Ndakazyalilwa ku Acul, idolopo lili mumalundu, Guatemala nkoili kumbo. Mukwasyi wangu uzwa mumusyobo wabana Ixil, ikakamu kabantu bazwa muzyalani lyaambaula mwaambo waci Maya. Kuyungizya amwaambo waci Spanish, ndilaambaula amwaambo wesu. Ndakazyalwa ciindi nikwakali nkondo yamucisi, mu Guatemala iyakatola myaka iili 36. Aciindi eeco, bunji bwabana Ixil bakafwa.

Nondakali amyaka yone yakuzyalwa, mupati wangu musankwa iwakali amyaka iili 7 wakali kusobanya kabbomba kakumaanza kalo ikakabbotoka cakutayeeyela. Akaambo kantenda eeyi, ndakoofwaala, mpoonya mukubula coolwe, mupati wangu walo wakafwa mpoonya aawo. Kumane, ndakatolwa kucikolo cabana boofwu mudolopo lya Guatemala City, ooko nkondakaiya kubala mabbuku aaboofwu. Kandili kooko, bamayi bakandikasya kubandika abana bamwi, pele tiindakali kutumvwisya twaambo ncobakaambila boobo, abalo basicikoloma bakali kunditantamuka. Lyoonse ndakali kulendelelwa alimwi ndakali kulombozya buyo kuunka kuŋanda kwamyezi yobilo amwaka kuli baama, balo ibakali aalubomba alimwi alweetelelo. Cuusisya ncakuti, bakafwa nondakali amyaka iili 10. Akaambo kakuti ndakasweekelwa muntu alikke iwakali kundiyanda kapati, ndakausa citaambiki.

Nondakaba amyaka iili 11, ndakapiluka kudolopo nkondakazyalilwa akutalika kukkala abapati bangu basankwa mbotwakazyedwe limwi kuli bataata alimwi amukwasyi wabo. Bakali kundilanganya kumubili, pele kunyina wakali kukonzya kundigwasya kujatikizya zintu izyakali kundikatazya mumizeezo. Zimwi ziindi ndakali kumulilila Leza akwaamba kuti: “Ino baama bakafwida nzi? Ino ndakabeda nzi moofwu?” Bantu bakali kundaambila kuti mapenzi aaya nkuyanda kwa Leza. Aciindi eeco ndakalimvwa kuti Leza tajisi luse pe alimwi ulasalulula. Icakandipa kuti nditalijayi, nkuti buyo tiindakajisi nzila yakucita boobo.

Koofwaala kwakandipa kupenga kumubili alimwi amumizeezo. Kandicili musyoonto, ndakatundululwa munzila yakoonwa ziindi zinji. Taakwe ngondakaambila makani aaya—kayi ndakali kuyeeya kuti kunyina uukonzya kundibikkila maano. Bantu tiibakali kuvwula kundaambauzya, aboobo andime tiindakali kwaambaula amuntu uuli woonse. Ndakali kulizandula alimwi ndakalityompedwe, kunyina ngondakali kusyoma.

Nondakali amyaka iili 13, Bakamboni ba Jehova bobilo (banabukwetene) bakandisikila ciindi notwakali kusobana kucikolo. Mwiiyi umwi waacikolo cesu iwakali kweetezyegwa abukkale bwangu, ngowakabaambila kuti bandiswaye. Bakandaambila kujatikizya zisyomezyo zyamu Bbaibbele zyakuti bafwide bayoobuka alimwi akuti bumwi buzuba boofwu bayoobona alimwi. (Isaya 35:5; Johane 5:28, 29) Makani ngobakandiyiisya akandikkomanisya kapati, pele cakali ciyumu kubandika ambabo nkaambo tiindakazyibide kwaambaula. Pele nokuba kuti ndakali aansoni kapati, calubomba alimwi cakukkazika moyo bakazumanana kundiswaya kutegwa bandiyiisye Bbaibbele. Banabukwetene aaba bakali kweenda makkilomita aainda ku 10 alimwi bakali kutanta mulundu kutegwa basike kudolopo nkondakali kukkala.

Bapati bangu bakandaambila kuti banabukwetene aaba bakali kusama kabotu pele tiibakajisi zintu zinji zyakumubili. Nokuba boobo, lyoonse bakali kutondezya kuti balandibikkila maano kwiinda mukundiletela zipego zisyoonto-syoonto. Ndakalimvwa kuti balikke Banakristo bakasimpe mbabakonzya kutondezya kulyaaba kuli boobu.

