MAKANI AAKULUULA

Kubelekela Jehova Mubuumi Bwangu Boonse

Akaluulwa Aba Bill Walden

Nondakamanizya cikolo kusekondali mu January 1937, ndakatalika kwiiya ku Iowa State University, United States nkoili kumbo afwaafwi ankotwakali kukkala. Kuunka kucikolo alimwi akubeleka kutegwa ndijane mali aakucikolo cakali kundimanina ciindi. Kuzwa kubukubusi ndakali kuyandisya kwiiya mbwaayakwa maanda malamfwu alimwi amabbiliki.

Kumatalikilo aamwaka wa 1942, cisi ca United States nicakatalika kutola lubazu mu Nkondo Yabili Yanyika, ciindi eeco ndakali mumwaka wasanu ku Yunivesiti alimwi kwakaceede buyo myezi misyoonto kuti ndipegwe digili yabusyaazibwene mumulimo wakuyaka. Twakali kukkala totatwe muŋanda yomwe. Omwe akati kabantu mbotwakali kukkala limwi wakandaambila kuti ndikabandike amuntu umwi iwakali kuswaya basankwa bamwi basimukoboma. Aboobo ndakabonana aba John O. (Johnny) Brehmer, Bakamboni ba Jehova. Ndakali kugambwa kubona mbobakali kulibelesya Bbaibbele kwiingula mibuzyo iili yoonse. Eeci cakandikkomanisya kapati cakuti ndakatalika kwiiya Bbaibbele ambabo cakusitikila. Mukuya kwaciindi ndakatalika kubasangana mumulimo wakukambauka.

Ba Otto, bausyi baba Johnny, bakaba Bakamboni ciindi nobakali bapati mubbanki lyamudolopo lya Walnut, mu Iowa. Ba Otto bakauleka mulimo wabo waatala akutalika mulimo waciindi coonse. Mukuya kwaciindi, cikozyanyo cabo cibotu alimwi acamukwasyi wabo, cakandigwasya kusala kabotu cakucita.

CIINDI CAKUSALA CAKUCITA

Bumwi buzuba bayi balupati-pati bakuyunivesiti bakandaambila kuti tiindakali kucita kabotu, aboobo ndakeelede kubeleka canguzu kutegwa ndikapase. Ndilayeeya kuti ndakapaila kuli Jehova Leza, kumulomba kuti andigwasye mumakani aaya. Tiilyakalampa, ndakaambilwa kuti tubonane abayi bakali kundiyiisya busyaazibwene mumayake. Balo bakandaambila kuti bakatambula lugwalo lwakali kulomba muntu uucibwene mumayake alimwi kakunyina kundibuzya bakaingula kuti mebo inga ndauzumina mulimo ooyu. Ndakabalumba kapati, pele alimwi ndakabapandulwida kaambo ncindakakanzide kubelekela Jehova mubuumi bwangu boonse. Mu June 17, 1942, ndakabbapatizyigwa alimwi kakutanainda ciindi ndakaba mupainiya, nkokuti kuba mubelesi waciindi coonse wa Bakamboni ba Jehova.

Mu 1942, ndakaambilwa kuti ndinjile mulimo wabusikalumamba, aboobo ndakabapandulwida balupati-pati ikaambo ncondatakali kuyandila kutola lubazu munkondo. Ndakabapa cipepa ncobakandipa bamayi bakali kundiyiisya icakali kutondezya bukkale bwangu bubotu alimwi alwiiyo mumayake. Nokuba kuti ndakabapa bumboni buli kabotu munzila iili boobu, ndakapegwa mulandu alimwi akundibbadelesya mali aasika ku $10,000 (U.S.) alimwi akwaangwa myaka yosanwe muntolongo yaku Leavenworth, Kansas.

BUUMI BWANGU MUNTOLONGO

Bakamboni bacili bana-bana bainda ku 230 bakalaangidwe muntolongo yakali afaamu iitwa kuti Leavenworth. Aawa afaamu twakali kupegwa milimo  kumwi katweendelezyegwa abalindizi bali mbobabede. Balindizi bamwi bakalizyi kuti tatutoli lubazu mutwaambo twacisi alimwi eeci cakali kupa kuti kabatulanganya kabotu.

Balindizi basyoonto bakali kutugwasyilizya mububambe bwesu bwakuti katucita miswaangano. Alimwi bakali kutugwasyilizya kutegwa tube amabbuku muntolongo aamba zyamu Bbaibbele. Musilikani uubeleka muntolongo wakalilembya kuti katambula magazini yakali kwiitwa kuti Consolation mu Cingisi (lino iitwa kuti Sinsimuka! mu Chitonga).

