MBWAANGA mabala aakuti “sikulwana Kristo” ali kubelesyegwa kuzwa kaindi kwaamba bami abeendelezi alimwi amafilimu, cileelela kubuzya kuti: Ino Sikulwana Kristo Nguni? Sena mabala aaya kuli mbwaatujatikizya swebo mazuba aano? Masimpe, bbuku ndyotweelede kubelesya kutegwa tumuzyibe kabotu sikulwana Kristo ooyu, ndi Bbaibbele, mwalo mabala aaya mwaajanika ziindi zyosanwe.

Mulembi wa Bbaibbele alikke iwakabelesya mabala aakuti “sikulwana Kristo,” mwaapostolo Johane. Ino wakamupandulula buti ooyu sikulwana Kristo? Amubone majwi aaya aali mulugwalo lwakwe lwakusaanguna aamba kuti: “Nobana baniini, ecino nciindi camamanino, alimwi mbubonya mbomwakamvwa kuti sikulwana Kristo ulaboola, noliba lino kuli basikulwana Kristo banji ibalibonya kale, eeco cituzyibya kuti ecino nciindi camamanino. Bakazwa akati kesu, pele tiibakali bamwi besu . . . Ino nguni mubeji kunze lyayooyo uukaka kuti Jesu ngu Kristo? Ooyu ngonguwe sikulwana Kristo, ooyo uukaka Taata alimwi a Mwana.”—1 Johane 2:18, 19, 22.

Ino twiiya nzi kumajwi aaya? Johane wakaamba “basikulwana Kristo banji,” ikutondezya kuti sikulwana Kristo ooyu tali muntu omwe buyo pe, pele ninkamu yabantu. Mbunga naa bantu ibaitwa kuti basikulwana Kristo bamwaya makani aakubeja, balakaka kuti Jesu ngu Mesiya, alimwi bapa bupanduluzi bunyongene kujatikizya cilongwe cili akati ka Leza alimwi a Mwanaakwe, Jesu Kristo. Aabo ibaitwa kuti basikulwana Kristo balamukazya Kristo naa kulyaamba kuti balo ngo Kristo naa baiminizi bakwe, pele mbwaanga “bakazwa akati kesu,” tabatobeli njiisyo zyakasimpe zyamu Bbaibbele. Kuyungizya waawo, nkamu eeyi yakaliko ciindi Johane naakalemba lugwalo lwakwe ‘muciindi camamanino,’ ambweni ciindi camamanino aabaapostolo.

Ino ncinzi acimbi Johane ncaakalemba kujatikizya sikulwana Kristo? Kaamba kujatikizya basinsimi bakubeja, wakacenjezya kuti: “Kufwumbwa majwi aasololelwa amuuya aazumina kuti Jesu Kristo wakaboola mumubili wanyama, azwa kuli Leza. Pele kufwumbwa majwi aasololelwa amuuya aatamuzumini Jesu taazwi kuli Leza pe. Kunze lyaboobo, aaya ngamajwi aasololelwa amuuya aasikulwana Kristo ngomwakamvwa kuti ayooboola, alimwi lino mwaali kale munyika.” (1 Johane 4:2, 3) Mpoonya mulugwalo lwakwe lwabili, Johane wakankaizya kuti: “Kuli basilweeno banji bamwaikide munyika, ibantu batazumini Jesu Kristo kuti wakaboola mumubili wanyama. Ooyu ngosilweeno alimwi sikulwana Kristo.” (2 Johane 7) Cilisalede kuti Johane wakalizyi kuti sikulwana Kristo mbantu boonse ibaamba makani aakubeja acaali kujatikizya Jesu Kristo alimwi anjiisyo zyakwe.

