1, 2. Ino ncinzi cibikkilizyidwe mukulanga kuli Jehova?

TUPONA “kumazuba aamamanino” alo ‘aakatazya ncobeni,’ alimwi buumi bulangilwa kuyumina limwi buya Jehova katananyonyoona nyika eeyi mbyaabi akuleta luumuno lwini-lwini anyika. (2Tim. 3:1) Aboobo cilayandika kapati kulibuzya kuti, ‘Ino nkuuli ni nkondilomba lugwasyo alimwi abusolozi?’ Bwiinguzi bwesu bwakusaanguna bulakonzya kuba bwakuti, “Nkuuli Jehova,” alimwi oobo mbobwiinguzi buluzi.

² Ino ncinzi cibikkilizyidwe mukulanga kuli Jehova? Alimwi ino mbuti mbotukonzya kuba masimpe kuti meso eesu azumanana kulanga kulinguwe ciindi notulwana mapenzi aakatazya kapati mubuumi. Myaka minji yainda, sintembauzyo wakabona mbociyandika kulindiswe kuwaala meso eesu kuli Jehova kutegwa atugwasye muziindi zyamapenzi. (Amubale Intembauzyo 123:1-4.) Kulanga kwesu kuli Jehova wakakukozyanisya kumubelesi uulanga kuli simalelo wakwe. Ino sintembauzyo wakali kupandulula nzi kwiinda  mukwaamba boobo? Mubwini, mubelesi talangili buyo kupegwa zyakulya alimwi akukwabililwa kuli simalelo wakwe, pele weelede kubikkila maano kuli nzyayanda simalelo wakwe akuzicita. Mubwenya buyo, tweelede kuvwuntauzya mu Jwi lya Leza kutegwa tuzyibe ncayanda Jehova kulindiswe kutugama alimwi akutobela busolozi bwakwe. Kuti twacita oobo, ndendilyo notukonzya kuba masimpe kuti Jehova uuyootugwasya muziindi zyamapenzi.—Ef. 5:17.

3. Ncinzi cikonzya kutunyonganya kuzumanana kulanga kuli Jehova?

³ Nokuba kuti tulizyi mbociyandika kuzumanana kulanga kuli Jehova, zimwi ziindi tulakonzya kunyonganizyigwa. Eeci ncocakacitika kumulongwe wa Jesu Marta. Marta “wakanyonganizyigwa akukutauka milimo minji.” (Lk. 10:40-42) Ikuti naa eeco cakacitika kumuntu uusyomeka alimwi kali aantoomwe a Jesu kumugama, nkokuti tatweelede kugambwa ikuti andiswe cintu icili mbuli ceeci catucitikila. Aboobo, ino ncinzi cikonzya kutunyonganya notuzumanana kulanga kuli Jehova? Mucibalo eeci, tulalanga-langa kujatikizya micito yabamwi mboikonzya kutunyonganya. Alimwi tulaiya mbotukonzya kuzumanana kulanga kuli Jehova.

4. Nkaambo nzi ncotukonzya kugambwa kuti Musa wakasweekelwa coolwe cakunjila mu Nyika Yakasyomezyedwe?

⁴ Cakutadooneka, Musa wakali kulanga kuli Jehova kutegwa amupe busolozi alimwi amalailile. Inzya, “wakazumanana kuzyandamana mbuli kuti wakalimubwene ooyo uutalibonyi.” (Amubale Bahebrayo 11:24-27.) Bbaibbele litwaambila kuti, “takunabede musinsimi mu Israyeli uuli mbuli Musa, ooyo Jehova ngwaakazyiba cakaanzambwene.” (Dt. 34:10) Pele nokuba kuti Musa wakajisi cilongwe ciyumu a Jehova, wakasweekelwa coolwe cakunjila mu Nyika Yakasyomezyedwe. (My. 20:12) Ino ncinzi cakapa kuti Musa alubizye?

5-7. Ndipenzi nzi ilyakatalika muciindi buyo cisyoonto bana Israyeli nobakazwa mu Egepita, alimwi ino Musa wakacita buti kupenzi eelyo?

