Muuya Uusalala Ulayandika Mubuumi Bwanu

“UTANDISOWI kuzwa kubusyu bwako; utandinyanzyi Muuya wako Uusalala.” (Intembauzyo 51:11) Oobu mbwaakapaila amoyo oonse Mwami Davida naakalubizya.

Davida ziindi zinji wakali kugwasyigwa amuuya uusalala. Naakali mukubusi, muuya uusalala wakamugwasya kujaya Goliati—sikalumamba uuyoosya. (1 Samuele 17:45-50) Alimwi wakamugwasya kulemba nyimbo zibotu. Davida wakaamba kuti: “Muuya wa-Jehova wakaamba mulindime, majwi aakwe akali alulimi lwangu.”—2 Samuele 23:2.

Jesu Kristo wakaamba muuya uusalala mbowakali kubeleka mubuumi bwa Davida. Ciindi cimwi, Jesu wakaambila baswiilizi bakwe kuti: “Davida mwini wakaamba ku-Muuya Uusalala kuti, Jehova wakaambila mwami wangu kuti, Kala kululyo lwangu, Mane nkabike basinkondonyoko kunsi amaulu aako.” (Marko 12:36; Intembauzyo 110:1) Jesu wakalizyi kuti Davida naakali kulemba nyimbo, wakali kusololelwa amuuya uusalala. Sena muuya uusalala ngweena ooyo ulakonzya kutugwasya mazuba aano?

“Amukumbile muzoopegwa”

Ambweni tamukonzyi kulemba nyimbo. Nokuba boobo, mulakonzya kujana mapenzi mapati mbuli ngaakajana Davida kuli Goliati iwakali mulamfwu kapati.  Mucikozyanyo, amulange-lange icakabacitikila ba Isabel. * Balumi babo bakabaccija akukwata mukaintu uucili muniini. Bakabasiila zikwelete alimwi kunyina nibakali kubagwasya abana babo bobilo basimbi. Bakaamba kuti: “Ndakalimvwa bubi. Nokuba boobo, kuzwa ciindi nibakandisiya, muuya uusalala wa Leza wakandigwasya kuti ndiliyumye.”

Sena ba Isabel bakali kuyeeya kuti balakonzya kupegwa muuya uusalala kakunyina kucita cili coonse? Peepe, bakali kupaila lyoonse kuli Leza kutegwa abagwasye. Bakalizyi kuti bakali kuyandika kugwasyigwa a Leza kutegwa baliyumye, bacikonzye kubabamba kabotu bana babo akuti kabatalimvwi bubi. Bakaccilila majwi aa Jesu aakuti: “Amukumbile, mulapegwa. Amuyandaule, mulajana. Amukonkomone, mulajulilwa.”—Matayo 7:7.

Abalo ba Roberto bakali kuuyanda muuya wa Leza kutegwa ubagwasye pele akaambo katwaambo tumwi. Bakali kufweba tombwe citaambiki amisamu iikola imwi. Bakali cilekede kufweba kwamyaka yobilo, pesi cakabaalila. Ba Roberto bakaamba kuti: “Ulakonzya kuciswa ikuti wacileka kubelesya misamu iikola. Lyoonse, inga koyanda kufweba.”

Ba Roberto bakazumanana kwaamba kuti: “Ndakali kuyanda kuti ndicince kutegwa kandimubelekela Leza kweelana ambwayanda. Lyoonse ndakali kuyeeya buyo twaambo tukulwaizya tuzwa mu Bbaibbele. Abuzuba ndakali kupaila kuli Leza kutegwa andigwasye kucileka kucita zyintu nzindakali kucita. Ndakalizyi kuti tandikonzyi kucileka ndelikke. Alimwi ndakabona Jehova mbwaakali kuyiingula mipailo yangu ikapati ikuti ndayanda kucileka kufweba. Ndakalizyi kuti muuya uusalala wakandigwasya kuba anguzu nkaambo nindatakacikonzya kucileka.”—Ba-Filipi 4:6-8.

