CIINDI ba Pascal nobakali kukomena mucisi ca Côte d’Ivoire kubusena bumwi ikwakali bucete, bakali kulombozya buumi buli kabotu. Akaambo kakuti bakali basicisobano cakulwana amfwaindi batacizyi kapati, bakali kulibuzya kuti, ‘Nkuukuli nkondikonzya kujana coolwe cakuba sicisobano uujisi mpuwo akuvwuba kapati?’ Nobakajisi myaka yakuzyalwa iibalilwa kuma 20, bakasala kuunka ku Europe. Pele akaambo kakuti tiibakajisi mapepa aayandika mulweendo, nkokuti bakali kukonzya kunjila mu Europe kwiinda mukusotoka mulawo.

Mumwaka wa 1998 kabajisi myaka yakuzyalwa iili 27, ba Pascal bakatalika lweendo lwabo. Bakazabuka minyinza mucisi ca Ghana, Togo, Benin mane limwi bakasika mudolopo lya Birni Nkonni mucisi ca Niger. Lino bakeelede kweenda lweendo lukatazya kapati ilwakali kulangilwa kubaletela ntenda. Kutegwa basike cisi nkocili kunyika, bakeelede kutanta mootokala cakusisikizya kutegwa bazabuke nkanda ya Sahara Desert. Mpoonya basika ku Mediterranean, bakali kukonzya kutanta bwato kuunka ku Europe. Mbobakali kuyanda kucita oobo pele kwakacitika zyintu zyobilo mu Niger izyakabalesya kucita boobo.

Cakusaanguna, mali ngobakajisi akamana. Cabili bakaswaangana aba Noé, bapainiya, balo ibakatalika kwiiya Bbaibbele ambabo. Nzyobakaiya zyakabanjila kapati mumoyo akupa kuti bacince mbobakali kububona buumi. Bakatalika kubikkila maano kuzyintu zyakumuuya muciindi cakubikkila maano kuzyintu zyakumubili. Mu December 1999, ba Pascal bakabbapatizyigwa. Kutegwa batondezye kulumba kuli Jehova, bakatalika bupainiya mu 2001 mucisi ca Niger—mudolopo mumonya mobakayiila kasimpe. Ino balimvwa buti kujatikizya mulimo wabo? Bakaamba kuti, “Ndajana lukkomano lwini-lwini mubuumi!”

Mbubwenya mbuli ba Pascal, bantu banji bajana kuti kukkutila ncobeni kulajanwa kwiinda mukubikkila maano kumbaakani zyakumuuya. Kutegwa bazuzikizye mbaakani eezyo, bamwi balalonga kuzwa ku Europe akuunka ku Africa kutegwa bakabeleke mumasena imuyandika kapati bakambausi ba Bwami. Kweelana ambocibede, Bakamboni ibasika ku 65 kuzwa ku Europe—ibajisi myaka iili akati ka 17 a 70—bakalonga kuyakubelekela kubusena kubulide basikumwaya mbuli ku Benin, Burkina Faso, Niger alimwi a Togo izisi zili ku West Africa. * Ncinzi cakabakulwaizya kubweza ntaamu mpati boobu, alimwi ino zyakabeendela buti zyintu?

Ba Anne-Rakel baku Denmark bakaamba kuti: “Bazyali bangu bakabeleka kabali bamisyinali ku Senegal. Lyoonse bakali kukkomana kwaamba kujatikizya buumi mumulimo wabumisyinali cakuti ndakali kuyanda kupona buumi buli boobo.” Myaka iibalilwa ku 15 iyainda, ciindi ba Anne-Rakel nobakajisi myaka iinda buyo asyoonto ku 20, bakalongela ku Togo kwalo nkobabelekela mumbungano iibelesya mwaambo wakutambaika. Ino ntaamu njobakabweza yakabakulwaizya buti bamwi? Bakaamba kuti: “Mukuya  kwaciindi basyoonto bangu, musimbi amusankwa bakanditobela ku Togo.”

Ba Aurele, mukwesu uukwete uujisi myaka yakuzyalwa iili 70 wakucisi ca France wakaamba kuti: “Myaka yosanwe yainda ciindi nondakapegwa mali aapegwa muntu wakkwanya myaka yakucileka kubeleka, ndakeelede kusala: kukkala mu France akulindila Paradaiso noiyakusika naa kuyungizya mulimo wangu wakukambauka.” Ba Aurele bakasala kuyungizya mulimo wabo wakukambauka. Myaka iibalilwa kuli yotatwe iyainda, balo abakaintu babo ba, Albert-Fayette, bakalongela ku Benin. Ba Aurele bakaamba kuti: “Kulyaaba kubelekela Jehova okuno ncecintu ciinda kubota ncotwacita mubuumi.” Bakayungizya kuti: “Mbubwenya mbocakacitika, zibeela zyacilawo cesu mumbali aankomwe zindiyeezya Paradaiso.”

