BANA Israyeli bakali kuzikkomanina kapati nyimbo. Kanji-kanji Bbaibbele lilaamba kujatikizya bantu balizya ziimbyo alimwi akwiimba nyimbo. Cibeela cipati ca Bbaibbele cijisi nyimbo. Mucikozyanyo, bbuku lya Intembauzyo, Lwiimbo lwa Solomoni alimwi alya Malilo, oonse akalembelwa kuti kaayimbwa. Bbuku litegwa Music in Biblical Life lyaamba kuti, Bbaibbele “litondezya kuti bana Israyeli bakali kubelesya nyimbo muzintu zinji nzyobakali kucita mubuumi bwabo.”

Kubelesya nyimbo mubuumi bwabuzuba abuzuba. Bana Israyeli bakali kulizya nyimbo kutondezya mbobakali kulimvwa. (Is. 30:29) Bamakaintu bakali kulizya nsakalala, kwiimba nyimbo zikkomanisya alimwi akuzyana nokwakali kusekelelwa kunanikwa kwamwami, basikalumamba nobakali kuzunda munkondo alimwi akumapobwe aabukombi. (Bab. 11:34; 1Sam. 18:​6, 7; 1Bam. 1:​39, 40) Bana Israyeli alimwi bakali kwiimba nyimbo zitondezya kuusa ciindi umwi naafwa. (2Mak. 35:25) Bbuku lyakuti McClintock and Strong’s Cyclopedia lyaamba kuti: “Bana Israyeli bakali kuziyanda kapati nyimbo.”

Bami bamu Israyeli bakali kuzikkomanina kapati nyimbo. Mwami Saulo wakaita Davida kuŋanda yakwe yabwami kuti kamulizyila kantimbwa. (1Sam. 16:​18, 23) Kumbele ciindi Davida naakaba mwami wakapanga zibelesyo zyakwiimbya, kulemba nyimbo zikkomanisya kapati alimwi akubikka nkamu yabaimbi kutegwa kabaimba kutempele lya Jehova. (2Mak. 7:6; Am. 6:5) Mwami Solomoni wakajisi baimbi muŋanda yakwe yabwami, basankwa abasimbi.—Muk. 2:8.

Bana Israyeli bakali kubelesya nyimbo kukomba Jehova. Amana buya, bamaalumi bali 4,000 bakali kulizya ziimbyo atempele ku Jerusalemu. (1Mak. 23:5) Bakali kulizya miyuwa, tuntimbwa, myeembo alimwi azibelesyo zimbi zyakwiimbya. (2Mak. 5:12) Pele baimbi aaba bacibwene tabali buyo mbabo balikke ibakali kubelesya nyimbo kukomba Jehova. Bana Israyeli banji bakali kwiimba nyimbo ciindi nobakali kuunka ku Jerusalemu kuyoosekelela mapobwe. Nyimbo eezyi zyakali kwiitwa kuti Nyimbo zya Basikutanta. (Int. 120-134) Alimwi kweelana amalembe aaci Juda, bana Israyeli bakali kwiimba Intembauzyo a zimwi, ciindi ca Pobwe Lyakwiindilila.

Nyimbo ziciyandika kapati kubabelesi ba Leza amazuba aano. (Jak. 5:13) Tulaimba nyimbo nkaambo ncibeela cabukombi bwesu. (Ef. 5:19) Nyimbo zilatukamantanya a Banakristoma. (Kol. 3:16) Alimwi zilatuyumyayumya ciindi notwajana mapenzi. (Mil. 16:25) Kwiimba nyimbo ninzila imwi mbotutondezya lusyomo lwesu alimwi aluyando kuli Jehova.