Ibbaibbele Lilakonzya Kubacinca Bantu

INO ncinzi cakapa kuti muntu uumwi iwakajisi masusu malamfwu aagele akucileka kubasalulula bamakuwa? Alimwi ino ncinzi cakapa kuti musankwa umwi iwakali sinkondo alimwi iwakali kugwasya basikusambala misamu iikola ikusesa bantu bakali kukweleta misamu eeyo acince? Amubone nzyobakaamba bantu aaba.

“Ndakacileka kusalulula.”—HAFENI NGHAMA

MYAKA: 34

KUCISI NKWAZWA: ZAMBIA

MBWAAKABEDE KAINDI: MU LASITA

MBONDAKABEDE KAINDI: Ndakazyalilwa munkambi yabazangalisi mu Zambia. Bamaama bakaccija nkondo ku Namibia alimwi bakanjila mumbunga yiitwa kuti South West Africa People’s Organization (SWAPO). Mbunga eeyi yakali kulwana bulelo bwaku cisi caku South Africa ibwakali kweendelezya cisi ca Namibia aciindi eeco.

Ndakakkala munkambi ziindene-indene kwamyaka iili 15 kuzwa nindakazyalwa. Bana ibakali kukkala munkambi zyaba SWAPO bakali kuyiisyigwa kulwanina lwaanguluko. Twakali kuyiisyigwa twaambo twacisi akuti twakeelede kubasula bamakuwa.

Nindakali amyaka iili 11 yakuzyalwa, ndakali kuyanda kuba Munakristo mucikombelo cakali munkambi. Ba Katolika, ba Lutheran, ba Anglican azikombelo zimwi bakali kukombela antoomwe. Mupati wacikombelo ngundakaambila wakandikasya kuti ndibe Munakristo. Kuzwa leelyo, ndakacileka kumusyoma Leza. Nindakakwanya myaka iili 15 yakuzyalwa, ndakatalika kuyanda nyimbo zyalege alimwi ndakali kuyanda kuti ndaamane mapenzi ngobakajisi bantu basiya, eeco cakapa kuti ndinjile mukabunga kabantu bajisi masusu malamfwu baitwa kuti Balasita. Masusu aangu akalampa, ndakatalika kufweba lubanje, ndakacileka kulya nyama alimwi ndakali kulombozya kuti bantu basiya baanguluke. Alimwi ndakazumanana kutalilemeka, kweebelela mavidiyo aankondo, alimwi ndakali kutukila.

IBBAIBBELE MBOLYAKANDICINCA: Mu 1995, nindakali amyaka iili 20 yakuzyalwa, ndakatalika kuyeeya mbondakali kuyanda kuti kandipona. Ndakali kwaabala mabbuku oonse ngobakajisi bantu bajisi masusu malamfwu. Amwi akajisi magwalo aamu Bbaibbele, pesi bupanduluzi tiibwakali kulimvwisya. Aboobo ndakatalika kulibala Bbaibbele.

Nikwakainda ciindi, mweenzuma wakandipa bbuku libelesyegwa kwiiya Bbaibbele lyakamwaigwa a Bakamboni ba Jehova. Ndakalibala bbuku eeli antoomwe a Bbaibbele. Mpoonya, ndakayaanya Bakamboni ba Jehova alimwi ndakazumanana kwiiya Bbaibbele ambabo.

Nokuba kuti tiicakali cuuba-uba, ndakacileka kufweba akunywa makoko. (2 Ba-Korinto 7:1)  Ndakaagela masusu, ndaacileka kutukila, kweebelela zyintu ziletela muzeezo wakoonana amavidiyo aankondo. (Ba-Efeso 5:3, 4) Mukuya kwaciindi, ndakacileka kubasalulula bamakuwa. (Incito 10:34, 35) Kutegwa ndicikonzye kuzileka zyintu eezyi zyoonse, ndakeelede kuzisowa nyimbo zyoonse zyakali kukulwaizya kusala mubala akucileka kusobana abeenzuma bakaindi, aabo ibakali kukonzya kundiyunga kucita zyintu nzindakali kucita kaindi.

