Zilenge Zilatondezya Kuti Kuli Leza Uupona

“Uleelela, Jehova, O Leza wesu, ikutambula bulemu . . . nkaambo nduwe wakalenga zyintu zyoonse.”—CIY. 4:11.

INO INGA MWAINGULA BUTI?

Ncinzi ncotweelede kucita kutegwa tumwaye njiisyo zyakubeja “ziyumu nta”?

Mbuti zilenge mbozitondezya nguzu abusongo bwa Leza?

Mbuti bazyali mbobakonzya kubagwasya bana babo kuyumya lusyomo lwabo muli Jehova?

1. Ncinzi ncotweelede kucita kutegwa lusyomo lwesu kaluli luyumu lyoonse?

SYAANKALIBONENE kubuzya cilakatazya, oobo mbombubo mbobayeeya bantu banji ibaamba kuti basyoma buyo zyintu nzyobakonzya kubona ameso. Mbuti mbotukonzya kubagwasya bantu bali boobu kuba alusyomo muli Jehova? Kuyungizya waawo, Bbaibbele lyaamba kuti “kunyina muntu wakamubona kale Leza nociba ciindi comwe.” (Joh. 1:18) Mbwaanga tatukonzyi kumubona, ncinzi ncotukonzya kucita kutegwa lusyomo lwesu muli “Leza uutalibonyi,” Jehova, kaluli luyumu lyoonse? (Kol. 1:15) Ntaamu yakusaanguna nkuzyiba njiisyo zisinkila kasimpe kajatikizya Jehova. Mpoonya tweelede kucizyiba kubelesya kabotu Bbaibbele kutegwa tunyonyoone mizeezo yoonse ‘iikazyanya aluzyibo lwa Leza.’—2 Ko. 10:4, 5.

2, 3. Ninjiisyo nzi zyobilo izisinkila bantu kuti batazyibi kasimpe kajatikizya Leza?

² Njiisyo imwi yakubeja iisumpulwa kapati iisinkila bantu kukasimpe kajatikizya Leza ninjiisyo yakusanduka. Muzeezo ooyu wabuntu ukazya ncolyaamba Bbaibbele alimwi upa kuti bantu batabi abulangizi. Mubufwaafwi, njiisyo yakusanduka iyiisya kuti buumi bwakalitalikila buya; aboobo itondezya kuti buumi bwabantu tabujisi mpindu pe.

³ Kulubazu lumwi, basololi bazikombelo zya Bunakristo bwakubeja bayumu mitwe bayiisya kuti bubumbo, kubikkilizya anyika yesu alimwi azyintu zipona zyoonse zili mumo, zijisi buyo zyuulu zyamyaka zisyoonto kuzwa nozyakalengwa. Aabo ibayiisya njiisyo eeyi yakubeja iijatikizya kulengwa kwazyintu, balakonzya kuti balalilemeka Bbaibbele, pele baamba kuti Leza wakalenga zyintu zyoonse mumazuba aali cisambomwe aajisi mawoola aali 24 zyuulu zyamyaka zisyoonto buyo zyainda. Bantu ibasyoma njiisyo eeyi balabukaka bumboni boonse bulimvwisya bwabasayaansi ibukazyanya akuyeeya kwabo. Akaambo kaceeco, njiisyo eeyi yakubeja ipa kuti bantu bamwi cibayumine kulisyoma Bbaibbele, alimwi ipa kuti Bbaibbele lilibonye mbuli kuti lilakatazya kumvwa akuti taliluzi. Bantu ibasumpula mizeezo iili boobu batuyeezya zyabantu bamwi bamumwaanda  wamyaka wakusaanguna ibakali basungu kubelekela Leza “pele ikutali kweelana aluzyibo lwini-lwini.” (Lom. 10:2) Mbuti mbotukonzya kulibelesya Jwi lya Leza kutegwa tumwaye njiisyo zyoonse “ziyumu nta” zyakusanduka anjiisyo zyakubeja zijatikizya kulengwa kwazyintu? * Tulakonzya kucita oobo ikuti lwesu kutugama twabeleka canguzu kujana luzyibo lwini-lwini kweelana ancoliyiisya Bbaibbele.

