Lufwu Lwa Jesu Mbolukonzya Kumufwutula

MYAKA iitandila ku 2,000 yainda, mumwaka wa 33 C.E. nokwakali Pobwe Lyakwiindilila lyaba Juda, muntu umwi uutakwe mulandu wakafwa kutegwa bantu bakonzye kupona. Ino muntu ooyo wakali ni? Wakali Jesu waku Nazareta. Ino mbaani bagwasyigwa alufwu lwakwe? Mbantu boonse. Kujatikizya cituuzyo eeci, lugwalo lwamu Bbaibbele luzyibidwe kapati lwaamba kuti: “Nkaambo obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.”—Johane 3:16.

Nokuba kuti mbanji baluzyi lugwalo oolu, mbasyoonto bazyi ncolwaamba. Balalibuzya kuti: ‘Nkaambo nzi ncotuyandila cituuzyo ca Kristo? Ino mbuti lufwu lwamuntu omwe mbolukonzya kufwutula bantu boonse?’ Ibbaibbele litupa bwiinguzi bulimvwisya alimwi bukkazyika moyo kumibuzyo eeyi.

Lufwu Mbolwakatalika Kupenzya Bantu

Bamwi bantu basyoma kuti bantu bakalengelwa kuti kabapona anyika kwaciindi cisyoonto, kabapenga, kabakkomana, kwamana kabafwa akuunka kubusena bumbi bubotu. Kweelana akuyeeya kwabantu aaba, baamba kuti lufwu ngamakanze ngajisi Leza kubantu. Nokuba boobo, Ibbaibbele lyaamba kaambo kaindene kapa kuti bantu kabafwa. Lyaamba kuti: “Mbuboobo cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya.” (Ba-Roma 5:12) Kapango aaka katondezya kuti bantu balafwa akaambo kacibi. Aboobo ino nguni “muntu omwe” wakabatambukizya cibi bantu boonse?

The World Book Encyclopedia lyaamba kuti, basayansi banji basyoma kuti bantu boonse bakazwa kumuntu omwe alimwi Ibbaibbele alyalo lilakasalazya kaambo aaka kuti twakazwa “kumuntu omwe.” Ku Matalikilo 1:27 tubala kuti: “Leza wakalenga muntu mucinkozya cakwe. Wakamulenga mucinkozya ca-Leza. Wakabalenga baalumi abanakazi.” Aboobo Ibbaibbele lyaamba kuti, bantu bobilo bakusaanguna bakali zyilenge zyilemekwa zya Leza Singuzuzyoonse.

Ibbuku lya Matalikilo lijisi twaambo tumbi tujatikizya buumi bwabantu Jehova Leza naakamana kulenga muntu wakusanguna. Cikkomanisya ncakuti, mucibalo coonse eeco Leza kunyina naakamba makani aalufwu, pele lufwu lwakali kukonzya kuboola akaambo kakutamvwa. (Matalikilo 2:16, 17) Wakali kuyanda kuti bantu kabapona muparadaiso munyika alimwi kabakkomene lyoonse. Tanaakali kuyanda kuti kabacembala akufwa. Aboobo, ino mbuti lufwu mbolwakatalika kupenzya bantu?

Ibbuku lya Matalikilo Caandano 3 lyaamba bantu bobilo bakusaanguna mbobakasala cakuliyandila kutamvwida Sikubapa Buumi, Jehova Leza. Aboobo, Leza wakababeteka kweelana ambwaakabaambila. Wakaambila muntu kuti: “Uli bulongo buyo, akooko kubulongo nkoelede kupiluka.” (Matalikilo 3:19) Masimpe, kweelana ambolyakaamba jwi lya Leza, bantu aabo batakali kumvwa bakafwa.

Nokuba boobo, mapenzi aayo akabajatikizya bantu boonse. Kutamvwa kwabo kwakapa kuti bana babo batabi abuumi bulondokede. Bantu batakaninga zyalwa bakalijatikizidwe mumakanze  Jehova ngaakaambila Adamu a Eva aakuti: “Amuzyalisye, muvule, muzuzye nyika akwiibombya. Amweendelezye inswi zyamulwizi abayuni bakujulu abanyama boonse baputauka ansi.” (Matalikilo 1:28) Mukuya kwaciindi, banabukwetene aabo nobakaizuzya nyika alimwi akukkomana kukabe kutamani. Pele muzyali wabo Adamu—“muntu omwe”—wakabasambala kuti babe bazike bacibi, eelyo lufwu lwakabasikila. Mwaapostolo Paulo, waluzubo lwa muntu wakusaanguna wakalemba kuti: “Mebo ndi wanyama buyo, ndi muzike wazibi.”—Ba-Roma 7:14.

