Sena mulayanda kuzyiba ciyoomucitikila kumbele? Bantu banji balayandisya kuzyiba ziyoocitika kumbele. Kuli bantu banji ibaambila limwi zintu zili afwaafwi kucitika, pele zicitika zini kanji-kanji inga tazyeelene anzyobaamba. Amulange-lange twaambo tutobela:

• BASAYAANSI babelesya mincini iisumpukide kapati alimwi amali manji kapati kusola kuzyibila limwi zintu ziyoocitika kumbele mbuli kusofwaazyigwa kwamasena mbokuya kwiijatikizya nyika alimwi akuyanda kuzyiba naa mvula iyoowa junza.

• BASYAAZIBWENE MUKULANGA-LANGA TWAAMBO baambila limwi kucinca ikulangilwa kuba mumakani aamakwebo alimwi atwaambo twacisi. Ba Warren Buffett, ibali akati kabantu bavwubide kapati munyika, bapedwe zina lyakuti musinsimi nkaambo balakonzya kwaambila limwi twaambo tuluzi kujatikizya kucinca kukonzya kuba mumakani aamakwebo. Syaazibwene umwi uutegwa Nate Silver ,wacikonzya kulanga-langa twaambo kutegwa kaambila limwi zintu zyoonse zijatikizya twaambo twacisi twamu United States alimwi abantu bayoopegwa bulumbu mumakani aakumwaya mafilimu mu Hollywood.

• MAKANI AAKALEMBWA KAINDI apandululwa kuti mbusinsimi. Bantu bamwi babona zintu zicitika mazuba aano kuti nzizeezyo zijanika mumalembe aatalimvwisyi kabotu aaba Michel de Notredame (Nostradamus) aamumwaanda wamyaka wa 16. Kkalenda yaci Maya yalo iyakamana mu December 21, 2012, bamwi bakapandulula kuti buzuba oobu bwakali kuyoocinca zintu munzila iigambya kapati.

• BASOLOLI BAZIKOMBELO zimwi ziindi inga baambila limwi zintu zibyaabi ziyoocitika mukusola kucenjezya bantu alimwi akulijanina basikwiiya. Musinsimi wa Doomsday (buzuba bwalunyonyooko) ba Harold Camping abasikwiiya babo bakaambilizya ooku akooku kuti nyika yakali kuyoonyonyoonwa mu 2011. Pele tee nyika nkoicili?

• BASIKWAAMBA ZYAKUMBELE aaba mbantu balyaamba kuti bajisi nguzu zyakwaambila limwi zintu ziyoocitika kumbele. Ba Edgar Cayce alimwi aba Jeane Dixon boonse bobilo bakaambila limwi twaambo tumwi twamasimpe kujatikizya zyakacitika mumwaanda wamyaka wa 20. Nokuba boobo, aumwi akati kabo wakaamba zintu zinji zyatakacitika. Mucikozyanyo, ba Dixon bakaamba kuti kwakali kuyooba Nkondo Yatatu Yanyika Yoonse mu 1958, abalo ba Cayce bakaamba kuti New York yakali kuyooloba mulwizi mumyaka yakuma 1970.

Sena ncobeni kuli nzila iisyomeka mbotukonzya kuzyiba zintu ziyoocitika kumbele? Cileelela kubuzya mubuzyo ooyu. Nomwali kukonzya kuzyibila limwi zintu zili afwaafwi kucitika, nokunga zili bumbi zintu nzyomusala kucita mubuumi bwanu.