KWAANGULULWA MUNTOLONGO, ALIMWI AMULIMO WABUMISYINALI

Nindakabeleka muntolongo kwamyaka yotatwe, ndakaangululwa mu February 16, 1946, kakwiindide myezi misyoonto kuzwa niyakamana Nkondo Yabili Yanyika. Kakunyina kusowa ciindi, ndakatalika mulimo wabupainiya alimwi. Kumane ndakatumwa kuyoobelekela kudolopo lya Leavenworth, Kansas. Ndakali kuyoowa kuyoobelekela kubusena oobu nkaambo bantu tiibakali kubayanda Bakamboni ba Jehova. Cakali kukatazya kujana mulimo wakuti kandijana nzyondakali kuyandika alimwi akujana ŋanda mwakukkala.

Ndilayeeya mulindizi umwi ngondakajana wakandaambila kuti, “Kozwa aawa!” Nindakabona nkoli yakuumya baseball njaakajisi, ndakayoowa mpoonya ndakazwa cakufwambaana. Aŋanda imwi, mukaintu umwi wakaamba kuti, “Amulindile asyoonto,” mpoonya wakajala cijazyo. Ndakalindila kusikila cakutayeeyela windo lyaŋanda yamujulu nolyakajaluka, mpoonya wakanditila meenda aadooti ngaakabelesyede kusanzya mitiba. Nokuba boobo, mulimo wakukambauka wakandiletela zilongezyo. Kumbele ndakazikumvwa kuti aabo mbondakaabila mabbuku aamba zyamu Bbaibbele bakaba Bakamboni.

Mu 1943 kwakatalisyigwa cikolo cabamisyinali cipya ku New York. Ndakatambwa kucikolo eeci mukkilasi yanamba 10, mpoonya ndakamanizya cikolo mu February 8, 1948. Cikolo eeci cakazooitwa kuti Watchtower Bible School of Gilead. Mbondakamanina buyo cikolo eeci, ndakatumwa kuyoobelekela kucisi ca Gold Coast, lino ciitwa kuti Ghana.

Nindakasika ku Gold Coast, mulimo wangu wakali wakukambaukila balupati-pati bamumfwulumende alimwi abantu bakali kuzwa ku Europe. Kumamanino aansondo ndakali kubeleka ambungano zya Bakamboni ba Jehova kugwasya basimbungano mumulimo wakukambauka kuŋanda aŋanda. Alimwi ndakali kuswaya mumasena mwakali Bakamboni bakamwaikene alimwi akubayiisya mulimo wakukambauka. Kuyungizya waawo, ndakabeleka kandili mulangizi weendeenda mucisi ca Ivory Coast, lino ciitwa kuti Côte d’Ivoire.

Nindakali kubelekela mumasena aaya, ndakaiya kupona mbobakali kupona bantu bamu Africa, mbuli koona mumaanda aamatidwe abulongo, kulya amaanza, alimwi akubelesya zimbuzi zyaanze mbuli mbobakali kucita bana Israyeli munkanda.  (Deuteronomo 23:12-14) Kucita boobu kwakandigwasya mebo alimwi abamisyinalima kwiiya kuba abube bubotu. Bamakaintu bamwi bakakwetwe kuli balupati-pati, bakatalika kwiiya Bbaibbele andiswe. Aboobo ciindi basikutukazya nibakatalika kutupenzya alimwi akulailila kuti batunyange mapepa aatuzumizya kukkala mucisi oomu, bamakaintu aaba bakatwiiminina kuli bamaalumi babo, aboobo tiibakatunyanga mapepa.

Mbubwenya mbuli bamisyinali bamwi banji mu Africa, andime ndakaciswa bulwazi bwantuntumaanzi. Zimwi ziindi ndakali kumvwa kutontola alimwi zimwi ziindi mubili wakali kupya calo cakali kundipa kutalika kulabalika. Zimwi ziindi ndakali kuujatilila buya mweebo waansi kutegwa uleke kubimba. Nokuba boobo, mulimo wangu wakazumanana kundiletela lukkomano alimwi akukkutila.

