KULI mizeezo minji iindene-indene kujatikizya buumi alufwu. Bamwi bayeeya kuti baakufwa bayoozumanana kupona alimwi, ambweni muciimo cimwi naa kubusena kumbi. Bamwi bayeeya kuti bayoozyalululwa kutegwa bakapone mucintu cimwi. Alimwi bamwi bayeeya kuti lufwu ngamamanino aazintu zyoonse.

Mulakonzya kuba amuzeezo wanu kujatikizya makani aaya, ciya buyo ankomwakakomenena. Mbwaanga mizeezo iijatikizya lufwu iliindene-indene kapati, sena kuli nkotukonzya kujana bwiinguzi kumubuzyo ooyu uukatazya kapati?

Kwamyaanda yamyaka, basololi bazikombelo balikuyiisya njiisyo yakuti kuli cintu cizumanana kupona muntu afwa. Batobeli bazikombelo zipati—Banakristo, ba Hindu, ba Juda, ba Mozilemu, abamwi—basyoma kuti kuli cintu cizumanana kupona muntu afwa, calo icaambwa kuti naa mubili wafwa cilazumanana kupona mubusena bwamyuuya. Kulubazu lumbi, ba Bbuda basyoma kuti kwiinda mukuzyalululwa ziindi zinji, mukuya kwaciindi muntu ulakonzya kwaanguluka kumapenzi oonse. Busena oobu bukkomanisya kapati bwiitwa kuti Nirvana.

Akaambo kanjiisyo eezyi, bunji bwabantu munyika batalika kusyoma kuti lufwu lujalula mulyango wakupona kunyika iimbi. Aboobo, bantu banji babona kuti lufwu ncibeela cabuumi ciyandika kapati, alimwi lufwu kulimbabo lulibonya kuti nkuyanda kwa Leza. Pele ino ncinzi ncolyaamba Bbaibbele kujatikizya makani aaya? Twamukulwaizya kuti mubale cibalo citobela. Bwiinguzi mbomutijane bulakonzya kumugambya.