Ino Iyooboola Lili Nkondo Ya Amagedoni?
Ino Iyooboola Lili Nkondo Ya Amagedoni?
“Ndakalanga, eelyo ndakabona nkamu mpati yabantu batakonzyi kubalwa amuntu uuli woonse, ibazwa muzisi zyoonse, mumisyobo yoonse, mumikowa yoonse alimwi amumilaka yoonse . . . bazwa mumapenzi mapati.”—CIYUBUNUZYO 7:9, 14.
LINO nkondo ya Amagedoni ilaafwaafwi. Mubuti?
Kuli kale mbunga yabantu nyika yoonse mbwiizulwa babelekela Jehova alimwi bapona kweelana azyeelelo zisumpukide zyakulilemeka zyamu Bbaibbele. Kwiinda mukugwasyigwa a Leza, mamiliyoni aabantu bazwa muzisi zyoonse, mumisyobo, alimwi amumilaka yoonse balabungana antoomwe akuba nkamu yabunyina iijisi luyando. Bunyina oobu bulalibonya akati ka Bakamboni ba Jehova.—Johane 13:35.
Ino-ino Saatani uyakubunganya basikalumamba bakwe akubelesya nzila yalunya kulwana bantu aaba basiluumuno ibalibonya mbuli kuti tabajisi bukwabilizi. (Ezekiele 38:8-12; Ciyubunuzyo 16:13, 14, 16) Ino inga mwakasyoma buti kaambo aaka? Ibbaibbele lilaamba zyintu zigaminide zikonzya kutugwasya kuzyiba ciindi nkondo ya Amagedoni noiya kuboola. Bunji bwazyintu eezyi Bbaibbele nzyolyaamba zili mukuzuzikizigwa kale.
Zyintu Nzyomubona Kazizuzikizyigwa
Basikwiiya ba Jesu bakamubuzya kujatikizya bantu mbobakali kuyoozyiba kuti ‘mamanino aabweende bwazyintu’ alaafwaafwi. (Matayo 24:3) Jesu wakaingula kwiinda mukwaamba kuti “cisi ciyoobukila cisinyina abwami buyoobukila bwaminyina, alimwi kuyooba nzala amizuzumo yanyika mumasena aaindene-indene.” Amane wakaamba kuti: “Zyintu zyoonse eezyi ngamatalikilo aamapenzi aali mbuli kumyongwa kwamukaintu uuyanda kutumbuka.” (Matayo 24:7, 8) Mwaapostolo Paulo wakapandulula ciindi eeci ncimunya kuti ‘mazuba aamamanino,’ kaamba kuti mazuba aayo anooli “ziindi zikatazya ncobeni.” (2 Timoteyo 3:1) Sena muyeeya kuti businsimi oobu bupandulula zyintu zicitika mazuba aano?
Ino nkaambo nzi ciindi eeci ncocinga caba ciindi cikatazya kapati? Mwaapostolo Johane wakakaamba kaambo ncocinooli boobo. Wakasinsima kuti kuyooba “kaindi kaniini” Saatani amadaimona aakwe nobanoocitila buyo anyika milimo yabo mibi. Saatani waambwa kuti ulijisi ‘bukali bupati’ mukaindi aaka. (Ciyubunuzyo 12:7-12) Sena mulabona kuti kuli muuya wabukali alimwi alunya akati kabantu mazuba aano, kutali buyo mubusena bumwi pele nyika yoonse?
Jesu alimwi wakaamba kuti muciindi eeci cikatazya kapati, mulimo uulibedelede uyoozuzikizyigwa. Wakaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni kumisyobo yoonse, mpoonya mamanino ayoosika.” (Matayo 24:14) Mazuba aano, Bakamboni ba Jehova balakambauka makani mabotu aa Bwami bwa Leza mumasi aainda ku 235 alimwi amumyaambo iinda ku 500. Imamagazini aaya obilo ngobamwaya aabandika zyamu Bbaibbele, Ngazi Yamulindizi alimwi a Sinsimuka!, ngamamagazini aamwaigwa kapati munyika yoonse. Alimwi Bakamboni ba Jehova balisandulula Bbaibbele mumyaambo iibalilwa ku 100. Mulimo wabo ulabelekwa abasikulisungula alimwi ulagwasyilizyigwa kwiinda mukusanga kwakuliyandila. Sena kukambauka ooku kukkomanisya inga kwaba kuzuzikizyigwa kwabusinsimi bwa Jesu?
