“Amukalane Abantu Boonse Caluumuno”
“Amukalane Abantu Boonse Caluumuno”
“Anooli kwakonzeka, nkukuti mbuli mbumukonzya nubeni, amukalane abantu boonse caluumuno.”—ROM. 12:18.
1, 2. (a) Ino Jesu wakabacenjezya nzi basikumutobela? (b) Ino nkuli nkotukonzya kujana malailile aambotukonzya kucita ciindi notukazyigwa?
JESU wakacenjezya basikwiiya bakwe kuti bantu bamasi bakali kuyakubakazya alimwi mangolezya, ibuzuba bwamamanino katanafwa, wakabaambila ncobakali kuyakukazyilwa. Wakaambila baapostolo bakwe kuti: “Nomwali bayeeyi inyika, inyika neyali kuyanda bayo, kwalo nkaambo tamuli bayeeyi nyika, pele ndakamusala kuzwa kunyika, nkakaambo ako inyika nciimusulide.”—Joh.15:19.
2 Kwiinda muzyintu zyakamucitikila, Paulo wakazyiba kuti majwi aa Jesu aaya akali amasimpe. Mulugwalo lwabili ndwaakalembela mubelesinyina Timoteo, Paulo wakati: “Yebo ulitobelede ndime mulwiisyo lwangu amumyeendo yangu amumakanze aangu, mulusyomo amukukazika moyo amukuyandana amulukakatilo, mukupenzegwa amukuciswa.” Amane Paulo wakayungizya kuti: “Ee, ncobeni boonse abo bayanda kupona cakululama muli-Kristo Jesu mbobayoopenzegwa.” (2 Tim. 3:10-12) Mucaandano 12 calugwalo ndwaakalembela Banakristo baku Roma, Paulo wakabalailila mbobakeelede kucita nobakazyigwa. Nzyaakaamba zilakonzya kutugwasya muciindi cino camamanino.
‘Kamucita Zyintu Zibotu’
3, 4. Ino mbuti mbotukonzya kulubelesya lulayo luli kulugwalo lwa Ba-Roma 12:17 (a) mumukwasyi motwiindene bukombi? (b) notucita zyintu abasimukoboma?
3 Amubale Ba-Roma 12:17. Paulo wakaamba kuti notupenzyegwa, tatweelede kujosya. Cilayandika kapati kulutobela lulayo oolu, ikapati mumikwasyi oomo mobaindene bukombi. Umwi wabanabukwetene Imunakristo naafwubaazigwa naa kupenzyegwa, ulalijata. ‘Ikupilusya cibi kumuntu’ takugwasyi pe. Pele cipa buyo kuti mapenzi azumanane.
4 Paulo wakaamba cintu cibotu ncotweelede kucita naakaamba kuti: “Kamucita zyintu zibonwa kuti nzibotu abantu boonse.” [NW] Mumukwasyi, imukaintu uuzumanana kutondezya luzyalo kumulumi wakwe nokuba kuti wamwaambila majwi mabi kujatikizya lusyomo lwakwe, ulakonzya kupa kuti kube luumuno. (Tus. 31:12) Carlos, lino uubelekela kumutabi, ulapandulula mbuli banyina mbobakazumanana kuba aluzyalo akwiibamba kabotu ŋanda nokuba kuti bausyi bakali kubakazya kapati. Waamba kuti: “Bamaama bakali kutwaambila lyoonse kuti katubalemeka bataata. Bakali kundikulwaizya kuti kandisobana cisobano ca boules (cisobano ca Chifulenci) abataata nokuba kuti tiindakali kucikkomanina. Pele eeci cakali kubapa kukkomana.” Bakatalika kwiiya Bbaibbele, bamane bakabbapatizyigwa. Kumakani aakucita “zyintu zibonwa kuti nzibotu abantu boonse,” Bakamboni ba Jehova kanji-kanji balabagwasya basimukobonyina nokwacitika ntenda, eeci cipa kuti baleke kubasulaika.
Kubelesya “Makala Aamulilo” Kulesya Kukazyigwa
5, 6. (a) Ino mbuti “makala aamulilo” mbwaabikwa amutwe wasinkondo? (b) Amwaambe cakuluula citondezya mbuli mbocigwasya kubelesya lulayo luli kulugwalo lwa Ba-Roma 12:20.
