MBWAANGA tukkede munyika iipilingene, tweelede kubeleka canguzu kutegwa tube aluumuno. Nokuba boobo, nociba ciindi notujisi luumuno luli mbolubede, kanji-kanji nciyumu kuzumanana kuba andulo. Ino ncinzi ncolyaamba Jwi lya Leza calo cikonzya kutugwasya kujana luumuno lwini-lwini alimwi lutamani? Alimwi ino mbuti mbotukonzya kubagwasya bamwi kucita boobo?

Kutegwa tube aluumuno lwini-lwini, tweelede kulimvwa kukwabililwa alimwi akuliiba mumizeezo. Alimwi tweelede kuba azilongwe ziyumu abamwi. Ciyandika kapati kwiinda zyoonse kutegwa tube aluumuno lutamani, nkuba acilongwe ciyumu a Leza. Ino mbuti mbotukonzya kucita boobo?

Ciindi notutobela malailile alimwi anjiisyo zya Jehova ziluleme, tutondezya kuti tulamusyoma alimwi akuti tulayandisisya kuba muluumuno anguwe. (Jer. 17:7, 8; Jak. 2:22, 23) Aboobo, ulaswena afwaafwi andiswe alimwi ulatulongezya aluumuno lwamumizeezo. Lugwalo lwa Isaya 32:17 lwaamba kuti: “Bululami bwini-bwini buyooleta luumuno, alimwi micelo yabululami bwini-bwini iyooba luumuno akuliiba mane kukabe kutamani.” Tulakonzya kuba aluumuno lwini-lwini lwamumizeezo kwiinda mukumuswiilila Jehova kuzwa aansi amoyo.—Is. 48:18, 19.

Alimwi tulagwasyigwa kuba aluumuno lutamani kwiinda mucipego cikkomanisya kuzwa kuli Taateesu wakujulu, nkokuti muuya wakwe uusalala.—Mil. 9:31.

Mwaapostolo Paulo wakabikka luumuno kuba cibeela catatu ‘camucelo wamuuya.’ (Gal. 5:22, 23) Mbwaanga muuya wa Leza nguupa kuba aluumuno lwini-lwini, tweelede kutobela busolozi bwamuuya uusalala kutegwa tube aluumuno lwini-lwini. Atulange-lange nzila  zyobilo muuya wa Leza mboukonzya kutugwasya kujana luumuno.

Yakusaanguna, tulagwasyigwa kuba aluumuno kwiinda mukubala Jwi lya Leza abuzuba. (Int. 1:2, 3) Notuzinzibala kuyeeya mulumbe wamu Bbaibbele, muuya wa Leza ulatugwasya kumvwisya mbwayeeya Jehova mumakani manji. Mucikozyanyo, tulabona mbwazumanana kuba siluumuno alimwi aluumuno ncoluyandika kapati kulinguwe. Ciindi notutobela ziiyo zili boobo kuzwa mu Jwi lya Leza, tulajana luumuno lunji mubuumi bwesu.—Tus. 3:1, 2.

Yabili, tweelede kulomba muuya uusalala wa Leza. (Lk. 11:13) Jehova usyomezya kuti, ikuti naa twalomba lugwasyo lwakwe, ‘luumuno lwa Leza oolo lwiinda maano oonse luyookwabilila myoyo yesu amizeezo yesu kwiinda muli Kristo Jesu.’ (Flp. 4:6, 7) Ciindi notupaila lyoonse kulomba muuya wa Jehova, Leza wesu ulatupa luumuno lwamumizeezo iluboola buyo kuli baabo balikke ibajisi cilongwe cibotu anguwe.—Rom. 15:13.

Ino mbuti bamwi mbobakalubelesya lulayo oolu lwamu Magwalo akubambulula mobakali kuyandika, calo icakabapa kuti babe aluumuno lutamani a Jehova, lwabo beni alimwi abantunyina?

Mazuba aano mumbungano ya Bunakristo, kuli bamwi kaindi ibakajisi ‘bukali’ pele lino bazilanga kabotu zintu, mbaasiluzyalo, balakkazika moyo alimwi mbaasiluumuno munzila njobayanzana abantu. * (Tus. 29:22) Amubone kaambo aaka mbokali kamasimpe kujatikizya basikumwaya ba Bwami bobilo ibakagwasyigwa kuzunda penzi lyabukali alimwi akuba aluumuno abantu.

Bube bubyaabi mbobakajisi ba David bwakaijatikizya ŋambawido yabo. Kabatanalyaaba kuli Leza, kanji-kanji bakali kujanina bamwi milandu alimwi akubelesya majwi aabukali kubanamukwasyi. Mukuya kwaciindi, ba David bakabona kuti cilayandika kucinca akuba siluumuno. Ino mbuti mbobakaba basiluumuno? Bakaamba kuti, “Ndakatalika kuzibelesya njiisyo zyamu Bbaibbele mubuumi bwangu, aboobo, twakatalika kulemekana mumukwasyi.”

Mbobakakomena ba Rachel kwakabujatikizya bube bwabo. Bakazumina akwaamba kuti, “Noliba lino, kunyema-nyema kulandikatazya  akaambo kakuti ndakakomenena mumukwasyi mobakali kunyema-nyema.” Ino ncinzi cakabagwasya kuba basiluumuno? Bakaamba kuti, “Ndakali kupaila kuli Jehova lyoonse akulomba lugwasyo.”

