BUVWUNTAUZI ibwakacitwa mu 2015 kubabelesi ibabeleka ciindi coonse muzisi zili lusele, basikubuzyigwa-buzyigwa banji bakaamba kuti cilabakatazya kuzuzikizya mulimo wabo alimwi akulanganya zintu zimwi ziyandika. Eeci cilacitika akaambo kakuvwula kwazintu nzyobeelede kucita kumulimo naa kuŋanda, kuyungizyika kwazintu ziyandika, alimwi akubeleka mawoola manji. Mucikozyanyo, ku United States, babelesi ibabeleka ciindi coonse balabeleka mawoola aabalilwa ku 47 ansondo. Muntu omwe akati kabantu bosanwe wakaamba kuti wakali kubeleka mawoola aali 60 naa kwiinda aawo!

Buvwuntauzi bumbi, bwalo ibwakali kubikkilizya zisi zili 36, basikubuzyigwa-buzyigwa ibainda ku 25 pesenti bakaamba kuti kanji-kanji bakali kulimvwa kubinzyigwa nociba ciindi nobakali kulikondelezya. Bana abalo balakonzya kujatikizyigwa kuti bapegwa zintu zinji kapati zyakucita.

Ikuti lyoonse katusola kucita zintu zinji kapati kwiinda ciindi ncotujisi, tulakonzya kutyompwa alimwi akuba bantu bajisi penzi lyakumaninwa ciindi. Pele sena cilakonzyeka kupona buumi bukkalikene? Ino zintu nzyotusyoma, nzyotusala, alimwi ambaakani zyesu zijisi mulimo nzi? Cakusaanguna, atulange-lange twaambo tone tupa kuti bantu bamwi kabacita zintu zinji kapati.

Muzyali uutegwa Gary, wakaamba kuti: “Ndakali kubeleka mazuba aali ciloba ansondo. Ndakali kucita oobo akaambo kakuti lyoonse kwakali cintu cimwi cibotu ncondakali kuyanda kupa bana bangu. Ndakali kuyanda kuti kabajisi zintu zibotu nzyondatakajisi mebo.” Nokuba kuti makanze aabo mabotu, bazyali beelede kuzilanga kabotu zintu nzyobabikkila kapati maano. Buvwuntauzi bumwi bwakatondezya kuti bapati antoomwe abana ibabikkila kapati maano kumali alimwi azintu zyakumubili tabajani lukkomano lwini-lwini, tabakkutili mubuumi, alimwi tabaponi buumi buli kabotu kwiinda baabo batabikkili kapati maano kuzintu zyakumubili.

Akaambo kakuyanda kuti bana babo bakakkale kabotu kumbele, bazyali bamwi bapa bana babo zintu zinji zyakucita alimwi eeci abalo cibapa kubeleka milimo minji kapati. Bbuku litegwa Putting Family First, lyakaamba kuti “eeci cilakonzya kupa kuti bana antoomwe abazyali bapenge.”

Basikwaambilizya makwebo balasola kutupa kusyoma kuti tulaliimya zintu zibotu ikuti naa tiitwaula zintu zyabo zipya. Magazini iitegwa The Economist yakaamba kuti: “Kuvwula kwazintu kwapa kuti bantu balimvwe kuti tabajisi ciindi cinji,” akaambo “kakukatazyigwa kusala zyakuula naa zyakweebelela naa zyakulya” muciindi cisyoonto ncobajisi.

Mumwaka wa 1930, syaazibwene umwi mumakani aabuvwubi bwacisi wakaamba kuti, kuyaambele mumakani aazintu zyakupanga-panga kulakonzya kupa babelesi ciindi cinji cakulyookezya. Eelo kaka tanaakaluzi pe! Elizabeth Kolbert, imulembi wamagazini iitegwa New Yorker wakaamba kuti: “Muciindi cakufwambaana kukotoka kutegwa bakalyookezye,” bantu baunka “kuyoobona zintu zimbi zipya nzyobayanda”—alimwi zintu nzyobabona ziladula alimwi ziyanda ciindi cinji cakuzilanganya.

Babelesi bamwi balabeleka mawoola manji kutegwa bakkomanisye basikubalemba mulimo. Babelesinyina abalo balakonzya kubapa kucita boobo kwiinda mukubapa kulimvwa kuba amulandu ikuti naa tiibabeleka mawoola manji. Alimwi kuli penzi lyakujana mali, calo cikonzya kupa kuti bantu kabalisungula kubeleka mawoola manji kapati naa kulisungula kuunka kumulimo aciindi cili coonse.

Abalo bazyali balakonzya kulimvwa kuti bayandika kuba azintu nzyoijisi mikwasyi iimbi. Ikuti naa tiibacita oobo, balakonzya kulimvwa kuba amulandu “wakwiimya” bana babo zintu zibotu kapati.

Ba Tim, ibakkala ku United States bakaamba kuti: “Ndakali kuuyanda kapati mulimo wangu, alimwi ndakali kulitakata lyoonse. Ndakali kulimvwa kuti ndakeelede kulitondezya mpondigolela munguzu zyangu.”