5 Amubale Ba-Roma 12:20. Naakali kusala majwi aakubelesya kulemba mulugwalo oolu, kweelede kuti Paulo wakali kuyeeya majwi ngotubala kulugwalo lwa Tusimpi 25:21, 22 aakuti: “Nkaambo kaako, anooli sinkondonyoko wafwa inzala, umusanine; afwa nyota, umunywisye; ikuti kukucita boobo ulalundika makala aamulilo amutwe wakwe.” Aboobo, Paulo naakapa lulayo luli kulugwalo lwa Ba-Roma caandaano 12, tanaakali kwaamba kuti imakala aacikozyanyo aaya aamba kusubula naa kusampaula sikukazya. Muciindi caboobo, imajwi aali mukasimpi amajwi aa Paulo ngaakalembela bana Roma, kulibonya kuti aamba nzila njobakali kubelesya kaindi kunyengulula zibulo. Syaabusongo umwi wiitwa kuti Charles Bridges wakali kupona mumwaanda wamyaka wa 19 wakaamba kuti: “Amucibikke mumulilo cibulo icikatazya kunyenguluka; kutali kucibikka buyo atala amulilo. Mbasyoonto bayumu myoyo cakuti nokuba kuti ulabakkazikila moyo, walyaaba kubabelekela naa kubacitila zyintu zibotu, tabakonzi kucinca pe.”
6 Mbubwenya mbuli “makala aamulilo,” kucita zyintu calubomba kulakonzya kupa kuti basikukazya bacince akuleka kupenzya babelesi ba Leza. Alimwi kulakonzya kubapa kuti batalike kubayanda bantu ba Jehova akuzumina makani aamu Bbaibbele ngobakambauka. Imwaapostolo Petro wakalemba kuti: “Amujatisye kweenda kwanu kubotu akati kabamasi, kuti nobamusendaula sunu kuti muli babi, bakamulemye Leza kubuzuba bwakulingula nkaambo kakulangilila milimo yanu mibotu.”—1 Pet. 2:12.
“Amukalane Abantu Boonse Caluumuno”
7. Ino nduumuno luli buti Kristo ndwaakasiila basikwiiya bakwe, alimwi lweelede kutukulwaizya kucita nzi?
7 Amubale Ba-Roma 12:18. Kali abaapostolo bakwe Jesu katanafwa imangolezya ibuzuba bwamamanino, wakabaambila kuti: “Ndamusiila luumuno, ndamupa luumuno lwangu.” (Joh.14:27) Luumuno Kristo ndwaakabasiila basikwiiya bakwe nkukkalikana mumizeezo nkobaba ankuko ciindi nobazyiba kuti balayandwa a Jehova Leza alimwi a Mwanaakwe. Kukkalikana ooku kweelede kutukulwaizya kukkala abantu muluumuno. Banakristo beni-beni balaluyanda luumuno alimwi balasolekesya kukkala abamwi muluumuno.—Mt. 5:9.
8. Ino mbuti mbotukonzya kuba aluumuno mumukwasyi alimwi amumbungano?
8 Inzila imwi mbotukonzya kuba aluumuno mumukwasyi njakufwambaana kubandika kaambo kaleta mazwanga ikutali kulindila mane zyintu zyabija. (Tus. 15:18; Ef. 4:26) Oobu mbokweelede kucitwa amumbungano ya Banakristo. Imwaapostolo Petro utondezya kuti ikuba aluumuno kuliswaangene akulubelesya kabotu lulimi. (1 Pet. 3:10, 11) Awalo Jakobo naakamana kupa lulayo kujatikizya kubelesya kabotu lulimi alimwi akuleka bbivwe akukazyanya, wakalemba kuti: “Busongo buzwa kujulu, lutaanzi bulasalala, alimwi mbwaluumuno, bulatontola, bulibombede, bulizwide lweetelelo amicelo mibotu, tabujisi lwaanzaano lwamoyo niluba luupaupo ameso. Alimwi basiluumuno basyanga muluumuno balatebula micelo yabululami.”—Jak. 3:17, 18.
9. Notusoleka ‘kukkala abantu boonse caluumuno,’ ino ncinzi ncotweelede kuyeeya?
9 Mumajwi aakwe aali kulugwalo lwa Ba-Roma 12:18, Paulo utondezya kuti ikuba aluumuno takugoleli buyo mumukwasyi amumbungano pe. Waamba kuti tweelede ‘kukkala abantu boonse caluumuno.’ Eeci cilabikkilizya abasimukoboma, babelesima, basicikoloma abaabo mbotukambaukila. Mwaapostolo Paulo wakatondezya mpotweelede kugolela mukuba aluumuno naakati: “Anooli kwakonzeka, nkukuti mbuli mbumukonzya nubeni.” Eeci citondezya kuti tweelede kusolekesya kusikila mpotugolela ‘kukkala abantu boonse caluumuno,’ pele ikutali kusikila akutyola milawo ya Leza.
Jehova Nguweelede Kubeteka
10, 11. Ino mbuti ‘mbotulekela bukali bwa-Leza busena,’ alimwi ino nkaambo nzi ncotweelede kucita boobo?
