1, 2. (a) Ino ‘cipego ca Leza citabbadelwi citakonzyi kupandululwa’ cibikkilizya nzi? (b) Mibuzyo nzi njotutiilange-lange mucibalo eeci?

JEHOVA wakatupa cipego caluyando icipati kwiinda ciindi naakatuma Jesu, Mwanaakwe uuyandwa kapati, kuboola anyika! (Johane 3:16; 1 Johane 4:9, 10) Mwaapostolo Paulo wakapandulula cipego eeci kuti ‘ncipego citabbadelwi citakonzyi kupandululwa.’ (2 Bakorinto 9:15) Nkaambo nzi Paulo ncaakabelesyela mabala aaya?

² Paulo wakalizyi kuti cituuzyo ca Jesu cipa cisyomezyo cakuti zisyomezyo zya Leza zyoonse zitaliboteli ziyoozuzikizyigwa. (Amubale 2 Bakorinto 1:20.) Eeci caamba kuti ‘cipego ca Leza citabbadelwi citakonzyi kupandululwa’ cibikkilizya cituuzyo ca Jesu, bubotu boonse alimwi aluyando lutamani eezyo Jehova nzyatutondezya. Cipego citaliboteli cili boobu tacikonzyeki pe kucipandulula munzila njotukonzya kumvwisya cakumaninina. Ino cipego eeci cilibedelede ceelede kutupa kulimvwa buti? Alimwi mbuti cipego eeci mboceelede kutukulwaizya ciindi notulibambila  Ciibalusyo calufwu lwa Kristo iciyoocitwa muli Bwatatu, mu March 23, 2016?

3, 4. (a) Ino mulimvwa buti ciindi muntu umwi naamupa cipego? (b) Mbuti cipego cilibedelede mbocikonzya kubucinca buumi bwanu?

³ Tulakkomana ciindi muntu umwi naatupa cipego. Pele zipego zimwi zitondezya zintu ziyandika kapati naa zilibedelede cakuti zilakonzya kubucinca buumi bwesu. Mucikozyanyo, amweezyeezye kuti mwacita mulandu mupati. Mpoonya cisubulo camulandu ooyo ndufwu. Kumane muntu umwi ngomutazyi walyaaba kupegwa cisubulo mubusena bwanu. Ulilibambilide kumufwida! Ino cipego cilibedelede cili boobo inga camupa kulimvwa buti?

⁴ Cipego eeco caluyando alimwi icilibedelede cilakonzya kumupa kucinca mubuumi bwanu. Cakutadooneka, alimwi mulakonzya kukulwaizyigwa kuzumanana kuba baabi, kuyanda bantu bambi alimwi akubalekelela boonse aabo ibakamucitila lunya. Mubuumi bwanu boonse, mulakonzya kutondezya kuti mulalumba kapati akaambo kacituuzyo icakapegwa.

5. Mbuti cipego ca Leza cacinunuzyo mbocili cipati ikwiinda cipego cimbi cili coonse?

⁵ Cipego ca Leza cacinunuzyo cilainda kapati aacipego icaambwa mucikozyanyo. (1 Petro 3:18) Amuyeeye kujatikizya kaambo aaka: Toonse twakakona cibi kuzwa kuli Adamu, alimwi cisubulo cacibi ndufwu. (Baroma 5:12) Luyando ndolwakapa Jehova kutuma Jesu aanyika kuti afwide bantu boonse, inzya kuti “afwide muntu uuli woonse.” (Bahebrayo 2:9) Pele cituuzyo ca Jesu ciyoogwasya munzila zinji kwiinda waawo! Ciyoolunyonyoona lufwu kukabe kutamani. (Isaya 25:7, 8; 1 Bakorinto 15:22, 26) Boonse ibasyoma Jesu bayoopona muluumuno akukkomana kukabe kutamani, kabali bami antoomwe a Kristo kujulu naa kabali balelwa ba Bwami bwa Leza anyika. (Baroma 6:23; Ciyubunuzyo 5:9, 10) Ino nzilongezyo nzi zimwi zibikkilizyidwe mucipego ca Jehova?

6. (a) Nzilongezyo nzi zijatikizya cipego ca Jehova nzyomulangila? (b) Amwaambe zintu zyotatwe cipego ca Leza ncociyootukulwaizya kucita?

