Ba Winston, amutwaambile kujatikizya mbomwakamuyandaula Leza.

Ndakakomenena kufaamu iili kulamfwu kapati ku Queensland, mu Australia. Mukwasyi wesu tiiwakali kukomba. Akaambo kakuti twakali kubusena ikwakanyina bantu banji, mbasyoonto bantu mbondakazyi kunze buyo lyabana mukwasyi. Nondakajisi myaka yakuzyalwa iili 12, ndakatalika kuyandaula Leza. Ndakali kupaila kulinguwe, kulomba kuti ndizyibe kasimpe kajatikizya nguwe. Mukuya kwaciindi, ndakazwa kufaamu akuyoojana mulimo ku South Australia, mudolopo lya Adelaide. Kandijisi myaka yakuzyalwa iili 21, ndakazyibana aba Pamela nondakaunkide kuyakulyookezya ku Sydney, alimwi bakandaambila kujatikizya nkamu yacikombelo cabana Israyeli ku Britain, nkamu eeyo yakali kulitaminina kuti bantu baku Britain bakazwa kumisyobo ya Israyeli iisweekede. Kujatikizya misyobo eeyo, nkamu yakaamba kuti, misyobo iili kkumi yakunyika iyakaba mubuzike mumwaanda wamyaka walusele B.C.E. Aboobo ciindi nondakapiluka ku Adelaide, ndakaatalisya makani aaya kumubelesima iwakali kwiiya Bbaibbele a Bakamboni ba Jehova. Twakabandika anguwe mawoola masyoonto buyo. Twakabandika zintu zinji kujatikizya nzyobasyoma Bakamboni. Nowakamana mubandi wesu ndakabona kuti mupailo wangu wakubwana wakaingulwa. Ndakali kwiiya kasimpe kujatikizya Mulengi alimwi a Bwami bwakwe! Ndakaijana ‘ngale iiyandika kapati.’—Mt. 13:45, 46.

Ba Pamela, andinywe mwakatalika kuyandaula ngale eeyo kamucili bana. Ino mwakaijana buti?

Ndakakomenena mumukwasyi iwakali kubikkila maano kubukombi ku New South Wales, mudolopo lya Coffs Harbour. Bazyali bangu alimwi abamakaapa bakali kusyoma njiisyo zyankamu yabana Israyeli yaku Britain. Musyoonto wangu musankwa,  mupati wangu musimbi, alimwi andime, antoomwe abeenima banji, twakakomezyegwa katusyoma kuti Leza ulabayanda kapati bantu bazwa ku Britain. Nokuba boobo, tiindakali kuzisyoma njiisyo eezyo alimwi tiindakali kulimvwa kuba acilongwe a Leza. Nondakakkwanya myaka yakuzyalwa iili 14, ndakaunka kuzikombelo ziindene-indene, kubikkilizya acikombelo ca Anglican, Baptist alimwi aca Sabata. Pele kunyina nobakandigwasya kuzyiba Leza.

Mukuya kwaciindi, mukwasyi wangu wakalongela ku Sydney, kwalo nkondakazyibana aba Winston, ibakasikide kuswaya. Akaambo kakuti twakali kubandika makani aabukombi aba Winston, mukuya kwaciindi bakatalika kwiiya Bbaibbele a Bakamboni ba Jehova. Kuzwa waawo, magwalo ngobakali kundilembela akazwide buyo magwalo aamu Bbaibbele! Kwaamba masimpe, kumatalikilo ndakalilibilikide, alimwi akunyema buya. Pele aasyoonto-syoonto ndakazyiba kuti nzyobakali kundilembela kakali kasimpe kajatikizya Leza.

Mu 1962, ndakalongela ku Adelaide kutegwa kandili afwaafwi aba Winston. Bakapanga bubambe bwakuti mebo kandikkala abanabukwetene Bakamboni, ba Thomas aba Janice Sloman, ibakali bamisyinali ku Papua New Guinea. Bakandifwida luzyalo lulibedelede; aciindi eeco ndakajisi buyo myaka yakuzyalwa iili 18, alimwi bakandigwasya kuzyiba zinji kujatikizya Jehova. Aboobo andime ndakatalika kwiiya Jwi lya Leza, cakuti muciindi buyo cisyoonto ndakazyiba kuti ndakajana kasimpe. Notwakakwatana aba Winston, mpoonya-mpoonya twakatalika kupona buumi bulaampindu ibwakubelekela Jehova, bwalo, nokuba kuti kwakali buyumuyumu, ibwakayungizya lukkomano lwesu kujatikizya ngale eeyi mbotu njotwakajana.