Nindakazileka zyintu eezyo, ndakayandaula Ŋanda ya Bwami ya Bakamboni ba Jehova akubalomba kuti kandipaila mucikombelo cabo. Bakatalika kundiyiisya Bbaibbele. Nindakayanda kuti ndibbapatizyigwe kutegwa ndibe umwi wa Bakamboni ba Jehova, bamukwasyi wangu tiibakakkomana. Bamaama bakandaambila kuti inga ndasala cikombelo cimbi “Cabunakristo” ikutali ca Bakamboni ba Jehova. Baacisya bamwi, bakali bapati-pati mumfwulumende, bakali kundikalalila lyoonse akaambo kakuti ndakali kuswaangana a Bakamboni.

Nokuba boobo, nindakayiya mbwaakali kubabona Jesu bantu akubelesya lulayo lwakwe, cakandigwasya kuliyumya nokuba kuti bakali kundikazya akundiseka. Nondakabona kuti nzyobayiisya Bakamboni zileendelana ancolyaamba Bbaibbele, ndakazyiba kuti ndabujana bukombi bwakasimpe. Mucikozyanyo, balautobela mulawo wakukambaukila bantu bamwi. (Matayo 28:19, 20; Incito 15:14) Alimwi tabatoli lubazu mutwaambo twacisi.—Intembauzyo 146:3, 4; Johane 15:17, 18.

MBONDAGWASYIGWA: Ikutobela zyeelelo zyamu Bbaibbele kwandigwasya kapati. Mucikozyanyo, kucileka kufweba lubanje kwandigwasya kuti kanditasowi mali manji amwezi. Ndakacileka kubona zyintu zitako alimwi mizeezo amubili wangu zyakaba kabotu.

Lino ndipona buumi buli kabotu alimwi ndilicizyi ncondiponena kweelana ambondakali kuyanda kuzwa kubwana. Alimwi iciinda kubota ncakuti, ndilimvwa kuti lino ndili mulongwe wa Leza.—Jakobo 4:8.

“Tandinyemi cakuzwa munzila.”—MARTINO PEDRETTI

MYAKA: 43

KUCISI NKWAZWA: AUSTRALIA

MBWAAKABEDE KAINDI: SIKUSAMBALA MISAMU IIKOLA

MBONDAKABEDE KAINDI: Bazyali bangu bakali kulonga-longa nindakali muniini. Twakakkala kumunzi, mudolopo alimwi kwaciindi cisyoonto twakakkala kumisyini yabantu baitwa kuti ba aborigin. Ndilayeeya zyintu zibotu nzyotwakali kucita abeenima alimwi abaacisya—twakali kuzuba nswi, kuyaka twaanda akubeza zyintu zimwi buyo.

Bataata bakali kulwana kapati aboobo bakatalika kundiyiisya kandicili mwana. Ndakali  mukali alimwi lyoonse ndakali kulwana abantu. Nindakali mukubusi ndakali kunywa bukoko kumabbiyaholo. Mebo abeenzuma twakali kubatalika buya bantu kutegwa tulwane. Twakali kubelesya zipeni azisamu kuuma bantu basika ku 20 naa bainda waawo.

Ndakali kujana mali kwiinda mukuuzya misamu iikola azyintu nzibakali kubba bantu bakali kubelekela kubusena nkwaasikila mato. Alimwi ndakali kugwasya basikusambala misamu iikola ikusesa bantu bakali kukweleta misamu kwiinda mukubakonga antobolo. Ndakali kuyanda kuba mujayi. Makanze aangu akali aakuti, Jaya, watajaya balakujaya.

