Ino Kulekelela Kwa Jehova Kwaamba Nzi Kulindinywe?
Ino Kulekelela Kwa Jehova Kwaamba Nzi Kulindinywe?
“Jehova! [ngu] Leza siluzyalo asibuuya uutafwambi kukalala, . . . uujatila milandu andeyo azibi.”—KUL. 34:6, 7.
AMUJANE BWIINGUZI
Ino Jehova wakacita nzi kujatikizya zibi zya Davida a Manase, alimwi nkaambo nzi?
Nkaambo nzi Jehova ncaakabelesya nzila njaakasala ciindi naakali kweendelezya cisi ca Israyeli coonse?
Mbuti mbotukonzya kulekelelwa a Jehova?
1, 2. (a) Ino Jehova wakali Leza uuli buti kucisi cabana Israyeli? (b) Mubuzyo nzi ngotutiilange-lange mucibalo eeci?
MUMAZUBA aa Nehemiya, kakamu kaba Levi kakazumina kuti bamausyi cakwiinduluka-induluka “bakakaka kuswiilila” milawo ya Jehova. Nokuba boobo, cakwiinduluka-induluka Jehova wakatondezya kuti ngu ‘Leza uuyandisya kulekelela, siluzyalo, sibuuya, uutafwambi kukalala.’ Muciindi ca Nehemiya, kulibaabo ibakapilukide kuzwa kubuzike, Jehova wakazumanana kubatondezya luzyalo.—Neh. 9:16, 17.
2 Umwi aumwi wesu ulakonzya kulibuzya kuti, ‘Ino kulekelela kwa Jehova kwaamba nzi kulindime?’ Kutegwa twiingule mubuzyo ooyu uuyandika kapati, atulange-lange Leza mbwaakabeendelezya baalumi bobilo ibakagwasyigwa akulekelela kwa Jehova—bami bobilo Davida a Manase.
ZIBI ZIPATI ZYA DAVIDA
3-5. Mbuti Davida mbwaakajatikizyigwa mucibi cipati?
3 Nokuba kuti Davida wakali mwaalumi uuyoowa Leza, wakacita zibi zipati. Zyobilo akati kazibi eezyi zyakali kujatikizya banabukwetene, Uriya a Bateseba. Zyintu zibyaabi izyakacitika akaambo kazibi eezyi, zyakabapenzya boonse bakajatikizyidwe. Nokuba boobo, Leza mbwaakamululamika Davida ciyubununa zinji kujatikizya kulekelela kwa Jehova. Amubone cakacitika.
4 Davida wakatuma basikalumamba bana Israyeli kuyoonyonyoona munzi mupati wabana Amoni, Raba. Munzi ooyu wakali kujwe aa Jerusalemu makkilomita aali 80, kutala aamulonga wa Jordano. Kali atala aaŋanda yakwe yabwami ku Jerusalemu, Davida wakabona Bateseba—mukamuntu—kasamba. Balumi bakwe tiibakaliko. Kwiinda mukulangilila Bateseba, Davida wakamunyomenena cakuti wakatuma muntu kuti akamulete kuŋanda yamwami, kwalo nkwaakacita bumambe anguwe.—2 Sam. 11:1-4.
5 Ciindi Davida naakazyiba kuti Bateseba wakalimitide, wakalailila kuti Uriya mulumaakwe apilusyigwe ku Jerusalemu kutegwa andiza inga woona amukaintu wakwe. Pele, nokuba kuti Davida wakasoleka kumukulwaizya Uriya kuti akoone kuŋanda yakwe, kunyina naakanjila muŋanda yakwe pe. Aboobo, mwami cakusisikizya wakalemba lugwalo kumupati wabasikalumamba kumwaambila kuti Uriya amubikke “mumundando mutaanzi wamunkondo inkali” alimwi akuti basikalumambanyina bapiluke musyule akumulekelezya. Uriya wakafwa munkondo mbubwenya mbwaakali kuyanda Davida. (2 Sam. 11:12-17) Lino cibi camwami cabumambe cakayungizyika kwiinda mukujaya mwaalumi uutakwe mulandu.