Mbubwenya mbuli ba Tim, bantu banji balimvwa kuti mpuwo yabo alimwi akuvwula kwazintu nzyobacita ziliswaangene kapati. Ncinzi cicitika akaambo kaceeci? Elizabeth Kolbert, iwaambidwe kale wakaamba kuti: “Ikujata bubi kupa kuba ampuwo. Ikuti kojisi bubi ciindi coonse, inga waboneka kuti ulayandika kapati.”

Bbaibbele likulwaizya bantu kuba bankutwe alimwi babeleka canguzu. (Tusimpi 13:4) Pele alimwi likulwaizya kuzilanga kabotu zintu. Lugwalo lwa Mukambausi 4:6 lwaamba kuti: “Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.”

Kuzilanga kabotu zintu mubuumi cilagwasya kukkalikana mumizeezo alimwi akupona buumi buli kabotu. Pele sena cilakonzyeka ncobeni kuzilanga kabotu zintu naa kuubya-ubya buumi? Inzya. Amulange-lange nzila zyone:

Tacilubide kuyanda kuba amali. Pele ino kuyandika kuba amali manji buti? Ino ncinzi cipa kuzwidilila? Sena caamba kuvwula kwamali ngajisi muntu naa kuvwula kwazintu zyakumubili? Kulubazu lumbi, kuba aciindi cinji cakulyookezya naa kulikondelezya akwalo kulakonzya kuyungizya penzi lyakumaninwa ciindi.

Ba Tim, ibaambwa kumatalikilo bakaamba kuti: “Mebo abakaintu bangu twakakkala ansi kulanga-langa buumi bwesu mpoonya twakasala kubuubya-ubya. Twakapanga ccaati iyakali kutondezya bukkale bwesu alimwi ambaakani zyesu zipya. Twakabandika mbokwakali kutujatikizya kusala kwesu kwakaindi alimwi ancotwakali kuyandika kucita kutegwa tuzuzikizye mbaakani zyesu.”

Bbaibbele litukulwaizya kweendelezya ‘zisusi zyameso.’ (1 Johane 2:15-17) Kwaambilizya makwebo kulakonzya kukulwaizya zisusi eezyi, akupa muntu kubeleka mawoola manji naa kucita zyakulikondelezya iziyandika mali manji. Masimpe kuti, inga tiimwacikonzya kutantamuka kwaambilizyigwa kwamakwebo koonse. Pele mulakonzya kukucesya-cesya kulangilila zintu zili boobo. Alimwi mulakonzya kuzilanga-langa kabotu zintu nzyomuyandika ncobeni.

Alimwi kamuyeeya mbobakonzya kumujatikizya bantu mbomuyanzana limwi. Ikuti naa mbantu bayandisya zintu zyakumubili naa ibabona kuti kuzwidilila caamba kuba azintu zinji zyakumubili, nkokuti inga caba cabusongo kuyandaula balongwe bambi ibabikkila maano kapati kuzintu zili kabotu. Bbaibbele lyaamba kuti: “Ooyo weenda abasongo ulaba musongo.”—Tusimpi 13:20.

Amubandike abasikumulemba mulimo kujatikizya mulimo wanu alimwi azintu nzyomubikkila kapati maano. Alimwi mutalimvwi kuba amulandu akaambo kakuba aciindi cakutaunka kumulimo. Bbuku litegwa Work to Live lyakaamba kuti: “Aabo ibajana ciindi cakulyookezya kumulimo akuba  amukwasyi wabo balibonena mbokali kamasimpe kaambo aaka kakuti: Zintu tazikonzyi kunyongana ikuti naa kamutawo.”

Ba Gary ibaambwa kumatalikilo, bakalijisi mali manji, aboobo bakasala kuti bacesye mawoola aakubeleka. Bakaamba kuti: “Ndakabandika amukwasyi wangu aboobo twakasala kuti tuubye-ubye buumi bwesu. Mpoonya asyoonto-syoonto twakabweza ntaamu zyakucita boobo. Alimwi ndakabandika abasikundilemba mulimo kulomba kuti kandibeleka buyo mazuba masyoonto nsondo ansondo, eelyo bakazumina.”

Bamalumi abamakaintu bayandika kuba aciindi cakuba antoomwe, abalo bana bayandika ciindi cakuba abazyali babo. Aboobo mutabi acilengwa cakuyanda kweelana amikwasyi iimbi yalo iijisi bubi lyoonse. Ba Gary bakaamba kuti: “Mweelede kuba aciindi cakulyookezya akulikondelezya, alimwi akuleka kucita zintu zitayandiki kapati.”

Ciindi nomwaba antoomwe amukwasyi wanu, mutalekeli cipekupeku, mafooni, naa tuncini tumwi kumwaandaanya. Amube aciindi cakulida antoomwe ambweni ciindi comwe abuzuba, alimwi akubelesya ciindi eeco kubandika mbuli mukwasyi. Ciindi bazyali nobatobela lulayo oolu, bana babo balakkomana kapati alimwi balacita kabotu kucikolo.

Lino amulibuzye kuti: ‘Ino ncinzi ncondiyanda mubuumi? Ino ncinzi ncondeelede kuucitila mukwasyi wangu?’ Ikuti naa muyanda kuba abuumi bukkomanisya alimwi ibulaampindu, amubikkile maano kuzintu ziyandika kapati zitondezya busongo bwamu Bbaibbele.