Ba David aba Rachel nzikozyanyo buyo zyobilo zyalo izitondezya kuti ciindi notuzibelesya njiisyo zyamu Magwalo izyakasololelwa amuuya alimwi anotusyoma muuya wa Leza kuti utugwasye, tuyooba aluumuno. Cakutadooneka, nokuba kuti tupona munyika iipilingene, tulakonzya kuba aluumuno lwamumizeezo lwalo ilupa kuti katweendelana amikwasyi yesu alimwi a Banakristoma. Nokuba boobo, Jehova utwaambila “kukkala muluumuno abantu boonse.” (Rom. 12:18) Sena masimpe eeci cilakonzyeka, alimwi ino mbubotu nzi buboola kwiinda mukusolekesya kwesu kubamba luumuno?

Kwiinda mumulimo wesu wakukambauka, tulabatamba bantu kutegwa bagwasyigwe amulumbe wesu waluumuno uujatikizya Bwami bwa Leza. (Is. 9:6, 7; Mt. 24:14) Cikkomanisya ncakuti, ibanji bautambula. Aboobo kunyina nobalimvwa kutyompwa naa kunyema akaambo kazintu nzyobabona kazicitika. Muciindi caboobo, lino balijisi bulangizi bwini-bwini bwakumbele alimwi eeci cilabakulwaizya ‘kuyandaula luumuno akusungwaala kulutobela.’—Int. 34:14.

Nokuba boobo, tabali boonse ibautambula kabotu mulumbe wesu ciindi cakusaanguna. (Joh. 3:19) Nokuba kuti cili boobo, muuya wa Leza ulatugwasya kutola makani mabotu kulimbabo muluumuno alimwi cabulemu. Munzila eeyi, tutobela malailile aa Jesu aajatikizya mulimo wakukambauka aalembedwe kulugwalo lwa Matayo 10:11-13, kwalo nkotulaililwa kuti: “Nomunjila muŋanda, amubaanzye bali mumo. Ikuti ŋanda eeyo kayeelela, luumuno lwanu alube alinjiyo; pele ikuti kaiteeleli, luumuno lwanu alupilukile kulindinywe.” Ciindi notutobela lulayo lwa Jesu, tulakonzya kubasiya muluumuno katujisi bulangizi bwakuti bayooswiilila ciindi ciboola.

Ciindi notubandika munzila yabulemu abeendelezi bamfwulumende alimwi abaabo bakazya mulimo wesu, tupa kuti kube luumuno. Mucikozyanyo, mfwulumende yamucisi cimwi camu Africa yakazumizya lusalululo kupa kuti itazumizyi kuyakwa kwa Maanda aa Bwami. Kutegwa babambe makani munzila yaluumuno, mukwesu iwakali misyinali kaindi mucisi camu Africa eeco, wakatumwa kutegwa akabonane a Mwiiminizi wacisi eeco ku London, England. Wakatumwa kutegwa akaambile mupati-pati ooyu kujatikizya mulimo waluumuno ngobacita Bakamboni ba Jehova mucisi cakwe. Ino ncinzi cakacitika?

Wakaamba kuti, “Nondakasika abusena mpobatambwida beenzu, kwiinda mukubona mbwaakasamide sikutambula beenzu, ndakazyiba kuti uzwa kubusena nkobaambaula mwaambo ngondakaiya. Aboobo ndakamwaanzya mumwaambo wakwe. Kagambidwe, wakandibuzya kuti, ‘Mwatuswaya?’ Cabulemu ndakamwaambila kuti ndalikuyanda kubonana a Mwiiminizi wacisi. Wakamutumina fooni mupati-pati ooyo, mpoonya wakaboola kutegwa tubonane alimwi wakandaanzya mumwaambo wakubusena ooko. Mpoonya wakandiswiililisya ciindi nondakali kumupandulwida kujatikizya milimo yaluumuno ya Bakamboni ba Jehova.”

Bupanduluzi mukwesu mbwaakapa munzila yabulemu, bwakapa kuti ikutabalanga munzila mbotu alimwi alusalululo ndwaakajisi Mwiiminizi ooyo kumulimo wa Bakamboni zimane. Mukuya kwaciindi, mfwulumende yacisi eeco camu Africa yakaugusya mulawo iwakali kukasya kuyaka Maanda aa Bwami. Eelo kaka bakwesu bakasekelela kujatikizya makani aayo mbwaakakosolwa munzila yaluumuno! Masimpe, ikubalemeka bantu kuleta zilongezyo zinji, kubikkilizya aluumuno.

Mazuba aano, bantu ba Jehova bali muparadaiso yakumuuya iizwide luumuno. Muyooyungizya luumuno oolu nomuzumanana kubeleka kutegwa mube aabube oobu bwamucelo wamuuya mubuumi bwanu. Icipati kwiinda zyoonse ncakuti, muyookkomaninwa a Jehova akujana luumuno lunji alimwi ilutamani munyika ya Leza mpya.—2Pet. 3:13, 14.