Ino ninjiisyo nzi nzyomwakayiisyigwa nomwakali mukubusi?

Kucikolo bakali kuyiisya njiisyo yakusanduka, pele kunyina wakapandulula buumi mbobwakatalika. Ciindi bazyali bangu nobakaba bacikombelo ca Taoism, ndakali kuswiilila kuli bamayi babo bacikombelo alimwi akubabuzya mibuzyo minji. Pele bakali kundipa buyo bwiinguzi busyoonto ibumvwika.

Ncinzi cakapa kuti mube basyaazibwene mulwiiyo lwanamba?

Nindakali kucikolo capulaimali, ndakali kuziyanda kapati namba. Eeci cakapa kuti ndizumanane kuziyanda anondakaunka kuyunivesiti, kwalo nkondakali kukkomanina makkoosi aanamba alimwi a probability. Kulindime, kusinizya cintu mubufwaafwi kwiinda mukubelesya namba nkubotu alimwi kulakkomanisya.

Ino mwakatalika buti kuba aluyandisisyo mu Bbaibbele?

Mu 1978 bakaintu bangu ba Jinghuei, bakatalika kwiiya Bbaibbele a Bakamboni ba Jehova, alimwi ziindi zimwi ndakali kutola lubazu mumibandi. Aciindi eeco twakali kukkala ku United States. Alimwi ndendilyo ba Jinghuei nobakatambula digili yaatala mulwiiyo lwa physics, mpoonya mebo ndakali kwiiya statistics ku Purdue University ku Indiana.

Ino Bbaibbele mwakali kulibona buti?

Ndakakkomana kumvwa zibalo izili mumo zyaamba mboyakabambwa nyika kutegwa bantu bakkale alinjiyo. Ziindi izili cisambomwe izyakulenga izyaambwa mubbuku lya Matalikilo, nokuba kuti zyaambidwe munzila nguba-uba, zimvwika  kuti zyamasimpe mukwiimpana azyaano zyansiku. * Nokuba boobo, kwamyaka minji tiindakali kusyoma mu Mulengi.

Nkaambo nzi aayo ncaakali makani mapati kulindinywe?

Cakali kujatikizya mbondakali kulimvwa. Kusyoma mu Mulengi cakali kwaamba kukaka cikombelo ncondakali kunjila kuzwa kubwana, nkaambo cikombelo ca Taoism taciyiisyi kuti kuli Leza naa Mulengi.

Nokuba boobo, mukuya kwaciindi, mwakacinca mbomwakali kuzibona zintu. Ino nkaambo nzi?

Akaambo kakuyeeya kapati kujatikizya matalikilo aabuumi, ndakatalika kusyoma kuti cintu cakusaanguna kupona ceelede kuti cakali kugambya kapati. Mucikozyanyo, cakeelede kuti kacicikonzya kuzyala, nkokuti kuba amakani aalembedwe mumaseelo alimwi anzila yakucikonzya kupanga makani aalembedwe mumaseelo aakozyene. Kuyungizya waawo, nokaba kaseelo, kayandika mincini yama molecules yakupangisya zibeela zyoonse zyaseelo lipya, alimwi anzila yakweendelezya nguzu. Mbuti bubambe oobo bukatazya kumvwisya mbobukonzya kulitalikila kuzwa kuzintu zitaponi? Mbondili syaazibwene mulwiiyo lwanamba, tiindakali kukuzumina kweezyeezya ooko. Inga kwayandika zintu zinji kapati kutegwa zintu zilitalikile.

Ncinzi cakapa kuti mutalike kulanga-langa njiisyo zya Bakamboni ba Jehova?

Ndakali kwiiya a Bakamboni cakutasitikila. Mpoonya mu 1995, nondakaswaide ku Taiwan, ndakaciswa alimwi ndakali kuyandika lugwasyo. Bakaintu bangu ibakali ku United States aciindi eeco, bakabandika a Bakamboni ba Jehova baku Taiwan. Bakamboni bakandijana kandikatede anze kucibbadela kwalo kwakanyina malo. Kamboni umwi wakandibweza akunditola kuhotela kutegwa ndikalyookezye. Wakali kundilingula mpoonya wakanditola kucibbadela kutegwa ndikasilikwe.

Kubikkilwa maano ookuya kwakandinjila kapati mumoyo, alimwi ndakayeeya ziindi zinji Bakamboni ba Jehova mbobakatondezya bubotu kumukwasyi wangu mubukkale bwiindene-indene. Lusyomo lwa Bakamboni lwakali kubapa kwiindana abantu bamwi. Aboobo, ndakatalika alimwi kwiiya Bbaibbele ambabo. Mwaka wakatobela ndakabbapatizyigwa.

Sena lusyomo lwanu lulakazyanya alwiiyo lwanu?

Peepe! Mumyaka yainda ndali kubelesya lwiiyo lwangu lwanamba kugwasyilizya basayaansi ibaiya makani aali mumaseelo mbwaabeleka. Lwiiyo lwamakani aali mumaseelo lupa kumvwisya buumi mbobubede—ikumvwisya ooku kundipa kulemeka busongo bwa Mulengi.

Amupe cikozyanyo cabusongo oobo.

Amuyeeye kuzyalana. Tulenge tumwi mbuli tuma amoeba, tatujisi kalumi naa kakaintu. Tulenge ootu itujisi buyo seelo lyomwe tulapanga kkopi lijisi makani aali mulintuto mpoonya akulyaandaanya (asexual reproduction.) Nokuba boobo, bunji bwabanyama azisyango zilazyalana kwiinda mukusanganya makani aali museelo kuzwa kucilumi alimwi akucikaintu. Nkaambo nzi nzila eeyi ncoigambya?

Nkaambo nzi nzila yakuzyalana mwalo kalenge mokalyaandaanya akuba zyobilo—alimwi kali kucita oobo kuzwa naa ndilili—mbokakonzya kucinca akutalika nzila mwalo zilenge zyobilo moziswaangana kutegwa zizyale cilenge comwe? Nzila iiyandika kubweza cibeela caseelo kucilumi akucikaintu akuziswaanganya ilakatazya kapati kumvwisya, calo icipa kuti cibe cintu cikatazya kapati kupandulula buumi kubelesya njiisyo yakusanduka. Mukubona kwangu, kuzyalana kubelesya zizo zyabwaalumi abukaintu kulasalazya ncobeni kuti Leza nkwali.