“BBAASI lilakonzya kuunka, pele musankwa waku China ulacaala!” Aaya ngamajwi ngobakamvwa ba Alexandra ciindi nobakakkede mubbaasi kabalindila kwiinda amunyinza iwakali akati kazisi zyobilo zyaku South America. Bakaseluka kuti babone cakali kucitika, mpoonya bakajana musankwa waku China iwakali kusola kupandulula penzi lyakwe mumwaambo waci Spanish cityokede kuli sikugatela waamunyinza. Mbwaanga ba Alexandra bakali kuswaangana kumbungano iyakali kubelesya mwaambo waci Chinese ya Bakamboni ba Jehova, bakalyaaba kuti bagwasye kusandulula.

Musankwa ooyu wakaamba kuti wakalijisi mapepa aamuzumizya kuba sicisi, pele bakamubbida mapepa aaya antoomwe amali. Kumatalikilo, sikugatela kunyina naakaasyoma makani aaya alimwi buya wakatalika kuyeeyela ba Alexandra kuti bakali umwi wabasikubba bantu. Kumamanino wakaasyoma makani aamusankwa ooyu, pele silweendo ooyu iwatakajisi coolwe wakaambilwa kubbadela akaambo kakutaba aamapepa aaluzi. Mbwaanga tanaakajisi mali, ba Alexandra bakamukweletesya mali aasika ku $20. Musankwa ooyu wakabalumba kapati akwaamba kuti uyoobapilusyila mali aainda ku $20. Ba Alexandra bakapandulula kuti tiibakali kuyanda kulumbulwa, pele bakali kuyanda buyo kugwasya nkaambo bakalimvwa kuti kucita boobo ncecakali cintu ciluzi. Bakapa musankwa ooyu mabbuku amwi aamba zyamu Bbaibbele akumukulwaizya kuti akaiye Bbaibbele a Bakamboni.

Cilakulwaizya kumvwa bwaabi bucitilwa bantu beenzu, alimwi cakutadooneka, bwaabi ibuli boobo bulacitwa abantu bazikombelo zyoonse alimwi abantu batakombi. Ikuti nomwakali ndinywe sena nomwakalisungula kugwasya munzila iili boobo? Mubuzyo ooyu ulayandika nkaambo Jesu wakaamba kuti: “Kupa kulakkomanisya kapati kwiinda kupegwa.” (Milimo 20:35) Abalo basayaansi mbobaamba nkaambo basikuvwuntauzya bajana kuti kucita boobo cilakonzya kumugwasya. Atubone nzila mbocigwasya.

Zintu zicitika zitondezya kuti kupa alimwi alukkomano kanji-kanji ziliswaangene. Mwaapostolo Paulo wakalemba kuti “Leza uyanda muntu uupa kumwi kakkomene.” Wakali kwaamba kujatikizya Banakristo ibakapede zyakusanga kutegwa bagwasye basyominyina ibakajisi buyumuyumu. (2 Bakorinto 8:4; 9:7) Paulo tanaakali kwaamba kuti bakapa akaambo kakuti bakalikkomene. Pele wakali kwaamba kuti bakalikkomene akaambo kakuti bakacikonzya kupa.

Masimpe, kweelana abuvwuntauzi bumwi, kupa “kugwasya zibeela zyabongo iziswaangene alukkomano, kumvwana abamwi, akusyoma, calo icipa kuti kube kulimvwa kukkutila ikuboola akaambo kakupa.” Abumwi buvwuntauzi bwakatondezya kuti “kupa mali muntu umwi kwakali kuyungizya lukkomano lwabasikupa kwiinda kuti mali aayo baabelesya lwabo beni.”