DAVIDA MBWAAKACINCA MOYO
6. Ncinzi Leza ncaakacita kujatikizya zibi zya Davida, alimwi ino eeci ciyubununa nzi kujatikizya Jehova?
6 Mubwini, Jehova wakazibona zyoonse zyakacitika. Kunyina cakasisidwe kulinguwe. (Tus. 15:3) Nokuba kuti mwami wakazikumukwata Bateseba, “cintu ncaakacita Davida cakabija loko mumeso aa-Jehova.” (2 Sam. 11:27) Aboobo, ncinzi Leza ncaakacita kukubisya kwa Davida kupati boobu? Wakatuma musinsimi wakwe Natani kuli Davida. Akaambo kakuti ngu Leza uulekelela, ambweni Jehova wakali kuyandaula nzila yakutondezya luzyalo. Eelo kaka ilakkomanisya nzila njaakabelesya Jehova! Kunyina naakamusinikizya Davida kwaamba zibi zyakwe, pele wakatuma Natani kuti akaambile mwami cikozyanyo cakali kutondezya mbozyakali zipati zibi zyakwe. (Amubale 2 Samuele 12:1-4.) Eelo kaka yakali nzila mbotu eeyi yakweendelezya kaambo kakatazya kapati!
7. Ncinzi Davida ncaakacita naakamvwa cikozyanyo ca Natani?
7 Cikozyanyo ca Natani cakapa mwami kuyandisya kucita zyintu cabululami. Davida wakanyema kapati akaambo kamwaalumi wamucikozyanyo alimwi wakaambila Natani kuti: “Ncobeni oyo muntu iwakacita obo uleelede kufwa.” Kuyungizya waawo, Davida wakaamba kuti ooyo wacitilwa cakutalulama weelede kubbadelwa akaambo kazyintu nzyaasweekelwa. Pele lino lyakasika penzi. Natani wakamwaambila kuti: “Nduwe omwini.” Kumane Davida wakaambilwa kuti akaambo kamicito yakwe, “ipanga” tiilyakali kuyoozwa kuŋanda yakwe alimwi amapenzi akali kuyoosikila mukwasyi wakwe. Alimwi wakali kuyakupenzyegwa mubuleya akaambo kazibi zyakwe. Davida wakabona mbocakali cipati cibi ncaakacita alimwi cakuusa wakazumina kati: “Ndabisya kuli-Jehova.”—2 Sam. 12:5-14.
MUPAILO WA DAVIDA ALIMWI AKULEKELELA KWA LEZA
8, 9. Mbuti majwi aajanika ku Intembauzyo 51 mbwaayubununa mbwaakali kulimvwa Davida, alimwi ino atuyiisya nzi kujatikizya Jehova?
8 Majwi aanyimbo njaakaimba Mwami Davida nikwakainda ciindi ayubununa mbwaakauside mumoyo. Muntembauzyo 51 mujanwa kulomba kwa Davida kuli Jehova alimwi kutondezya kuti wakacita zinji kutali buyo kuzumina zibi zyakwe. Alimwi wakeempwa kuzibi zyakwe. Ikapati Davida wakali kulibilika kujatikizya cilongwe cakwe a Leza. Wakalyaambilila kati: “Nduwe olike ngundabisizya.” Wakakombelezya Jehova kuti: “Undipe moyo uusalala, O Leza; Ulengulule muuya uululeme mukati kangu. . . . Undiboozezye lukondo lwalufutuko lwako, akundipa moyo wabusungu wakundiyumya.” (Int. 51:1-4, 7-12) Sena mulasyomeka nimwaambaula a Jehova kujatikizya kulezya kwanu?