Ba Clodomir abakaintu babo ba Lysiane, bakalonga kuzwa ku France kuya ku Benin myaka iili 16 iyainda. Kumatalikilo, bakabazimba banamukwasyi abalongwe babo baku France, alimwi banabukwetene aaba bakali kulibilika kuti tabakonzyi kubuzyibila buumi bupya. Nokuba boobo kwakanyina kaambo ncobakeelede kulibilika. Bakajana lukkomano kapati. Ba Clodomir, bakaamba kuti: “Mumyaka eeyi iili 16, twajana coolwe cakugwasya muntu omwe amwaka kuti atambule kasimpe.”

Ba Sébastien aba Johanna, mbaanabukwetene ibakalongela ku Benin kuzwa ku France mu 2010. Ba Sébastien bakaamba kuti: “Kuli zyintu zinji zyakucita mumbungano. Kubelekela kokuno cili mbuli kujanika kucikolo cigwasya kuyungizya luzyibo mumulimo wa Leza!” Ino bantu bautambula buti mulumbe mumuunda? Ba Johanna bakaamba kuti: “Bantu balijisi nyota yakasimpe. Noliba leelyo notutali mumulimo wakukambauka, bantu balatwiimika mumugwagwa kutubuzya mibuzyo yamu Bbaibbele akubweza mabbuku.” Ino ntaamu njobakabweza yacijatikizya buti cikwati cabo? Ba Sébastien bakaamba kuti: “Cikwati cesu cayuma. Cilakkomanisya kubelekela antoomwe mumulimo abakaintu bangu buzuba boonse.”

Ba Eric abakaintu babo ba Katy, balabeleka kabali bapainiya mucisi ca Benin nkocili kunyika mubusena imuli bantu basyoonto pele ibatakkede mubusena bomwe. Myaka iibalilwa kukkumi iyainda, nobakali kukkala ku France, bakatalika kubala zibalo izijatikizya kubelekela kubusena kubulide alimwi akubandika ababelesi baciindi coonse. Eeci cakabapa kuba aluyandisisyo lwakuunka kumasi aambi, aboobo bakacita oobo mu 2005. Kuyaambele nkobakabona kulakkomanisya. Ba Eric baamba kuti: “Myaka yobilo iyainda, kabunga kesu mudolopo lya Tanguiéta kakajisi basikumwaya ibali 9; lino tuli 30. Mu Nsondo bantu babalilwa ku 50 a 80 balajanika kumuswaangano. Eelo kaka cilaletela lukkomano kapati ikubona mulimo mbowayaambele!”

Mbuyumuyumu nzi mbobajana bamwi ibabelekela kubusena kubulide basikumwaya? Ba Benjamini, ibajisi myaka yakuzyalwa iili 33, mbanabokwabo aba Anne-Rakel. Nobakali mucisi ca Denmark mu 2000, bakaswaanganya misyinali iwakali kubelekela mucisi ca Togo. Ba Benjamin bakaamba kuti: “Ciindi nondakamwaambila mukwesu iwakali misyinali kuti ndiyanda kucita bupainiya, wakaamba kuti: ‘Ulakonzya kuunka ku Togo kuyakucitila nkuko bupainiya.’” Ba Benjamin bakakkala ansi kwaayeeya makani aayo. Bakaamba kuti: “Ndakajisi buyo myaka yakuzyalwa iili 20 aciindi eeco, pele bacizyi bangu bobilo bakali kubelekela kale mu Togo. Eeci cakapa kuti cuube-ube kubatobela.” Aboobo, bakaunka. Nokuba boobo, kwakali buyumuyumu. Ba Benjamin bakaamba kuti: “Tiindakazyi bbala noliba lyomwe lyaci French. Cakali ciyumu kubandika abantu kwamyezi iili cisambomwe yakusaanguna.” Nokuba boobo, mukuya kwaciindi bakatalika kuuzyiba mwaambo ooyo. Ba Benjamin lino babelekela ku Bbeteli mucisi ca Benin, kutola mabbuku mumasena aasiyene-siyene akugwasyilizya mudipatimenti iilanganya makkompyuta.

Ba Eric aba Katy, ibaambidwe kale mucibalo cino, kabatanaunka ku Benin bakalibelekede kale mucilawo cibelesya mwaambo wakunze aacisi mu France. Ino nkwiindana nzi ikwakaliko nobakaunka ku West Africa? Ba Katy bakaamba kuti: “Cakali kukatazya kujana busena bubotu bwakukkala. Kwamyezi iili mbwiibede, twakali kukkala muŋanda iitakwe magesi amaanzi.” Ba Eric bakayungizya kwaamba kuti: “Mubusena motwakali kukkala, zilimba zyakali kupanga coongo kusikila akati kamasiku eeni. Bukkale buli boobu buyandika kukkazyika moyo alimwi akuba aaluyandisisyo lwakucinca.” Banabukwetene aaba bakati: “Lukkomano ndotwajana akaambo kakubelekela mubusena bantu banji mobatanamvwide mulumbe wa Bwami kutupa kuti tutabikkili maano kubuyumuyumu.”

