‘Mutatyompwi Pe’
‘Mutatyompwi Pe’
“Tutaleki pe kucita zibotu.”—GAL. 6:9.
INO INGA MWAINGULA BUTI?
Mbubambe nzi ibutugwasya kutegwa tuzumanane kuba basungu kukasimpe?
Mbuti kubikkila maano kubukombi bwesu mbokukujatikizya kujanika kwesu kumiswaangano?
Mbuti kusala kwesu mbokukonzya kutondezya naa tulaliyumya naa twatalika kutyompwa mumulimo wesu?
1, 2. Mbuti lusyomo lwesu mboluyumizyigwa kwiinda mukulanga-langa mbunga ya Jehova yamububumbo boonse?
CILAKKOMANISYA kapati kuzyiba kuti tuli cibeela cambunga yamu bubumbo boonse. Muzilengaano zilembedwe mulugwalo lwa Ezekiele caandaano 1 alimwi a Daniele caandaano 7 zilatondezya kabotu-kabotu Jehova mbwayendelezya zyintu munzila iigambya. Jesu nguusololela mbunga ya Jehova yaanyika kutegwa ibikkile maano kumulimo wakukambauka makani mabotu, kulanganya zyintu zyakumuuya zyabaabo ibacita mulimo ooyu, alimwi akusumpula bukombi bwakasimpe bwa Jehova. Eelo kaka eeci citupa kuba alusyomo luyumu kapati kumbunga ya Jehova!—Mt. 24:45.
2 Sena swebo kutugama tweendela antoomwe ambunga eeyi mbotu? Sena luyandisisyo lwesu lwakasimpe luyaabuvwula naa luyaabuceya? Ikuti twatalika kulanga-langa mibuzyo mbuli yeeyi, cilakonzya kutugwasya kuzyiba naa tucili basungu naa twatalika kutyompwa. Eeci inga cacitika. Mumwaanda wamyaka wakusaanguna, mwaapostolo Paulo wakakulwaizya Banakristonyina kutegwa balange-lange cikozyanyo ca Jesu. Paulo wakaamba kuti, kucita oobo kulakonzya kubagwasya kutegwa ‘batakatali akutyompwa.’ (Heb. 12:3) Mbubwenya buyo, kulanga-langa cibalo cainda cakusitikila, calo icitondezya mulimo uuli mukucitwa ambunga ya Jehova, kweelede kutugwasya kutegwa tuzumanane kuba basungu akuliyumya.
3. Ncinzi ciyandika ikuti naa katuyanda kuti tutatyompwi, alimwi ncinzi ncotutibandike mucibalo eeci?
3 Nokuba boobo, Paulo wakatondezya kuti kuli zinji ziyandika ikuti naa katuyanda kuti tutatyompwi. Wakaamba kuti tweelede kubeleka kutegwa ‘katucita zibotu.’ (Gal. 6:9) Aboobo, tweelede kubweza ntaamu swebo kutugama. Atulange-lange mbazu zyosanwe zyamulimo izikonzya kutugwasya kutegwa tuzumanane kusungwaala alimwi akuzumanana kweendelaamwi ambunga ya Jehova. Mpoonya twamana tweelede kulisalila tobamukamwini kutegwa tubone naa kuli mbazu nzyotweelede kubikkila kapati maano swebo naa mikwasyi yesu.
