CISI ca Belize nokuba kuti ncisyoonto, pele cilijisi zintu ziindene-indene—masena moiwa mvwula kapati, ameenda eebeka azingulukide nsumbu zinji kunkomwe iili afwaafwi acisi eeci. Pele mbobweebeka busena oobu, ngamatalikilo aazintu zibotu izili mucisi ca Belize.

Misyobo-misyobo yabayuni alimwi abanyama ilajanika mucisi eeci. Akati kazilenge izili mucisi eeci kuli muyuni uutegwa toucan alimwi amunyama uutegwa Baird’s tapir uujisi mpemo ndamfwu uukonzyene acipembele alimwi uukonzya kweendesya anyika alimwi amumaanzi. Mpoonya kuli munyama uuyandisya kweenda alikke uutegwa jaguar. Alimwi cisi ca Belize cilalidunda kuti ncecakusaanguna munyika yoonse kukwabilila munyama ooyu.

Cisi ca Belize cakali cibeela cabweendelezi bwaba Maya. Basikuzunda bana Spain bakasika mumwaanda wa 16 pele tiibakabazunda cakumaninina ba Maya. Mukuya kwaciindi, bana Britain mbebakali kweendelezya busena oobu mpoonya mu 1862 bwakaambwa kuti bwakatalika kweendelezyegwa a British Honduras. Mumwaka wa 1981 cisi ca Belize cakalilela.

 Bana Belize baleebeka mbubwenya mbuli cisi cabo. Misyobo imwi yamucisi eeci ibikkilizya ci Creole, ci East Indian, ci Garifuna, ci Maya alimwi aci Mestizo. Bantu bamucisi eeci mbabotu myoyo alimwi mbantu baseka-seka. Ciindi bana nobaambaula abapati inga bavwula kubelesya majwi aabulemu.

Mucisi ca Belize, kuli mbungano zya Bakamboni ba Jehova izibelesya Mwaambo Wakutambaika waku America, ci Belize Kriol, Cingisi, ci Low German, ci Mandarin Chinese, ci Maya (Mopán), alimwi aci Spanish. Mumwaka wa 2013, muntu omwe akati kabantu bali 40 baku Belize, wakajanika a Bakamboni ku Ciibalusyo calufwu lwa Kristo.