AMUBAYIISYE BANA BANU

Jesu Kristo Mbuti Mbotweelede Kumuyeeya?

Bantu banji munyika yoonse, mumwezi wa December balabona zifwanikiso zya Jesu kali muvwanda. Uli mucilido cabanyama, cibbokesi cipati mubikkwa bwizu bwabanyama kuti balye. Pele, sena Jesu tweelede kumuyeeya buyo kali muvwanda?— * Atubandike nzila imwi iiyandika kapati mbotweelede kumuyeeya Jesu. Tulakonzya kwiiya kujatikizya cakacitikila kabunga kabeembezi masiku amwi musyokwe kufwaafwi a Betelehemu.

Cakutayeeyela mungelo wakaima kumbele aabeembezi akubaambila kuti: “Sunu mwazyalilwa Mufwutuli, Kilisito Mwami.” Mungelo alimwi wakabaambila kuti bayoojana Jesu “kavwungaidwe muzisani alimwi kalede mucilido cabanyama.” Mpoonya-mpoonya, bangelo bambi banji bakaboola akutalika ‘kutembaula Leza.’

Ino inga mwalimvwa buti ikuti mwamvwa bangelo kabatembaula Leza?— Beembezi bakakkomana! Bakaamba kuti: “Katuya ku Betelehemu lino aawa tukabone cintu eeci cacitika.” Nobakasika bakajana “Maliya a Josefa amuvwanda kalede mucilido cabanyama.”

Kakutanainda ciindi abamwi bakasika ku Betelehemu nkobakabede ba Mariya a Josefa. Ciindi beembezi nobakabaambila cakacitika, boonse bakagambwa. Sena mulikkomene kuzyiba makani aaya aakondelezya?— Toonse notumuyanda Leza tulakkomana. Lino atubone kaambo kuzyalwa kwa Jesu ncokupa kukkomana kapati. Kutegwa tucite oobo, tuyandika kulanga-langa cakacitika Mariya katanakwatwa.

Bumwi buzuba mungelo uutegwa Gabriyeli wakaswaya Mariya. Mungelo ooyu wakasyomezya Mariya kuti uyooba amwana. Mwana ooyo “unooli mupati alimwi uyootegwa Mwana wa Mupatikampatila.” Gabriyeli wakayungizya akwaamba kuti: “Unooli Mwami . . . alimwi Bwami bwakwe tabukamani.”

Mariya wakali kuyanda kuzyiba eeci mbocakali kuyookonzyeka, mbwaanga tanaakazyi musankwa. Aboobo, Gabriyeli wakamupandulwida kuti: “Nguzu zya Mupatikampatila  ziyooba alinduwe” alimwi “ooyo uyoozyalwa uyakwaambwa kuti uusalala, Mwana wa Leza.” Kubweza Mwana wa Leza kuzwa kujulu akumubikka mwida lya Mariya kutegwa akomene, akali maleele mapati kapati!

Sena inga mulazibona zifwanikiso ‘zyabaalumi basongo’ botatwe abeembezi kabaswaya Jesu muvwanda?— Ciindi cakusekelela Kkilisimasi zifwanikiso zili boobu zilavwula kapati. Pele tazili zyamasimpe. “Baalumi basongo” aaba bakali basikulingula bweende bwanyenyeezi, bakali kucita zyintu zitamukkomanisyi Leza. Atubone cakacitika ciindi nobakasika. Ibbaibbele lyaamba kuti: “Nobakanjila muŋanda bakamubona mwana kali a Maliya banyina.” Aboobo, aciindi eeco Jesu tanaakacili muvwanda uuli mucilido cabanyama pe; wakali mwana wakali kukkala a Josefa alimwi a Mariya muŋanda.

Ino basikulingula bweende bwanyenyeezi bakamujana buti Jesu?— Bakasololelwa ‘anyenyeezi,’ ikutali kuya ku Betelehemu, pele kuya ku Mwami Heroda ku Jerusalemu. Bbaibbele lyaamba kuti Heroda wakali kuyanda kujana Jesu kutegwa amujaye. Amuyeeye buyo! Nguni ngomuyeeya kuti nguwakapanga cakali kulibonya mbuli kuti ninyenyeezi kutegwa cisololele basikulingula bweende bwanyenyeezi kuli Heroda?— Tanaakali Leza wakasimpe, Jehova, pele wakali sinkondonyina Saatani Diabolosi!

Mazuba aano Saatani upa bantu kuyeeya kuti Jesu ucili muvwanda uutakonzyi kucita cilicoonse. Pele mungelo Gabriyeli wakaambila Mariya kuti: “Unooli Mwami . . . , alimwi Bwami bwakwe tabukamani.” Lino Jesu ulalela kali Mwami kujulu, alimwi ino-ino uyoonyonyoona basinkondonyina Leza boonse. Eeco ncotweelede kuzyiba kujatikizya Jesu, alimwi tweelede kwaambila bamwi kujatikizya makani aaya.

Amubale mu Bbaibbele Lyanu

Luka 1:26-35; 2:8-18

Matayo 2:7-12; 1 Petulo 5:8

Ciyubunuzyo 19:19-21; 1 Johane 2:17

[Bupanduluzi buyungizidwe]