Imulengi Ngotweelede Kutembaula
Amube Acilongwe a Leza
Imulengi Ngotweelede Kutembaula
SENA kuli nomwakalibuzyide kuti, ‘Ino ncinzi ncotuponena?’ Aabo basyoma kuti zyintu zipona zyakasanduka buya balaalilwa kujana bwiinguzi bwamubuzyo ooyu. Pele aabo basyoma kuti Jehova Leza nkakasensa kabuumi balibuzyi bwiinguzi. (Intembauzyo 36:9) Balikazyi kaambo Leza ncaakatulengela. Aaka kaambo kali mulugwalo lwa Ciyubunuzyo 4:11. Atubone majwi aaya aakalembwa amwaapostolo Johane mbwaatondezya ncotuponena.
Johane wakalemba lwiimbo lwakali kwiimbwa azilenge zyakujulu kazimutembaula Leza kuti: “Nduwe uuelede, O Mwami, kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.” Jehova alikke nguweelede bulemu oobu. Nkaambo nzi? Nkaambo kakuti ‘nguwakalenga zyintu zyoonse.’ Aboobo, ino zilenge zyakwe zili amaano zyeelede kucita nzi?
Jehova waambwa kuti uleelela “kutambula” bulemu, kulemekwa anguzu. Masimpe, Leza nguuyinda kulemekwa alimwi nguulaanguzu kapati mububumbo boonse. Pele bantu banji tabazumini kuti ngo Mulengi wazyintu zyoonse. Nokuba boobo, nkobali bantu ibakonzya kubona “bube [bwakwe] butaboneki” kwiinda mukulanga zyintu nzyaakalenga. (Ba-Roma 1:20, BT) Nobabona zyintu eezyi, balamulemeka Jehova camoyo woonse. Balakambauka kubantu boonse bakonzya kumvwa makani aakondelezya aapa bumboni bwakuti Jehova ngowakalenga zyintu zyoonse munzila iigambya alimwi akuti ngonguwe ngotweelede kulemeka.—Intembauzyo 19:1, 2; 139:14.
Pele, ino mbuti Jehova mbwatambula nguzu kubakombi bakwe? Mubwini, kunyina cilenge cikonzya kumupa nguzu Imulengi singuzu zyoonse. (Isaya 40:25, 26) Nokuba boobo, akaambo kakuti twakalengwa mucinkozya ca Leza, tulakonzya kutondezya bube bwakwe kubikkilizya anguzu. (Matalikilo 1:27) Ikuti ncobeni katulumba akaambo kazyintu nzyatucitila Mulengi wesu, tulakonzya kukulwaizyigwa kubelesya nguzu zyesu kucita zyintu zikonzya kupa kuti alemekwe. Muciindi cakubelesya nguzu zyesu mukucita buyo nzyotuyanda, tulizyi kuti tweelede kumubelekela Jehova Leza anguzu zyesu zyoonse.—Marko 12:30.
Aboobo, ino ncinzi ncotuponena? Icibeela camamanino calugwalo lwa Ciyubunuzyo 4:11 caamba kuti: “Nkaambo kabukanze bwako nkizibeda, [zilenge zyoonse] ankizyakalengelwa.” Tiitwakalilenga buya pe. Tulapona akaambo kakuyanda kwa Leza. Nkakaambo kaako, ikuti katucita buyo zyintu nzyotuyanda, ibuumi bwesu bulakonzya kuba bwabuyo. Ikutegwa tukkomane, tube aluumuno akukkutila azyintu nzyotucita, tweelede kuzyiba makanze aa Leza akupona kweelana angayo. Ikuti twacita oobo, tuya kubona kaambo ncotwakalengelwa alimwi ancotuponena.—Intembauzyo 40:8.
Nkotwakajana cifwanikiso icili apeeji 27]
NASA, ESA, and A. Nota (STScI)