⁵ Kaitanakkwana myezi yobilo kuzwa ciindi bana Israyeli nobakazwa mu Egepita, kwakabuka penzi lipati, kabatanasika a Cilundu ca Sinai. Bantu bakatalika kutongooka kujatikizya kubula maanzi. Bakatalika kutongaukila Musa, alimwi zintu zyakabija kapati cakuti Musa wakalilila Jehova kati: “Ino ndilabacita buti bantu aaba? Ino-ino buyo balandipwaya mabwe!” (Kul. 17:4) Jehova wakaingula kwiinda mukupa Musa malailile aasalede. Wakeelede kubweza musako wakwe akuuma bbwe ku Horebu, mpoonya maanzi akali kunoopoomoka. Tubala kuti: “Musa wakacita mbubonya oobo kabalangilila baalu bamu Israyeli.” Bana Israyeli bakanywa maanzi alimwi nyota yakamana, aboobo penzi eeli lyakamana.—Kul. 17:5, 6.

⁶ Malembe aakasololelwa amuuya alazumanana kutwaambila kuti Musa “busena oobo wakabuulika kuti Masa a Meriba, akaambo kakuti bana Israyeli bakazwangana anguwe alimwi akaambo kakuti bakasunka Jehova kabaamba kuti: ‘Sena Jehova mpali akati kesu naa pe?’” (Kul. 17:7) Mazina aaya akali kweelela nkaambo aamba ‘Kusunka’ alimwi ‘Akuzwangana.’

⁷ Ino Jehova wakalimvwa buti kujatikizya cakacitika ku Meriba? Wakalimvwa kuti bana Israyeli bakazangila nguwe alimwi abweendelezi bwakwe, ikutali Musa. (Amubale Intembauzyo 95:8, 9.) Cilisalede kuti bana Israyeli bakalubizya. Aciindi eeco, Musa wakacita ciluzi kwiinda mukulanga kuli Jehova alimwi akutobela busolozi bwakwe.

8. Ino ndipenzi nzi ilyakatalika kabali kumamanino aalweendo lwabo lwamyaka iili 40 kuya munkanda?

 ⁸ Pele ino ncinzi cakacitika ciindi penzi likozyenye alyaambwa kale nolyakatalika nokwakainda myaka iili 40, kabali kumamanino aalweendo lwabo kuya munkanda? Bana Israyeli bakalijana alimwi abusena ibwakazyikwiitwa kuti Meriba. Pele oobu bwakali busena bumbi, bwakali aafwaafwi a Kadesi, munsi-munsi amunyinza wa Nyika Yakasyomezyedwe. * Bana Israyeli bakatongooka alimwi kujatikizya kubula maanzi. (My. 20:1-5) Pele aciindi eeci, Musa zintu wakazicita munzila iimbi.

9. Ino malailile nzi Musa ngaakatambula, pele ino ncinzi ncaakacita? (Amubone cifwanikiso icili kumatalikilo aacibalo.)

⁹ Ino ncinzi Musa ncaakacita kujatikizya kuzanga ooku? Aciindi aawa alimwi wakalomba busolozi bwa Jehova. Musa wakaambilwa kuti abweze musako wakwe, akubunganya bantu kumbele lyandomba, mpoonya akuti aambaule kundomba. (My. 20:6-8) Nokuba boobo, Musa tanaakaambaula kubbwe naa kundomba. Muciindi caboobo, wakakalala kapati cakuti wakaambila bantu bakabungene kuti: “Amuswiilile lino, nywebo nobazangi! Sena muyanda kuti tumugwisizye maanzi mundomba oomu?” Mpoonya wakauma ndomba ziindi zyobilo kutali ciindi comwe.—My. 20:10, 11.

10. Ino Jehova wakacita nzi kujatikizya ncaakacita Musa?

¹⁰ Jehova wakamunyemena kapati Musa. (Dt. 1:37; 3:26) Nkaambo nzi Jehova ncaakanyema boobu? Kweelede kuti kwakali twaambo tunji twakajatikizyidwe. Kweelana ambokwaambwa kale, kweelede kuti Jehova wakanyema akaambo kakuti Musa wakaalilwa kutobela malailile mapya ngaakatambula.

