Ino Muuya Uusalala Ninzi?

BUZUBA bumwi Jesu wakababuzya basikwiiya bakwe kuti: “Nguuli wisi mwana akati kanu kuti mwanaakwe wakumbila nsima, sena ulamupa bbwe? Kuti wakumbila inswi, sena ulamupa nzoka, iitali nswi njiyonya na? Kuti wakumbila iji, sena ulamupa kabanze?” (Luka 11:11, 12) Ibana baku Galileya bakali kuziyanda nswi amayi alimwi bakalizyizyi zyintu nzyobakali kuyanda kulya.

Jesu wakaamba kuti tweelede kuzumanana kulomba muuya uusalala mbubwenya mwana uufwide nzala mbwalomba cakulya. (Luka 11:9, 13) Ikuuzyiba muuya uusalala kulakonzya kutugwasya kuzyiba mbouyandika amboukonzya kutugwasya mubuumi bwesu. Aboobo, atulange-lange ncoliyiisya Bbaibbele kujatikizya muuya uusalala.

“Nguzu zya-Sijulu Lyamajulu”

Imagwalo alatondezya kuti muuya uusalala ninguzu nzyabelesya Leza kuzuzikizya makanze aakwe. Imungelo Gabriyeli naakamwaambila Mariya kuti uya kuzyala mwana musankwa nokuba kuti kunyina musankwa ngwaakazyi, imungelo wakamwaambila kuti: “Muuya Uusalala uzooza alinduwe, enguzu zya-Sijulu lyamajulu zikuvunikile, ayooyo Uusalala uti tumbukwe uzooambwa kuti Mwana a-Leza.” (Luka 1:35) Imajwi ngaakaamba Gabriyeli atondezya kuti kuli kweendelana akati kamuuya uusalala “anguzu zya Sijulu lyamajulu.”

Kaambo aaka kalilembedwe mu Bbaibbele. Musinsimi Mika wakaamba kuti: “Mebo ncobeni ndizwide inguzu nkaambo ka-Muuya wa-Jehova.” (Mika 3:8) Jesu wakabasyomezya basikwiiya bakwe kuti: “Muyootambula nguzu, wasika alindinywe Muuya Uusalala.” (Incito 1:8) Awalo mwaapostolo Paulo wakaamba kujatikizya “nguzu zya-Muuya Uusalala.”—Ba-Roma 15:13, 19.

Aboobo, ino ncinzi ncotukonzya kwaamba kujatikizya muuya uusalala kweelana atwaambo ntotwalanga-langa? Kuli kweendelana akati kamuuya uusalala anguzu zya Leza. Muuya uusalala ninguzu nzyabelesya Jehova kuzuzikizya makanze aakwe. Eelo kaka Leza ulaanguzu! Tatukonzyi kuzyizyiba nguzu nzyaakabelesya Leza naakali kulenga nyika ajulu. Kwiinda mumusinsimi Isaya, Jehova wakaamba kuti tulange-lange zyintu eezyi zitobela: “Amuululale mubone kujulu. Ezi zyoonse nguni wakazilenga? Ulapozya makamu aazyo cakubala mweelwe wazyo. Zyoonse buyo ulaziita mazina. Mubupati bwakwe bugambya, mbwali singuzu, taakwe niiba yomwe iibulika.”—Isaya 40:26.

Aboobo, Ibbaibbele litondezya kuti bubumbo boonse bwakalengwa kabotu akaambo ‘kabupati bwa Leza bugambya,’ naa nguzu zya Leza Singuzu zyoonse. Masimpe,  nguzu zya Leza zipati alimwi nguupa kuti katupona.—Amubone kabbokesi kakuti “Mboubeleka Muuya Uusalala.”

Jehova ulakonzya kuubelesya muuya uusalala kucita zyintu zipati, mbuli naakali kulenga bubumbo. Kunze lyaboobo, ulakonzya kuubelesya ikugwasya bantu. Mu Bbaibbele tujana zikozyanyo zinji zitondezya Leza mbwaakaubelesya muuya wakwe ikugwasya babelesi bakwe.

“Muuya wa-Jehova Uli Alindime”

Zyintu nzyaakali kucita Jesu naakali anyika zitondezya kuti muuya uusalala wa Leza ulakonzya kubapa nguzu babelesi bakwe. Jesu wakaambila bantu baku Nazareta  kuti: “Muuya wa-Jehova uli alindime.” (Luka 4:18) Ino nzyintu nzi Jesu nzyaakacita “munguzu zya-Muuya”? (Luka 4:14) Wakali kuponya malwazi aaindene-indene, wakaumuzya guwo, wakasanina zyuulu zyabantu kwiinda mukubelesya buyo zinkwa answi alimwi wakali kubusya bantu bafwide. Imwaapostolo Petro wakamwaamba Jesu kuti wakali ‘mwaalumi ngwaakatondezya Leza milimo mipati amaleele azitondezyo Leza nzyaakacita kwiinda mulinguwe.’—Incito 2:22.

Mazuba aano, muuya uusalala taupi kuti maleele aali boobu kaacitika. Nokuba boobo, ulakonzya kutugwasya kucita zyintu zipati. Jehova ulaakubapa muuya uusalala bakombi bakwe mbubwenya Jesu mbwaakasyomezya basikwiiya bakwe. (Luka 11:13) Aboobo, mwaapostolo Paulo wakaamba kuti: “Zintu zyoonse buyo ndazikonzya nkaambo kanguzu nzimpedwe kuli-Kristo.” (Ba-Filipi 4:13) Sena muuya uusalala ulakonzya kumugwasya andinywe? Mubuzyo ooyu ulaingulwa mucibalo citobela.

Kabbokesi/[Cifwanikiso icili apeeji 5]

Ncotwaambila kuti muuya uusalala tauli muntu

Ibbaibbele likozyanisya muuya uusalala kumaanzi. Leza naakabaambila bantu bakwe kuti uyakubalongezya, wakati: “Njootila maanzi aliyooyo uufwa nyota atulonga anyika injumu. Njootila Muuya wangu alunyungu lwako, acoolwe cangu njoocitilila bana bako.”—Isaya 44:3.

Leza nabapa muuya babelesi bakwe, ‘balazula muuya uusalala.’ Jesu, Johane Mubbapatizi, Petro, Paulo, Barnaba abamwi basikwiiya ibakabungana buzuba bwa Pentecoste 33 C.E. boonse bakazwide muuya uusalala.—Luka 1:15; 4:1; Incito 4:8; 9:17; 11:22, 24; 13:9.

Amuyeeye buyo: Sena muntu inga ‘watilwa’ abantu banji? Sena inga mwaamba kuti muntu omwe ulakonzya ‘kuzula’ mubantu banji? Peepe. Ibbaibbele lilaamba bantu ibakali basongo naa bazwide busongo, pesi kunyina nolyaamba kuti muntu wakazula muntunyina.—Ba-Kolose 1:9.

Ibbala lya Cigiliki lya “muuya uusalala” lyakuti pneuma lyaamba nguzu zitalibonyi. Vine Expository Dictionary of New Testament Words lyaamba kuti bbala lya pneuma “lyaamba muwo . . . muya awalo uli mbuli muwo, taulibonyi, alimwi ulijisi nguzu.”

Aboobo, muuya uusalala tauli muntu. *

Bupanduluzi buyungizidwe

[Kulumba]

Photodisc/SuperStock