⁶ Mbocili cibeela cacipego ca Leza, nyika iyooba paradaiso, baciswa bayooponesyegwa, alimwi bafwide bayoobusyigwa. (Isaya 33:24; 35:5, 6; Johane 5:28, 29) Tulamuyanda Jehova alimwi a Mwanaakwe uuyandwa kapati akaambo kakutupa ‘cipego citabbadelwi citakonzyi kupandululwa’ eeci. Ino cipego eeci ciyootulwaizya kucita nzi? Ciyootukulwaizya (1) kumwiiya Kristo Jesu kwiinda mukutobelesya mikondo yakwe, (2) kuyanda bakwesu, alimwi (3) akulekelela bantu kuzwa ansi aamoyo.

7, 8. Mbuti mbotweelede kulimvwa kujatikizya luyando lwa Kristo, alimwi ncinzi ncolweelede kutukulwaizya kucita?

⁷ Cakusaanguna, tweelede kukulwaizyigwa kubelesya buumi bwesu kulemeka Jesu. Mwaapostolo Paulo wakati: “Luyando ndwajisi Kristo lulatukulwaizya.” (Amubale 2 Bakorinto 5:14, 15.) Paulo wakalizyi kuti, ikuti naa twalutambula luyando lupati ndwajisi Jesu, luyootukulwaizya kumuyanda akumulemeka Jesu. Inzya, ciindi notumvwisya ncaakatucitila Jehova, luyando lwakwe luyootukulwaizya kupona munzila iitondezya kuti tulamulemeka Jesu. Mbuti mbotucita oobo?

⁸ Luyando ndotujisi kuli Jehova luyootukulwaizya kwiiya cikozyanyo ca Jesu, akwiitobelesya mikondo yakwe. (1 Petro 2:21; 1 Johane 2:6) Ciindi notumvwida Leza a Kristo, tusinizya kuti tulabayanda. Jesu wakati: “Kufwumbwa ooyo uutambula milawo yangu akwiitobela nguundiyanda. Alimwi kufwumbwa ooyo uundiyanda uyooyandwa a Taata, eelyo ambebo  ndiyoomuyanda akulitondezya caantangalala kulinguwe.”—Johane 14:21; 1 Johane 5:3.

9. Ino mbuyumuyumu nzi mbotujisi?

⁹ Mumyezi ya Ciibalusyo, cilagwasya kuzinzibala kuyeeya mbotububelesya buumi bwesu. Aboobo amulibuzye kuti: ‘Muumbazu nzi mondili mukumwiiya kale Jesu? Muumbazu nzi mbondiyandika kubambulula?’ Cilayandika kapati kulibuzya mibuzyo eeyi nkaambo bantu munyika bayanda kuti katupona mbobapona. (Baroma 12:2) Ikuti naa tiitwacenjela, tulakonzya kulimvwa kuti tulasungilizyigwa kwiiya bamayi bamunyika eeyi, basimpuwo, alimwi abaabo balaampuwo muzisobano. (Bakolose 2:8; 1 Johane 2:15-17) Mbuti mbotukonzya kukuzunda kuyungwa ooko?

10. Mibuzyo nzi njotweelede kulibuzya mumyezi ya Ciibalusyo, alimwi ncinzi mibuzyo eeyo ncoikonzya kutukulwaizya kucita? (Amubone cifwanikiso icili kumatalikilo aacibalo.)

¹⁰ Cilayandika kapati kuba aciindi mumyezi ya Ciibalusyo cakulanga-langa zyakusama zyesu, mafilimu ngotweebelela, nyimbo nzyotuswiilila, alimwi azintu zili mumakkompyuta eesu, mumafooni, naa mumatabbuleti. Amulibuzye kuti: ‘Ikuti Jesu naaliko aawa akubona nzyondisamide, sena ndilakonzya kulisenda?’ (Amubale 1 Timoteyo 2:9, 10.) ‘Sena zisani zyangu zilakonzya kutondezya kuti ndili sikutobela Kristo? Sena Jesu ulakonzya kubotelwa kweebelela mafilimu ngondeebelela? Sena ulakonzya kuswiilila kunyimbo nzyondiswiilila? Ikuti naa Jesu walomba kuti abelesye fooni yangu naa tabbuleti, sena ndilakonzya kulisenda azintu nzyakonzya kubona? Sena cilakonzya kundiyumina kumupandulwida Jesu ikaambo ncozindikkomanisya zisobano zyaavidiyo nzyondisobana?’ Luyando ndotujisi kuli Jehova lweelede kutukulwaizya kuzisowa zintu zyoonse ziteeleli ku Munakristo, tacikwe makani anzyotukonzya kusweekelwa akaambo kakucita boobo. (Milimo 19:19, 20) Ciindi nitwakaaba buumi bwesu kuli Jehova, twakasyomezya kubelesya buumi bwesu kulemeka Kristo. Aboobo tatweelede kuba acintu cili coonse icikonzya kupa kuti cituyumine kwiiya Jesu.—Matayo 5:29, 30; Bafilipi 4:8.