Mbubonya mbuli zyigwebenga mbozyinyonyoona zifwanikiso zyibotu kapati mazuba aano, awalo Adamu naakabisya, wakanyonyoona cintu cibotu kapati ncaakalenga Leza—bantu. Bana ba Adamu bakazyala bana, abalo bana bakaba abananyina. Bantu bakali kuzyalwa akukomena bamane bafwa. Ino nkaambo nzi kakapa kuti boonse bafwe? Akaambo kakuti boonse mbaluzubo lwa Adamu. Ibbaibbele lyaamba kuti: “Nkaambo bantu banji bakafwa nkaambo kamulandu wamuntu omwe buyo.” (Ba-Roma 5:15) Kuciswa, kucembala, kulombozya kucita zyintu zyitaluzi alimwi alufwu, nzyintu zyuusisya zyakaboola kumukwasyi ooyo akaambo kakutasyomeka kwa Adamu. Andiswe tulibikkilizyidwe mumukwasyi ooyo.

Mulugwalo ndwaakalembela Banakristo baku Roma, mwaapostolo Paulo wakalemba bukkale bwakwe abwabantu boonse batalondokede mbobweetezya alimwi ambotutyompwa akaambo kacibi. Wakalamwa akwaamba kuti: “Maawe! ndi muntu uusampaukide ncobeni! Ino nguni uukonzya kundivuna kumubili oyu walufu?” Ooyu mubuzyo uuyandika kapati. Ino nguni wakali kukonzya kuvwuna Paulo abantu balombozya kwaanguluka kuzwa mubuzike bwacibi alufwu? Nguwenya Paulo wakaingula kuti: “Ngu-Leza. Ndamulumba kuli-Jesu Kristo Mwami wesu!” (Ba-Roma 7:14-25) Masimpe ngakuti, Mulengi wesu wabamba bubambe bwakutuvwuna kwiinda Mumwanaakwe, Jesu Kristo.

Leza Mbwavwuna Bantu Kwiinda Muli Jesu

Jesu wakapandulula mulimo ngwajisi wakuvwuna bantu kuzwa mubuzike bwacibi. Wakaamba kuti: ‘Mwana a-Muntu wakeza akwaaba buumi bwakwe kuti bube cinunuzyo cabanji.’ (Matayo 20:28) Ino mbuti buumi bwa Jesu mbobukonza kuba cinunuzyo? Ino lufwu lwakwe lutugwasya buti?

 Ibbaibbele lyaamba kuti, Jesu “taakwe naakacita cibi” alimwi lyaamba kuti ‘ulipambukide kuzwa kuli basizibi.’ Mubuumi bwakwe boonse, Jesu wakali kutobela Mulawo wa Leza. (Ba-Hebrayo 4:15; 7:26) Aboobo Jesu tanaakafwa akaambo kacibi naa kutamvwa. Pele Adamu wakafwa akaambo kacibi akutamvwa. (Ezekieli 18:4) Jesu wakazumina kufwa nokuba kuti tanaakeelede kufwa kutegwa acite luyando lwa Bausyi lwakuvwuna bantu kucibi akulufwu. Mbubonya mbokwaambwa kale atala aawa, Jesu wakalisungula kuboola ‘kuzyooaba buumi bwakwe kuti bube cinunuzyo cabanji.’ Jesu wakatondezya luyando lupati ciindi naakalisungula ‘kufwida’ bantu.—Ba-Hebrayo 2:9.

Buumi Jesu mbwaakaaba bwakaleelene aboobo mbwaakasweekelwa Adamu naakabisya. Ino lufwu lwa Jesu lwakalijisi mpindu? Jehova wakacitambula cipaizyo eeco ‘cakunununa bantu boonse.’ (1 Timoteo 2:6) Aboobo, Leza wakabelesya lufwu lwa Jesu ikuula naa kunununa bantu kuzwa mubuzike bwacibi alufwu.

Ibbaibbele cakwiinduluka-induluka lyaamba luyando oolu lupati lwa Mulengi wesu. Paulo wakayeezya Banakristo kuti ‘bakaulwa’ buya. (1 Ba-Korinto 6:20; 7:23) Petro wakalemba kuti, Leza tanaakabelesya ngolida naa nsiliva kunununa Banakristo kuzwa kulufwu, pele wakabelesya bulowa bwa Mwanaakwe. (1 Petro 1:18, 19) Jehova wakacita bubambe bwakuvwuna bantu kutegwa batafwidilili kwiinda mucinunuzyo cacituuzyo ca Kristo.