LUSYOMO LWEELEDE KUYAAMA AABUMBONI ALIMWI ATWAAMBO TULIMVWISYA

4. Ino lusyomo lwesu lweelede kuyaama aanzi?

⁴ Bbaibbele lituyiisya kuyobola luzyibo. (Tus. 10:14) Jehova uyanda kuti lusyomo lwesu kaluyeeme aabumboni alimwi atwaambo tulimvwisya, kutali azyintu nzyobayiisya basyaabusongo naa tunsiya-nsiya twabasizikombelo. (Amubale Bahebulayo 11:1.) Kutegwa tuyake lusyomo lwesu muli Leza, cakusaanguna tweelede kusinizya kuti Jehova nkwali. (Amubale Bahebulayo 11:6.) Tulakonzya kucita oobo kutali kwiinda muzyintu zyakuyeeyela buyo, pele kwiinda mukulanga-langa twaambo twamasimpe alimwi ‘akubelesya maano.’—Lom. 12:1.

5. Nkaambo nzi komwe ikatondezya ncotweelede kusinizya kuti Leza nkwali?

⁵ Mwaapostolo Paulo ulapa kaambo komwe ncotweelede kusinizya kuti Leza nkwali nokuba kuti tatukonzyi kumubona. Kujatikizya Jehova, Paulo wakalemba kuti: “Bube bwakwe butalibonyi bulalibonya caantangalala kuzwa ciindi naakalenga nyika kuya kumbele, nkaambo bulabonwa muzyintu nzyalengede, noziba nguzu zyakwe zitamani akuti ngu Leza ncobeni.” (Lom. 1:20) Mbuti mbomukonzya kumugwasya muntu uudooneka kuti Leza nkwali kubona mbwaali aamasimpe majwi aakasololelwa amuuya ngaakaamba Paulo? Mulakonzya kulanga-langa bumboni bumwi butobela kuzwa kuzilenge ibuyubununa nguzu abusongo bwa Mulengi wesu.

NGUZU ZYA LEZA ZILALIBONYA MUZILENGE

6, 7. Mbuti nguzu zya Jehova mbozilibonya muzyintu zyobilo izitukwabilila?

⁶ Nguzu zya Jehova zilalibonya muzyintu zyobilo izitukwabilila—mulengalenga anguzu zikwela izili mumo. Mucikozyanyo, mulengalenga tautupi buyo muya ngotuyoya. Ulatukwabilila alimwi akuzyintu zinji zikonzya kutunyonyoona izili mujulu. Zibeela zyamabwe izyaanduka izikonzya kunyonyoona zyintu zinji zilapya zyanjila buyo mumulengalenga, akupa kuti kuboneke mumuni mubotu kapati mujulu masiku.

⁷ Azyalo nguzu zikwela izili munyika zilatukwabilila. Mukati mwini mwanyika momumo mozitalikila nguzu eezyi. Nguzu zikwela izitukwabilila mane zyaakusika amumulengalenga zizwa mumbali aacintu icili akati-kati kanyika icipangidwe abutale buteteete ibupya kapati. Nguzu eezyi izikwela zilatukwabilila kumumuni uunyonyoona uuzwa kuzuba alimwi akuzyintu zimwi zizwa kulindilyo. Mbwaanga nguzu eezyi zikwela zilatukwabilila, zyintu zyuumi izili anyika tazyuumpwi pe. Nguzu eezyi zilaukwela akuupilusya kujulu alimwi. Nguzu eezyi zikwela zilalibonya ciindi mumuni wamisyobo-misyobo nouboneka mujulu kunyika alimwi akumusanza. Cakutadooneka, Jehova ncobeni ‘ngusinguzu.’—Amubale Isaya 40:26.

BUSONGO BWA LEZA BULALIBONYA MUZILENGE

8, 9. Mbuti busongo bwa Jehova mbobulibonya kwiinda munzila yakucincanya zyintu kutegwa kakuli buumi?