Kaindi Johane katanalemba kujatikizya bakombi aaba basilweeno, Jesu Kristo wakalailila basikumutobela kuti: “Amubacenjelele basinsimi bakubeja ibaboola kulindinywe kabasamide zisani zyambelele,  pele mukati mbaaumpe babutambo.” (Matayo 7:15) Awalo mwaapostolo Paulo wakacenjezya Banakristo baku Tesalonika kuti: “Kutabi muntu uumweena akumusowa munzila iili yoonse, nkaambo buzuba oobo [bwa Jehova] tabukasiki pe ccita kuti luleyo lukasaangune kusika alimwi amuntu mubi akayubununwe, nkokuti mwana walunyonyooko.”—2 Batesalonika 2:3.

Aboobo, mumwaanda wamyaka wakusaanguna, basinsimi bakubeja alimwi abasiluleyo bakaliko kale, bakakanzide kunyonganya mbungano ya Bunakristo. Boonse aabo ibajatikizyidwe mukumwaya makani aakubeja alimwi alweeno lwabukombi kujatikizya Jesu Kristo anjiisyo zyakwe, bakalibikkilizyidwe mumabala ngaakaamba Johane aakuti “sikulwana Kristo.” Jehova mbwababona basikulwana Kristo kwakalibonya ciindi Paulo naakabaamba kuti “mwana walunyonyooko.”

Ino mbuti kujatikizya mazuba aano? Bantu alimwi ambunga zipanga sikulwana Kristo zicizumanana kumukazya Kristo alimwi anjiisyo zyakwe. Acaali, balamwaya makani aakubeja alimwi aalweeno kabajisi makanze aakunyonganya makani aakasimpe kujatikizya Taata, Jehova Leza, alimwi a Mwanaakwe, Jesu Kristo. Kuli kaambo kamvwika ncotweelede kucenjela kujatikizya lweeno oolu lwabukombi. Atulange zikozyanyo zyobilo.

Kwamyaka minji, zikombelo zyamwaya njiisyo ya Butatu, ikwaamba kuti Taata alimwi a Mwana, muntu omwe. Aboobo basikulwana Kristo balanyonganya alimwi akusisa bwini mbwabede Jehova a Jesu Kristo. Eeci cipa kuti bantu babombe myoyo batacikonzyi kwiiya Jesu Kristo alimwi akuba acilongwe a Leza kweelana a Bbaibbele mbolibakulwaizya kucita.—1 Bakorinto 11:1; Jakobo 4:8.

Kuyungizya waawo, zikombelo azyalo zyanyonganya bantu kwiinda mukukulwaizya kubelesya busanduluzi bwama Bbaibbele aatajisi zina lya Leza limugeme lyakuti Jehova. Balacita oobu nokuba kuti zina lyakuti Jehova lilajanika ziindi zili 7,000 mumalembe aakusaanguna aamu Bbaibbele. Ino ncinzi cacitika? Eeci capa kuti Leza atazyibwi bwini mbwabede.

Kulubazu lumbi, kuzyiba zina lya Leza lyakuti Jehova cabagwasya babombe myoyo banji kuba acilongwe a Leza. Eeci ncecakabacitikila ba Richard, ibayeeya mubandi ngobakajisi a Bakamboni ba Jehova bobilo. Ba Richard bakaamba kuti: “Bakanditondezya mu Bbaibbele kuti zina lya Leza wakasimpe ngu Jehova. Ndakakkomana kapati kuzyiba kuti Leza ulijisi zina limugeme, icintu ncondatakaningamvwa.” Kuzwa ciindi eeco, bakacinca bukkale bwabo kutegwa bweendelane azyeelelo zyamu Bbaibbele alimwi akukkomanisya Jehova. Bakaamba kuti: “Kuzyiba zina lya Leza kwandigwasya kuba acilongwe ciyumu anguwe.”

Kwamyaka minji, basikulwana Kristo bapa kuti bantu banji bazumanane kuba mumudima wakumuuya. Pele kwiinda mukwiiya Jwi lya Leza, Bbaibbele, tulakonzya kuzyiba bwini mbwabede sikulwana Kristo alimwi akuteenwa kulweeno lwabukombi lwabasikulwana Kristo.—Johane 17:17.