Munyika mazuba aano, kusyomeka kubonwa kuti takugwasyi. Bamwi mane inga baamba kuti:

•   ‘Ikuti nditabeji kubazyali bangu, balandisubula.’

•   ‘Ikuti nditabeji mumusunko ooyu, ndilafeela.’

•   ‘Ikuti nditabbi cintu eeci, ndeelede kuyandaula mali kutegwa ndicijane.’

 Bamwi balakonzya kwaamba kuti, ‘Ino ncinzi cilubide, tee bantu boonse tabasyomeki?’

 Bwiinguzi kumubuzyo ooyu ngwakuti tabali boonse batasyomeki. Bantu banji​—kubikkilizya abakubusi banji​—basyoma kuti cilagwasya kusyomeka, alimwi kuli kaambo kabotu ncocili boobu. Bbaibbele lyaamba kuti: “Kufwumbwa cintu muntu ncasyanga, ncencico eeco ncayootebula.” (Bagalatiya 6:7) Eeci caamba kuti lyoonse zintu nzyotucita zilakonzya kutuletelela naa pe.

 Mucikozyanyo, amubone zintu zibi zyakabacitikila bantu bakali kubeja aciindi cimwi.

  “Ndakababeja bamaama kuti tiindakali kubandika amusankwa umwi. Bakalizyi buya kuti ndakali kubeja. Nindakabeja ciindi catatu kujatikizya makani aaya, bamaama bakanyema kapati. Ndakasubulwa kwansondo zyobilo, alimwi bakandikasya kubelesya fooni yangu naa kweebelela TV kwamwezi omwe. Kuzwa leelyo tandinabuzuba ndababeja bazyali bangu alimwi!”​—Anita.

 Ncomweelede kuyeeya: Nkaambo nzi ncocikonzya kutola ciindi cilamfwu kuti banyina Anita batalike alimwi kumusyoma mwanaabo?

 Bbaibbele lyaamba kuti: “Mbwaanga lino mwacileka kubeja, umwi aumwi wanu aambe zyamasimpe kumweenzinyina.”​—Baefeso 4:25.

  “Ndakabacenga bazyali bangu kandiyeeya kuti ndacenjela pele bakandibuzya alimwi kuti ndiinduluke kwaamba cakacitikide. Ncondakaamba cakaliindene kapati ancondakaambide kumatalikilo. Kuti waamba masimpe kuzwa kumatalikilo, tokonzyi kuziluba nzyookaambide aciindi cimwi!”​—Anthony.

 Ncomweelede kuyeeya: Ino Anthony wakeelede kucita buti kutegwa atajaniki mubukkale oobu bufwisya nsoni?

 Bbaibbele lyaamba kuti: “Milomo yaamba zyakubeja ncisesemyo kuli Jehova, pele aabo bacita zintu cakusyomeka mbabamukonda.”​—Tusimpi 12:22.

  “Ndilijisi mweenzuma umwi uuyungizya twaambo tutako. Ndilamuyanda kapati alimwi inga tanditubikkili maano twaambo ntwaamba. Nokuba boobo cilakatazya kumusyoma cakumaninina.”​—Yvonne.

 Ncomweelede kuyeeya: Mbuti kuyungizya twaambo tutako alimwi akutaamba masimpe mbokukonzya kumubisyila zina mweenzinyina wa Yvonne?

 Bbaibbele lyaamba kuti: “Tuyanda kuti katusyomeka muzintu zyoonse.”​—Bahebrayo 13:18.

 Lino amubone bubotu mbomukonzya kujana akaambo kakusyomeka.

  “Bakaintu bamwi ibakali kweenda ambele lyangu bakalosya mali. Ndakabaita akubapa mali aabo. Bakalumba kapati. Bakaamba kuti: ‘Wacita kabotu. Mbasyoonto bakonzya kucita boobu.’ Ndakakkomana akaambo kakulumbaizyigwa kucita ciluzi!”​—Vivian.

 Ncomweelede kuyeeya: Nkaambo nzi bakaintu aaba ncobakagambwa akaambo kakusyomeka kuli boobu? Ino kusyomeka kwakamugwasya buti Vivian?

 Bbaibbele lyaamba kuti: “Balikkomene aabo . . . bacita ziluleme ciindi coonse.”​—Intembauzyo 106:3.

  “Mukwasyi wesu ubeleka mulimo wakusalazya masena, alimwi zimwi ziindi notupyaanga muofesi, tulajana makkoini ansi. Kuti caba boobo, tulaabikka makkoini atebulu lili afwaafwi. Mubelesi wakubusena bumwi wakanyema akaambo kakusyomeka kwesu. Wakaamba kuti, ‘Nkakkoini buyo!’ Pele cibotu ncakuti, lyoonse wakali kutusyoma.”​—Julia.

 Ncomweelede kuyeeya: Ino kusyomeka kwa Julia inga kwagwasya buti ciindi nayandika pepa lipandulula mbwabede ciindi nayandaula mulimo umbi?

 Bbaibbele lyaamba kuti: “Kosungwaala kulitondezya kuti uli muntu uutambulika kuli Leza, mubelesi uutakwe cintu cimuusya nsoni.”​—2 Timoteyo 2:​15.

  “Ndakavwozyegwa mali aamawoola aakumulimo aali 80 muciindi camawoola aali 64. Nokuba kuti nocakabota kuumuna buyo, ndakaalilwa kucita oobo. Ndakamwaambila iwakali kulanganya mali aakkampani, aboobo wakalumba kapati. Kkampani eeyi ilivwubide kapati, pele tiindakali kuyanda kuyobola mali ngondakazyi kuti ngakubba.”​—Bethany.

 Ncomweelede kuyeeya: Sena kubbida kkampani takuli kubba mbubwenya mbuli kubbida muntu?

 Bbaibbele lyaamba kuti: “Muntu mumpelenge ncisesemyo kuli Jehova, pele balulami mbabajisi cilongwe ciyumu anguwe.”​—Tusimpi 3:32.