10 Amubale Ba-Roma 12:19. Nokuba kuli “baabo bakazya makani” kubikkilizya abaabo batusulide, tweelede “kubosya moyo” akucita zyintu “camoyo mubombe.” (2 Tim. 2:23-25) Paulo ulailila Banakristo kuti tabeelede kuliya inkoto, pele “[ba]lekele bukali bwa-Leza busena.” Swebo Tobanakristo tulizyi kuti tatuli ndiswe tweelede kubeteka. Sintembauzyo wakalemba kuti: “Leka kunyema, sowa bukali. Utalipenzyi, nkaambo kulaleta bubi buyo.” (Int. 37:8) Awalo Solomoni wakalailila kuti: “Utaambi kuti, Njoobweedezya bubi; Lindila Jehova, kuti akugwasye.”—Tus. 20:22.
11 Ikuti naa basikutukazya batucisa, tweelede kulekela buyo Jehova kuti abasubule muciindi cakwe. Ikutondezya kuti Paulo wakali kayeeyede kaambo aaka, wakayungizya kuti: “Kulilembedwe kuti, Lubeteko ndulwangu, mebo njoobweedezya, mbwaamba Jehova.”” (Amweezyanisye Deuteronomo 32:35.) Ikusola kuliya inkoto naa kujosya cibi kucibi inga kwaba kulisumpula, kucita cintu Jehova ncaamba kuti walo nguuyelede kucicita. Alimwi inga caboneka kuti tatumusyomi Jehova iwakasyomezya kuti: “Njoobweedezya.”
12. Ino ndiilili bukali bwa Jehova nobuya kuyubununwa, alimwi muunzila nzi?
12 Kumatalikilo aalugwalo ndwaakalembela bana Roma, Paulo wakaamba kuti: “Bukali bwa-Leza buzwa kujulu buli mukuyubunwidwa kami-kami akutalulama koonse kwabantu basinkila buswini kukutalulama kwabo.” (Rom. 1:18) Bukali bwa Leza buyakuyubununwa kuzwa kujulu kwiinda mu Mwanaakwe ciindi “[ca]mapenzi aayo mapati.” (Ciy. 7:14) Eeci “[ciyaku]tondezya kubeteka kwa-Leza kululeme,” kweelana ambwaakaamba Paulo mulugwalo lumbi, naakati: “Nkaambo kakuti kumeso aa-Leza kuliluleme kubweedezya mapenzi kulibaabo abamupenzya, pele nywebo nomupenzegwa uyoomupa kulyookezya, antoomwe aswebo, kuciindi cakuyubunuka kwa-Mwami Jesu kuzwa kujulu. Uyooyubunuka antoomwe abaangelo bakwe basinguzu, abbalabala lyamulilo, nkabela uyoobwedezya muliyano kulibaabo abatamuzi Leza akutaswiilila Makani Mabotu aa-Mwami wesu Jesu.”—2 Tes. 1:5-8.
Amuzunde Bubi Kwiinda Mukucita Zyintu Zibotu
13, 14. (a) Ino nkaambo nzi ncotutagambwi notukazyigwa? (b) Ino mbuti mbotukonzya kubalongezya aabo batupenzya?
13 Amubale Ba-Roma 12:14, 21. Ikuti katusyoma kuti Jehova uyakwaazuzikizya makanze aakwe, tulabikkila maano kubeleka mulimo ngwaakatupa kuti tuucite—kukambauka “Makani Mabotu aa-Bwami . . . munyika yoonse.” (Mt. 24:14) Tulizyi kuti ooyu mulimo wa Bunakristo ulabanyemya basinkondoma, nkaambo Jesu wakaamba kuti: “Muzoosulwa kumisyobo yoonse nkaambo kazina lyangu.” (Mt. 24:9) Aboobo tacitugambyi naa kututyompya ikuti bantu batukazya. Imwaapostolo Petro wakalemba kuti: “Nomuyandwa mutagambi aamasukusyo aayaka mbuli mulilo aamusikila kuti musukusigwe ngao. Mutayeeyi kuti mwasikilwa cintu ceenzu, pe, nkaambo mwaba bapenzinyina Kristo.”—1 Pet. 4:12, 13.
14 Muciindi cakubasula basikutupenzya, tulasola kubayiisya nkaambo tulizyi kuti bamwi balatupenzya akaambo kakutazyiba. (2 Kor. 4:4) Tulasolekesya kutobela lulayo lwa Paulo lwakuti: “Amubalongezye abo bamupenzya, ee, amubalongezye, mutatuki pe.” (Rom. 12:14) Nzila imwi mbotukonzya kubalongezya basikutupenzya nkubapailila. Mumulumbe wakwe waa Cilundu, Jesu wakaamba kuti: “Amuyande basinkondonyoko, mubacitile kabotu abamusulide, mubalongezye abamutukana, mubakombele abamuvwiya.” (Lk. 6:27, 28) Kwiinda mucintu cakamucitikila, mwaapostolo Paulo wakalizyi kuti muntu uupenzya Banakristo ulakonzya kucinca akuba sikwiiya wa Kristo uusyomeka alimwi akuba mubelesi wa Jehova musungu. (Gal. 1:13-16, 23) Mulugwalo lwakwe lumbi, Paulo wakaamba kuti: “Ciindi ncitwaambilwa cisapi tulalumba, aciindi ncitupenzegwa tulaumuna buyo, nkabela ciindi ncitutukilwa tulakombelezya.”—1 Kor. 4:12, 13.
