Kubantu bamwi, kunyina cintu cibi mbuli kukkala aŋanda masyikati noiwa mvwula kakunyina cakucita alimwi kakunyina kwakuunka. Mukubusi wazina lya Robert wakaamba kuti: “Aziindi zili boobu, inga ndikkede buyo kakunyina kuzyiba ncondeelede kucita.”

 Sena kuli nomwakalimvwide boobu? Kuti naa mboobo, cibalo eeci cilamugwasya kapati!

•  Ncomweelede kuzyiba

•  Ncomweelede kucita

•  Nzyobaamba beenzinyoko

•   Kubelesya intaneti inga tiikwalimana penzi.

   Kulanga-langa zintu ziindene-indene a Intaneti inga kwapa kuti mutalendelelwi, pele alimwi kulakonzya kupa kuti mube batolo kuyeeya, aboobo eeco inga camupa kulendelelwa. Mukubusi wazina lya Jeremy uujisi myaka yakuzyalwa iili 21 wakaamba kuti: “Inga walijana kuti wiile buyo kulanga asikkilini kakunyina kuyeeya cintu cilicoonse.”

   Awalo mukubusi wazina lya Elena ulaazuminizya makani aaya. Wakaamba kuti: “Tazili zyoonse nzyokonzya kucita aintaneti. Ipa kutabona zintu bwini mbozibede cakuti wazwa aintaneti, ulimvwa kulendelelwa kapati!”

•   Kuzilanga kabotu zintu kulagwasya.

   Sena kuba azinji zyakucita inga kwalimana penzi lyakulendelelwa? Ciya buyo aluyandisisyo ndomujisi kuli ceeco ncomucita. Mucikozyanyo mukubusi wazina lya Karen wakaamba kuti: “Kunyina nindakali kucikkomanina cikolo, nokuba kuti ndakalijisi zyakucita buzuba boonse. Weelede kuciyandisya eeco ncocita kutegwa utalendelelwi.”

 Sena mulizyi? Kubula cakucita cipa coolwe cakujana cintu cimwi cakucita icigwasya.

 Amube azintu zinji nzyomukkomanina kucita. Amujane balongwe bapya. Amutalike kucita cintu cipya cimukkomanisya. Amuvwuntauzye makani mapya. Bantu bajisi zintu zinji nzyobakkomanina tabavwuli kulendelelwa ciindi nobali balikke alimwi tabalendelezyi nobali abamwi!

 Njiisyo yamu Bbaibbele: “Kufwumbwa mulimo maanza aako ngaajana, koubeleka anguzu zyako zyoonse.”​—Mukambausi 9:​10.

 “Caino-ino ndakatalika kwiiya ci Mandarin Chinese, alimwi kusola-sola kwaambaula mwaambo ooyu abuzuba kwakandipa kubona kuti ndakaindidwe cintu cibotu. Cilandikkomanisya kapati kuba acintu cakucita. Cindipa kuyeeya alimwi akundigwasya kucibelesya munzila iigwasya ciindi.”​—Melinda.

 Amubikkile maano kumbaakani yanu. Ikuti kamujisi mbaakani nomucita cintu cimwi, luyandisisyo lwakucicita luyookomena. Nouba mulimo wakucikolo mulakonzya kuukkomanina kuti kamujisi mbaakani.

 Njiisyo yamu Bbaibbele: “Kumuntu, kunyina cintu cibotu kwiinda . . . kukkomana mumilimo njabeleka canguzu.”​—Mukambausi 2:​24.

 “Nindakali kuyanda kumanizya cikolo, ndakali kubala kwamawoola aali 8 nkaambo kunyina nindakali kubala kumatalikilo. Sena cakali kulendelezya? Peepe akaambo kakuti ndakakanzide kusika ambaakani yangu. Ndakabikkila maano kubulumbu bwakali kumbele nkokuti kumanizya cikolo alimwi eeci cakandikulwaizya.”​—Hannah.

 Kuti mwaalilwa mutanyongani azintu nzyomutakonzyi kucinca. Noziba zintu zibotu kapati zilakonzya kuleka kukkomanisya. Alimwi buya nobaba balongwe beni-beni balakonzya kujaya pulogilamu, akumusiya kamutakwe cakucita. Muciindi cakutyompwa akaambo kabukkale oobu, amusoleke kuzilanga kabotu zintu.

 Njiisyo yamu Bbaibbele: “Ooyo uulaamoyo uukkomene ulaapobwe ciindi coonse.”​—Tusimpi 15:15.

 “Mweenzuma wakandaambila kuti ndeelede kwiiya kucikkomanina ciindi nondili ndelikke. Wakaamba kuti cilayandika kwiiya kuba abeenzinyoko alimwi akwiiya kuba olikke.”​—Ivy.