⁸ Busongo bwa Jehova bulalibonya muzyintu zipa kuti katupona. Amubone cikozyanyo eeci: Amuyeeyele kuti mukkala mudolopo lijisi bantu banji lizungulukidwe abulambo pele litajisi nzila yakuletela maanzi mabotu naa yakusowela tombe. Cakutadooneka, dolopo lili boobu lilakonzya kuba atombe ncobeni akupa kuti bantu batacikonzyi kukkala mumo. Munzila imwi, nyika yesu eeyi ili mbuli dolopo eelyo lijisi bulambo. Maanzi aali mumo alakonzya kumana, alimwi tatukonzyi kusowa tombe mumulengalenga.  Nokuba boobo, nyika ilapa nzyoziyandika zilenge zyoonse kuti kazipona alimwi ilakonzya kucita oobo mane kukabe kutamani. Ino nkaambo nzi ncocili boobo? Nkaambo ilijisi nguzu zyakubambulula naa kucincanya zyintu ziyandika kutegwa kakuli buumi.

⁹ Mucikozyanyo atubone muya ngotuyoya uutegwa oxygen mboupangwa. Mabbiliyoni aazilenge zyuumi zilabweza muya ooyu ngotuyoya mpoonya alimwi zilagusya muya ngotuyoyela anze uutegwa carbon dioxide. Nokuba boobo, muya ngoziyoya zilenge eezyi taumani, alimwi mulengalenga taunyongani amuya uutali kabotu ngoziyoyela anze. Ino nkaambo nzi ncocili boobo? Akaambo kanzila iitegwa photosynthesis mwalo zisyango mozipanga zyakulya kwiinda mukubelesya mumuni. Kwiinda mukubelesya nzila eeyi, zisyango zilabweza muya ngotuyoyela anze, maanzi, mumuni kuzwa kuzuba, ambolezi akupanga zilyo zipa nguzu zitegwa carbohydrates alimwi amuya ngotuyoya. Ikuti twayoya muya ooyo, nkokuti kubambulula naa kucincanya ooko kwazulila. Munzila imwi inga twaamba kuti Jehova ubelesya zisyango nzyaakapanga ‘kupa bantu boonse buumi amuya.’ (Mil. 17:25) Eelo kaka busongo oobu bulagambya!

10, 11. Mbuti inkoonkolekwa asimweenzeenze mboziyubununa busongo bwa Jehova?

¹⁰ Busongo bwa Jehova alimwi bulalibonya muzyintu zinji nzyaakalenga aano anyika. Buvwuntauzyi bumwi ibwakacitwa butondezya kuti kuli zilenge zyuumi ziindene-indene izibalilwa ku 2 miliyoni kusika ku 100 miliyoni. (Amubale Intembauzyo 104:24.) Amubone busongo bwakwe kwiinda mukulanga-langa zilenge zyakwe zimwi.

¹¹ Mucikozyanyo, musyobo umwi wa inkoonkolekwa uutegwa monarch butterfly ujisi bongo busyoonto kapati ibuli mbuli kabbola kali kumpela kwini kwabboopeni. Nokuba boobo, inkoonkolekwa eeyi ilakonzya kulonga akweenda musinzo uulampa makkilomita aali 3,000 kuzwa kucisi ca Canada kuunka mubusena bumwi mucisi ca Mexico kwiinda mukugwasyigwa azuba kutegwa izyibe mbokweendwa. Ino icikonzya buti kucita oobo mbwaanga zuba inga taliimvwi abusena bomwe? Jehova wakapanga bongo bwankoonkolekwa busyoonto kapati kutegwa kabucikonzya kuzyiba nzila nokuba kuti zuba lyacinca. Amubone alimwi liso lyasimweenzeenze. Simweenzeenze ubelesya meso obilo. Nokuba kuti simweenzeenze ujisi bongo busyoonto kapati, ulakonzya kubona akumvwisya zyintu zinji loko zicitika notuba tuntu tusyoonto-syoonto kwiinda mukubelesya meso aakwe.

12, 13. Ncinzi cimugambya kujatikizya Jehova mbwakaapanga maseelo aapanga mubili wanu?

¹² Cilagambya kapati kubona Jehova mbwakaapanga maseelo aazyintu zyoonse izipona. Mucikozyanyo, mubili wanu ulijisi maseelo aabalilwa ku 100 tililiyoni. Mukati kaseelo imwi aimwi kuli kantu kamwi kali mbuli katambo kaniini kategwa DNA. Oomo momujanika makani manji aajatikizya bupange bwamubili wanu woonse.