Ndakaiya Bbaibbele kwiinda mukubelesya mabbuku aaboofwu. Nokuba kuti ndakali kuzimvwisya nzyondakali kwiiya, pesi mumizeezo tiicakali cuuba-uba kuzizumina zintu zimwi. Mucikozyanyo, ndakakatazyigwa kusyoma kuti Leza ulandibikkila maano mebo lwangu kundigama alimwi akuti bantu bamwi balandibikkila maano mbubwenya mbuli Leza. Ndakakamvwisya kaambo Jehova ncazumizya bubi kucitika kwakaindi kaniini, pele cakandiyumina kumubona kuti ngu Taata siluyando ncobeni. *

Mukuya kwaciindi, nzyondakaiya mu Magwalo zyakandigwasya kucinca mbondakali kuzibona zintu. Mucikozyanyo, ndakaiya kuti Leza uleetezyegwa kapati kubona bantu bapenga. Kujatikizya bakombi bakwe ibakali kweendelezyegwa calunya, Leza wakati: “Masimpe ndaabona mapenzi aabantu bangu . . . Ndilaazyi kabotu mapenzi aabo.” (Kulonga 3:7) Nondakabuzyiba kabotu bube bwa Jehova butaliboteli, ndakaaba buumi bwangu kulinguwe. Mu 1998, ndakabbapatizyigwa akuba Kamboni wa Jehova.

Nokwakainda mwaka omwe kuzwa nondakabbapatizyigwa, ndakaunka kucikolo cimwi caboofwu afwaafwi adolopo lya Escuintla. Mwaalu umwi wamumbungano yakubusena nkondakali kukkala wakazyiba buyumuyumu mbondakajisi bwakujanika kumiswaangano mudolopo mondakakomenena. Mbungano iyakali afwaafwi njeeyo yakali amulundu banabukwetene mpobakali kwiinda kutegwa baboole kuzikwiiya andime, aboobo cakali kundiyumina kweenda musinzo ooyu. Mwaalu ooyu wakandigwasya kwiinda mukujana mukwasyi wa Bakamboni mu Escuintla ibakalyaabide kuti ndikkale ambabo kutegwa kabandigwasya kuunka kumiswaangano. Kusikila sunu, balandibamba mbuli kuti ndakazyalilwa muŋanda yabo.

Ndilakonzya kwaamba zinji kujatikizya luyando lwini-lwini ndobanditondezya bakwesu bamumbungano. Mbuli Kamboni wa Jehova, zyoonse eezyi zindipa kusinizya kuti, ndili akati ka Banakristo bakasimpe.—Johane 13:34, 35.

Tandicilimvwi kubula mulimo naa kubula bulangizi. Lino buumi bwangu bulaampindu ncobeni. Mbuli mukambausi waciindi coonse mumulimo wakuyiisya Bbaibbele wa Bakamboni ba Jehova, ndibikkila kapati maano kuyiisya bamwi kasimpe kayandika kapati kamu Bbaibbele muciindi cakubikkila maano kubulema bwangu. Alimwi ndilijisi coolwe cakubeleka mbuli mwaalu mumbungano alimwi akupa makani aa Bbaibbele kubuleya mumbungano zili afwaafwi. Mane buya ndakalijisi acoolwe cakupa makani aamu Bbaibbele amuswaangano wacooko ooko bantu banji nkobajanika.

Mu 2010, ndakamanizya Cikolo Cakwiiya Mulimo (lino ciitwa kuti Cikolo Cabakambausi ba Bwami) icakacitilwa mu El Salvador. Cikolo eeci cakandigwasya kubona mbondikonzya kwiizuzikizya kabotu mikuli yangu mumbungano. Ikutambula lwiiyo oolu kwakandipa kulimvwa kuti Jehova Leza ulandibikkila maano akuti ulandiyanda kapati, walo uukonzya kuyiisya muntu uuli woonse mumulimo wakwe.

Jesu wakaamba kuti: “Kupa kulakkomanisya kapati kwiinda kupegwa.” (Milimo 20:35) Mazuba aano, ndilakonzya kwaamba camasimpe kuti ndilikkomene, alimwi nokuba kuti kaindi ndakali kuyeeya kuti eeci tacikonzyeki, lino ndilimvwa kuti ndilakonzya kubagwasya bamwi.