Mupailo

4 Ino Zyintu nzi Nzyotweelede Kupailila?

WAAMBWA kuti ngomupailo wiinda mipailo yoonse yaambwa ya Banakristo. Nokuba kuti aaya masimpe naa pe, mupailo wa Jesu wacikozyanyo—zimwi ziindi wiitwa kuti mupailo wa mwami naa Taatesu—uli akati kazyintu bantu banji nzyobatamvwisisyi. Tuulunzuma twabantu balaamba majwi ali mumupailo oyu buzuba abuzuba, ambweni isikati lyoonse. Pele Jesu kunyina naakali kuyanda kuti mupailo kaubelesyegwa munzila iili boobu. Ino tuzyi buti?

Katanawaamba mupailo ooyu, Jesu wakaamba kuti: “Pele ciindi nomupaila, mutani kwaambi majwi ngeena cakwiinduluka.” (Matayo 6:7) Sena Jesu wakalikazya mwini kwiinda mukwaamba majwi aelede kubikkwa mumutwe alimwi akwiindulukwa? Peepe! Muciindi caboobo, Jesu wakali kutuyiisya  nzyotweelede kupailila alimwi akututondezya zyintu nzyotweelede kusaanguna kubikkila maano notupaila. Atulange-lange ncaakaamba mumupailo uulembedwe kuli Mateyo 6:9-13.

“Taateesu ooli kujulu, alisalazyigwe zyina lyako.”

Jesu wakayeezya baswiilizi bakwe kuti mipailo yoonse yeelede kugamikwa kuli Bausyi, Jehova. Pele sena mulizyi kaambo zyina lya Leza ncoliyandika kapati alimwi akaambo ncolyeelede kusalazyigwa?

Kuzwa bantu nobakalengwa, zyina lya Leza lisalala lyasampaulwa. Sikondonyina Leza, Saatani wakaamba Jehova kuti mubeji, muleli uuliyanda uutajisi nguzu zyakweendelezya zilenge zyakwe. (Matalikilo 3:1-6) Banji bali kulubazu lwa Saatani akwaamba kuti Leza tali mulongwe mubotu, ngusilunya alimwi akukazya kuti Mulengi. Bamwi balikaka akuligusya zyina lyakwe lyakuti Jehova mubusanduluzi bwama Bbaibbele akutalibelesya.

Bbaibbele litondezya kuti Leza uyoogusya kutalulama koonse ooku. (Ezekiele 39:7) Kwiinda mukucita boobo, uyoozilanganya zyoonse nzyomuyandika akumanizya mapenzi aanu oonse. Munzila nzi? Majwi aatobela mumupailo wa Jesu alapa bwiinguzi.

“Abuboole Bwami bwako”

Mazubaano, kuli kunyongana kuliko akati kabamayi bazikombelo kujatikizya Bwami bwa Leza. Pele baswiilizi ba Jesu, bakalizyi kuti, basinsimi ba Leza bakambilidwe limwi kuti Mesiya, Mufutuli usalidwe a Leza, uyoolela mu Bwami bwalo buyoocinca nyika. (Isaya 9:6, 7; Daniele 2:44) Buyoosalazya zyina lya Leza kwiinda mukuyubununa bubeji bwa Saatani akumugusya antoomwe amilimo yakwe. Bwami bwa Leza buyoogusya nkondo, kuciswa, nzala alimwi alufu. (Intembauzyo 46:9; 72:12-16; Isaya 25:8; 33:24) Ciindi nomupailila Bwami bwa Leza kuti buboole, mupailila kuti zisyomezyo eezi zyoonse zizuzikizigwe.

“Akucitwe kuyanda kwako ansi aano mbubonya mbuli kujulu.”

Majwi a Jesu atondezya kuti masimpe kuyanda kwa Leza kuyoocitwa anyika mbubonya mbuli kujulu. Kuyanda kwa Leza kwakacitwa kale kujulu,okuya Mwana wa Leza wakalwana a Saatani alimwi abangelo bakwe,akubawaala ansi. (Ciyubunuzyo 12:9-12) Kulomba ooku kwatatu mumupailo wacikozyanyo, mbuli kulomba kobilo kwaambwa kale, kutugwasya kubikkila maano kuzyintu ziyandika kapati—nkokuti kuyanda kwa Leza kutali kuyanda kwesu. Kuyanda kwa Leza kuleta bubotu kuzilenge zyoonse. Nkakaambo kaako, naba Jesu wakalondokede wakaambila Bausyi kuti: “Kutacitiki kuyanda kwangu, pele akucitike kuyanda kwako.”—Luka 22:42.

“Kotupa sunu cakulya cesu cabuzuba obuno.”

Kumane Jesu wakatondezya kuti tulakonzya kupailila zyintu nzyotuyandika. Tacilubide pe kupaila kuli Leza kujatikizya zyintu nzyotuyandika buzuba abuzuba naa mubuumi. Mubwini, kucita boobo kutuyeezya kuti Jehova “nguupa bantu boonse buumi, muya alimwi azyintu zyoonse.” (Milimo ya Batumwa 17:25) Bbaibbele lyaamba kuti muzyali siluyando uyandisya kupa bana bakwe nzyobayanda. Nokuba boobo, mbuli muzyali mubotu, takabapi kuti naa balomba zyintu zitajisi mpindu.

“Kotulekelela zibi zyesu.”

Sena masimpe mulaa cibi kuli Leza? Sena mulayanda kuti amulekelele? Banji sunu tabacizyi kuti cibi ncinzi alimwi ancokali kaambo kapati. Pele Bbaibbele liyiisya kuti cibi ngomuyanda wamapenzi eesu, nkaambo nceciletela lufu kubantu. Mbwaanga twakazyalilwa mucibi, lyoonse tulabisya, pele bulangizi bwesu bwakumbele buyeeme akulekelelwa kuli Leza. (Baloma 3:23; 5:12; 6:23) Cilakomanisya kuzyiba kuti Bbaibbele lyaamba kuti: “Nkaambo yebo, O Mwami, uli mubotu, ulafwamba kujatila.”—Intembauzyo 86:5.

“Utuvwune kumubi.”

Sena mulizyi mbociyandika kapati kukwabililwa a Leza? Banji tabasyomi kuti: “mubyaabi,” Saatani, nkwali ncobeni. Pele Jesu wakayiisya kuti Saatani mwini-mwini, akumwaamba kuti “mweendelezi wanyika eeyi.” (Johane 12:31; 16:11) Saatani waisofwaazya nyika eeyi mbwali nguyeendelezya alimwi ulalangilwa kumusofwaazya andinywe, kumulesya kupanga cilongwe a Taata wanu Jehova. (1 Petulo 5:8) Nokuba boobo, Jehova ulijisi nguzu kwiinda Saatani alimwi ulakkomana kukwabilila baabo bamuyanda.

Twaambo tupati-pati twaambidwe mumupailo wa Jesu wacikozyanyo tatubikkilizyi zyoonse nzyotunga twapailila. Amuyeeye kuti lugwalo lwa 1 Johane 5:14 lutwaambila boobu kujatikizya Leza: “Kufwumbwa cintu ncotumulomba ceendelana akuyanda kwakwe, ulatumvwa.” Aboobo, mutayeeyi kuti mapenzi aanu masyoonto kwaambila Leza.—1 Petulo 5:7.

Ino mbuti kujatikizya ciindi alimwi abusena? Sena busena bwakupailila alimwi aciindi zilayandika?