Kubelekela Leza Ngomusamu Wakwe!

Ciindi bapainiya bobilo nobakatambwa kunjila muŋanda imwi ku Kenya, bakagambwa kubona muntu mupati uujisi kabili kaniini kalede abulo. Muntu ooyo wakajisi kabili kaniini amaanza mafwaafwi. Nobakali kubandika anguwe kujatikizya cisyomezyo ca Leza caamba kuti “cilema unooya busotauka mbuli insya,” muntu ooyo wakakkomana kapati.—Is. 35:6.

Bapainiya aaba bakazikuzyiba kuti ba Onesmus, ibajisi myaka yakuzyalwa iitandila ku 40, bakazyalwa abulwazi bupa kuti mafuwa kaakomooka (osteogenesis imperfecta). Mafuwa aabo akali kukomooka-komooka—cakuti kunyamuna cintu cilema buyo asyoonto cakali kukonzya kupa kuti atyoke. Mbwaanga taakwe busilisi kubulwazi oobu, ba Onesmus bakali kulangila kuzumanana kupona mbubwenya oobu camapenzi-penzi kabeendela akacinga kabalema mane lufwu.

Ba Onesmus bakazumina kwiiya Bbaibbele. Nokuba boobo, banyina bakali kubakasya kuunka kumiswaangano ya Bunakristo, bakali kwaamba kuti eeci cilakonzya kupa kuti balicise alimwi akucisilwalimwi. Aboobo, bakwesu bakali kulekkooda miswaangano, mpoonya ba Onesmus bakali kuswiilila miswaangano eeyi kabali aŋanda. Nokwakainda myezi yosanwe kuzwa ciindi nobakatalika kwiiya Bbaibbele, ba Onesmus bakasala kuti kabaunka kumiswaangano nokuba kuti kucita boobo kwakali kulibikka muntenda.

Sena kujanika kumiswaangano ya Bunakristo kwakapa kuti bulwazi bwaba Onesmus bwiindile? Peepe. Ba Onesmus bakaamba boobu: “Ciindi camiswaangano zicisa zyakali kuceya.” Bakaamba kuti bulangizi bwabo bupya mbobwakali kubapa kulimvwa kabotu. Banyina baba Onesmus nobakabona kucinca kwabube bwamwanaabo, abalo bakazumina kwiiya Bbaibbele. Bakali kwaamba kuti: “Kubelekela Leza ngomusamu wamwanaangu.”

Tiilyakalampa, ba Onesmus bakaba basikumwaya batabbapatizyidwe. Mukuya kwaciindi, bakabbapatizyigwa alimwi lino mbakutausi mumbungano. Nokuba kuti tabacikonzyi kubelesya maulu aabo ajanza lyomwe, ba Onesmus bakali kuyandisisya kucita kufwumbwa ncobakonzya mumulimo wa Jehova. Bakali kuyanda kucita bupainiya bwakugwasyilizya pele bakali kuyoowa kulilembya. Ino nkaambo nzi? Nkaambo bakalizyi kuti kutegwa bacite mulimo ooyo bakeelede kweenzyegwa lyoonse amuntu umwi akacinga kabalema. Nobakaambila Banakristonyina icakali kubalibilisya, bakabasyomezya kuti bayakubagwasya. Bakacita oobo, kugwasya ba Onesmus kucita bupainiya bwakugwasyilizya.

Nobakayanda kucita bupainiya bwaciindi coonse, ba Onesmus bakatalika kulibilika apenzi ndemunya alimwi. Nokuba boobo, lugwalo lwabuzuba lumwi lwakabakulwaizya kapati. Majwi aayo akali kuzwa mulugwalo lwa Intembauzyo 34:8, ilwaamba kuti: “Amulabile, mubone kuti Jehova mubotu.” Nobakazinzibala kuyeeya kujatikizya lugwalo oolu, ba Onesmus bakasala kuba bapainiya baciindi coonse. Lino balakambauka mazuba one ansondo alimwi balasololela ziiyo zya Bbaibbele kubantu ibali mbobabede ibacita kabotu kumuuya. Mu 2010, bakanjila Cikolo Camulimo Wabapainiya. Ba Onesmus bakakkomana kapati kaka kubona kuti umwi akati kabamayi babo bobilo ngowakabaswaide ciindi cakusaanguna!

Bazyali baba Onesmus bakafwa, pele bakwesu abacizyi bamumbungano balabalanganya akubapa nzyobayandika abuzuba. Balalumba kapati kuzilongezyo zyoonse nzyobatambula kale, alimwi balangila kumbele ciindi nokutakabi muntu “naba omwe akati kabantu banyika uuamba kuti, ndaciswa.”—Is. 33:24.