9 Jehova taakwe naakazigwisya zyintu zibi zyakacitikila Davida akaambo kakubisya kwakwe. Zyakali kuyakuzumanana kucitika mubuumi bwakwe boonse. Nokuba boobo, akaambo kakuti Davida wakeempwa—wakajisi “moyo uupengede akweempwa”—Jehova wakamulekelela. (Amubale Intembauzyo 32:5; Int. 51:17) Leza Singuzuzyoonse ulamvwisya bwini mbwazibona zyintu muntu alimwi amakanze aakwe kujatikizya zibi. Muciindi cakulekela basimamambe aaba kuti bapegwe cisubulo calufwu kwiinda mukubetekwa ababetesi bantunsi kweelana a Mulawo wa Musa, Jehova caluzyalo wakanjilila mumakani aaya, akubeendelezya nguwe ba Davida a Bateseba. (Lev. 20:10) Alimwi buya Leza wakabikka mwanaabo Solomoni kuba mwami iwakatobela wa Israyeli.—1 Mak. 22:9, 10.
10. (a) Ntwaambo nzi tulibonya kuti ntotwakapa kuti Jehova amulekelele Davida? (b) Nzyintu nzi zipa kuti Jehova kalekelela?
10 Ambweni kaambo kambi kakapa kuti Jehova amulekelele Davida, nkakuti Davida wakatondezya luzyalo kuli Saulo. (1 Sam. 24:4-7) Kweelana ambwaakapandulula Jesu, Jehova ulatweendelezya mbubwenya mbotweendelezya bamwi. Jesu wakaamba kuti: “Amuleke kubeteka kutegwa mutabetekwi, nkaambo lubeta ndomubetesya, ndomuyoobetesyegwa andinywe, acipimyo ncomubelesya kupimina bamwi, ncobayoobelesya kumupimina andinywe.” (Mt. 7:1, 2) Eelo kaka cilakatalusya kuzyiba kuti Jehova uyakutulekelela zibi zyesu—niziba zibi zipati mbuli bumambe naa kujaya! Uyakucita oobo kuti katujisi muuya wakulekelela, kuti tweempwa zibi zyesu kulinguwe, alimwi kuti twatondezya kuti twacinca mizeezo kuzwa kumicito mibi. “Ziindi zyakukatalukwa” zizwa kuli Jehova ciindi basizibi nibeempwa camoyo woonse.—Amubale Milimo 3:19.
MANASE WAKABISYA KAPATI PELE WAKEEMPWA
11. Muunzila nzi Mwami Manase mwaakacita zyintu zibi mumeso aa Leza?
11 Atulange-lange acimwi cibalo camu Magwalo icitondezya Jehova mbwalibambilide kulekelela. Myaka iibalilwa ku 360 kuzwa Davida naakatalika kulela, Manase wakaba mwami wa Juda. Bulelo bwakwe bwamyaka iili 55 bwakalizyibidwe kapati akaambo kabubi, alimwi micito yakwe iisesemya yakapa kuti asinganizyigwe kuli Jehova. Akati kazyintu zibi nzyaakacita, Manase wakabamba zipaililo zya Baala, wakali kukomba “makamu makamu aakujulu,” wakainzya bana bakwe mumulilo alimwi wakali kusumpula bulozi. Inzya, “wakacita bubi bunji mumeso aa-Jehova.”—2 Mak. 33:1-6.