Ba Winston, amutwaambile kujatikizya buumi bwanu bwakumatalikilo mumulimo wa Jehova.

Tiikwakainda ciindi cilamfwu kuzwa notwakakwatana aba Pamela, Jehova wakatalika ‘kutujalwida milyango mipati’ yamilimo iiyungizyidwe. (1Kor. 16:9) Iwakatujalwida mulyango wakusaanguna Mukwesu Jack Porter, iwakali kubeleka kali mulangizi wabbazu kumbungano yesu iisyoonto. (Lino tubeleka limwi amukwesu ooyu mu Kkomiti Yamutabi waku Australasia.) Ba Jack alimwi abakaintu babo, ba Roslyn, bakatukulwaizya kutalika bupainiya bwaciindi coonse, mulimo ngotwakabeleka calukkomano kwamyaka yosanwe. Nondakajisi myaka yakuzyalwa iili 29, mebo aba Pamela twakatumwa kuyoobeleka mulimo wamu bbazu kunsumbu zyamu South Pacific, yalo iyakatalika kulanganizyigwa amutabi wa Fiji. Nsumbu eezyi zibikkilizya American Samoa, Samoa, Kiribati, Nauru, Niue, Tokelau, Tonga, Tuvalu, alimwi a Vanuatu.

Mazuba aayo, bantu ibakali kukkala munsumbu zimwi izyakali kulamfwu kapati bakali kubayoowa Bakamboni ba Jehova, aboobo twakeelede kucenjela alimwi akupakamana. (Mt. 10:16) Mbungano zyakali zisyoonto, alimwi zimwi tiizyakali kucikonzya kutujanina aakoona. Aboobo nokuba kuti bantu bakubusena oobo bakali kutuyoowa, twakali kubalomba kuti tukkale ambabo, alimwi bakali kutufwida luzyalo.

Ba Winston, mulaubikkila maano kapati alimwi akuuyanda mulimo wakusandulula. Ino ncinzi cakamupa kulimvwa boobo?

Ciindi notwakatalika kubelekela kunsumbu yakucisi ca Tonga, bakwesu bakajisi buyo matulakiti alimwi amabbuku masyoonto aamuci Tongan, imwaambo waci Polynesia. Mubukambausi, bakali kubelesya bbuku lyakwiiya lyamu Chikuwa lyakuti The Truth That Leads to Eternal Life. Aboobo munsondo zyone zyacikolo cabaalu, baalu botatwe bakubusena ooko bakazumina kulisandulula bbuku eeli muci Tongan nokuba kuti tiibakauzyi kabotu mwaambo waci Chikuwa. Ba Pamela bakalilemba bbuku eeli akkompyuta, mpoonya twakalituma kuti likasimbwe kumutabi waku United States. Mulimo woonse wakatola nsondo izili lusele. Nokuba kuti busanduluzi tiibwakali kabotu kapati, bbuku eeli lyakagwasya bantu banji ibakali kwaambaula mwaambo waci Tongan kwiiya kasimpe. Mebo alimwi aba Pamela tatuli basanduluzi, pele eeci icakacitika cakatupa kuubikkila maano alimwi akuuyanda mulimo ooyu.

Ba Pamela, mbuti buumi munsumbu mbobwakaindene abuumi bwaku Australia?

Bwakaliindene kapati! Mumasena aamwi, kwakali mansenya manji, kupya kapati alimwi amudumu, mbeba, malwazi, alimwi zimwi ziindi akubula  cakulya cikkwene. Kulubazu lumwi, kumangolezya, cakali kuumbulizya kulanga lwaanje mukaanda kesu ikakali kwiitwa kuti fale, izina lyamwaambo waci Samoa ilyaamba kaanda kaku Polynesia ikavwumbidwe abwizu alimwi ikatajisi bwaanda. Zimwi ziindi masiku mwezi wakali kubala kapati cakuti twakali kucikonzya kubona zisamu zyamakunka. Ziindi eezyo izyakali kukkomanisya zyakali kutupa kuzinzibala kuyeeya alimwi akupaila, calo icakali kutugwasya kuyeeya zintu zibotu muciindi cakuyeeya zintu zibi.

