Mucibalo cainda, twalanga-langa citondezyo ncaakapa Jesu. Icitondezyo eeci cipa bumboni bulibonya bwakuti Bwami bwa Leza bwakatalisyigwa kujulu, Jesu Kristo kali Mwami.

Bbaibbele lyaamba kuti ciindi Jesu naakatalika buyo kweendelezya wakamutanda Saatani amadaimona aakwe kuzwa kujulu. Milimo yabo lino baicitila buyo aano anyika, nkakaambo kaako zintu ncozyaindila buya kubija kuzwa mumwaka wa 1914.—Ciyubunuzyo 12:7, 9.

Nokuba kuti bukkale buyaabwiindila kubija anyika, Jesu kali Mwami wa Bwami bwa Leza wacita zintu zigwasya bantu nyika yoonse. Akaambo kamulimo uucitwa nyika yoonse wakuyiisya bantu Bbaibbele ngwaakaamba Jesu, bantu banji balaiya alimwi akubelesya njiisyo zyamu Bbaibbele mubuumi bwabo. (Isaya 2:2-4) Bantu banji baiya mbobakonzya kuba azilengwa zibotu zyakubeleka, kupona buumi bwamumukwasyi ibuli kabotu alimwi akuzilanga munzila yeelede zintu zyakumubili. Bantu ibali boobu bali mukugwasyigwa lino alimwi akuba bantu aabo Leza mbayanda kuti bakabe balelwa ba Bwami bwakwe.

Nokuba kuti Jesu ulalela lino kujulu, mfwulumende zyabantu azyalo ziceendelezya anyika. Nokuba boobo, Leza wakalailila Jesu kuti: “Nkooko koyaabuzunda akati kabasinkondonyoko.” (Intembauzyo 110:2) Ino-ino, Jesu uyoobanyonyoona cakumaninina basikukazya boonse alimwi akubaangulula kumapenzi bantu ibalibambilide kumvwida Leza.

Aciindi eeco, Bwami bwa Leza buyoobweza ntaamu ya:

• Kunyonyoona bukombi bwakubeja. Zikombelo izyali kuyiisya makani aakubeja kujatikizya Leza alimwi akupa kuti buumi bwabantu buyume, ziyoonyonyoonwa. Bbaibbele lyaamba bukombi bwakubeja kuti muvwuule. Kunyonyoonwa kwambubo kuyoobagambya bantu banji. —Ciyubunuzyo 17:15, 16.

• Kumanizya bweendelezi bwabantu. Bwami bwa Leza buyoobweza ntaamu yakumanizya bweendelezi boonse bwabantu.—Ciyubunuzyo 19:15, 17, 18.

• Kunyonyoona bantu babi. Ino mbuti kujatikizya baabo ibakanzide kucita zintu zibyaabi akukaka kumvwida Leza? Tubala kuti: “Pele babi bayoonyonyoonwa munyika.”—Tusimpi 2:22.

• Kugwisya Saatani alimwi amadaimona. Saatani alimwi amadaimona tabakacikonzyi ‘kweena limbi masi.’—Ciyubunuzyo 20:3, 10.

Ino eeci ciyakwaamba nzi kulibaabo ibabuzumina Bwami bwa Leza?

Jesu anoolela kali Mwami kujulu, uyoocita zintu zinji nzyatanacitide mweendelezi muntunsi uuli woonse. Uyoogwasyilizyigwa abalelinyina bali 144,000, balo ibasalwa akati kabantu. (Ciyubunuzyo 5:9, 10; 14:1, 3) Uyooba masimpe kuti kuyanda kwa Leza kwacitwa aano anyika. Ino Bwami bwa Leza buyoobacitila nzi bantu aano anyika?

• Buyoogwisya malwazi alimwi alufwu. “Taakwe muntu naba omwe uukkala munyika uuyakwaamba kuti: ‘Ndaciswa,’” alimwi “lufwu talukabi limbi.”—Isaya 33:24; Ciyubunuzyo 21:4.

• Buyooleta luumuno lwini-lwini alimwi akuliiba. “Luumuno lwabana bako luyoovwula kapati,” alimwi “bayookkala umwi aumwi munsi lyamusaansa wakwe amunsi lyamukuyu wakwe, alimwi takukabi muntu naba omwe uuyoobayoosya.”—Isaya 54:13; Mika 4:4.

• Buyoopa kuti bantu babe amilimo iikatalusya. “Basale bangu bayakwiikkomanina kapati milimo yamaanza aabo. Tabakabelekeli maliminya pe.”—Isaya 65:22, 23.

• Buyakwaamana mapenzi aajatikizya kunyonyooka kwamasena. “Inkanda alimwi anyika iinyina maanzi ziyoosekelela, acalo cibanda camucimpayuma ciyookondwa akufwulula mbuli maluba-luba aasaferone.”—Isaya 35:1.

• Buyoobayiisya bantu ncobeelede kucita kutegwa bakapone mane kukabe kutamani. “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.”—Johane 17:3.

Leza uyanda kuti mukabe aanzizyo zilongezyo eezyi. (Isaya 48:18) Cibalo citobela cilapandulula ncomukonzya kucita lino kutegwa mukazibone zintu eezyi zitaliboteli iziboola kumbele.