Bantu tabacijisi bulemu. Mwaunka kucibbadela mulajana kuti balwazi babwentela bamadokota; mumalesitilanti basikuula zyakulya bafwubaazya baabo babapa zyakulya; mundeke basikukwela ndeke balwana bantu babeleka mumo; bana batalilemeki bafwubaazya bamayi babo kucikolo akubalwana; kumane basimapolitikisi bamwi balajatikizyigwa mumicito mibi kapati alimwi bamwi inga basola kulitondezya kuti mbantu balilemeka kabotu.

 Bbaibbele lilijisi busolozi bukonzya kutugwasya kuzyiba mbotweelede kulilemeka. Alimwi lilapandulula kaambo bantu ncobatalilemeki mazuba aano.

 Munyika yoonse cilalibonya kuti bantu banji tabacililemeki.

•   Kweelana abuvwuntauzi bwakacitwa caino-ino, bana America basyoma kuti bantu bakkala ku United States babula bulemu lino kwiinda mbocakabede myaka iili 22 yainda.

•   Mubuvwuntauzi abumwi bwakacitwa, kubantu bainda ku 32,000 muzisi zili 28, kwakajanwa kuti 65 pesenti yabantu aabo bakaamba kuti bantu mbobalilemeka mazuba aano ncintu ncobatanabwene.

 Bbaibbele lyakasinsima kujatikizya bantu mbobalilemeka mazuba aano.

•   ‘Kumazuba aamamanino kuyooba ziindi zikatazya ncobeni. Nkaambo bantu bayooba basikuliyanda, bayandisya mali, basikulidunda, basikulisumpula, basikusampaula, batamvwidi bazyali, batalumbi, batajisi luyando lwakuzyalwa andulo, alimwi bakali.’​—2 Timoteyo 3:1-3.

 Kutegwa muzyibe zinji kujatikizya businsimi oobu mbobuli mukuzuzikizyigwa, amubale cibalo cakuti “Sena Bbaibbele Lyakaambilalimwi Bantu Mbobanikuyeeya Akucita Zintu Mazuba Aano?”

 Munyika eeyi bantu mobatalilemeki, mamiliyoni aabantu bajana kuti Bbaibbele lijisi busolozi bugwasya caboola kumakani aambotweelede kulilemeka. Busolozi mbolipa “bulasyomeka ciindi coonse, lino mane kukabe kutamani.” (Intembauzyo 111:8) Amubone zikozyanyo zisyoonto:

•   Ncolyaamba Bbaibbele: “Zintu zyoonse nzyomuyanda kuti bantu bamucitile, anywebo nzyomweelede kubacitila.”​—Matayo 7:12.

   Bupanduluzi: Tweelede kweendelezya bamwi caluzyalo alimwi cabulemu, mbubonya mbotuyanda kuti abalo batweendelezye.

•   Ncolyaamba Bbaibbele: “Mbwaanga lino mwacileka kubeja, umwi aumwi wanu aambe zyamasimpe kumweenzinyina.”​—Baefeso 4:25.

   Bupanduluzi: Tweelede kusyomeka muzintu zyoonse nzyotwaamba akucita.

 Kutegwa muzyibe zinji mumakani aaya, twamulomba kuti mubale:

•   Ngazi Yamulindizi iijisi mutwe wakuti “Ncinzi Cikonzya Kumugwasya Kuzyiba Ciluzi Alimwi Acitaluzi?”

•   Cibalo cakuti “Bbaibbele Mbolikonzya Kutugwasya Kutabeteka Bamwi.”