Sena Muyakugwasyigwa Acinunuzyo ca Kristo?

Kaamba zyilongezyo zyinji zyacinunuzyo ca Kristo, mwaapostolo Johane wakalemba kuti: “[Jesu Kristo] ngomulungo wazibi zyesu, alimwi teensi kulindiswe akulike, pele kuzibi zyanyika yoonse.” (1 Johane 2:2) Masimpe, cinunuzyo ca Kristo cilabajatikizya bantu boonse. Sena eeci caamba kuti muntu uuli woonse ulakonzya kugwasyigwa acituuzyo cacinunuzyo ca Kristo? Peepe. Amuyeeye bantu bakafwutulwa baambwa mucibalo cainda. Aabo bakabafwutula bakanjizya cikwepe kusika mpobakabede bantu aabo, pele bantu bakasinkilidwe mumugoti aumwi wakeelede kunjila mucikwepe eeco. Ncimwi buyo aabo ibayanda kugwasyigwa acituuzyo cacinunuzyo ca Kristo tabeelede kukkala buyo akulindila zilongezyo zya Leza. Beelede kubweza ntaamu.

Ino Leza uyanda kuti babweze ntaamu nzi? Johane 3:36 yaamba kuti: “Oyo uusyoma Mwana nguuli abuumi ubutamani, pele oyo uutamvwi Mwana takooyoobona buumi, pele bukali bwa-Leza bulikede alinguwe.” Leza uyanda kuti tube alusyomo mucituuzyo ca Kristo. Alimwi kuli zyimbi nzyotweelede kucita. “Mbuboobo mbutuzi kuti tulimuzi [Jesu], na kuti twabamba milazyo yakwe.” (1 Johane 2:3) Aboobo, kaambo kayandika kapati nkakuti, ikuti katuyanda kuvwunwa kuzwa kucibi akulufwu, tweelede kutondezya lusyomo mucinunuzyo  ca Kristo alimwi akubamba milawo yakwe.

Nzila yomwe iiyandika kapati mbotukonzya kutondezya lusyomo mucinunuzyo ca Jesu nkwiinda mukwiibaluka lufwu lwakwe kweelana ambwaakalailila. Katanafwa Jesu wakalya cilyo cacikozyanyo abaapostolo bakwe basyomeka akubaambila kuti: “Amukacite obo kuti mukandiyeeye.” (Luka 22:19) Bakamboni ba Jehova balautobela mulawo ooyo akaambo kakuti bajisi cilongwe ciyumu a Mwana aa Leza. Mwaka uno, Ciibalusyo ca lufwu lwa Jesu Kristo ciyoocitwa mu Mujibelo, mu March 22, lyaakubbila zuba. Twamutamba kuti mukajanike kumuswaangano ooyu uulibedelede mukutobela mulawo wa Jesu. Bakamboni ba Jehova bali mucilawo canu balakonzya kumwaambila ciindi abusena nkuuyoobeda muswaangano ooyu. Kumuswaangano wa Ciibalusyo muya kwiiya zyintu zyimwi nzyomweelede kucita kutegwa cinunuzyo ca Kristo cikonzye kumwaangulula kulufwu lwakaboola akaambo kacibi ca Adamu.

Mazuba aano, mbasyoonto bantu babuzyi alimwi ibabulumba bubambe oobu bwacinunuzyo Mulengi wabo a Mwanaakwe mbobabamba bwakubavwuna kulufwu. Aabo batondezya lusyomo mucinunuzyo balakkomana kapati. Kujatikizya Banakristonyina, mwaapostolo Petro wakalemba kuti: “Mulamuyandisya, nkabela nomutamuboni sunu mulamusyoma, aboobo mulakondwa alukondo lutaambiki luli abulemu, alimwi mulalijanina cintu eco nceluleta lusyomo lwanu, nkokuti lufutuko lwamyuuya yanu.” (1 Petro 1:8, 9) Kwiinda mukumuyanda Jesu Kristo alimwi akusyoma cituuzyo cacinunuzyo, mulakonzya kukkomana lino akulangila kufwutulwa kucibi alufwu.

[Cifwanikiso icili apeeji 6]

Jesu wakaaba buumi bwakwe kutegwa azunde cibi ca Adamu

[Cifwanikiso icili apeeji 7]

Ciibalusyo ca lufwu lwa Jesu Kristo ciyakucitwa mu Mujibelo, mu March 22, 2008, lyaakubbila zuba