Ba Seth * bakaamba kuti: “Mebo abakaintu bangu twakalesyegwa mulimo aciindi comwe. Aboobo, kwamyaka yobilo twali kuponena buyo azintu zyakupegwa alimwi amutulimo-limo buyo tutayi koomoonga. Akaambo kaceeci bakaintu bangu ba Priscilla, bakatyompwa, alimwi mebo ndakalimvwa kubula mpindu.

“Ino twakaliyumya buti? Cakwiinduluka-induluka, ba Priscilla bakali kwaayeeya majwi aa Jesu aajanika mulugwalo lwa Matayo 6:34. Wakaamba kuti tatweelede kulibilika kujatikizya zyabuzuba butobela, mbwaanga buzuba bumwi abumwi bulijisi mapenzi aambubo. Alimwi mipailo yabo iizwa ansi aamoyo yakabagwasya kutegwa bazumanane kuliyumya. Kulubazu lwangu, lugwalo lwa Intembauzyo 55:22 lwakanduumbulizya. Mbubwenya mbuli sintembauzyo, ndakauwaala mukuli wangu uuminya mumaanza aa Jehova, aboobo wakandilanganya ncobeni. Nokuba kuti lino ndilabeleka, twazumanana kuubya-ubya buumi bwesu kweelana alulayo lwa Jesu lujanika mulugwalo lwa Matayo 6:20-22. Pele kwiinda zyoonse, eeci catupa kuswena kuli Leza alimwi akuyumya cikwati cesu.”

Ba Johathan bakaamba kuti: “Ndakayoowa ciindi makwebo aamukwasyi wesu naakawa. Akaambo kapenzi lyakubula mali, kubeleka canguzu nkondakabeleka kwamyaka iili 20 kwakaba kwabuyo. Mebo abakaintu bangu twakatalika kuzwangana kujatikizya mali. Tiitwakali kukonzya nokuba kuula zintu kubelesya credit card, akaambo kakuyoowa kuti kkampani yama credit card tiiyakali kukonzya kutuzumizya.

“Pele Jwi lya Leza amuuya wakwe zyakatugwasya kutegwa tusale kabotu. Ndakaiya kuzumina kubeleka mulimo uuli woonse, alimwi akucileka kubelesya mali muzintu zyatakali kuyandika kapati. Mbotuli Bakamboni ba Jehova, alimwi twakagwasyigwa abasyomima. Bakatuyumya kujatikizya mbotwakali kulimvwa  alimwi akutugwasya ciindi zintu nozyakali kukatazya kapati.”

Ba Raquel bakaamba kuti: “Ciindi balumi bangu nobakandisiya cakutayeeyela, cakandicisa alimwi ndakanyema kapati. Mpoonya ndakausa kapati. Pele ndakaswena kuli Leza, aboobo wakanduumbulizya. Ciindi nondakali kupaila kulinguwe buzuba abuzuba, luumuno lwa Leza lwakaukwabilila moyo wangu. Ndakalimvwa mbuli kuti wakauponya moyo wangu wakaandukide.

“Ndilalumba akaambo ka Jwi lyakwe Bbaibbele, nkaambo ndakakuzunda kunyema alimwi akubikkilila nkondakajisi. Ndakaayeeyesya majwi aamwaapostolo Paulo aajanika mulugwalo lwa Baroma 12:21 aakuti: ‘Utalilekeli kuzundwa abubi pe, pele kozumanana kuzunda bubi kwiinda mukucita zibotu.’

“Mweenzuma umwi wakandigwasya kubona mbociyandika kuluba zintu zyakainda. Wakanditondezya lugwalo lwa Mukambausi 3:6 akundaambila calubomba kuti kuli ciindi ncotweelede ‘kuciluba buyo eeco casweeka.’ Lwakali lulayo lukatazya kumvwisya, pele ndondulo ndondakali kuyandika. Lino ndijisi mbaakani zipya mubuumi.”

Ba Elizabeth bakaamba kuti: “Ciindi cikwati cako nocamana, uyandika lugwasyo. Ndakalijisi mweenzuma wakali kundigwasya buzuba abuzuba. Wakali kulila andime, wakali kunduumbulizya, aboobo wakandipa kulimvwa kuyandwa muciindi cakulimvwa kukakwa. Ndilaalusyomo lwakuti Jehova wakamubelesya kutegwa andiponye mukutyompwa kwangu.”