Sena kuli nomwakalimvwide kuti akaambo kabukkale bwanu taakwe zinji nzyomukonzya kucita? Masimpe ngakuti muntu uuli woonse ulakonzya kujana lukkomano luboola akaambo ‘kakupa  kumwi kakkomene.’ Ikuti kwacitwa amakanze mabotu, icapegwa taceelede kuba cintu cipati buya. Kamboni wa Jehova umwi wakatuma mulumbe ooyu acakusanga kuli basikulemba magazini eeyi: “Myaka yoonse eeyi ndali kucikonzya buyo kupa mali masyoonto ku Ŋanda ya Bwami.” Pele wakayungizya kuti: “Jehova Leza wandipilusyila zinji kwiinda nzyondakapa. . . . Ndalumba ikundigwasya kuti ndicikonzye kupa cipego eeci—cilanduumbulizya.”

Mubwini, kupa, tacaambi buyo kuti ccita mali alikke. Kuli nzila zimbi zinji motukonzya kupa.

Bbaibbele lyaamba kuti: “Muntu siluzyalo ulaliletela mpindu, pele silunya uliletela mapenzi.” (Tusimpi 11:17) Bantu basiluzyalo mbaabi, balalisungula—kupa ciindi cabo, nguzu, kubikkila maano azimwi buyo. Kucita boobo mubuumi kulabagwasya munzila ziindene-indene, alimwi akati kabubotu mbobajana akaambo kabwaabi ibuli boobo nkuba abuumi bubotu.

Buvwuntauzi butondezya kuti aabo ibalisungula kugwasya bamwi bajanwa kuti tabavwuli kumvwa zicisa-cisa mumubili alimwi tabavwuli kutyompwa. Kanji-kanji, inga bapona buumi bubotu. Kupa camoyo woonse mane kusumpula buumi bwabantu bamwi ibaciswa malwazi mapati mbuli bulwazi bwansinga amilambi (multiple sclerosis) naa bwasikalileke. Alimwi buvwuntauzi bwatondezya kuti bantu ibakajisi penzi lyakuciindizya kunywa bukoko ibagwasya bamwi balaleka kutyompwa kapati alimwi balakonzya kugwasyigwa kutegwa batapiluki alimwi kumicito yabo yakaindi.

Ikaambo ncocili boobo kwaambwa kuti “lubomba, bubotu alimwi aluzyalo zipa kuti muntu atalimvwi bubi.” Kupa alimwi kucesya kulibilika alimwi a BP. Alimwi bantu ibakafwidwa muntu ngobakakwetene limwi bakali kufwambaana kuleka kuba azitondezyo zyakutyompwa ciindi nobakali kulisungula kugwasya bamwi.

Tacidoonekwi pe. Kupa kumuletela bubotu.

Jesu wakakulwaizya basikumutobela kuti: “Amube baabi, abalo bantu bayoomwaabila. Bayoomutilila munkomwe zyanu zyaacamba ceelelo cibotu cisindaidwe, cuumidwe-umidwe alimwi cizwide pamu. Nkaambo cipimyo ncomubelesya kupimina bamwi, ncobayoobelesya kumupimina andinywe.” (Luka 6:38) Ikuti kamupa, bantu balalangilwa kubweza ntaamu kubwaabi bwanu kwiinda mukulumba alimwi akuba baabi abalo. Aboobo kupa cigwasya kuti kube kukamantana alimwi abulongwe.

Basikuvwuntauzya ibaiya zilongwe akati kabantu bakajana kuti “bantu ibatondezya bwaabi lyoonse bakulwaizya bamwi kucita mbubwenya.” Mubwini, “ikwiile kubala buyo makani aamba micito yaluzyalo cipa bantu kuti babe amuuya wabwaabi kapati.” Aboobo, kweelana abuvwuntauzi bumwi mbobwakatondezya, “muntu umwi uuli akati kabantu banji ulakonzya kugwasya bantu bali mbobabede nobaba banji kucinca, bamwi akati kabo mbatazyi alimwi mbatanabwene.” Munzila imwi, kutondezya bwaabi ciindi comwe kulakonzya kuyambukila bantu boonse mucilawo. Sena inga tiimwayanda kukkala mubusena ibuli boobo? Masimpe, zilongezyo  zinji zilakonzya kuboola ikuti bantu banji kabapa.

