Kwamyaka iili mbwiibede, mabbuku eesu alikupandulula kuti Gogo waku Magogo ndizina ndyaakapegwa Saatani Diabolosi kuzwa ciindi naakatandwa kujulu. Bupanduluzi oobu bwakayeeme akaambo ikajanika mubbuku lya Ciyubunuzyo ikatondezya kuti Saatani Diabolosi nguuyakusololela mukulwana bantu ba Leza nyika yoonse mbwiizulwa. (Ciy. 12:1-17) Aboobo, kwakali kuyeeyelwa kuti Gogo lyeelede kuba zina limbi lya Saatani lyabusinsimi.

Nokuba boobo, bupanduluzi oobu bwakapa kuti kube mibuzyo imwi iiyandika. Ino nkaambo nzi? Amubone kaambo aaka: Kujatikizya ciindi Gogo nayoozundwa, Jehova wakaamba kuti: “Ndiyookupa kuba cakulya camisyobo yoonse yabayuni balya nyama alimwi acabanyama bamusyokwe.” (Ezk. 39:4) Mpoonya Jehova wakayungizya kuti: “Mubuzuba oobo Gogo ndiyoomupa busena bwakuzikkilwa mucisi ca Israyeli . . . Oomo momumo mobayoomuzikkila Gogo amakamu aakwe oonse.” (Ezk. 39:11) Pele ino mbuti cilenge camuuya mbocikonzya kuligwa ‘abayuni balya nyama alimwi abanyama bamusyokwe’? Mbuti Saatani mbwakonzya kupegwa “busena bwakuzikkilwa” anyika? Bbaibbele lilasalazya kwaamba kuti Saatani uyakwaangwa myaka iili 1,000, kutali kuligwa naa kuzikkwa.—Ciy. 20:1, 2.

Twaambilwa kuti kumamanino aamyaka iili 1,000, Saatani uyakwaangununwa kuzwa mumulindi uutagoli, mpoonya “uyakuunka kuyakweena masi aayo aali muzyooko zyone zyanyika, nkokuti Gogo a Magogo, kuti akaabunganye antoomwe kunkondo.” (Ciy. 20:8) Pele mbuti Saatani mbwakonzya kweena Gogo ikuti kali ngonguwe Gogo? Aboobo, mubusinsimi bwa Ezekieli naa mubbuku lya Ciyubunuzyo “Gogo” iwaambwa tali Saatani pe.

Aboobo, ino nguni Gogo waku Magogo? Kutegwa tujane bwiinguzi kumubuzyo ooyu, tweelede kuvwuntauzya mu Magwalo kutegwa tuzyibe uuyoolwana bantu ba Leza. Bbaibbele talyaambi buyo kulwanwa a ‘Gogo waku Magogo’ pele alimwi lilaamba kujatikizya kulwanwa ‘amwami wakunyika’ alimwi akulwanwa “abami bamunyika.” (Ezk. 38:2, 10-13; Dan. 11:40, 44, 45; Ciy. 17:14; 19:19) Sena majwi aaya aamba kulwanwa kwiindene-indene? Peepe, takulibonyi boobo. Cakutadooneka, Bbaibbele lyaamba kulwanwa nkomunya kubelesya mazina aindene-indene. Ino nkaambo nzi ncotukonzya kwaamba boobu? Nkaambo kakuti Magwalo atwaambila kuti  masi oonse aamunyika ayoojatikizyigwa mukulwanwa ooku kwamamanino ikuyootalisya nkondo ya Amagedoni.—Ciy. 16:14, 16.

Ikuti tweezyanisya twaambo toonse ootu twamu Magwalo itujatikizya kulwanwa kwamamanino kwabantu ba Leza, tujana kuti izina lyakuti Gogo waku Magogo talyaambi Saatani pe, pele lyaamba nkamu yazisi. Sena nkamu yazisi eeyi iyakweendelezyegwa ‘amwami wakunyika’ wacikozyanyo? Tatukonzyi kwaamba cakusinizya. Pele muzeezo ooyu ulibonya kuti uleendelana ancaakaamba Jehova kujatikizya Gogo kuti: “Yebo uyooboola kuzwa kubusena bwako, kuzwa kumasena aakulamfwu ooko kunyika, yebo alimwi abantu banji ibalaanduwe, boonse buyo kabatantide mabbiza, inkamu mpati, inzya impi mpati yabasikalumamba.”—Ezk. 38:6, 15.

Mbubwenya buyo, musinsimi Daniele awalo iwakali musinsimi mumazuba aamusinsimi Ezekieli, wakaamba kujatikizya mwami wakunyika kuti: “Uyoomvwa makani kuzwa kujwe alimwi akuzwa kunyika aayoomunyonganya, eelyo uyakuunka kanyemede kapati kuti akanyonyoone alimwi akujaya bantu banji. Mpoonya uyoosimpa matente aakwe aabwami akati kalwizi lupati acilundu cisalala camu Cisi Cibotu Kapati; kumane uyoosika kumamanino aakwe, eelyo kunyina uuyoomugwasya.” (Dan. 11:44, 45) Majwi aaya aleendelana kabotu ancolyaamba bbuku lya Ezekieli kujatikizya nzyayoocita Gogo.—Ezk. 38:8-12, 16.

Ino ncinzi ciyootobela kulwanwa kwamamanino ooku? Daniele waamba kuti: “Kuciindi eeco Mikayeli [Jesu Kristo] uyakwiimikila [lyankondo ya Amagedoni], silutwe mupati ooyo wiimvwi [kuzwa mu 1914] kuti agwasye bantu bako. Eelyo kuyoosika ciindi camapenzi aayo aatanacitikide kuzwa ciindi nokwakaba cisi mane kusikila kuciindi eeco. Alimwi kuciindi eeco bantu bako bayoofwutuka, kufwumbwa muntu uuyoojanika kalembedwe mubbuku.” (Dan. 12:1) Makani aaya aajatikizya ncayoocita mwiiminizi wa Leza, Jesu, alaambidwe amulugwalo lwa Ciyubunuzyo 19:11-21.

Pele ino nguni “Gogo a Magogo” iwaambidwe mulugwalo lwa Ciyubunuzyo 20:8? Kumamanino aakusunkwa kwamamanino kumamanino aamyaka iili 1,000, aabo ibayoozangila Jehova bayootondezya muuya wabujayi mbuli wa ‘Gogo waku Magogo,’ nkokuti zisi iziyoolwana bantu ba Leza kumamanino aamapenzi mapati. Alimwi nkamu zyoonse eezyi ziyoopegwa cisubulo cikozyenye—kunyonyoonwa cakumaninina! (Ciy. 19:20, 21; 20:9) Aboobo, cilibonya kuti cileelela ikwaamba kuti boonse ibayoozanga kumamanino aamyaka iili 1,000 baitwe kuti “Gogo a Magogo.”

Mbotuli basikwiiya Jwi lya Leza ibabikkila maano, tuyandisisya kuzyiba uuyooba “mwami wakunyika.” Pele tacikwe makani naa nguni uuyoosololela nkamu yazisi, zintu zyobilo nzyotusinizyide nzyakuti: (1) Gogo waku Magogo alimwi ampi zyakwe bayoozundwa akunyonyoonwa; alimwi (2) Mwami wesu uulela Jesu Kristo uyoofwutula bantu ba Leza akubanjizya munyika mpya yaluumuno alimwi iinoojisi lukwabililo lwini-lwini.—Ciy. 7:14-17.