Twakali kubayanda bana ibakali kutukkomanisya alimwi ibakali kutulanga kapati tobakuwa. Notwakaswaya ku Niue, kana kasankwa kamwi kakajata maanza aaba Winston aajisi boya akwaamba kuti, “Alibonya mbuli kuti mapepe, ndaakkomanina.” Cakutadooneka, kunyina naakaabwene kale maanza aajisi boya alimwi tanaakazyi mbwaaitwa!

Twakali kuusa kubona mbobakali bacete bantu alimwi ambobwakali kubayumina bukkale. Bakalijisi masena mabotu pele tiibakajisi busilisi buli kabotu alimwi bakanyina maanzi manji aakunywa. Nokuba boobo, bakwesu tiibakali kulibonya kulibilika. Bakalizyibide abukkale oobu. Bakalikkomene abukkale oobu akaambo kakuti bakali amukwasyi wabo, busena bwakukombela, alimwi acoolwe cakutembaula Jehova. Cikozyanyo cabo cakatugwasya kubikkila maano kuzintu ziyandika kapati alimwi akuubya-ubya buumi bwesu.

Ba Pamela, zimwi ziindi mwakali kulitekela maanzi alimwi akulijikila zyakulya mubukkale bwiindene kapati, ino mwakali kucikonzya buti kucita boobo?

Ndilabalumba bataata akaambo kakuti bakandiyiisya. Bakandiyiisya zintu zinji kapati alimwi izigwasya, mbuli kukunka mulilo wankuni akujika amulilo wankuni alimwi akupona kamujisi buyo zintu zyakumubili zisyoonto kapati. Notwakaswaya ku Kiribati, twakali kukkala mukaanda kaniini ikavwumbidwe bwizu, ikakasyinguludwe abulongo ansi, akuyakililwa amatete. Kutegwa ndijike cakulya, ndakali kusya cilindi akukunka mulilo kubelesya makwa aama coconut. Kutegwa nditeke maanzi, ndakali kwiima mumulongo abamakaintu bakubusena oobo kumugoti. Kutegwa bateke maanzi, bakali kubelesya kasamu kalampa mamita obilo ikaangidwe ntaambo kumamanino, ikali mbuli kuti nkasamu kakulobya. Pele muciindi cakubikka kalobyo kumamanino, bakali kwaanga kagumbuli. Twakali kwiinzyanya, aumwi casika ciindi cakwe wakali kukafusa kabotu-kabotu kagumbuli mumaanzi. Kagumbuli kakali kubbila azula maanzi. Ndakali kuyeeya kuti tacikatazyi, kusikila nocakasika ciindi cangu. Ndakakafusa kagumbuli ziindi zinji, pele kakali kuuma amaanzi akwiile kwiibauka! Nobakamana kundiseka boonse, umwi mukaintu wakandigwasya. Lyoonse bakali kutufwida luzyalo akutugwasya.

Nyoonse mwakaukkomanina mulimo munsumbu. Sena inga mwatwaambila zintu zimwi izyakamucitikila?

Ba Winston: Cakatutolela ciindi kwiiya zilengwa zimwi. Mucikozyanyo, ciindi bakwesu nobakali kutupa cakulya, kanji-kanji bakali kutupa zyakulya zyoonse nzyobakajisi buzuba oobo. Kumatalikilo, tiitwakazyi kuti twakeelede kubasiila. Aboobo twakali kuzilya zyoonse nzyobakali kutupa! Pele notwakazyiba kuti mbocibede oobo, twakatalika kubasiila zyakulya. Nokuba kuti twakali kulubizya, bakwesu bakali kutumvwisya. Alimwi bakali kukkomana kutubona kwainda myezi iili cisambomwe naa kwiinda waawo ciindi notwakali kubaswaya mumulimo wesu wamubbazu. Aciindi eeco, bakwesu bakubusena ooku kunyina nobakabwene kale Bakamboni bamwi ibatakali kuzulilwa mumbungano yabo kunze buyo lyaba Winston alimwi aba Pamela.

Kuswaya kwesu kwakali kupa bumboni kubantu bakubusena oobo. Bantu banji bakubusena oobu bakali kuyeeya kuti bukombi bwabakwesu aaba bwakali bwakulipangila buyo. Pele ciindi ba Winston alimwi aba Pamela nobakabaswaya Bakamboni bakunsumbu eeyi, bantu bakasyoma kuti eeyi yakali mbunga yabukombi yakasimpe, iibikkila maano kuli umwi aumwi alimwi bakakkomana kapati.