11. (a) Mbuti luyando lwesu kuli Jehova a Jesu mbolutukulwaizya mumulimo wakukambauka? (b) Mbuti luyando lwesu mbolukonzya kutukulwaizya kugwasya bamwi mumbungano?

¹¹ Luyando ndotujisi kuli Jesu lutukulwaizya kukambauka alimwi akuyiisya cabusungu. (Matayo 28:19, 20; Luka 4:43) Mumyezi ya Ciibalusyo, sena inga mwabambulula bukkale bwanu kutegwa mucite bupainiya bwakugwasyilizya akubeleka mawoola aali 30 naa 50 mumulimo wakukambauka? Mwaalumi umwi uujisi myaka iili 84 iwakafwidwa mukaintu wakali kuyeeya kuti takonzyi kubeleka kali mupainiya akaambo kaciimo cakwe alimwi akuciswa-ciswa. Pele bapainiya ibakali mubusena mwaakali kukkala bakali kuyanda kumugwasya. Bakabikka bubambe bwakuti kabamunyamuna mumootokala alimwi akusala cilawo ceelede mwaakali kukonzya kunoobelekela. Akaambo kabubambe oobu, mukwesu ooyu wakaizuzikizya mbaakani yakwe yamawoola aali 30. Sena mulakonzya kugwasya muntu umwi mumbungano yanu kucita bupainiya bwakugwasyilizya mu March naa mu April? Masimpe kuti tabali boonse ibakonzya kucita bupainiya, pele tulakonzya kubelesya ciindi cesu alimwi anguzu kuyungizya mulimo wesu kuli Jehova. Ikuti twacita oobo, mbubwenya mbuli Paulo, tuyootondezya kuti tulakulwaizyigwa aluyando lwa Jesu. Ncinzi acimbi luyando lwa Leza ncoluyootukulwaizya kucita?

12. Ino luyando lwa Leza lutukulwaizya kucita nzi?

¹² Cabili, luyando lwa Leza lweelede  kutukulwaizya kuyanda bakwesu. Mwaapostolo Johane wakalemba kuti: “Nobayandwa, ikuti naa oobu mbwaakatuyanda Leza, nkokuti andiswe tweelede kuyandana.” (1 Johane 4:7-11) Aboobo ikuti naa twalutambula luyando lwa Leza, tweelede kubayanda bakwesu. (1 Johane 3:16) Mbuti mbotukonzya kutondezya kuti tulabayanda?

13. Ncikozyanyo nzi ncaakapa Jesu cakuyanda bantu?

¹³ Cikozyanyo ca Jesu citondezya mbotweelede kubayanda bantu. Ciindi naakali anyika, wakagwasya bantu, ikwaambisya babombe myoyo. Wakaponya babombe myoyo, balema, boofwu, basinkematwi, abasyaataambi. (Matayo 11:4, 5) Ikwiindana abasololi babukombi, Jesu wakali kukkomana kuyiisya bantu ibakali kuyanda kwiiya kujatikizya Leza. (John 7:49) Wakali kubayanda bantu babombe myoyo alimwi wakabeleka canguzu kutegwa abagwasye.—Matayo 20:28.

14. Ncinzi ncomukonzya kucita kutegwa mutondezye luyando ku Banakristonyoko?

¹⁴ Myezi ya Ciibalusyo alimwi nciindi cibotu cakuyeeya mbomukonzya kugwasya bakwesu abacizyi ibali mumbungano yanu, ikwaambisya ibacembeede. Sena mulakonzya kubaswaya ibayandwa aaba? Sena mulakonzya kubatolela cakulya, kubagwasya milimo yaaŋanda, kubatamba kweenda limwi kumiswaangano, naa kubalomba kubeleka limwi mumulimo wamumuunda? (Amubale Luka 14:12-14.) Kuyanda Leza akumukulwaizye kutondezya luyando ku Banakristonyoko!

15. Nkaambo nzi kamwi ikayandika kubikkila maano?

¹⁵ Catatu, luyando lwa Jehova lutukulwaizya kubalekelela bakwesu abacizyi. Toonse twakakona cibi kuzwa kuli Adamu, aboobo kunyina uukonzya kwaamba kuti, “Tandiyandiki cinunuzyo.” Naba mubelesi wa Leza uusyomeka kapati uyandika cipego cacinunuzyo. Umwi aumwi wesu wakalekelelwa cikwelete cipati kapati! Nkaambo nzi ncociyandika kapati kukabikkila maano kaambo aaka? Bwiinguzi tulabujana mucikozyanyo cimwi ca Jesu.