¹³ Ino DNA ijisi makani manji buti? Tulakonzya kweezyanisya DNA iilema gilamu yomwe  ku CD yomwe. CD yomwe ilakonzya kuyobola makani oonse aajanika mubbuku lipandulula mabala, eeci cilagambya mbwaanga CD nkkapulasitiki buyo kapapalede. Nokuba boobo, DNA iilema gilamu yomwe ilakonzya kuyobola makani aakonzya kuyobolwa ama CD aabalilwa ku 1 tililiyoni! Munzila imwi ncotwaamba ncakuti, DNA yakayuma iikkwana akapunu kasyoonto ilakonzya kuyobola makani aakonzya kubelesyegwa kupanga bantu babalilwa ku 2.5 tililiyoni!

14. Ino zyintu nzyobajana basayaansi zimupa kulimvwa buti kujatikizya Jehova?

¹⁴ Mwami Davida wakapandulula malailile aayandika kupanga mubili wamuntu mbuli kuti alilembedwe mubbuku lyacikozyanyo. Wakaamba boobu kujatikizya Jehova Leza: “Meso aako akandibona nkencili insalalila; mubbuku lyako zizo zyangu zyoonse kazilembedwe, izyakali kucitwa buzuba bumwi abumwi, zyoonse kazitana kuboneka.” (Int. 139:16) Nkakaambo kaako tacikatazyi kubona kaambo Davida ncaakali kuyandila kutembaula Jehova naakabona mbuli mbwaakalengwa. Zyintu nzyobajana basayaansi kujatikizya mubili wamuntu zitupa kugambwa notuzinzibala kuyeeya twabona mbwaakatulenga Jehova. Zyintu eezyi nzyobajana basayaansi zitupa twaambo tumbi ncotweelede kwaazumina majwi aasintembauzyo iwakalemba kujatikizya Jehova kuti: “Njookulumba nkaambo kakugambya kwakulengwa kwangu. Milimo yako ilagambya; moyo wangu ulizi loko.” (Int. 139:14) Zilenge zituzingulukide zilapa bumboni buzulide buyubununa kuti kuli Leza uupona!

AMUBAGWASYE BANTU KULEMEKA LEZA UUPONA

15, 16. (a) Ino muunzila nzi mabbuku eesu mwaatugwasya kulumba Jehova akaambo kanguzu zyakwe zyakulenga? (b) Akati kazibalo zyakuti “Sena Cakalengwa Buya?” ncibalo nzi cakamukkomanisya kapati?

¹⁵ Kwamyaka minji, magazini ya Sinsimuka! yabagwasya bantu banji kwiiya kujatikizya Leza kwiinda muzyintu nzyaakalenga. Mucikozyanyo, magazini ya Sinsimuka! yamu Cingisi ya September 2006 yakajisi mutwe wakuti “Is There a Creator?” (Sena Kuli Mulengi?) Magazini eeyi yakabambilidwe kugwasya baabo ibasyoma njiisyo yakusanduka anjiisyo yakubeja iijatikizya kulengwa kwazyintu. Kujatikizya magazini eeyi yaalubazu, mucizyi umwi wakalembela ofesi yamutabi yaku United States kuti: “Mulimo wakwaabila magazini eeyi yaalubazu wakeenda kabotu loko. Umwi mukaintu wakandilomba mamagazini aali 20. Mukaintu ooyu mwiiyi uuyiisya ciiyo cazilenge zipona (biology) alimwi wakali kuyanda kuti bana bacikolo mbayiisya babe amagazini eeyi.” Mukwesu umwi wakalemba kuti: “Ndili musungu mumulimo wakukambauka kuzwa mumyaka yamuma 1940 alimwi lino ndili amyaka yakuzyalwa iitandila ku 75, pele kunyina nondakaukkomanina kale mulimo wakukambauka mbuli mbondaukkomanina mwezi uuno wakwaabila magazini eeyi yaalubazu ya Sinsimuka!”