Ba Pamela: Cintu cimwi nconditakalubi ku Kiribati ncakuti, kwakali mbungano iyakajisi buyo bakwesu alimwi abacizyi basyoonto. Ba Itinikai Matera, ibakali baalu balikke, bakasoleka kusikila  mpobagolela kutulanganya. Buzuba bumwi bakasika kabanyamwide mutaanga iwakajisi iji lyomwe. Bakaamba kuti, “Ndamuletela.” Aciindi eeco iji lyankuku lwakali lwija lwamubwa. Kusoleka nkobakacita, nokuceya, kwakatukulwaizya kapati.

Nokwakainda myaka, ba Pamela, mwakafwidwa mwana kwiinda mukusowa da. Ino ncinzi cakamugwasya kuliyumya?

Ndakamita mu 1973 ciindi notwakali ku South Pacific. Twakayeeya kujokela ku Australia, mpoonya da lyakazwa nokwakainda buyo myezi yone. Mebo aba Winston twakausa kapati. Mukuya kwaciindi moyo wakali kuyaabuleka kucisa, pele wakacilekela limwi ciindi notwakatambula Ngazi Yamulindizi ya April 15, 2009. Acibeela ca “Mibuzyo Yabasikubala” kwakali mubuzyo wakuti: “Ikuti mwana wafwa kacili mwida, sena ujisi bulangizi bwabubuke?” Cibalo cakatupa bulangizi bwakuti makani aaya ayeeme aali Jehova, walo lyoonse uucita ziluzi. Uyookumana kucisa koonse nkotujisi munyika eeyi mbyaabi ciindi aakulailila Mwana wakwe kuti ‘anyonyoone milimo ya Saatani.’ (1Joh. 3:8) Alimwi cibalo cakatugwasya kuyungizya lukkomano lwesu akaambo ‘kangale’ njotujisi tobantu ba Jehova! Ino notwali kuli, ikuti notwatalikazyi kasimpe kajatikizya bulangizi bwakumbele?

Nolyakazwa da, twakatalika alimwi mulimo waciindi coonse. Twakabeleka myezi iili mbwiibede kumutabi waku Australia mpoonya akujokela alimwi mumulimo wamubbazu. Mu 1981, notwakabeleka myaka yone muminzi yaku New South Wales alimwi aku Sydney, twakatumwa kuyoobelekela kumutabi waku Australia, kweelana amboyakali kwiitwa ciindi eeco, alimwi nkotucibede asunu.

Ba Winston, sena bukkale bwakunsumbu zyaku South Pacific bulamugwasya mumulimo wanu mbomuli mu Kkomiti ya Mutabi ku Australasia?

Inzya, munzila zinji. Kumatalikilo, mutabi waku Australia wakalombwa kulanganya mutabi waku American Samoa aku Samoa. Mpoonya, mutabi waku New Zealand wakatalika kweendelezyegwa amutabi waku Australia, kumbele iwakatalika kwiitwa kuti mutabi wa Australasia. Lino, cilawo camutabi waku Australasia cilabikkilizya a Australia, American Samoa alimwi a Samoa, Cook Islands, New Zealand, Niue, Timor-Leste, Tokelau, alimwi a Tonga, bunji bwamasena aaya ndakalaaswaide kale nondakali kwiiminina mutabi. Kubeleka abakwesu alimwi abacizyi basyomeka aabo munsumbu kwandigwasya kapati mbwaanga lino ndilabalanganya kandili kuofesi yamutabi.

Majwi aamamanino ngakuti, mebo alimwi aba Pamela twakazyiba kuti tabali buyo bapati balikke ibayandaula Leza. Eeci twakacibona kwiinda muzintu izyakatucitikila swebo. Abalo bana basyoonto balaiyanda ‘ngale iiyandika kapati,’ nokuba kuti banamukwasyi bamwi inga kabataiyandi. (2Bam. 5:2, 3; 2Mak. 34:1-3) Kwaamba masimpe, Jehova ngu Leza siluyando uuyanda kuti bantu boonse, bana alimwi abapati, bakabe abuumi butamani!

Ciindi mebo aba Pamela notwakatalika kuyandaula Leza myaka iili 50 yainda, kunyina notwakazyi icakali kuyoocitika akaambo kakucita boobo. Kasimpe ka Bwami takali kakudooneka, ningale iidula kapati! Tulikanzide kukakatila kungale eeyi iiyandika kapati!