“Bube Bwakwe Butalibonyi Bulalibonya Caantangalala”
AMUBE ACILONGWE A LEZA
“Bube Bwakwe Butalibonyi Bulalibonya Caantangalala”
Sena mulasyoma muli Leza? Ikuti kamusyoma, sena inga mwabwaamba bumboni butondezya kuti nkwali? Bwini mbwakuti tulizingulukidwe abumboni butondezya kuti kuli Mulengi musongo, singuzu, alimwi siluyando. Ino mbumboni nzi oobo, alimwi businizya nzi? Kutegwa mujane bwiinguzi, amubone majwi aamwaapostolo Paulo aalembedwe mulugwalo ndwaakalembela Banakristo baku Roma.
Paulo wakaamba kuti: “Bube bwakwe [Leza] butalibonyi bulalibonya caantangalala kuzwa ciindi naakalenga nyika kuya kumbele, nkaambo bulabonwa muzyintu nzyalengede, noziba nguzu zyakwe zitamani akuti ngu Leza ncobeni, cakuti tabajisi cilitamizyo pe.” (Baloma 1:20) Paulo wakatondezya kuti milimo ya Mulengi ilapa bumboni bwakuti nkwali. Lino atwaalange-lange kabotu majwi aa Paulo.
Paulo wakaamba kuti bube bwa Leza bwakali kukonzya kubonwa “kuzwa ciindi naakalenga nyika kuya kumbele.” Mukapango aaka, ibbala lya Chigiliki lyakuti “nyika” talyaambi nyika iini kwiigama. Muciindi caboobo, lyaamba bantu bamunyika. * Aboobo, Paulo wakali kwaamba kuti kuzwa ciindi bantu nobakalengwa, bakali kukonzya kubona bumboni bwabube bwa Mulengi muzyintu nzyaakalenga.
Bumboni oobu bulituzingulukide toonse. Tabusisidwe muzyintu nzyaakalenga pe, pele “bulalibonya caantangalala.” Kutalikila kuzyintu zipati kusikila kutuntu tusyoonto, zilenge zilatondezya caantangalala, kutali buyo kuti Mulengi nkwali pele alimwi akuti ulijisi bube butaliboteli. Sena zyintu izyakalengwa cabupampu zituzingulukide tazitondezyi busongo bwa Leza? Sena ijulu lizwide nyenyeezi alimwi amayuwe avwuuma aamulwizi, taziyubununi nguzu zyakwe? Sena zyakulya ziindene-indene izitukkomanisya alimwi abubotu bwakupasula alimwi akubbila kwazuba takuyubununi luyando ndwajisi kubantu?—Intembauzyo 104:24; Isaya 40:26.
Sena tabusalede bumboni oobu? Buli aantangalala cakuti aabo batabuboni alimwi ibakaka kusyoma muli Leza “tabajisi cilitamizyo pe.” Syaazibwene umwi wakabupandulula boobu: Amweezeezye namutekenya iwatabikkila maano kucikwankwani caamba kuti “Mugwagwa Wajalwa—Amunyone Kulumwensyi.” Mpoonya mupulisa wamwiimika akutalika kumulembela kapepa kakumujanina mulandu. Namutekenya wasola kukazya kuti taakwe naacibona cikwankwani. Pele cilitamizyo cakwe tacilimvwisyi nkaambo cikwankwani cilaantangalala, alimwi meso aanamutekenya ali buyo kabotu. Kuyungizya waawo, mbwali namutekenya, mukuli wakwe kubona alimwi akutobela zitondezyo zili boobo. Oobu mbocibede kujatikizya bumboni buli muzyintu nzyaakalenga, ibutondezya kuti Leza nkwali. “Cikwankwani” eeci cilaantangalala. Mbotuli zilenge ziyeeya, tulakonzya kucibona. Kunyina cilitamizyo cakutacibikkila maano.
Masimpe, bbuku lyazilenge liyubununa zinji kujatikizya Mulengi wesu. Pele kuli bbuku alimbi liyubununa zinji kujatikizya nguwe—Ibbaibbele. Kwiinda mulindilyo tulakonzya kuzyiba bwiinguzi kumubuzyo ooyu uuyandika kapati: Ino makanze nzi ngajisi Leza kujatikizya nyika alimwi abantu bakkala mumo? Kuzyiba bwiinguzi kumubuzyo ooyu kulakonzya kumugwasya kuba acilongwe a Leza walo uujisi ‘bube bulibonya caantangalala’ munyika.
Magwalo aamu Bbaibbele aasalidwe kubalwa mu August
[Bupanduluzi buyungizidwe]
^ munc. 5 Ibbaibbele alimwi lyaamba “nyika” kuti ijisi mulandu wacibi alimwi iyandika mufwutuli, mutupango tuli boobu cilasalala kuti bbala lyakuti “nyika” lyaamba bantu kutali nyika iini.—Johane 1:29; 4:42; 12:47.
[Majwi aakwelelezya sikubala aali apeeji 11]
Milimo ya Mulengi ilapa bumboni bwakuti nkwali