16, 17. (a) Ncinzi ncotweelede kwiiya kucikozyanyo ca Jesu camwami alimwi abazike? (b) Mbomwazinzibala kuyeeya cikozyanyo ca Jesu, ncinzi ncomukanzide kucita?

¹⁶ Jesu wakapa cikozyanyo camwami iwakalekelela muzike wakwe cikwelete cipati icisika kumadinari aali 60,000,000. Pele kwiinde ciindi, muzike ooyo tanaakamulekelela muzikenyina cikwelete cisyoonto buyo camadinari aali 100. Luse lwamwami lwakeelede kumukulwaizya muzike ooyu kulekelela muzikenyina. Mwami wakanyema kapati ciindi naakamvwa kuti muzike wakwe tanaakamulekelela muzikenyina iwakajisi cikwelete cisyoonto boobo. Wakati: “Omuzike mubi, ndakakulekelela cikwelete coonse eeciya nookandikombelezya. Sena ayebo tonooyelede kumufwida luse muzikenyoko mbubonya mbundakakufwida luse?” (Matayo 18:23-35; bupanduluzi buyungizyidwe) Mbubwenya mbuli mwami ooyo, Jehova wakatulekelela cikwelete cipati kapati. Ino luyando  lwa Jehova aluse lwakwe zyeelede kutukulwaizya kucita nzi?

¹⁷ Notulibambila Ciibalusyo, tulakonzya kulibuzya kuti: ‘Sena kuli mukwesu naa mucizyi iwakandinyemya? Sena cilandikatazya kumulekelela?’ Ikuti kacili boobo, eeci nceciindi cibotu cakwiiya Jehova, ooyo ‘uulibambilide kulekelela.’ (Nehemiya 9:17; Intembauzyo 86:5) Ikuti naa katulumba akaambo kaluse lupati lwa Jehova, tuyoobafwida luse bantu alimwi akubalekelela kuzwa ansi aamoyo. Ikuti naa katutabayandi alimwi katutabalekeleli bakwesu, tatukonzyi kulangila kuti Jehova uyootuyanda alimwi akutulekelela. (Matayo 6:14, 15) Ciindi notubalekelela bambi, tacaambi kuti tiibakatunyemya pe, pele ciyootugwasya kuba abuumi bukkomanisya kumbele.

18. Mbuti luyando lwa Leza mbolwakagwasya mucizyi umwi kweengelela mucizyi umbi akaambo kakutalondoka kwakwe?

¹⁸ Cilakonzya kuyuma kubeengelela bakwesu abacizyi akaambo kakutalondoka kwabo. (Amubale Baefeso 4:32; Bakolose 3:13, 14.) Mucizyi umwi iwakacita boobo ngu Lily. ^[1] (Amubone bupanduluzi buyungizyidwe kumamanino aacibalo.) Ba Lily bakagwasya ba Carol bamukamufwu. Mucikozyanyo, bakali kubelesya mootokala wabo kutola ba Carol kufwumbwa nkobali kuyanda kuunka, bakali kubagwasya kuula zintu, alimwi akubacitila zintu zimwi zinji. Nokuba kuti ba Lily bakali kucita zintu eezyo zyoonse, ba Carol lyoonse bakali kutongooka, alimwi zimwi ziindi tiicakali cuuba-uba kubagwasya. Pele ba Lily bakabikkila buyo maano kubube bubotu bwaba Carol alimwi bakabagwasya kwamyaka iili mbwiibede kusikila ciindi ba Carol nobakaciswa kapati akufwa. Nokuba kuti cakali ciyumu kuli ba Lily kugwasya ba Carol, ba Lily bakati: “Ndilangila kuyoobona ba Carol baakubusyigwa kumbele. Ndiyanda kuti ndikabazyibe mbobayooba baakulondoka.” Cilisalede kuti, luyando lwa Leza lulakonzya kutukulwaizya kubalekelela bakwesu abacizyi alimwi akulangila kumbele kuciindi kutalondoka kwabantu nokuyakumana kukabe kutamani.

19. Mbuti ‘cipego ca Leza citabbadelwi citakonzyi kupandululwa’ mbociyoomukulwaizya?

¹⁹ Ncobeni Jehova wakatupa ‘cipego citabbadelwi citakonzyi kupandululwa.’ Lyoonse atutondezye kulumba akaambo kacipego eeci! Myezi ya Ciibalusyo nciindi cibotu kapati cakuzinzibala kuyeeya zintu zyoonse Jehova alimwi a Jesu nzyobakatucitila. Luyando lwabo alutukulwaizye kwiitobelesya mikondo ya Jesu, kuyanda bakwesu alimwi akubalekelela kuzwa ansi aamoyo.