12. Mbuti Manase mbwaakapiluka kuli Jehova?
12 Mukuyakwaciindi, Manase wakabwezegwa kuzwa kumunzi wakwe kuya kuntolongo yabana Babuloni. Okuya weelede kuti wakaayeeya majwi aa Musa ngaakaambila bana Israyeli kuti: “Nemunooli mumapenzi, amakani aya oonse naayoomusikila, kumamanino aaciindi muyooboola kuli-Jehova Leza wanu akuswiilila ijwi lyakwe.” (Dt. 4:30) Manase wakapiluka kuli Jehova. Munzila nzi? ‘Wakalibombya loko’ alimwi ‘wakazumanana kukomba’ kuli Leza (mbubwenya mbokutondezyedwe apeeji 21). (2 Mak. 33:12, 13) Majwi eeni ngaakaamba Manase mumipailo eeyo taalembedwe, pele tulakonzya kuyeeyela kuti munzila zimwi akali kozyenye amajwi aa Mwami Davida, aalembedwe mu Intembauzyo 51. Kufwumbwa mbocakabede, moyo wa Manase wakacinca cakumaninina.
13. Nkaambo nzi Jehova ncaakamulekelela Manase?
13 Ino Jehova wakayiingula buti mipailo ya Manase? “Wakakombelezegwa [a]nguwe [Manase], waswiilila cikombyo cakwe.” Mbubwenya mbuli Davida iwakamutaangunina, Manase wakabona kuti zibi zyakwe nzipati alimwi wakeempwa ncobeni. Nkakaambo kaako Leza wakamulekelela Manase akumupilusya acuuno cabwami mu Jerusalemu. Akaambo kaceeci, “Manase wakaziba kuti Jehova ngu-Leza.” (2 Mak. 33:13) Eelo kaka cilakkomanisya kuba abumboni bumbi bwakuti Leza wesu siluse ulabalekelela aabo ibeempwa ncobeni!
SENA KULEKELELA KWA JEHOVA TAKUGOLI?
14. Ncinzi citondezya kuti Jehova ulakonzya kubalekelela basizibi?
14 Mbasyoonto akati kabantu ba Leza ibayakuyandaula kulekelelwa zibi zipati mbuli zya Davida alimwi a Manase. Pele ikaambo kakuti Jehova wakabalekelela bami aaba bobilo katugwasya kuzyiba kuti Leza wesu ulayanda kulekelela noziba zibi zipati kuti sikubisya weempwa ncobeni.
15. Ino tuzyi buti kuti talili lyoonse Jehova nalekelela?
15 Cakutadooneka, tatukonzyi kwaamba kuti Jehova ulalekelela zibi zyabantu boonse kakunyina akulanga-langa makani aajatikizyidwe. Aboobo, atweezyanisye muuya wakatondezya Davida a Manase alimwi abantu bakazanga mu Israyeli alimwi a Juda. Leza wakatuma Natani kuli Davida akumupa coolwe cakuti acince. Davida wakalumba kucoolwe eeci. Ciindi Manase naakali mumapenzi, wakeempwa ncobeni. Nokuba boobo, bantu bamu Israyeli a Juda kanji-kanji tiibakali kweempwa. Aboobo, Jehova tanaakabalekelela. Muciindi caboobo, wakatuma basinsimi bakwe ziindi zinji kuti baambilizye mbwaakali kubabona akaambo kakutamvwida kwabo. (Amubale Nehemiya 9:30.) Noliba leelyo aabo ibakatoledwe mubuzike nobakapiluka kumunzi wabo kuzwa ku Babuloni, Jehova wakazumanana kutuma batumwa basyomeka, mbuli mupaizi Ezara alimwi amusinsimi Malaki. Ciindi bantu nobakacita kweelana akuyanda kwa Jehova, bakajana lukkomano kapati.—Neh. 12:43-47.
16. (a) Kujatikizya cisi ca Israyeli coonse, zyintu nzi zibi izyakabacitikila akaambo kakuteempwa kwabo? (b) Ncinzi cilangilwa kucitika kubaluzubo lwabana Israyeli bansiku umwi aumwi kumugama?