¹⁶ Mumyaka buyo misyoonto yainda, mamagazini manji aa Sinsimuka! alikubikkilizya acibalo cijisi mutwe wakuti “Sena Cakalengwa Buya?” Zibalo eezyi izilembedwe mubufwaafwi zilatondezya zilenge mbozigambya alimwi abantu mbobasola kupanga zyintu kwiinda mukwiiya kuzyintu nzyaakalenga Mulengi wesu. Kuyungizya waawo, mumwaka wa 2010 twakatambula broshuwa yakuti Was Life Created? Zifwanikiso ziboneka kabotu izili mubroshuwa eeyi zyakabambilwa kutugwasya kulumba Jehova akaambo kanguzu zyakwe zyakulenga. Mibuzyo iijanika kumamanino aacibeela cimwi acimwi igwasya sikubala kuyeeyesya zyintu nzyaabala. Sena mwakaibelesya kale broshuwa eeyi mumulimo wabukambausi bwakuŋanda aŋanda, kubuleya naa bwamukwiizya?

17, 18. (a) Nobazyali, mbuti mbomukonzya kubagwasya bana banu kwiiminina lusyomo lwabo? (b) Sena mwakaabelesya kale mabroshuwa aamba zyakulengwa kwazyintu mukukomba kwanu kwamumukwasyi?

¹⁷ Nobazyali, sena mwakaibelesya kale broshuwa eeyi mbotu abana banu ciindi cakukomba mumukwasyi? Ikuti mwacita oobo, muyakubagwasya kulumba Leza akaambo kanguzu zyakwe zyakulenga. Andiza mulijisi bana bakubusi  bali kusekondali. Bantu ibayiisya njiisyo yakusanduka baliyandide kubanyonganya. Basayaansi, bamayi kucikolo, mafilimu aazilenge, azyintu zimbi buyo nzyobatondezya aacipekupeku zisumpula muzeezo wakuti zyintu zyakasanduka buya. Mulakonzya kubagwasya bana banu bakubusi kukazya mizeezo iili boobo kwiinda mukubelesya broshuwa imbi ayalo iyakamwaigwa mu 2010 yakuti, The Origin of Life—Five Questions Worth Asking. Mbubwenya mbuli broshuwa yakuti Was Life Created?, broshuwa eeyi ilabagwasya aabo bacili baniini kuba ‘amaano.’ (Tus. 2:10, 11) Ilabagwasya kubona mbobakonzya kucita kutegwa babone naa nzyobaiya kucikolo nzyamaano.

¹⁸ Broshuwa yakuti Origin of Life yakabambilwa kugwasya bana bacikolo kulanga-langa makani ngobakonzya kwaamba basayaansi aakuti kuli zyintu zimwi nzyobakajana izyakali kupona kaindi izitondezya kuti kusanduka kwakacitika ncobeni. Broshuwa eeyi ilabagwasya kubona naa ncobeni makani ngobaamba alasinizya kuti muntu wakazwa kuzilenge zimwi zyaansi kapati. Alimwi ilabagwasya kubona mbobakonzya kucita ikuti basayaansi baamba kuti buumi bwakatalika buyo cakutayeeyelwa. Nobazyali, ikuti mwaabelesya mabroshuwa aaya, mulakonzya kubagwasya kapati bana banu kucikonzya kwiingula ciindi bamwi nobababuzya kuti baambe kaambo ncobasyomena kuti Mulengi nkwali.—Amubale 1 Petulo 3:15.

19. Ncoolwe nzi ncotujisi swebo toonse?

¹⁹ Makani aakavwuntauzyigwa kabotu-kabotu ngotutambula kwiinda mumbunga ya Jehova alatugwasya kubona bube bwakwe bubotu muzilenge zituzingulukide. Bumboni oobu bulimvwisya butupa kutembaula Leza wesu. (Int. 19:1, 2) Eelo kaka tulijisi coolwe cakupa Jehova, Mulengi wazyintu zyoonse, bulemu alulemeko lumweelede!—1 Ti. 1:17.

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 7]

Zifwanikiso izili apeeji 9]

Busongo bwa Leza bulalibonya kwiinda mukulanga mbolyakalengwa liso lyasimweenzeenze; cifwanikiso icili mukati citondezya mboliboneka ikuti lyakomezyegwa

(Amubone muncali 11)

[Kulumba]

Cifwanikiso cili mukati: Boris Krylov, www.macro-photo.org

[Zifwanikiso izili apeeji 11]

Nobazyali, amubagwasye bana banu kwiiminina lusyomo lwabo

(Amubone muncali 17)