11. Kwiinda mukuuma bbwe, nkaambo nzi Musa ncaakapa kuti bana Israyeli bayeeye kuti Jehova kunyina naakacita maleele?

¹¹ Kweelede kuti kuli kaambo akambi kakamupa kunyema Jehova. Mandomba aakali ku Meriba wakusaanguna akali mayumu kapati. Nokuba kuti muntu wayuuma buti ndomba, kunyina wakali kuyeeyela kuti maanzi inga azwa mulinjiyo. Nokuba boobo, mandomba aakali ku Meriba wabili akaliindene kapati, akalisangene amabwe mateteete aatuba. Akaambo kambwaakapangidwe mabwe aaya, maanzi akali kukonzya kupola akukkalila ansi alimwi bantu bakali kukonzya kuteka maanzi kwiinda mukudonkola bbwe. Ciindi Musa naakauma bbwe ziindi zyobilo, muciindi cakubandika andilyo, wakapa bantu kuyeeya kuti maanzi akaile kulizwida alikke, ikutali kwiinda mumaleele aa Jehova. * Tatuzyi mbocakabede.

12. Nkaambo nzi akambi ikakapa kuti Jehova amunyemene Musa alimwi a Aroni?

¹² Kuli akambi kaambo ikakapa kuti Jehova anyemene Musa alimwi a Aroni. Amumvwe Musa mbwaakabambila bantu: “Sena muyanda kuti tumugwisizye maanzi mundomba oomu?” Kwiinda mukubelesya bbala lyakuti “tumugwisizye,” Musa ambweni wakali kulyaamba lwakwe mwini alimwi a Aroni. Majwi aayo akatondezya kubula bulemu kuli Jehova, Kasensa kamaleele aayo. Makani aaya aleendelana ancotubala mulugwalo lwa Intembauzyo 106:32, 33: “Bakamunyemya Leza kumaanzi aaku Meriba, eelyo zintu tiizyakamweendela kabotu  Musa akaambo kambabo. Bakanyemya moyo wakwe, eelyo wakaamba caambaambe amulomo wakwe.” * (My. 27:14) Kufwumbwa naa cakali buti, ncaakacita Musa, tiicakapa bulemu mbwayelede Jehova. Kaambila Musa alimwi a Aroni, Jehova wakati: “Nywebo nyobilo tiimwakatobela malailile aangu.” (My. 20:24) Eeco cakali cibi cipati!

13. Nkaambo nzi cisubulo Jehova ncaakapa Musa ncocakali kweelela?

¹³ Mbuli basololi akati kabantu ba Jehova, Musa alimwi a Aroni bakalijisi zinji zyakulyaambilila. (Lk. 12:48) Musyule, Jehova wakalibakasyide baluzubo lwa Israyeli boonse kunjila munyika ya Kanana akaambo kakutatobela malailile. (My. 14:26-30, 34) Aboobo cakali kweelela kuli Jehova kumubeteka munzila njiyonya Musa akaambo kakutatobela malailile. Mbubwenya mbuli bamwi batakatobela malailile, tanaakazumizyigwa kunjila mu Nyika Yakasyomezyedwe.

14, 15. Ncinzi cakapa kuti Musa aalilwe kutobela malailile?

¹⁴ Ino ncinzi cakapa kuti Musa abe amuuya wakutatobela malailile? Amubone alimwi lugwalo lwa Intembauzyo 106:32, 33 ncolwaamba: “Bakamunyemya Leza kumaanzi aaku Meriba, eelyo zintu tiizyakamweendela kabotu Musa akaambo kambabo. Bakanyemya moyo wakwe, eelyo wakaamba caambaambe amulomo wakwe.” Nokuba kuti bana Israyeli bakanyemya Jehova, Musa ngonguwe wakanyema. Kutalijata kwakapa kuti aambe kakunyina kuyeeya zyakali kukonzya kucitika.

¹⁵ Musa wakazumizya micito yabamwi kumunyonganya kuzumanana kulanga kuli Jehova. Penzi lyakusaanguna Musa wakalyeendelezya munzila iiluzi. (Kul. 7:6) Kweelede kuti akaambo kakweendelezya bana Israyeli bazangi kwamyaka minji, Musa wakakatala alimwi akunyema. Sena Musa wakali kubikkila maano kujatikizya mbwaakali kulimvwa muciindi cakubona mbuli mbwaakali kukonzya kulemeka Jehova?