IBBAIBBELE MBOLYAKANDICINCA: Nindakali mwana ndakamvwa kuti kuli Bakamboni ba Jehova. Nindakakkwanya myaka iili 20, ndakababuzya bamaama naa bakalibazyi Bakamboni ba Jehova ankobajanika. Nokwakainda mazuba obilo, Kamboni uumwi wazyina lyakuti Dixon wakakonkomona amulyango. Nitwakamana kubandika wakanditamba kumiswaangano ya Bakamboni ba Jehova. Ndakaunka kumuswaangano ooyo alimwi kuzwa ciindi eeco lyoonse ndilaakuunka alimwi kwainda myaka iili 20 lino. Mibuzyo iili yoonse njondakajisi, Bakamboni bakaivwiila kwiinda mukubelesya Bbaibbele.

Ndakakkomana ikuzyiba kuti Jehova ulabayanda bantu kubikkilizya abaabo batamukombi. (2 Petro 3:9) Ndakazyiba kuti ngu Taata siluyando uukonzya kundilanganya noliba leelyo nokutako uukonzya kucita boobo. Alimwi ndakakkomana ikuzyiba kuti ulakonzya kundilekelela zibi zyangu ikuti ndacinca. Tupango twamu Bbaibbele tuli kulugwalo lwa Ba-Efeso 4:22-24 twakandigwasya kapati. Cibalo eeci cakandikulwaizya ‘kuleka ziyanza zyangu zyaciindi abuntu bwangu bukulukulu akulisamika buntu bupya bulengulwidwe mucinkozya ca Leza.’

Cakanditolela ciindi cilamfwu kutegwa ndicince. Yakali kumana nsondo kanditabelesyi misamu iikola pele kumamanino kwansondo ikuti kandili “abeenzuma” ndakali kwiibelesya misamu iikola. Ndakabona kuti ndakeelede kuleka kuyanzana ambabo kutegwa ndicilekele limwi kubelesya misamu iikola, aboobo, ndakalongela kudolopo limwi. Beenzuma bamwi bakandaambila kuti balakonzya kundisindikila, ndakabaambila kuti cili buyo kabotu. Munzila bakatalika kufweba lubanje alimwi bakali kuyanda kuti andime ndifwebe. Ndakabaambila kuti ndakacileka kubelesya misamu iikola aboobo twakaandana, kumane ndakazumanana alweendo lwangu. Nokwakainda ciindi ndakamvwa kuti “beenzuma” bakabba mubbanki alimwi bakali kubelesya mfwuti.

MBONDAGWASYIGWA: Nindakacileka kusobana ambabo, ndakacinca kakunyina abuyumu-yumu buli boonse. Mu 1989 ndakaba Kamboni uubbapatizyidwe. Nindakabbapatizyigwa, mucizyi wangu, bamaama abataata boonse bakandisangana kubelekela Jehova.

Ndilikwete alimwi twakkala mucikwati kwamyaka iili 17, tulijisi bana botatwe babotu. Mazuba aano tandinyemi cakuzwa munzila nokuba kuti bantu bandinyemya. Alimwi ndakayiya kubayanda bantu ‘bamisyobo yoonse, bazwa kuzisi zyoonse abamikowa yoonse.’ (Ciyubunuzyo 7:9) Ndakabona kuti majwi ngaakaamba Jesu ngamasimpe. Wakaamba kuti: “Mwajatisya majwi aangu, ncobeni mwaba basikwiiya bangu, alimwi muyooziba bwini, abwalo bwini buyoomunununa.”—Johane 8:31, 32.

Majwi aakwelelezya sikubala aali apeeji 15]

Ikucinca kwakandipa kuti ndizisowe nyimbo zyoonse izyakalikundipa kubasula bantu bamisyobo iimwi

Majwi aakwelelezya sikubala aali apeeji 16]

Mebo abeenzuma twakali kubatalika buya bantu kutegwa tulwane. Twakali kubelesya mipeni azisamu kuuma bantu bali 20 naa bainda waawo