Ba Michel aba Marie-Agnès, banabukwetene ibakazwa kucisi ca France ibajisi myaka iitandila kuma 60, bakalongela kucisi ca Benin myaka yosanwe yainda. Kumatalikilo, bakali kulibilika. Ba Michel bakaamba kuti bamwi bantu bakali kuyeeya kuti ntaamu njobakabweza yakali kubikka buumi muntenda. Bakayungizya kuti: “Kubweza ntaamu eeyo cakali kuyoosya kwaambisya ikuti kotazyi kuti Jehova ulaanduwe. Aboobo, twakabweza ntaamu eeyo akaambo ka Jehova alimwi kwiinda mukugwasyigwa anguwe.”

Aabo bakabelekela kale kubusena kubulide basikumwaya balatondezya mbociyandika kulibambila kwiinda mukutobela nzila eezyi: Kulibambilida limwi zyakumbele. Amulibambile kucinca. Amukakatile kumulongo uutondezya mbomweelede kubelesya mali. Amusyome Jehova.—Lk 14:28-30.

Ba Sébastien, ibaambwa kale musyule oomu baamba kuti: “Katutanalonga, ba Johanna andime twakayobola mali kwamyaka yobilo kwiinda mukucesya mali ngotwakali kubelesya muzyakulikondelezya alimwi akucesya kuula zyintu zitayandiki kapati.” Kutegwa bazumanane kubeleka mumulimo wakukambauka kunze aacisi, balabeleka kwamyezi  misyoonto mu Europe, calo cibapa kuti babeleke mulimo wa bupainiya mwaka woonse mu Benin.

Ba Marie-Thérèse bali akati kabacizyi ibatakwetwe ibali 20 ibakazwa kuzisi zimbi ibabelekela kubusena kubulide basikumwaya mu West Africa. Bakali kubeleka mulimo wakweenzya bbaasi mu France, nokuba boobo, mu 2006 bakapumuna kumulimo mwaka woonse kutegwa bacite bupainiya mu Niger. Tiilyakalampa pe, bakazikuzyiba kuti oobu mbobuumi mbobakali kuyanda kuti kabapona. Ba Marie-Thérèse baamba kuti: “Ciindi nindakajokela ku France, ndakalomba bakandilembede mulimo kuti kandibeleka mawoola masyoonto, aboobo bakazumina. Lino, kuzwa mu mwezi wa May kusikila mumwezi wa August, ndilabeleka mulimo wakweenzya bbasi mu France, mpoonya kuzwa mu September kusika mu April, ndilabeleka mulimo wabupainiya mu Niger.”

Aabo ‘ibasaanguna kuyandaula Bwami’ balakonzya kuba masimpe kuti Jehova uyakubapa ‘zyintu zimbi zyoonse ziyandika.’ (Mt. 6:33) Mucikozyanyo: Amubone cakacitikila ba Saphira, mucizyi uutakwetwe iwakazwa ku France uujisi myaka yakuzyalwa iitandila ku 30 alimwi uubeleka kali mupainiya mu Benin. Mumwaka wa 2011 bakapiluka kuya kucisi ca France kuyakubeleka kutegwa bakajane mali aayandika kubelesya mumulimo wabo mwaka umbi omwe (mwaka wacisambomwe) mu Africa. Ba Saphira bakaamba kuti: “Bwakali Bwasanu, buzuba bwangu bwamamanino kubeleka, nokuba boobo ndakali kuyandika kubeleka kwamazuba aali kkumi kutegwa mali aakubelesya kwamwaka omwe akkwane. Ndakaceede buyo ansondo zyobilo zyakukkala mu France. Ndakapaila kuli Jehova kumupandulwida bukkale bwangu. Nokwakainda buyo ciindi cisyoonto, kkampani imwi yakanditumina fooni kundilomba kuti ndinjile mubusena bwamuntu umwi kwansondo zyobilo.” Mu Muhulo, ba Saphira bakaunka kukkampani eeyo kutegwa muntu ngobakali kuyandika kujatila busena abayiisye mulimo. Bakaamba kuti: “Ndakagambwa kujana kuti wakali mucizyi Munakristo iwakali kuyanda mazuba aali kkumi aakulyookezya kutegwa akajanike Kucikolo Camulimo Wabupainiya! Bapati bamulimo bakakaka kubapa mazuba aakulyookezya ccita kuti bajana muntu wakali kukonzya kubeleka abusena bwabo. Bakamulomba Jehova kuti abagwasye—mbubwenya andime mbondakacitide.”

Bakwesu abacizyi bamwi babeleka mu West Africa myaka minji alimwi waba munzi wabo. Bamwi bakkala myaka misyoonto mpoonya akupiluka kucisi nkobazwa. Pele naaba mazuba aano, bantu bali boobo ibakabelekela kubusena kubulide basikumwaya bacikkomana abubotu mbobakajana mumyaka eeyo njobakabelekela kuzisi zyakulamfwu. Bakaiya kuti lukkomano lwini-lwini akukkutila zilaboola kwiinda mukubelekela Jehova.