15. Ino ninzila nzi mbotu iikonzya kutupa kuti tuzunde cibi akucita cibotu?
15 Aboobo, Imunakristo uusyomeka ulaatobela majwi aali mukapango kamamanino ku Ba-Roma caandaano 12: “Utazundwi kububi pe, uzunde bubi kukucita bubotu.” Matalikilo aabubi boonse ngu Saatani Diabolosi. (Joh. 8:44; 1 Joh. 5:19) Muciyubunuzyo, Jesu wakaambila mwaapostolo Johane kuti ibanyina bananike “bakamuzunda [Saatani] kubulowa bwa-Mwanambelele akujwi lyabumboni bwabo.” (Ciy. 12:11) Eeci citondezya kuti inzila mbotu yakuzunda Saatani ameeneeno aakwe ngabelesya mubweende bwazyintu oobu, nkuzumanana kucita cibotu kwiinda mukukambauka makani mabotu aa Bwami.
Amube Abulangizi Cakukondwa
16, 17. Ino lugwalo lwa Ba-Roma caandaano 12 lwatuyiisya nzi kujatikizya (a) mbotweelede kubelesya buumi bwesu? (b) mbotweelede kucita zyintu mumbungano? (c) mbotweelede kukkala abantu bakazya lusyomo lwesu?
16 Ikulanga-langa caandaano 12 calugwalo Paulo ndwaakalembela Banakristo bana Roma kwatuyeezya zyintu zinji. Twaiya kuti mbotuli babelesi ba Jehova tweelede kulyaaba. Kwiinda mukukulwaizyigwa amuuya uusalala, tulalyaaba nkaambo tusyoma kuti oobu mbwayanda Leza kuti tucite. Tulapya mumoyo akaambo kamuuya uusalala alimwi tulazibelesya zipego zyesu ziindene-indene cabusungu. Tubelekela Leza cakulibombya akulilesya alimwi tulasoleka kukamantana a Banakristo. Tulasamausya beenzu alimwi akubafwida luzyalo.
17 Lugwalo lwa Ba-Roma caandaano 12 alimwi lulijisi malailile manji kujatikizya mbotweelede kucita notukazyigwa. Tatweelede kujosya pe. Ciindi notukazyigwa, tweelede kucita zyintu calubomba. Kusikila mpotugolela alimwi kakunyina kutyola milawo ya Leza, tweelede kukkala abantu boonse caluumuno. Oobo mbotweelede kucita mumukwasyi, mumbungano, notuli abasimukoboma, kumilimo, kucikolo alimwi anotuli mumulimo wakukambauka. Noliba leelo notupenzyegwa, tweelede kusoleka kuzunda cibi kwiinda mukucita cibotu nkaambo tulizyi kuti kubeteka nkwaa Jehova.
18. Ino zyintu nzi zyotatwe ziyandika izyaambwa kulugwalo lwa Ba-Roma 12:12?
18 Amubale Ba-Roma 12:12. Ikuyungizya waawo, Paulo waamba zyintu zyotatwe ziyandika. Mbwaanga tatukonzyi kuzicita zyintu zyoonse eezyi kakunyina kugwasyigwa a Jehova, imwaapostolo utukulwaizya kuti ‘tujatisye kukomba.’ Eeci ciyakutugwasya kutobela lulayo lwakwe lwakuti “amukakatile nikuba kuciindi camapenzi.” Camamanino, tweelede kugamika mizeezo yesu kuzisyomezyo zya Jehova zyabuumi butamani kujulu naa anyika kutegwa “[t]ube abulangizi cakukondwa.”
Kwiinduluka
• Ino tweelede kucita buti ciindi notukazyigwa?
• Ino muumbazu nzi motweelede kuba aluumuno, alimwi ino mbuti mbotukonzya kucita boobo?
• Ino nkaambo nzi ncotuteelede kuliya inkoto naa kujosya cibi kucibi?
[Mibuzyo yaciiyo]
[Cifwanikiso icili apeeji 8]
Ikugwasya basimukoboma kulakonzya kupa kuti baleke kutusulaika
[Cifwanikiso icili apeeji 9]
Sena mulasoleka kuba aluumuno mumbungano?