Akaambo kakuyaambele kwasayaansi mazuba aano, mulakonzya kubandika abantu banji cakuliiba kwiinda mbocakabede kaindi. Nokuba boobo, balongwe mbomujisi andiza tabali beni-beni. Mukubusi umwi wakaamba boobu: “Ndilimvwa mbuli kuti zilongwe nzyondijisi zilakonzya kumana kufwumbwa ciindi. Kulubazu lumwi, bataata balijisi balongwe mbobamvwana limwi kwamyaka minji.”

Nkaambo nzi mazuba aano ncocili ciyumu kuba abalongwe mbomukonzya kumvwana limwi kwaciindi cilamfwu?

Kuyaambele kwasayaansi kwapa kuti kacili boobo. Kulembelana tugwalo twaafooni, intaneti, alimwi anzila zimwi zyakubandika kwatondezya kuti cilakonzyeka kuba abalongwe nokuba kuti tamubonani. Mibandi yamaano yanjililwa busena atugwalo tutobelana kuboola. Bbuku litegwa Artificial Maturity lyaamba kuti: “Bantu bayaabucileka kubonana. Basicikolo babelesya ciindi cinji akkompyuta, mpoonya bajisi buyo ciindi cisyoonto cakubonana abeenzinyina.”

Ziindi zimwi, kuyaambele kwasayaansi kulakonzya kutondezya mbuli kuti balongwe balamvwana kapati. Brian, * uujisi myaka iili 22 wakaamba kuti: “Ndakabona kuti lyoonse ndime ndakali kuyeeya kubalembela tugwalo beenzuma kutegwa ndizyibe mbobabede. Aboobo, ndakaleka kubalembela kutegwa ndibone naa bali bongaye bakonzya kundilembela. Kwaamba masimpe, mbasyoonto kapati. Ndakajana kuti balongwe bamwi tatumvwani mbuli mbondakali kuyeeya.”

Pele sena kulembelana tugwalo twaafooni akubelesya Intaneti takukonzyi kumugwasya kubandika abantu alimwi akuyumya zilongwe zyanu? Inzya, kwaambisya ikuti balongwe aabo kamucikonzya kubonana alimwi akulembelana tugwalo. Pele kanji-kanji Intaneti igwasya buyo kuti mubandike abamwi kakunyina kuba acilongwe cini-cini ambabo.

Amuzyibe ncocaamba kuba acilongwe cini-cini. Bbaibbele lipandulula mulongwe kuti nguyooyo “uukakatila kwiinda mwanookwanu.” (Tusimpi 18:24) Sena ooyu ngomulongwe ngomuyanda? Sena oobu mbomubede nywebo? Kutegwa mwiingule mibuzyo eeyi, amulembe bube botatwe mbomuyanda kuti kajisi mulongwe wanu. Mpoonya mulembe bube botatwe nywebo mbomujisi. Amulibuzye kuti: ‘Akati kabantu mbondibandika limwi a Intaneti, nguni uujisi bube mbondiyanda kumulongwe? Ino mbube nzi balongwe aabo mbobakonzya kwaamba kuti mebo ndilijisi?’—Njiisyo yamu Bbaibbele: Bafilipi 2:4.

Amuzyibe zintu nzyomubikka mubusena bwakusaanguna. Zilongwe zyaa Intaneti kanji-kanji ziyeeme acintu comwe bantu bobilo ncobakkomanina kucita. Nokuba boobo, kweendelana muzintu nzyomubikka mubusena bwakusaanguna kulayandika kapati kwiinda kuba azintu izikozyenye. Musimbi uutegwa Leanne uujisi myaka iili 21 wakaamba kuti: “Ndilakonzya kuti kanditajisi balongwe banji pele aabo mbondijisi balandigwasya kutegwa ndibe muntu uuli kabotu.”—Njiisyo yamu Bbaibbele: Tusimpi 13:20.

Amubonane abantu cacigaminina. Kunyina ciinda kubota mbuli kubonana ntongolameso nomubandika, kwalo nywebo alimwi amuntu umwi nkomukonzya kubona aumwi kacinca-cinca jwi, mbwalibonya kumeso alimwi akunyanyaasya mubili.—Njiisyo yamu Bbaibbele: 1 Batesalonika 2:17.

Kulemba lugwalo. Nokuba kuti nzila eeyi iboneka kuti njakaindi, kulemba lugwalo kutondezya kuti mulamubikkila maano muntu cakumaninina. Kubikkila maano ikuli boobo takujaniki-janiki mazuba aano munyika bantu mobajisi zintu zinji zyakucita. Mucikozyanyo, Sherry Turkle mubbuku lyakwe litegwa Alone Together wakalemba kujatikizya mukubusi umwi iwakaamba kuti mubuumi bwakwe tanatambwide lugwalo lumugeme. Kujatikizya ciindi bantu nobakali kulembelana magwalo, wakaamba kuti: “Akali mazuba nsini nokuba kuti tiindakaningazyalwa.” Sena tamukonzyi kubelesya nzila eeyi yakaindi kujana balongwe?

Masimpe ngakuti: Cilongwe cini-cini cibikkilizya zinji kutali buyo kubandika. Ciyanda kuti nywebo alimwi amulongwe wanu kamutondezya luyando, lweetelelo kukkazika moyo alimwi akulekelela. Bube oobu bupa kuti mukuya kwaciindi cilongwe kacigwasya. Pele bube oobo bulakatazya kubutondezya ikuti kamubandika buyo aa Intaneti.