“Balaya Butanta Amababa Mbuli Basikwaze”

Mbuli ba Isabel aba Roberto, Bakamboni ba Jehova banji bagwasyigwa amuuya uusalala. Nguzu Jehova nzyaakabelesya kulenga bubumbo zilakonzya kumugwasya ikuti kamuyanda. Leza ulakonzya kumupa muuya wakwe ikuti naa mwamulomba camoyo woonse. Nokuba boobo, ikutegwa Leza amupe muuya ooyu, mweelede kumuzyiba akucita nzyayanda.—Isaya 55:6; Ba-Hebrayo 11:6.

Kwiinda mukugwasyigwa amuuya uusalala mulakonzya kuba anguzu zikonzya kumugwasya kumubelekela Leza akuzyiba mbotukonzya kuliyumya ikuti twasikilwa mapenzi. Ibbaibbele litusyomezya kuti: “[Jehova] ulakatalusya bakateede, abaabo batakwe inguzu ulabayumya. . . . Abo babikide myoyo yabo kuli-Jehova balabukulusya inguzu zyabo, balaya butanta amababa mbuli basikwaze, balazuzaana akutakataala, balaya bweenda cakutawizuka.”—Isaya 40:28-31.

Bupanduluzi buyungizidwe

Majwi aakwelelezya sikubala aali apeeji 8]

‘Abuzuba ndilaakupaila kuli Leza kutegwa andiyumye. Ndakalizyi kuti tandikonzyi kucileka ndelikke. Alimwi ndakabona Jehova mbwaakaingula mipailo yangu’

 Kabbokesi/[Zifwanikiso izili apeeji 7]

MUUYA UUSALALA MBOWAKABELESYEGWA

Leza wakabelesya muuya uusalala kulenga nyika azyintu zyoonse zili mububumbo. Sintembauzyo wakaamba kuti: “O Jehova, milimo yako yavula! Zyoonse wakazicita mubusongo bwako! Nyika ilizwide zilenge zyako, ulatuma muuya wako, mpoonya awo zilalengwa.”—Intembauzyo 104:24, 30; Matalikilo 1:2; Jobu 33:4.

Ibakalemba Bbaibbele bakagwasyigwa amuuya uusalala. Paulo wakalemba kuti: “Magwalo aya oonse akazwa kuli-Leza.” (2 Timoteo 3:16) Muuya wa Jehova wakabasololela basikulemba Bbaibbele kuti balembe “makani aa-Leza.”—1 Ba-Tesalonika 2:13.

Muuya uusalala wakapa kuti Babelesi ba Leza baambile limwi ziboola kumbele. Mwaapostolo Petro wakalemba kuti: “Nkaambo teensi luyando lwamuntu lwakaleta businsimi kalekale, pe, pele bantu ba-Leza bakaamba mbobakasungulwa Muuya wa-Leza.”—2 Petro 1:20, 21; Joeli 2:28.

Muuya uusalala wakamugwasya Jesu abaalumi bamwi basyomeka ikukambauka makani mabotu aa Bwami bwa Leza akucita maleele. Jesu wakaamba kuti: “Muuya wa-Jehova uli alindime, nkaambo wandinanika kuti ndikambaukile bacete makani mabotu. Wandituma kuti ndiponye batyokede kumyoyo, ndyoompolole kwaangununwa kubaange, akubonununwa kuboofu.”—Luka 4:18; Matayo 12:28.

 Kabbokesi/[Zifwanikiso izili apeeji 9]

MUUYA UUSALALA MBOUKONZYA KUTUGWASYA

Muuya uusalala ulakonzya kumugwasya kuleka micito mibi. Mwaapostolo Paulo wakaamba kuti: “Leza wasyomeka, ikuti takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo, kuti mukabe alukolelo.”—1 Ba-Korinto 10:13.

Muuya uusalala ulakonzya kumugwasya kuba abube bukonzya kumukkomanisya Leza. “Micelo ya-Muuya njeeyi:—luyandano, lukondo, luumuno, busicamba, buuya, bubotu, lusyomo, lubombo, kulyeendelela.”—Ba-Galatiya 5:22, 23.

Muuya uusala ulakonzya kumugwasya kuliyumya mumasunko. “Zintu zyoonse buyo ndazikonzya nkaambo kanguzu nzimpedwe kuli-Kristo.”—Ba-Filipi 4:13.