Mumyaka iili 30 yainda, bantu banji balikulimvwa kuti kuli kukamantana akati kazisi alimwi kukamantana ooku kuli mukuyaambele. Nokuba boobo, zintu zyacitika mumyaka yainda zitondezya kuti kaambo aaka andiza nkakubeja.

•   “Bantu balalibilika kuti nkondo iili ku Gaza ilakonzya kujatikizya zisi zimwi zyamucilawo eeci ciindi cisi ca Israel alimwi acipani ca Hezbollah nobalwana amunyinza wa Lebanon.”​—Reuters, January 6, 2024.

•   “Tubunga tweendelezyegwa acisi ca Iran tulalwana mumasena aindene-indene alimwi cisi ca Iran catalika alimwi kupanga zilwanyo zyankondo. Kuyungizya waawo, cisi ca Russia a China lino zibelekela antoomwe. Eeci capa kuti zisi zimwi zilibilike kapati.”​—The New York Times, January 7, 2024.

•   “Cisi ca Russia cazumanana kulwana cisi ca Ukraine akucinyonyoona kapati.”​—UN News, January 11, 2024.

•   “Cisi ca China cazumanana kuba abuvwubi alimwi azilwanyo zyankondo. Bantu baku Taiwan balalisumpula akaambo kacisi cabo alimwi cisi ca China a U.S. tazicimvwani cakuti kufwumbwa ciindi nkondo ilakonzya kutalika.”​—The Japan Times, January 9, 2024.

 Sena Bbaibbele kuli ncolyaamba kujatikizya kutamvwana kuliko akati kazisi nkotubona mazuba aano? Sena kuyoosololela kunkondo yanyika yoonse?

 Bbaibbele tiilyakazyaamba cacigaminina zisi zinakulwana mazuba aano. Nokuba boobo, lyakaamba zyankondo zili mukucitika mumazuba eesu alimwi ‘zigusya luumuno anyika.’​—Ciyubunuzyo 6:4.

 Bbuku lya Daniele lyakasinsima kuti “kuciindi cakumamanino,” beendelezi bamunyika ibazundana bakali ‘kuyootonkana,’ naa kuzundana kutegwa umwi abe nguwe uubeendelezya boonse. Kuzundana ooko kunooli kupati alimwi kuyootola “lubono” lunji kapati, naa mali manji.​—Daniele 11:40, 42, 43.

 Bbaibbele litondezya kuti bukkale bwamunyika buyakwiindila kubija kabutanabota. Jesu wakasinsima kuti “kuyooba mapenzi mapati aatanacitikide kuzwa kumatalikilo aanyika.” (Matayo 24:21) “Mapenzi mapati” aaya ayoosololela kunkondo iitegwa Amagedoni, yalo yaambidwe kuti “nkondo yabuzuba bupati bwa Leza Singuzuzyoonse.”​—Ciyubunuzyo 16:14, 16.

 Nokuba boobo, Amagedoni iyoofwutula bantu, kutali kubanyonyoona pe. Kwiinda munkondo eeyi, Leza uyoomanizya bulelo bwabantu, bwalo bwapa kuti kube nkondo zinji zinyonyoona. Kutegwa mwiiye Amagedoni mboiyakuleta luumuno lutakamani, amubale zibalo zitobela:

•   “Ino Nkondo ya Amagedoni Ninzi?”

•   “Amagedoni, Makani Mabotu!”