AMUSWAANGANE KUTEGWA MUKULWAIZYANYE AKUKOMBA
4. Nkaambo nzi ncotwaamba kuti kuswaangana antoomwe ncintu ciyandika kapati mubukombi bwakasimpe?
4 Kuswaangana antoomwe lyoonse wali mulimo uuyandika kapati kubabelesi ba Jehova. Kujulu kutalibonyi, zilenge zyamuuya zilatambwa kuboola kumbele lya Jehova muziindi zibikkidwe. (1 Bam. 22:19; Job. 1:6; 2:1; Dan. 7:10) Mu Israyeli wakaindi, cisi cabana Israyeli cakeelede kubungana ‘kuti baswiilile alimwi kuti baiye.’ (Dt. 31:10-12) Ba Juda bamumwaanda wamyaka wakusaanguna bakajisi cilengwa cakuunka kucikombelo kutegwa babale Magwalo. (Lk. 4:16; Mil. 15:21) Nociba ciindi mbungano ya Banakristo noyakatalika, kukulwaizya ooku kujatikizya kubungana antoomwe kwakazumanana, alimwi ncintu ciyandika kapati mubukombi bwesu. Banakristo bakasimpe ‘balabikkilana maano kutegwa bakulwaizyanye kutondezya luyando akucita milimo mibotu.’ Tweelede kuzumanana ‘kuyumizyanya umwi amweenzinyina, alimwi atuzumanane kucita boobo ikapati mbotubwene kuti buzuba bwa Jehova bwaswena afwaafwi.’—Heb. 10:24, 25.
5. Mbuti mbotukonzya kukulwaizyanya ciindi camiswaangano yesu?
5 Nzila yomwe motukulwaizyanya umwi amweenzinyina nkwiinda mukutola lubazu mumiswaangano yesu. Tulakonzya kwaamba abuleya kutondezya lusyomo lwesu kwiinda mukwiingula mibuzyo iisimbidwe, kwaamba mbolunga lwagwasya lugwalo, mubufwaafwi kuluula cimwi cakacitika citondezya mbocigwasya kutobela njiisyo zyamu Bbaibbele naa kubelesya nzila zimwi. (Int. 22:22; 40:9) Cakutadooneka, mulakonzya kuzuminizya kuti, kufwumbwa naa mwali kuswaangana kwamyaka yongaye, kuswaangana icili njenzila iikulwaizya kuswiilila kubwiinguzi buzwa aansi aamoyo bwabakwesu abacizyi—bana abapati.
6. Mbuti miswaangano yesu mboitugwasya kutegwa tuzumanane kuyuma kumuuya?
6 Ntwaambo nzi atumwi Leza wesu ntwaamba itutondezya kuti kuswaangana antoomwe kulayandika kapati? Miswaangano yesu yambungano, yaalubazu, yabbazu, ayacooko ilatugwasya kuba basicamba mukwaambaula alimwi amukuliyumya muzilawo zyesu notukazyigwa. (Mil. 4:23, 31) Tulayumizyigwa akuyuma mulusyomo kwiinda mumibandi yamu Magwalo. (Mil. 15:32; Lom. 1:11, 12) Kuyiisyigwa alimwi akukulwaizyanya nkotujana kumiswaangano yesu yakukomba, kulatugwasya kujana lukkomano lwini-lwini alimwi kutupa ‘kukatalukwa mumazuba aamapenzi.’ (Int. 94:12, 13) Kkomiti Iilanganya Ziyiisyigwa iya Kabunga Keendelezya njiilanganya bubambe boonse bwamapulogilamu aakumuuya aakubelesya mukulaya bantu ba Jehova nyika yoonse mbwiizulwa. Eelo kaka tweelede kulumba kububambe ibubikkilidwe ndiswe kutegwa katukkomana alwiiyo ndotutambula kumiswaangano yesu nsondo ansondo!
7, 8. (a) Ino miswaangano yesu yambungano ijisi makanze nzi aayandika kapati? (b) Ino miswaangano imugwasya buti kumuuya?
7 Nokuba boobo, kuli acimbi iciyandika kapati kwiinda kugwasyigwa nkotujana swebo tobeni kumiswaangano yesu. Cintu ciyandika kapati ncotuswaanganina antoomwe nkukomba Jehova. (Amubale Intembauzyo 95:6.) Eelo kaka tulijisi coolwe cipati cakutembaula Leza wesu mubotu! (Kol. 3:16) Jehova uleelede kukombwa lyoonse kwiinda mukujanika akutola lubazu kumiswaangano yabunaleza. (Ciy. 4:11) Nkakaambo kaako tukulwaizyigwa kuti ‘tutaleki kuswaangana antoomwe, mbuli bamwi ibajisi ciyanza eeci’!—Heb. 10:25.
