INO mulimvwa buti mwayeeya makani aakucembaala? Banji cibapa kulibilika alimwi akuyoowa. Cili boobu akaambo kakuti bucembele kanji-kanji bupa muntu kunyana lukanda, kubula nguzu, kuluba-luba, alimwi akuciswa-ciswa.

Nokuba boobo, masimpe ngakuti bantu baliindene kapati mbobacembaala. Bamwi mumyaka yabucembele bwabo balakkomana kupona buumi buli kabotu, kumubili alimwi amumizeezo. Akaambo kakusumpuka kwamisamu, bantu bacikonzya kusilika naa kukwabilila malwazi aatamani. Akaambo kaceeci, muzisi zimwi bantu banji balapona ciindi cilamfwu kabali aabuumi buli kabotu.

Nokuba boobo, kufwumbwa naa bantu balaamapenzi aabola akaambo kabucembele naa pe, bantu banji balombozya kuceembaala kabakkomene. Ino eeci inga cakonzyeka buti? Kucita boobo ciyeeme ambotuzilanga zintu alimwi akulyaaba kucinca kweelana abukkale oobu bupya. Kutegwa tujane lugwasyo mumbazu eezyi, atulange-lange njiisyo zimwi zyamu Bbaibbele zigwasya.

AMULIBOMBYE: “Balibombya mbabajisi busongo.” (Tusimpi 11:2) Mukapango aaka, majwi aakuti “balibombya” alakonzya kwaamba bacembeede ibazyi akuzumina kuti kuli zintu nzyobatakonzyi kucita akaambo kaciimo cabo, ikutali kulikakatizya kucita zintu nzyobatakonzyi. Ba Charles, ibajisi myaka iili 93 baku Brazil bakaamba masimpe ciindi nobakati: “Ikuti mwapona kwaciindi cilamfwu, mweelede kucembaala. Taakwe mbomukonzya kucita kutegwa mube bakubusi alimwi.”

Nokuba boobo, kulibombya tacaambi kuti mweelede kuba amuzeezo uutali kabotu wakuti “Mebo ndacembaala kale, tandicijisi mulimo.” Kuyeeya kuli boobu kulakonzya kupa muntu kubula nguzu. Lugwalo lwa Tusimpi 24:10 lwaamba kuti: “Ikuti watyompwa mubuzuba bwamapenzi, nkokuti nguzu zyako zilaceya.” Muciindi caboobo, muntu uulibombya ulatondezya busongo kwiinda mukubuzumina bukkale bwakwe alimwi akucita buyo zyeezyo nzyakonzya.

Ba Corrado, ibajisi myaka iili 77 baku Italy, cabusongo bakaamba kuti: “Ikuti kamweenzya mootokala uukkwela mulundu, mweelede kucinca buyo magiya kutegwa kamweenda asyoonto-syoonto ikutali kwiima buya pe.” Masimpe, kuli kucinca kweelede kucitwa kuti muntu wacembaala. Ba Corrado abakaintu babo bakatalika kuzilanga kabotu zintu caboola kumakani aamilimo yaaŋanda, batobela mulongo wakucita zintu uuli kabotu calo cipa kuti batalimvwi kukatala kapati kumamanino aabuzuba. Ba Marian, ibajisi myaka iili 81 baku Brazil, abalo bakulanga munzila yeelede kucembaala. Bakaamba kuti: “Ndaiya kucita zintu munzila njondikonzya. Ciindi nondibeleka  inga ndilalyookezya-okezya. Inga ndilakkala naa kulandabala ciindi nondibala naa kuswiilila nyimbo. Ndaiya kuzumina kuti tandikonzyi kucita zintu nzyondakali kukonzya kucita kaindi.”

