Amwiiye Ncolyaamba Jwi Lya Leza

Ino Jesu Kristo Nguni?

Cibalo eeci cili amibuzyo imwi njomwakalibuzyide alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.

1. Ino Jesu Kristo nguni?

Kwiindana abantunsi, Jesu wakakkala kujulu kali muntu wamuuya katanazyalwa aano anyika. (Johane 8:23) Jesu ngowakali cilenge cakusaanguna alimwi wakamugwasyilizya mukulenga zyintu zyoonse. Jesu alikke nguwakalengwa a Leza cakaanzambwene. Nkakaambo kaako wiitwa kuti mwana Leza “simuzyalwaalikke.” Jesu wakabeleka kali Mwaambilizi wa Leza ncencico eeci ncategwa ‘ndi Jwi.’—Johane 1:1-3, 14; amubale Tusimpi 8:22, 23, 30; Bakolose 1:15, 16.

2. Nkaambo nzi Jesu ncaakaboolela anyika?

Leza wakatuma Mwanaakwe anyika kwiinda mukulonzya buumi bwakwe kuzwa kujulu kuya mwida lyanakalindu imu Juda wazyina lya Mariya. Aboobo Jesu taakajisi usyi muntunsi. (Luka 1:30-35) Jesu wakaboola anyika (1) kuzooyiisya kasimpe kajatikizya Leza, (2) kuzoopa citondezyo mukucita kuyanda kwa Leza, alimwi (3) kuti ape buumi bwakwe cibe “cinunuzyo.”—Amubale Matayo 20:28; Johane 18:37.

3. Nkaambo nzi ncotuyandika cinunuzyo?

Cinunuzyo ncintu cibbadelwa kutegwa kunununwe muntu umwi kuzwa kubuzike. Kuzwa kumatalikilo, taakali makanze a Leza kuti bantu kabafwu alimwi akucembaala. Ino tuzyiba buti oobo? Leza wakaambila muntu wakusanguna Adamu kuti, naa wacita Bbaibbele ncoliita kuti cibi, uuyoofwa. Ikuti Adamu naatakabisya, naatakafwa pe. Nokuba kuti Adamu tanaakafwa mpoona-mpoona, wakatalika kufwa kuzwa mubuzuba mbwaakazangila Leza. (Matalikilo 2:16, 17; 5:5) Adamu wakatambukizya cibi alufwu kuluzubo lwakwe loonse. Aboobo, lufwu “lwakanjila” munyika kwiinda muli Adamu. Nkakaambo kaako ncotuyandika cinunuzyo.—Amubale Baloma 5:12; 6:23.

 4. Ino Jesu wakafwida nzi?

Ino ngwani wakali kuyoopa cinunuzyo kutegwa atununune kulufwu? Twafwa, tubbadelela zibi zyesu. Kunyina muntu uutalondokede uukonzya kunununa muntunyina kucibi.—Amubale Intembauzyo 49:7-9.

Akaambo kakuti Jesu kunyina naakakona cibi kuli usyi muntunsi, tanaakafwa akaambo kacibi cakwe pe, pele wakafwida zibi zyabamwi. Leza wakatuma Mwanaakwe kuzootufwida kutondezya luyando ndwajisi kubantu. Jesu awalo wakatondezya luyando lwakwe kulindiswe kwiinda mukumvwida Bausyi alimwi akwaaba buumi bwakwe akaambo kazibi zyesu.—Amubale Johane 3:16; Baloma 5:18, 19.

5. Ncinzi Jesu ncacita lino?

Jesu wakatondezya nzyayoocitila bantu bamuswiilila kwiinda mukuponya baciswa, kubusya bafwide, akugwasya bantu bakali muntenda. (Luka 18:35-42; Johane 5:28, 29) Jesu naakafwa, Leza wakamubusya kali muntu wamuuya. (1 Petulo 3:18) Mpoonya Jesu wakalindila kujanza lyalulyo lya Leza kusikila naakapegwa nguzu kuli Jehova zyakulela nyika kali Mwami. (Bahebulayo 10:12, 13) Lino Jesu ulalela kali Mwami kujulu alimwi basikumutobela bakwe bali anyika bali mukwaambilizya makani mabotu nyika yoonse mboizulwa.—Amubale Daniele 7:13, 14; Matayo 24:14.

Lino-lino, Jesu uyoobelesya nguzu zyakwe kali Mwami kumana mapenzi akunyonyoona baabo baaleta. Mamiliyoni aabantu bajisi lusyomo muli Jesu akumuswiilila, bayookkomana kupona muparadaiso anyika.—Amubale Intembauzyo 37:9-11.

Kutegwa muzyibe zinji, amubone cibalo 4 mubbuku eeli, lyakamwaigwa a Bakamboni ba Jehova. Ino Ncinzi Cini Bbaibbele Ncoliyiisya?

[Cifwanikiso icili apeeji 25]

Mamiliyoni aabantu bajisi lusyomo muli Jesu akumuswiilila, bayookkomana kupona muparadaiso anyika