KUBONEKA kuti kwakaindide myaka iibalilwa ku 800 kuzwa ciindi musyobo waba Maori nowakeenda makkilomita aali mbwaabede kuzabuka lwaanje akuyookkala ku New Zealand. Okuya, bakajana busena bwiindene kapati ansumbu yaku Polynesia nkobakazwa. Oobu bwakali busena bwamalundu, zizyiba zijisi maanzi aakasaala alimwi acaanda. Musyobo umbi wabantu wakaboola akukkala kubusena oobu nokwakainda myaanda yamyaka iibalilwa kuli yosanwe, alimwi bantu aaba bakazwa ku Europe. Mazuba aano, bunji bwabantu baku New Zealand balacita zilengwa zyabana Anglo-Saxon alimwi azyabana Polynesia. Mweelwe wabantu ibabalilwa ku 90 pesenti bakkala mumadolopo. Dolopo lya Wellington lizyibidwe kuti ndedolopo pati ilili kumusanza kwini kwacisi munyika yoonse.

 Aboobo tacigambyi kuti, nokuba kuti cisi ca New Zealand cili kulamfwu kapati azisi zimbi, basikuswaya masena ibasika ku 3 miliyoni balaunka mwaka amwaka akaambo kakuti cisi eeci cileebeka kapati.

Cisi ca New Zealand cizyibidwe kuba azilenge zyamusyokwe ziindene-indene alimwi abayuni banji batakonzyi kuuluka kwiinda cisi cili coonse munyika. Alimwi kulajanika atunyama tutegwa tuatara ituboneka mbuli syaantombela twalo itukonzya kupona myaka iili 100. Zilenge izijanika buyo mucisi eeci, zilabikkilizya amusyobo watumpaamfwa alimwi azilenge zimwi zyamumaanzi mbuli bazenimutende alimwi ama dolphin.

Bakamboni ba Jehova bali kubeleka mucisi ca New Zealand kwamyaka iitandila ku 120. Balayiisya Bbaibbele mumyaambo iisika ku 19, kubikkilizya amyaambo yaku Polynesia mbuli ci Niuean, Rarotongan, Samoan alimwi aci Tongan.