AMUZILANGE KABOTU ZINTU: “Bamakaintu beelede kulisakatizya kwiinda mukusama kabotu, cabulemu alimwi acakulibatamika.” (1 Timoteyo 2:9) Majwi aakuti ‘kusama cabulemu’ aamba kutaciindizya alimwi akusama zisani zili kabotu. Ba Barbara, ibajisi myaka iili 74 baku Canada bakaamba kuti: “Ndilasoleka kulibamba kutegwa kandiboneka kabotu alimwi kandinyina tombe. Tandiyandi kusama zisani zitali mufashoni akaambo kakuti ndili mucembele; tandiyandi kuba amuuya wakuti ‘nsikwe makani ambondiboneka.’” Ba Fern, ibajisi myaka iili 91 baku Brazil bakaamba kuti: “Zimwi ziindi ndilaula zisani zinyowana kutegwa kandilimvwa kuti ndiboneka kabotu.” Pele ino ncinzi cikonzya kwaambwa kujatikizya bamaalumi bacembeede? Ba Antônio, ibajisi myaka iili 73 baku Brazil bakaamba kuti: “Ndilasoleka kapati kusama kabotu, kusama zisani zitakwe tombe alimwi ziboneka kabotu.” Kujatikizya bulondo, bakayungizya kwaamba kuti: “Ndilasamba amubili akuligela malezu abuzuba.”

Kulubazu lumwi, cilayandika kapati kutaciindizya kubikkila maano kujatikizya mbomuboneka cakuti mwaalilwa ‘kulibatamika.’ Ba Bok-im, ibajisi myaka iili 69 baku South Korea bazilanga kabotu zintu kujatikizya makani aazyakusama. Bakaamba kuti: “Ndilizyi kuti tandeelede kusama zisani zimwi nzyondakali kusama kandicili mukubusi.”

AMUZILANGE BWEELEDE ZINTU: “Mazuba oonse aamuntu uupengede mabyaabi, pele ooyo uulaamoyo uukkomene ulaapobwe ciindi coonse.” (Tusimpi 15:15) Mbomuyaabucembaala, mulakonzya kulimvwa bubi mwayeeya nguzu nzyomwakajisi nomwakacili bakubusi alimwi azintu zinji nzyomwakali kukonzya kucita kaindi. Eeci cilamvwika. Nokuba boobo, amusolekesye kutazundwa akuyeeya ooko kutali kabotu. Kunooyeeya zintu zyamusyule kulakonzya kumupa kuusa alimwi akumupa kutyompwa kucita zintu nzyomucikonzya kucita. Ba Joseph, ibajisi myaka iili 79 baku Canada, balo baamba kuti: “Ndilasola kuzikkomanina zintu nzyondikonzya kucita alimwi akutalimvwa bubi kujatikizya zintu nzyonditakonzyi kucita lino zyalo nzyondakali kukonzya kucita kaindi.”

Kubala alimwi akwiiya azyalo zilakonzya kumugwasya kuzilanga kabotu zintu nkaambo inga zyamugwasya kuyungizya luzyibo. Aboobo, amusolekesye kusikila mpomugolela kubikkila maano kukubala alimwi akwiiya zintu zipya. Ba Ernesto, ibajisi myaka iili 74 baku Philippines, balaunka kulaibbulali kuyoolanga-langa mabbuku aakkomanisya kubala. Bakaamba kuti: “Ndicikukkomanina kweendeenda mumasena aaindene-indene, alimwi akubala kulandikkomanisya muciindi cakukkala buyo.” Ba Lennart, ibajisi myaka iili 75 baku Sweden mane bakatalika mulimo uukatazya kapati wakwiiya mwaambo uumbi.

AMUBE BAABI: “Amube baabi, abalo bantu bayoomwaabila.” (Luka 6:38) Amube acilengwa cakujana ciindi cakubandika abantu bamwi alimwi akwaabila bamwi  zintu nzyomujisi. Eeci ciyoomupa kulimvwa kabotu alimwi akukkomana. Ba Hosa, ibajisi myaka iili 85 ibakkala ku Brazil balasolekesya kugwasya bamwi nokuba kuti abalo balaciswa-ciswa. Bakaamba kuti: “Ndilabatamba beenzuma ibaciswa naa batyompedwe akubalembela magwalo. Zimwi ziindi ndilabatumina zipego zisyoonto-syoonto. Alimwi ndilayandisya kujikila baciswa naa kubabambila twakulya tumwi tulweela.”