16. Nkaambo nzi ncotweelede kubikkila maano kumicito ya Musa?

¹⁶ Ikuti musinsimi uusyomeka mbuli Musa wakanyonganizyigwa alimwi akulubizya, nkokuti cintu cili boobu cilakonzya kutucitikila andiswe. Mbubwenya mbuli Musa, tulaafwaafwi kunjila munyika yacikozyanyo, nyika mpya njaakatusyomezya Jehova. (2Pet. 3:13) Kunyina naba umwi wesu uuyanda kwiindwa coolwe eeci cilibedelede. Nokuba boobo, kutegwa tuzuzikizye makanze eesu, tweelede kuzumanana kulanga kuli Jehova, lyoonse katulibambilide kucita kuyanda kwakwe. (1Joh. 2:17) Nziiyo nzi nzyotweelede kwiiya kuzwa kukulubizya kwa Musa?

17. Ino ncinzi iciyootugwasya kulijata ciindi notwanyema?

¹⁷ Kamulijata ciindi nomwanyema. Nokuba kuti twalijana mubukkale bukatazya ciindi aciindi, “tutaleki pe kucita zibotu, nkaambo kuciindi ceelede tuyootebula ikuti naa tiitwatyompwa.” (Gal. 6:9; 2Tes. 3:13) Ciindi notwalijana mubukkale bunyemya naa notwazwangana abamwi, sena tulalijata kwaambaula alimwi akunyema? (Tus. 10:19; 17:27; Mt. 5:22) Ciindi bamwi nobatunyemya, tweelede kwiiya ‘kusiila busena bukali bwa Leza.” (Amubale Baroma 12:17-21.) Ikuti twazumanana kulanga kuli Jehova, nkokuti tuyootondezya kuti tulamulemeka kwiinda mukusiila busena bukali bwakwe, kulindila cakukkazyika moyo kutegwa abweze ntaamu ikuti kakuyandika kucita boobo. Kuti twacita ciindene aceeci alimwi  akupilusya cibi tobeni, nkokuti tuyootondezya kubula bulemu kuli Jehova.

18. Ncinzi ncotweelede kuyeeya caboola kumakani aakutobela busolozi?

¹⁸ Amubikkile maano kubusolozi bupya. Sena tulabutobela busolozi bupya mbwatupa Jehova? Ikuti naa tulacita oobo, tatukazumanani kucita zintu mbubwenya mbotwali kuzicita lyoonse musyule. Muciindi caboobo, tunoolibambilide lyoonse kutobela busolozi bupya mbwatupa Jehova kwiinda mumbunga yakwe. (Heb. 13:17) Aciindi ncimunya, tuyoobikkila maano kutegwa ‘tutakaindilili zintu zilembedwe.’ (1Kor. 4:6) Kwiinda mukucita boobo, tulazumanana kulanga kuli Jehova.

19. Nkaambo nzi ncotuteelede kulekela kulubizya kwabamwi kunyonganya cilongwe cesu a Jehova?

¹⁹ Mutalekeli kulubizya kwabamwi kunyonganya cilongwe canu a Jehova. Ikuti twagamika meso eesu aacikozyanyo kulanga kuli Jehova, tatukazumizyi micito yabamwi kutunyonganya naa kunyonganya cilongwe cesu anguwe. Eeci cilayandika kapati kwaambisya ikuti, mbubwenya mbuli Musa, tupedwe mukuli mumbunga ya Leza. Nokuba kuti umwi aumwi wesu weelede ‘kuzumanana kubelekela lufwutuko lwakwe cakuyoowa akukankama,’ tweelede kuyeeya kuti Jehova tajisi ceelelo comwe cigaminide ncabelesya kutubeteka. (Flp. 2:12) Muciindi caboobo, ulacita oobo kweelana amukuli ngotujisi. (Lk. 12:48) Pele kuti katumuyanda ncobeni Jehova, kunyina ciyakutulebya naa kutwaandaanya kuluyando lwakwe.—Int. 119:165; Rom. 8:37-39.

20. Makanze nzi ngotweelede kuba aangawo?

²⁰ Muziindi eezyi zikatazya, atuzumanane kuwaala meso eesu kuli yooyo ‘uukkede acuuno cabwami kujulu,’ kutegwa tuzyibe nzyayanda kuti tucite. Tutasoli kulekela micito yabamwi kunyonganya cilongwe cesu a Jehova. Cikozyanyo ca Musa cituyiisya ciiyo cipati kapati. Muciindi cakuciindizya kunyema akaambo kakutalondoka kwabamwi kutuzingulukide, atubone kuti “meso eesu alanga kuli Jehova Leza wesu kusikila mane atufwide luzyalo.”—Int. 123:1, 2.