayuma mbuli mbwaakabede, alimwi alwalo lukanda luteteete lulazwa akunjililwa busena alukanda luyumu. Mububambe boonse oobu, kupona kwacilonda ncikozyanyo cakubelekela antoomwe kugambya kapati.

Sena kuli bukkale mbomuyeeyede bwakamukkomanisya kapati?

Inzya. Ndilayeeya nindakali kusilika mukubusi uujisi myaka iili 16 yakuzyalwa iwakali muntenda yamootokala. Musimbi ooyu wakaliliciside kapati cakuti wakaanduka akabeela kamwi kali munsi-munsi abula alimwi kakali kuzwa bulowa kapati. Kaindi, kutegwa tusilike kabeela aaka twakali kukaandula naa kukagwisyila limwi. Pele mazuba aano, bamadokota basyoma kapati nguzu zyamubili kutegwa ulibambulule. Ndakali kumusilika buyo malwazi mbuli, kubula bulowa, kulimvwa kucisa, alimwi akubula maanzi aamumubili. Nikwakainda nsondo zisyoonto, twakamulanga-langa akujana kuti wapona. Ndabona mbuli mubili mboulibambulula wini, cindipa kukkomana. Lino ndilijisi lusinizyo lwakuti twakalengwa buya a Leza.

Ino ncinzi cakamupa kuti kamuyanzana a Bakamboni ba Jehova?

Ndakajana kuti mbantu baseka-seka, alimwi lyoonse bakali kwiingula mibuzyo yangu kwiinda mukubelesya Bbaibbele. Alimwi ndakali kukkomana ndabona mbobaambila bamwi zintu nzyobasyoma cabusicamba alimwi akugwasya bamwi kwiiya zya Leza.

Sena kuba Kamboni wa Jehova kwamugwasya mumulimo wanu?

Inzya. Munzila imwi, ndakagwasyigwa kuliyumya kukutyompwa kuboola akaambo kakuusa alimwi akuba akabuko nkobaba ankako bamadokota abamanesi akaambo kakulanganya bantu bacisidwe naa ibakalicisa. Alimwi, ciindi balwazi nobakali kuyanda kubandika, ndakali kubapandulwida cisyomezyo ca Mulengi cakuyoogwisya kuciswa akupenga * alimwi akuleta nyika mwalo munoonyina muntu iwaamba kuti, “Ndaciswa.” *