Ibbaibbele alimwi lilaamba zyintu iziyoosololela kunkondo akati ka Jehova Leza abaabo bamukazya. Amubone businsimi botatwe mbomuyoobona kabuzuzikizyigwa.
Zyintu Nzyomuyoobona Ino-ino Kazicitika
Businsimi Bwakusaanguna. Ibbaibbele lyaamba kuti masi ayakwaambilizya kuti “luumuno akuliiba.” Banooyeeya kuti ambweni balaafwaafwi kwaamana mapenzi mapati-pati. Nokuba boobo, zyintu ziyoocitika baakumana kwaamba majwi aaya tazikaambi kuti kunooli luumuno.—1 Batesalonika 5:1-3.
Businsimi Bwabili. Iciyootobela, mfwulumende zisiyene-siyene ziyooyanda kulwana mbunga zyamunyika zyabukombi. Mu Bbaibbele, imfwulumende eezyi ziimininwa “amunyama uulya; alimwi bukombi bwanyika bwakubeja bwiimininwa amukaintu uutantide munyama. (Ciyubunuzyo 17:3, 15-18) Eeci cinyama cacikozyanyo ciyoocita eeco Leza ncayanda kuti cikacite kwiinda mukunyonyoona zikombelo zilyaamba kuti ziiminina Leza.
Mucikozyanyo, mwaapostolo Johane upandulula cisobano eeci munzila eeyi: “Imeja aali kkumi ngowabona, amunyama uulya, eezyi ziyoomusulaika mukaintu muvwuule alimwi ziyoomusaala akumusiya mantanda, alimwi ziyoolya nyama yamubili wakwe akumuumpa amulilo mane akalote. Nkaambo Leza wakacibikka mumyoyo yabo kuti bazwidilizye muzeezo wakwe.”—Ciyubunuzyo 17:16, 17.
Businsimi Bwatatu. Bwaakumana kulwanwa bukombi bwakubeja, Saatani uyoobunganya masi kutegwa alwane baabo bakomba Jehova Leza.—Ciyubunuzyo 7:14; Matayo 24:21.
Ino Muyoojatikizyigwa Buti?
Ikuti tamunabede aacoolwe cakwiiya Bbaibbele cakusitikila, inga camukatazya kusyoma kuti zyintu eezyi izyaambwa atala aawa ziyoocitika. Pele kuli twaambo tubotu tweelede kutupa kusyoma kuti zyintu eezyi zyoonse ziyoozuzikizyigwa ino-ino. Ibusinsimi bwakazuzikizyigwa kale bulembedwe mu Bbaibbele bulatupa kusyoma. *
Mbuti kuti mwajana ciindi cakuzyiba kaambo Bakamboni ba Jehova ncobasyoma kuti ‘nkondo yabuzuba bupati bwa Leza Singuzuzyoonse’ ilaafwaafwi kusika alimwi akaambo ncomuteelede kwiiyoowa? Amubandike ambabo kujatikizya Bbaibbele ncolyaamba kuti mweelede kucita kutegwa mube akati kabantu mbakwabilila Jehova Leza. (Ciyubunuzyo 16:14) Nzyomuyakwiiya zilakonzya kucinca bulangizi bwanu bwakumbele.
[Bupanduluzi buyungizidwe]
^ munc. 17 Kutegwa mubone bumboni butondezya kuti businsimi bwamu Bbaibbele bwakazuzikizyigwa, amubone cibalo 2 a cibalo 9 mubbuku lyakuti Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.
[Majwi aakwelelezya sikubala aali apeeji 8]
Sena mulimo wa Bakamboni ba Jehova uzuzikizya businsimi bwamu Bbaibbele?
