Sena Leza Ulacinca Kuyeeya?

IBBAIBBELE lyaamba boobu kujatikizya Leza: ‘Tasanduki, tajisi cenzule cisanduka.’ Kunze lyaboobo, Leza lwakwe utusyomezya kuti: “Ndime Jehova, nsisanduki pe.” (Jakobo 1:17; Malaki 3:6) Elo kaka Jehova Leza uliindene kapati abantu baliyanda ibatakonzyi kusyomwa akaambo kakuti lyoonse balacinca maano!

Nokuba boobo, basikubala Bbaibbele bamwi bayeeya kuti Leza wakacinca. Mucikozyanyo, kaindi Jehova Leza wakali bapede Banakristo nguzu zyakucita maleele, pele mazuba aano taciti oobo. Leza wakali kuzumizya bantu kukwata maali, pele mazuba aano taciti oobo. Kwiinda muli Musa, Jehova wakabikkide mulawo wakuti bantu kababamba Sabata, pele mazuba aano tauciko mulawo ooyu. Sena zikozyanyo eezyi tazitondezyi kuti Leza wakacinca?

Kaambo kakusaanguna nkotweelede kuyeeya nkakuti, Leza tacinci zyeelelo zyakwe zijatikizya luyando abululami. Kuyungizya waawo, ‘makanze aakwe’ aakulongezya bantu kwiinda mu Bwami bwakwe tanaakacinca. (Ba-Efeso 3:11) Mbubwenya mbomukonzya kucinca maano ikuti muntu umwi kacita zyintu zimutyompya, Jehova ulaakucinca kutegwa alanganye kaambo naa bukkale bumwi.

Alimwi Leza ulaakucinca malailile ngapa bantu bakwe kweelana abukkale bwabo. Kaambo aaka takeelede kutugambya pe. Amuyeeye buyo ncakonzya kucita muntu uucizyi kweenzyeenzya bantu mupaaki ikuti wabona munyama uuyoosya kumpela aanzila. Ulakonzya kwaambila bantu mbeezyeenzya kuti  babelesye nzila imbi, buyo-buyo umwi ulakonzya kulumwa. Pele, eeci tacaambi kuti tabako kusika nkobayanda kuunka, sena tabusyi oobo? Aboobo, atulange-lange twaambo totatwe twaambwa atala awa tubakatazya bamwi.

Nkaambo Nzi Maleele Ncaakamanina?

Ino nkaambo nzi Leza ncaakapa nguzu zyakucita maleele ku Banakristo bamwi bamumwaanda wamyaka wakusaanguna? Ambweni muliyeeyede kuti bana Israyeli bakali salidwe a Leza, bunji bwaziindi Leza wakali kutondezya kuti wakali ambabo kwiinda mukucita maleele. Kwiinda muli Musa, Leza wakabelesya nguzu ikugusya bana Israyeli ku Egepita akubasololela munkanda akubanjizya mu Nyika Yakasyomezyegwa. Cuusisya ncakuti, bana Israyeli tiibakamusyoma. Mukuya kwaciindi, Jehova wakabakaka bana Israyeli akutalisya mbungano ya Banakristo. Wakabapa nguzu baapostolo abasyomi bamwi zyakucita maleele. Mucikozyanyo, mwaapostolo Petro a Johane bakaponya muntu wakali mulema kuzwa naakazyalwa, awalo Paulo wakabusya muntu wakafwa. (Incito 3:2-8; 20:9-11) Maleele ngobakali kucita akapa kuti bantu bazwa mumasi manji babe Banakristo. Aboobo, ino nkaambo nzi maleele ncaakamanina?

Mwaapostolo Paulo wakapandulula cakapa kuti amane kwiinda mukubelesya cikozyanyo: “Nindakacili mwana, ndakali kwaamba mbuli mwana, akuyeeya mbuli mwana, alimwi akwiiya mbuli mwana. Pele ciindi nindakakomena, ndakaleka nzila zyabwana.” (1 Bakolinti 13:11, BT) Mbubwenya muzyali mbwaindanya zyintu nzyacitila mwana muniini amupati, awalo Jehova wakacinca mbwaakali kwiilanganya mbungano ya Banakristo ciindi niyakaleka kuba “mbuli mwana.” Imwaapostolo Paulo wakaamba kuti zipego mbuli kwaambaula myaambo iimbi naa kusinsima ‘ziya kuloba.’—1 Ba-Korinto 13:8.