8 Sena miswaangano yesu ya Bunakristo twiibona kuti mbubambe bubikkilidwe kutugwasya kuliyumya kusikila mane Jehova akanyonyoone bweende oobu bubyaabi bwazyintu? Ikuti kacili boobo, miswaangano inooli akati kazyintu “ziyandika kapati” cakuti tuyakujana ciindi cakuswaangana nokuba kuti tujisi bubi kapati. (Flp. 1:10) Aboobo, tatweelede kuleka kujanika kumiswaangano ccita kuti kakuli kaambo kapati.
AMUYANDAULE BAABO BAJISI MYOYO MIBOTU
9. Ino tuzyi buti kuti mulimo wakukambauka ulayandika kapati?
9 Kutola lubazu mumulimo wesu wakukambauka akwalo kulatugwasya kutegwa katweendela antoomwe ambunga ya Jehova. Jesu naakali anyika, wakautalisya mulimo ooyu. (Mt. 28:19, 20) Kuzwa leelyo, mulimo wa Bwami wakukambauka akugwasya bantu kuba basikwiiya wali ngomulimo ngoibikkila kapati maano mbunga ya Jehova yoonse. Zyakuluula zyamazuba aano zilasinizya kuti bangelo balagwasyilizya mumulimo ooyu akutusololela kuli baabo ‘bajisi myoyo mibotu.’ (Mil. 13:48; Ciy. 14:6, 7) Mbunga ya Jehova yaanyika mazuba aano ijisi makanze aakubamba akugwasyilizya mulimo ooyu uuyandika kapati. Sena andinywe ngomulimo ngomubikkila kapati maano mubuumi bwanu?
10. (a) Amupe cikozyanyo citondezya mbotukonzya kuzumanana kuba aaluyandisisyo lwakasimpe. (b) Mbuti mulimo wakukambauka mbowamugwasya kuti mutatyompwi?
10 Kuba basungu mumulimo wakukambauka kutugwasya kuzumanana kuba aaluyandisisyo lwakasimpe. Amubone ncaakaamba mukwesu Mitchel, imwaalu iwabeleka kwaciindi cilamfwu alimwi mupainiya waciindi coonse. Wakaamba kuti: “Ndilakkomana kapati kwaambila bamwi kasimpe. Ndilakkala aansi kuyeeya kujatikizya zibalo zipya izili mu Ngazi Yamulindizi naa Sinsimuka! akukkomana abusongo, luzyibo, ambwaagwasya makani aali mumagazini. Cindipa kuba aluyandisisyo lwakuunka mumulimo kutegwa ndibone mbobakonzya kwaatambula makani mabotu bantu, alimwi ambondikonzya kubagwasya kuba aaluyandisisyo. Mulimo wakukambauka ulandigwasya kuyuma. Ikuti kakuli zimwi zyintu ziyandika kucita, ndilasoleka canguzu kuti zitanyonganyi ciindi ncondibikkide cakuunka mumulimo wakukambauka.” Mbubwenya buyo, busungu bwesu mumulimo ooyu uusalala inga bwatugwasya kutegwa tuzumanane kuyaambele cakutazungaana mumazuba aano aamamanino.—Amubale 1 Bakolinto 15:58.
AMULYE CAKULYA CAKUMUUYA
11. Nkaambo nzi ncotweelede kulya cakulya cakumuuya coonse ncotutambula kuzwa kuli Jehova?
11 Jehova watupa zyakulya zinji zyakumuuya kwiinda mumabbuku kutegwa zituyumye. Cakutadooneka, mulakonzya kuyeeya ciindi nomwakabala makani amwi akuyeeya kuti: ‘Eeci ncencico ncindali kuyanda! Cili mbuli kuti Jehova walembela ndime!’ Eeci tacicitiki buyo cilikke. Kwiinda mububambe oobu, Jehova ulatusololela akutukwabilila. Wakaamba kuti: “Njookulaya akukutondezya inzila njoelede kutola.” (Int. 32:8) Sena tulasoleka kulya cakulya cakumuuya coonse ncotutambula akuzinzibala kuyeeya kujatikizya ncico? Kucita oobo kuyakutugwasya kutegwa tuzumanane kuzyala micelo akuyuma kumuuya mumazuba aano aakatazya.—Amubale Intembauzyo 1:1-3; 35:28; 119:97.