Ba Luis ibaambwa kale mucibalo cakumatalikilo, bakali kuciswa bulwazi bwamoyo, alimwi ziindi zyobilo bakali kuyanda kufwa. Lino bayandika kuti kabali mu oxygen kwamawoola aali 16 abuzuba. Bakaamba kuti: “Ndilapaila kuli Jehova lyoonse. Ciindi ndamana kupaila kuli Leza, ndilimvwa kuti muuya wakwe wandipa nguzu. Mupailo undipa busicamba bwakuzumanana kupona nkaambo ndilijisi lusyomo mulinguwe alimwi ndilizyi kuti ulandilanganya.”

Ba Petra ibajisi myaka iili kuma 80 bakapandulula kuti: “Ndiyanda kucita zintu zinji kapati, pele tandikonzyi. Kubona nguzu zyangu kazimana nciyumu kapati. Ndilimvwa kulema alimwi ndiponena amisamu. Kanji-kanji ndilayeeya Jesu naakali kulomba bausyi kuti penzi limwi liinde buyo kuti naa cakali kukonzyeka. Pele  Jehova wakamupa nguzu Jesu, alimwi andime ulandiyumya. Mupailo ngomusamu wangu buzuba abuzuba. Ndilimvwa kabotu ndamana kubandika a Leza.”—Matayo 26:39.

Ba Julian ibaciswa bulwazi bwansinga amilambi (multiple sclerosis) kwamyaka iili 30, abalo mbobalimvwa oobo. Bakaamba kuti: “Ndakacincanya cuuno cangu cibotu akacinga kabalema. Pele buumi bwangu lino bulaampindu nkaambo ndibubelesya kugwasya bamwi. Kupa kulakonzya kucesya-cesya kupenga, alimwi Jehova utusyomezya kutuyumya muziindi zikatazya. Mbubwenya mbuli mwaapostolo Paulo, ndilakonzya kwaamba kuti: ‘Muzintu zyoonse ndilijisi nguzu kwiinda muli yooyo uundipa nguzu.’”—Bafilipi 4:13.

Ba Antonio bakaamba kuti: “Ciindi bataata nobakafwa muntenda yamumugwagwa, kumatalikilo tiindakasyomede. Cakali kulibonya kuti tiicakali kweelela nkaambo bakali buyo basimweenda nzila. Pele kunyina ncondakali kukonzya kucita. Bakali kufwumba bulamfwu kwamazuba osanwe kabatanafwa. Zimwi ziindi ndakali kulijata kulila munsi-munsi abamaama, pele ndakali kulila ciindi ndaba endikke. Lyoonse ndakali kulibuzya kuti, ‘Nkaambo nzi? Nkaambo nzi?’

“Mumazuba aayo aamapenzi, ndakazumanana kulomba Jehova kuti andigwasye kweendelezya mbondakali kulimvwa alimwi akuti andipe luumuno. Alimwi aasyoonto-syoonto ndakalikuyaabulimvwa kabotu. Ndakayeeya kuti Bbaibbele lyaamba kuti muntu uuli woonse ulasikilwa ‘zintu zitalangilwi.’ Mbwaanga Leza takonzyi kubeja, ndilisinizyide kuti ndiyoobabona bataata alimwi baakubuka.”—Mukambausi 9:11; Johane 11:25; Tito 1:2.

Ba Robert ibaambwa mucibalo cili kumatalikilo, bajisi mizeezo mbubwenya mbuli yeeyi. Bakaamba kuti: “Mebo abakaintu bangu twalubona luumuno lwamumizeezo lwaambidwe mulugwalo lwa Bafilipi 4:6, 7. Lwakaboola kulindiswe kwiinda mumipailo yesu kuli Jehova. Oolu luumuno lwamumizeezo lwakatupa kwaambila basimubweza twaambo kujatikizya bulangizi bwesu bwabubuke. Nokuba kuti mwaneesu wakafwa ciindi ndeke noyakawa, tuciziyeeya ziindi zimwi zikkomanisya notwakali kuba antoomwe. Tulasolekesya kuzibikkila maano.

“Ciindi Bakambonima nobakatubona katupandulula lusyomo lwesu cakukkazika moyo acipekupeku, twakabaambila cakusinizya kuti twakalumba kapati akaambo kamipailo yakali kupaililwa ndiswe. Ndilisinizyide kuti Jehova wakali kutugwasya kwiinda mutugwalo twabo tunji tuumbulizya.”

Mbubwenya mbuli zitondezyo zyainda mbozitondezya, Leza ulakonzya kupa luumbulizyo kubantu bayaanya mapenzi aaindene-indene alimwi abuyumuyumu. Ino mbuti kujatikizya ndinywe? Tacikwe makani amapenzi ngomukonzya kuyaanya mubuumi, kuli luumbulizyo lukonzya kumugwasya muziindi zikatazya. * Aboobo inga mwamulomba Jehova kuti amugwasye. Ngu “Leza siluumbulizyo loonse.”—2 Bakorinto 1:3.