Cakuluula cimwi icitondezya bubotu ibuliko cizwa ku Florida, U.S.A. Nkamu ya Bakamboni ba Jehova yakalisungula kubeleka ciindi guwo nolyakanyonyoona. Ciindi nobakali kulindila zibelesyo aŋanda mpobakali kubelekela, bakabona bwaanda bwamuntu umwi mucilawo eeco ibwakanyonyookede, mpoonya bakalisungula kububambulula. Nokwakainda ciindi, mulugwalo muntu ooyo ndwaakalembela kumaofesi mapati aa Bakamboni ba Jehova wakaamba kuti: “Ndalumba kapati. Ndajana kuti bantu aaba bali akati kabantu mbondizyi ibali kabotu kapati.” Kulumba kwakamupa kuti atume cakusanga cakwe kuti cikabelesyegwa mumulimo ngwakaita kuti mulimo mupati wa Bakamboni.

Cintu ncobakajana basayaansi mubuvwuntauzi bwabo ncakuti “kuboneka kuti kuli cintu cipati icili mubantu calo icibakulwaizya kucitila bamwi zibotu.” Buvwuntauzi bwakatondezya kuti bana, “balacita zintu izitondezya kulisungula noliba leelyo kabatanaiya kwaambaula.” Ino nkaambo nzi? Bbaibbele lilapa bwiinguzi ciindi nolyaamba kuti bantu bakalengwa “mucinkozya ca Leza,” nkokuti, balijisi bube bumwi bwa Leza.—Matalikilo 1:27.

Akati kabube bubotu mbwajisi Mulengi wesu Jehova Leza, mbwaabi. Wakatupa buumi alimwi azintu zyoonse nzyotuyandika kutegwa katukkomene. (Milimo 14:17; 17:26-28) Tulakonzya kumuzyiba kabotu Taateesu wakujulu alimwi amakanze aakwe aaluyando ngajisi kulindiswe kwiinda mukwiiya Jwi lyakwe, Bbaibbele. Bbuku eeli alimwi lilaamba kuti Leza wabikka bubambe bwakuti tukakkomane kumbele. * (1 Johane 4:9, 10) Mbwaanga Jehova Leza ngokasensa kabwaabi alimwi mwakalengwa mucinkozya cakwe, taceelede kugambya kuti kupa—notwiiya Leza—kulamugwasya alimwi akupa kuti amukkomanine.—Bahebrayo 13:16.

Sena muli bayeeyede ba Alexandra, ibaambwa kumatalikilo aacibalo eeci? Ino ncinzi cakabacitikila kumamanino? Nokuba kuti silweendonyina mubbaasi wakaamba kuti wakasowa mali aakwe, mwaalumi ngobakagwasya wakaambila beenzinyina mudolopo kwalo bbaasi nkoyakaima, mpoonya cikwelete ca $20 cakabbadelwa mpoonya-mpoonya. Kuyungizya waawo, musankwa wakacita kweelana amuzeezo ngobakapa ba Alexandra akutalika kwiiya Bbaibbele. Bakakkomana kubonana alimwi nokwakainda myezi yotatwe kumuswaangano wacooko wamumwaambo waci Chinese wa Bakamboni ba Jehova ku Peru. Kutegwa atondezye kulumba kuzintu zyoonse nzyobakamucitila ba Alexandra, musankwa ooyu wakabatamba alimwi ambobakali limwi kumuswaangano kuti baunke abusena bwakwe mpaakali kusambala zyakulya zijikidwe kale.

Kupa alimwi akugwasya bamwi kuletela lukkomano kapati. Kwaambisya kuti nomucita boobo, mugwasya bantu kuzyiba kabotu Kasensa kazipego zibotu zyoonse—Jehova Leza! (Jakobo 1:17) Sena mulikkomene abubotu buboola akaambo kakupa ikuli boobo?