16 Jehova wakacileka kutambula zituuzyo zyabanyama bana Israyeli nzyobakali kutuula ciindi Jesu naakaboola ano anyika akupa cipaizyo cacinunuzyo cilondokede. (1 Jo. 4:9, 10) Kali muntu, Jesu wakatondezya mbobazibona zyintu Bausyi ciindi naakaamba majwi aapa kuyeeya aakuti: “Aakaka Jelusalemu, Jelusalemu, yebo oojaya basinsimi akubapwaya mabwe aabo batumwa kulinduwe—lyoonse ndakali kuyanda kufwukatila bana bako mbuli nkuku ntumbu mboifwukatila twana twanjiyo mumababa aayo! Pele nywebo nobantu tiimwakali kuyanda.” Aboobo, Jesu wakaamba kuti: “Amubone! Ŋanda yanu lyaba tongo alimwi yasiigwa kulindinywe.” (Mt. 23:37, 38) Aboobo, akaambo kakubisya akuteempwa, cisi cabana Israyeli cakanjililwa busena a Israyeli wakumuuya. (Mt. 21:43; Gal. 6:16) Pele mbuti kujatikizya muntu umwi aumwi waciinga cabana Israyeli bakumubili? Balatambulwa kutegwa bagwasyigwe akulekelela kwa Jehova alimwi aluzyalo lwakwe kwiinda mukusyoma Leza acipaizyo ca Jesu Kristo. Coolwe eeci alimwi ciyakupegwa akubantu bakafwa kabali basizibi balo ibayakubusyigwa munyika iisalazyidwe.—Joh. 5:28, 29; Mil. 24:15.
AMUGWASYIGWE AKULEKELELA KWA JEHOVA
17, 18. Mbuti mbotukonzya kulekelelwa a Jehova?
17 Ino tweelede kucita nzi twalanga mbwayandisisya kulekelela Jehova? Masimpe tweelede kucita mbobakacita ba Davida a Manase. Tweelede kukuzumina kubisya kwesu, kweempwa kukulubizya kwesu, kulomba kulekelelwa kuli Jehova camoyo woonse alimwi akumulomba kuti atusalazye mumoyo. (Int. 51:10) Kuti twacita cibi cipati, tweelede kulomba alimwi lugwasyo lwakumuuya kuzwa kubaalu. (Jak. 5:14, 15) Kufwumbwa bukkale motubede, cilaumbulizya kuzyiba kuti Jehova uli mbuli mbwaakalipandulula kuli Musa naakati—“Leza siluzyalo asibuuya uutafwambi kukalala, uuzwide luse alusyomo, uufwida bantu bali zyuulu luzyalo, uujatila milandu andeyo azibi.” Jehova tanaacinca pe.—Kul. 34:6, 7.
18 Kabelesya cikozyanyo cigwasya kapati, Jehova wakasyomezya bana Israyeli beempwa kubagwisyila tubala toonse twazibi zyabo, kupa kuti eezyo zyakali ‘kusalala pyu’ zitube buu mbuli “lukobo.” (Amubale Isaya 1:18.) Aboobo, ino kulekelela kwa Jehova caamba nzi kulindiswe? Caamba kulekelelwa cakumaninina zibi zyesu alimwi akulubizya lilikke buyo kuti twatondezya muuya wakulumba akweempwa.
19. Ino ncinzi ncotuyoolanga-langa mucibalo citobela?
19 Mbotuli basikutambula lulekelelo lwa Jehova, mbuti mbotukonzya kumwiiya muzyintu nzyotucita kuli umwi amweenzinyina? Mbuti mbotukonzya kutantamuka muuya wakutalekelela kujatikizya baabo ibacita zibi zipati pele ibatondezya kweempwa ncobeni? Cibalo citobela ciyakugwasya umwi aumwi wesu kulingula moyo wakwe kutegwa abe mbuli Taateesu, Jehova, walo ‘mubotu alimwi uufwamba kujatila.’—Int. 86:5.
[Mibuzyo yaciiyo]
[Cifwanikiso icili apeeji 24]
Akaambo kakulekelelwa a Jehova, Manase wakapilusyigwa acuuno cakwe cabwami mu Jerusalemu