12. Ncinzi cikonzya kutugwasya kutegwa katubikkila maano kucakulya cakumuuya ncotupegwa?
12 Cilagwasya kapati kulanga-langa mulimo uujatikizyidwe mukubamba cakulya cakumuuya icigwasya kutegwa kaciliko lyoonse. Kkomiti Iilanganya Ziyiisyigwa iya Kabunga Keendelezya ilalanganya mulimo wakuvwuntauzya, kulemba, kwiinduluka kubala, kusala zifwanikiso, alimwi akusandulula mabbuku eesu aasimbwa alimwi amakani aajanika aa Web site yesu. Mitabi iisimba mabbuku ilatola mabbuku aayo kumbungano zili afwaafwi alimwi azili kulamfwu. Nkaambo nzi mulimo woonse ooyu ncoucitilwa? Kutegwa bantu ba Jehova kabalya kabotu kumuuya. (Is. 65:13) Atusungwaale mukulya cakulya cakumuuya coonse ncotutambula kuzwa kumbunga ya Jehova.—Int. 119:27.
AMUGWASYILIZYE BUBAMBE BWAMBUNGA
13, 14. Mbaani ibagwasyilizya bubambe bwa Jehova kujulu, alimwi mbuti mbotukonzya kucita oobo andiswe aano anyika?
13 Mucilengaano ncaakapegwa mwaapostolo Johane, Jesu ulitondezyedwe katantide bbiza lituba kuzunda baabo bazangila Jehova. (Ciy. 19:11-15) Eelo kaka eeci cilayumya lusyomo kuzyiba kuti kunze lya Jesu kuli bangelo basyomeka alimwi abananike ibakazunda nyika, ibakatambula kale bulumbu bwabo bwakujulu! (Ciy. 2:26, 27) Eelo kaka eeci ncikozyanyo ciinda kubota citondezya mbotweelede kugwasyilizya bubambe bwa Jehova!
14 Mbubwenya buyo, nkamu mpati ayalo ilagwasyilizya kapati mulimo wabanabokwabo Kristo ibananike ibacili anyika alimwi ibasololela mumbunga. (Amubale Zekariya 8:23.) Mbuti umwi aumwi wesu kumugama mbwakonzya kutondezya kuti ulagwasyilizya bubambe bwambunga? Nzila imwi nkwiinda mukumvwida baabo ibasololela. (Heb. 13:7, 17) Eeci ceelede kutalikila mumbungano yesu. Sena nzyotwaamba kujatikizya baalu zipa bulemu kuli mbabo amulimo ngobajisi? Sena bana besu tulabakulwaizya kuti kababalemeka baalumi aaba ibasyomeka akuti kabalanga kuli mbabo kutegwa bajane lugwasyo lwamu Magwalo? Kuyungizya waawo, sena tulabandika mbuli mukwasyi kutegwa tubone mbotukonzya kugwasyilizya mulimo wanyika yoonse kwiinda mukusanga? (Tus. 3:9; 1 Ko. 16:2; 2 Ko. 8:12) Sena mulimo wakusalazya akubamba Ŋanda ya Bwami kutegwa kailibonya kabotu tuubona kuba coolwe? Muuya wa Jehova ulabeleka kabotu ikuti bulemu alukamantano kaluliko. Kwiinda mumuuya ooyu, tulagwasyigwa kutegwa tutatyompwi mumazuba aano aamamanino.—Is. 40:29-31.
ATUPONE KWEELANA AMULUMBE WESU
15. Nkaambo nzi lyoonse ncotweelede kuzumanana kubeleka canguzu kutegwa katupona kweelana amakanze aa Jehova aasumpukide?
15 Camamanino, kutegwa tuliyumye akuzumanana kweendela antoomwe ambunga ya Jehova, tweelede kuzumanana kupona kweelana amulumbe ngotukambauka kwiinda ‘mukusinizya naa ncotucita cilatambulika ku Mwami.’ (Ef. 5:10, 11) Akaambo kakutalondoka alimwi akuyunga kwa Saatani anyika eeyi mbyaabi, lyoonse tulwana kuyungwa kubi mubuumi bwesu. Nobamwi bakwesu abacizyi nomuyandwa, abuzuba mulabeleka canguzu kutegwa muzumanane kuba acilongwe a Jehova. Kucita oobo kupa kuti muyandwe kapati anguwe. Mutaleki pe! Kupona kweelana amakanze aa Jehova kuyakupa kuti tukkutile akupa kuti bukombi bwesu butabi bwabuyo.—1 Ko. 9:24-27.