Nkaambo Nzi Leza Ncaakazumizya Kukwata Maali?

Jesu wakatondezya kuti kuli mulawo ngwaakabikka Leza kujatikizya lukwatano naakaambila banabukwetene bakusaanguna kuti: “Mwaalumi asie wisi abanyina, akakatile mukakwe, kuti aba bobile babe nyama yomwe.” (Matayo 19:5) Bantu bobilo bakwetene tiibakeelede kulekana. Nokuba boobo, ciindi Leza naakabamba cisi cabana Israyeli akubapa Mulawo, bantu banji bakali kukwata maali. Aboobo, nokuba kuti Leza tali nguwe wakatalisya naa kukulwaizya bantu kuti kabakwata maali, wakabikka milawo njobakeelede kutobela aabo bakali kwaalika. Noyakatalika mbungano ya Banakristo, Ijwi lya Leza lyakali kukasya kwaalika.—1 Timoteo 3:2.

Jehova Leza ulazumizya zyintu zimwi kucitika. (Ba-Roma 9:22-24) Jesu wakatondezya kuti Jehova ‘wakazumizya’ bantu kucita zilengwa zimwi akaambo “kabuyumu bwamyoyo” yabana Israyeli.—Matayo 19:8; Tusimpi 4:18.

 Nkaambo Nzi Ikubamba Sabata Ncokwakali Kwaciindi Buyo Cisyoonto?

Leza naakabagusya bana Israyeli mu Egepita wakabaambila kuti kababamba Sabata ansondo. Alimwi mulawo ooyu wakeelede kutobelwa abantu boonse. (Kulonga 16:22-30; 20:8-10) Mwaapostolo Paulo wakaamba kuti Jesu wakalyaaba ‘akulobya milazyo iibikidwe mu Mulawo’ alimwi “wakamwaya mulandu, BT.” (Ba-Efeso 2:15; Ba-Kolose 2:14) Icakaloba akumwaigwa cilabikkilizya mulawo wa Sabata nkaambo Ibbaibbele lyaamba kuti: “Lino kutabi muntu naba omwe uumubika kaambo mumakani aakulya nanka kunywa nanka ipobwe nanka mweezi mupya nanka buzuba bwa-Sabata.” (Ba-Kolose 2:16) Ino nkaambo nzi Leza ncaakabikkila Mulawo ooyu kubikkilizya awa Sabata?

Imwaapostolo Paulo wakalemba kuti: “Mulao wakatubeda mbuli simalelo mane kusikila kuciindi ncati keze Kristo.” Alimwi wakayungizya kuti: “Lino mbulwasika lusyomo, tatucili mumaanza aasimalelo.” (Ba-Galatiya 3:24, 25) Muciindi cakuti Leza acince, wakali kububelesya bubambe oobu kutegwa abayiisye bantu kuti lyoonse beelede kukkala ansi kuyeeya makani aakumuuya. Nokuba kuti mulawo wakubamba Sabata wakali buyo waciindi cisyoonto, wakali kutondezya kuti kumpela mapenzi aakumubili aakumuuya aya kumana.—Ba-Hebrayo 4:10; Ciyubunuzyo 21:1-4.

Leza Ulasyomeka Alimwi Ulatuyanda

Zikozyanyo zyamu Bbaibbele nzyotwalanga-langa zitondezya kuti Jehova Leza wakali kupa malailile amilawo muziindi ziindene. Pele eeci tacaambi kuti wakacinca. Muciindi caboobo, wakali kucita zyintu kweelana anzyobakali kuyanda bantu alimwi zyakali kubagwasya. Oobo mbwacita mazuba aano.

Akaambo kakuti Jehova tacinci zyeelelo zyakwe, lyoonse tweelede kuzyiba ncotweelede kucita kutegwa tumukkomanisye. Kunze lyaboobo, tulakonzya kusyoma kuti zyintu zyoonse nzyaakasyomezya ziyakucitika. Jehova wakaamba kuti: “Njoocita zyoonse nzinjanda. . . Ndikanzide, lino njoocita obo.”—Isaya 46:10, 11.

Majwi aakwelelezya sikubala aali apeeji 19]

Leza tacinci zyeelelo zyakwe zijatikizya luyando abululami

Majwi aakwelelezya sikubala aali apeeji 20]

Paulo wakaamba kuti mukuya kwaciindi zipego zyakucita maleele ‘ziya kuloba’

Majwi aakwelelezya sikubala aali apeeji 21]

Lukwatano talweede kumana