Mumyaka yone yakusaanguna mumulimo wangu mu Africa, ndakali kubandika aba Eva Hallquist balo mbotwakabonana nindakacili ku United States. Ndakazikumvwa kuti bakamanizya cikolo ca Gilead mukkilasi yanamba 21 mu July 19, 1953, lyamuswaangano wamasi wa Bakamboni ba Jehova wakacitilwa ku Yankee Stadium mu New York. Ndakabandika amupati wabasikweenzya bwato kuti ndibeleke mubwato kutegwa ndicikonzye kuunka ku United States.

Nokuba kuti zimwi ziindi mulwizi mwakali kuba mayuwe, nokwakainda mazuba aali 22 ndakasika alimwi ndakaunka kuyoobonana aba Eva kumaofesi mapati aa Bakamboni ba Jehova ku Brooklyn. Nindakasika ookuya, katuli atala aŋanda ndamfwu alimwi cito ca New York mpoceebeka, ndakabazyibya ba Eva makani aakuti tukwatane. Mukuya kwaciindi, ba Eva bakandisangana ku Gold Coast nkondakali kubelekela.

KULANGANYA MUKWASYI

Notwakabeleka aba Eva myaka iili mbwiibede mu Africa, ndakatambula lugwalo kuzwa kuli bamaama ilwakandizyibya kuti Bataata bakalicisidwe kapati bulwazi bwakkansa. Notwakalomba kusiya mulimo wesu kwaciindi cili mbocibede, mebo aba Eva twakapiluka ku United States. Bulwazi bwabataata bwakaindila, tiikwakainda ciindi cilamfwu, bakafwa.

Nokwakainda myaka yone kuzwa ciindi notwakapiluka ku Ghana, twakazikumvwa kuti bamaama balaciswa kapati. Beenzuma bamwi bakatukulwaizya kuti tupiluke ku United States kuyoolwazya bamaama. Ooku kusala kwakatuyumina kapati. Nokwakainda myaka iili 15 mumulimo wabumisyinali, iili 11 katuli banabukwetene, twakapiluka ku United States.

Kwamyaka iili mbwiibede twakali kucincana kulanganya bamaama, kubagwasya kuya kumiswaangano nocakali kukonzyeka. Mu January 17, 1976, bakafwa kabajisi myaka yakuzyalwa iili 86. Pele nokwakainda myaka iili fwuka ndakaba apenzi lipati kwiinda leeli. Ba Eva bakajanwa abulwazi bwakkansa. Twakasola nzila iili yoonse kubasilisya, pele cakaala mane mu June 4, 1985, bakafwa kabajisi myaka yakuzyalwa iili 70.

KUCINCA AKUMWI

Mu 1988 ndakatambwa kuyoojanika ciindi maofesi aamutabi mapya naakali kwaabwa ku Ghana. Eelo kaka tandikacilubi ciindi eeci! Ciindi nindakasika ku Ghana kakwiindide myaka iili 40 kuzwa nondakamanizya lwiiyo lwaku Gileadi, kwakali buyo Bakamboni basyoonto. Kuzikusika mu 1988 Bakamboni bakali kwiinda ku 34,000, lino batandila ku 114,000.

Mu August 6, 1990, kakwiindide myaka yobilo kuzwa ciindi nindakali ku Ghana, ndakakwata mweenzinyina waba Eva, ba Betty Miller. Antoomwe twazumanana kubelekela Jehova mubuumi bwesu. Tulangila ciindi nituyoobonana abazyali besu, bakaapa alimwi aba Eva baakubusyigwa munyika ya Paradaiso.—Milimo 24:15.

Eelo kaka ilandeenda misozi ndayeeya coolwe citaliboteli ncondakajisi cakubelesyegwa a Jehova mumulimo wakwe myaka iinda ku 70! Lyoonse ndilamulumba akaambo kakundigwasya kutegwa ndimubelekele mubuumi bwangu boonse. Nokuba kuti lino ndijisi myaka yakuzyalwa iili kuma 90, Jehova, syaazibwene mupati mumakani aamayake mububumbo boonse wazumanana kundipa nguzu abusicamba kutegwa ndizumanane kumubelekela.

[Cifwanikiso icili apeeji 10]

Mebo aba Betty

[Cifwanikiso icili apeeji 9]

Mboiboneka Ntolongo yaku Leavenworth mu U.S. mazuba aano. Notubalilwa ku 230 twakalaangidwe mumwenya oomu

[Cifwanikiso icili apeeji 9]

Katuli amwami umwi waku Gold Coast, cisi lino ciitwa kuti Ghana

[Cifwanikiso icili apeeji 8]