Ikuti katuli baabi, tuyookulwaizya bamwi kuba baabi abalo. Ba Jan, ibajisi myaka iili 66 baku Sweden bakaamba kuti: “Ikuti kamutondezya luyando kuli bamwi, abalo bayootalika kumuyanda akumubikkila maano.” Masimpe, muntu mwaabi upa kuti kube muuya mubotu wakusamausya walo uukomanisya bantu bamwi.

AMUBE BALONGWE: “Kufwumbwa muntu uulizandula utobela buyo zintu nzyayanda walo alikke; ulabukaka busongo boonse bugwasya.” (Tusimpi 18:1) Nokuba kuti kuli ziindi nzyomunga mwayanda kuba nyolikke, tamweelede kuba acilengwa cakulizandula. Ba Innocent, ibajisi myaka iili 72 baku Nigeria balakkomana kuba antoomwe abalongwe babo. Bakaamba kuti: “Ndilakkomana kapati kuyanzana abantu bamisela iindene-indene.” Ba Börje, ibajisi myaka iili 85 baku Sweden bakaamba kuti: “Ndilasolekesya kwiizya abakubusi. Kubona nguzu zyabo kundipa kulimvwa mbuli kuti ndicili mukubusi.” Amubweze ntaamu yakutamba balongwe banu kuŋanda. Ba Han-sik, ibajisi myaka iili 72 baku South Korea bakaamba kuti: “Mebo abakaintu bangu tulayandisya kutamba beenzuma bamisela iindene-indene—bapati abakubusi—kutegwa tulide antoomwe.”

Balongwe tabakatazyi kubandika limwi. Pele mbwaanga kubandika takuli kwamuntu omwe buyo, nkokuti mweelede kwaambaula alimwi akuswiilila. Amutondezye kuti mulababikkila maano bamwi. Ba Helena, ibajisi myaka iili 71 baku Mozambique bakaamba kuti: “Ndilamvwana abantu alimwi ndilabalemeka. Ndilaswiilila nzyobaamba kutegwa ndizyibe mbobayeeya alimwi anzyobayanda.” Ba José, ibajisi myaka iili 73 baku Brazil bakaamba kuti: “Bantu balakkomana kuba akati kabantu babaswiilila—bantu ibatondezya lweetelelo akubabikkila maano bamwi, ibalumbaizya aciindi ceelede alimwi ibaseka-seka.”

Ciindi nomwaamba mbomuyeeya, amubikkile maano ‘kulweezya majwi aanu amunyo.’ (Bakolose 4:6) Kamubabikkila maano bamwi akubakulwaizya.

KAMULUMBA: “Amutondezye kuti mulalumba.” (Bakolose 3:15) Twanoogwasyigwa, atutondezye kuti tulalumba akaambo kalugwasyo oolo. Kwaamba majwi aatondezya kulumba kulagwasya kutegwa tube azilongwe zibotu. Ba Marie-Paule, ibajisi myaka iili 74 baku Canada bakaamba kuti: “Mebo abalumi bangu caino-ino twakalongela muŋanda nsyoonto. Twakajisi balongwe banji ibakatugwasya. Twakabula majwi aakwaamba. Aboobo twakabatumina tukkaadi twakulumba mpoonya bamwi kuzwa ciindi eeco twali kubatamba kuzoolida antoomwe.” Ba Jae-won, ibajisi myaka iili 76 baku South Korea, balalumba akaambo kakubabweza amootokala kuunka ku Ŋanda ya Bwami. Bakaamba kuti: “Ndilalumba kapati akaambo kalugwasyo loonse oolu cakuti ndilasolekesya kupa mali aakuula mungwimba. Zimwi ziindi ndilabamba zipego zisyoonto-syoonto kazijisi amajwi aakulumba.”

Kwiinda zyoonse, amulumbe akaambo kabuumi mbomujisi. Mwami musongo Solomoni wakatuyeezya kuti: “Mubwa uucipona mubotu kwiinda syuumbwa uufwide.” (Mukambausi 9:4) Masimpe, kwiinda mukuzilanga kabotu zintu alimwi akulisungula kucinca, cilakonzyeka kucembaala kamukkomene.