AMUBE ACILONGWE A LEZA

“Ino Mulawo Nzi Mupati Kumilawo Yoonse?”

Ncinzi Leza ncayanda kulindiswe? Sena kuli milawo minji kapati njotweelede kutobela? Bwiinguzi mbwakuti peepe. Kweelana ancaakaamba Mwana wa Leza, Jesu Kristo, ncayanda Leza kulindiswe cilakonzya kwaambwa kwiinda mukubelesya buyo bbala lyomwe.—Amubale Maako 12:28-31.

Cakusaanguna amulange-lange cakali kucitika ciindi Jesu naakaamba majwi aaya. Wakali kuyiisya mutempele mubuzuba bwa Nisani 11, mazuba masyoonto katanafwa. Basinkondonyina bakali kuyanda kumulebya kwiinda mukumubuzya mibuzyo iikatazya. Lyoonse wakali kuyiingula mibuzyo yabo. Mpoonya Jesu wakabuzyigwa mubuzyo ooyu: “Ino mulawo nzi mupati kumilawo yoonse?”—Kapango 28.

Ooyu wakali mubuzyo uukatazya. Bama Juda bakali kukazyanya kujatikizya mulawo mupati, naa uuyandika kapati akati kamilawo iinda ku 600 iyakali kupanga Mulawo wa Musa. Kulibonya kuti bamwi bakali kwaamba kuti milawo yoonse yakali kuyandika akuti tiicakaluzi kuyeeya kuti milawo iimwi yakali kuyandika kapati kwiinda iimwi. Mbuti Jesu mbwaakali kukonzya kwiingula mubuzyo ooyu?

Mukwiingula, Jesu wakaamba milawo yobilo kutali omwe. Wakaamba kuti mulawo wakusaanguna ngwakuti: “Weelede kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.” (Kapango 30; Deuteronomo 6:5) Mabala aakuti “moyo,” “mizeezo,” “buumi,” alimwi “anguzu” alakonzya kwaamba cintu comwe. Aamba kuti: Kuyanda Jehova kweelede kubikkilizya muntu woonse, nguzu zyakwe zyoonse azyintu zyoonse nzyajisi. Bbuku limwi ilyaamba zya Bbaibbele lyaamba boobu: “Leza weelede kuyandwa cakumaninina.” Aboobo, kuti kamumuyanda Leza, muyoosoleka kupona munzila njakkomanina buzuba abuzuba.—1 Johane 5:3.

Jesu wakaamba kuti mulawo wabili ngwakuti: “Weelede kuyanda simukobonyoko mbubonya mbuli mboliyanda omwini.” (Kapango 31; Levitiko 19:18) Luyando kuli Leza alimwi akuli basimukoboma zileendelana. Luyando kuli basimukoboma lulaboola akaambo kakuyanda Leza. (1 Johane 4:20, 21) Ikuti basimukoboma katubayanda mbuli mbotuliyanda, tuyoobacitila zyintu mbubwenya mbuli mbotuyanda kuti batucitile. (Matayo 7:12) Aboobo tutondezya kuti tulamuyanda Leza wakatulenga swebo alimwi ambabo mucinkozya cakwe.—Matalikilo 1:26.

Ino mulawo wakuyanda Leza alimwi awakuyanda basimukoboma uyandika buti? Jesu wakaamba kuti: “Kunyina mulawo mupati uumbi wiinda yeeyi.” (Kapango 31) Mucibalo cimwi cikozyenye aceeci, Jesu wakaamba kuti milawo iimbi yoonse iyeeme amilawo eeyi yobilo.—Matayo 22:40.

Kukkomanisya Leza tacikatazyi pe. Zyoonse ziyandika zilakonzya kwaambwa mubbala lyomwe buyo: luyando. Eeci ncecintu cakali kuyandika kapati mubukombi bwakasimpe alimwi ncecinooyandika lyoonse. Pele luyando talutondezyegwi buyo mukwaamba naa mbomulimvwa; lulatondezyegwa mumilimo. (1 Johane 3:18) Amwiiye mbomukonzya kuba aluyando alimwi akulutondezya kuli Jehova, Leza walo uuli “nduyando”—1 Johane 4:8.

Magwalo Aamu Bbaibbele Aasalidwe Kubalwa mu March

Maako 9–Luka 6

[Majwi aakwelelezya sikubala aali apeeji 13]

Zyoonse nzyayanda Jehova kubakombi bakwe zilakonzya kwaambwa mubbala lyomwe buyo: luyando