16, 17. (a) Ncinzi ncotweelede kucita ikuti twacita cibi cipati? (b) Mbuti mbotukonzya kugwasyigwa acikozyanyo caba Anne?
16 Ncinzi ncotweelede kucita ikuti twacita cibi cipati? Amulombe lugwasyo kakutanainda ciindi. Kusisa makani kuyakupa kuti penzi likomene. Amuyeeye kuti Davida wakaamba kuti ciindi naakasisa zibi zyakwe, ‘mubili wakwe wakali kuyaabumana, wakali kutongela buzuba boonse.’ (Int. 32:3) Inzya, kusisa cibi kuyakupa buyo kuti tukatale mumizeezo akumuuya, pele “oyo uulyaambawida akuleka ulafwidwa luzyalo.”—Tus. 28:13.
17 Amubone cikozyanyo caba Anne. * Ciindi ba Anne nobakajisi myaka yakuzyalwa iitandila ku 20, bakali kubeleka kabali mupainiya waciindi coonse. Nokuba boobo, bakatalika kupona buumi bwakuupa-upa ameso. Eeci cakabajatikizya kapati. Bakaamba kuti: “Manjezyeezya aangu akatalika kundipenzya. Lyoonse ndakali muntu uutakkomene alimwi ndakalityompedwe.” Ino bakacita buti? Bakaamba kuti bumwi buzuba kumiswaangano lugwalo lwa Jakobo 5:14, 15 lwakabandikwa. Ba Anne bakazyiba kuti bakeelede kugwasyigwa, aboobo bakaunka kumwaalu akulomba lugwasyo. Bakaamba kuti: “Ikuti ndalanga musyule, magwalo aayo musamu uusilika ngwapa Jehova kutegwa muntu apone kumuuya. Kunywa musamu ooyu tacili cuubauba, pesi ulagwasya. Ndakalutobela lulayo lujanwa mumagwalo aayo, alimwi ndakagwasyigwa.” Kwainda myaka, lino kabajisi busungu bupya, ba Anne alimwi mbasungu mukubelekela Jehova kabajisi manjezyeezya mabotu.
18. Ino tweelede kukanza kucita nzi?
18 Eelo kaka ncoolwe cipati kupona mumazuba aano aamamanino alimwi akuba cibeela cambunga ya Jehova mbotu kapati! Atuzibikkile maano zyintu eezyo nzyotujisi. Atubelekele antoomwe mbuli mukwasyi kutegwa katujanika lyoonse kumiswaangano akukomba antoomwe ambungano iili mubusena motukkala, kuyandaula baabo bajisi myoyo mibotu mucilawo cesu, alimwi akuzikkomanina zyakulya zyakumuuya nzyotutambula lyoonse. Atubagwasyilizye aabo ibasololela alimwi atupone kweelana amulumbe ngotukambauka. Ikuti twacita oobo, tunooyendela antoomwe ambunga ya Jehova alimwi tatukatyompwi mukucita zibotu pe!
[Bupanduluzi buyungizidwe]
^ munc. 17 Zyina lyacincwa.
[Mibuzyo yaciiyo]
[Cifwanikiso icili apeeji 27]
[Cifwanikiso icili apeeji 29]
[Kabbokesi kali apeeji 29]
MBUNGA YA JEHOVA YAANYIKA IBIKKILIZYA:
1. Kabunga Keendelezya
2. Makkomiti aa Mitabi
3. Balangizi beendeenda
4. Tubunga twabaalu
5. Mbungano
6. Sikumwaya umwi aumwi
[Cifwanikiso icili apeej 31]
Cabusungu amubagwasye bamwi kutegwa babone mbobakonzya kuba cibeela cambunga ya Jehova mpati
