“Uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”—Ciyubunuzyo 21:4, Bbaibbele lya Busanduluzi Bwanyika Mpya.

 “Uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:4, The Bible in Tonga Lyamu 1963.

 Leza usyomezya ikutali buyo kugusya kucisa akupenga kucitikila bantu mazuba aano pele alimwi acipa bantu kuti kabapenga.

 “Uyoosindula misozi yoonse kumeso aabo.” Majwi aaya akankaizya cisyomezyo ca Jehova a cakalembwa amusinsimi Isaya cakuti “uyoosindula misozi kumasyu oonse.” (Isaya 25:8; Ciyubunuzyo 7:17) Majwi aaya atondezya kuti Leza ulababikkila maano boonse aabo balila akaambo kakusweekelwa muyandwa wabo naa cintu cili coonse cipa kuti kabapenga.

 “Lufwu talukabi limbi.” Majwi aaya alimwi alakonzya kwaambwa kuti “kunoocinyina lufwu.” Leza usyomezya kulumana lufwu alimwi amapenzi aaboola akaambo kandulo. Kuyungizya waawo, kuyooba kubusyigwa kwabafwide. (1 Bakorinto 15:21, 22) Aboobo, lufwu ‘luyoonyonyoonwa.’—1 Bakorinto 15:26.

 “Akwalo koomoka, kulila nokuba kucisa takukabi limbi pe.” Cisyomezyo ca Leza eeci tacaambi kuti bantu tabacinoomvwi kucisa, mbuli kucisa kwalo kutucenjezya kuti kuli ntenda naa kuti inga twalicisa. Muciindi caboobo, cisyomezyo eeci citondezya kuti kucisa kuli koonse ikwakaboola akaambo kacibi b alimwi akutalondoka kuyoomana.—Baroma 8:21, 22.

 “Zintu zyakaindi zyamana.” Majwi aaya aamamanino aamba kucinca kupati bantu nkobayoobona. Lifalensi iimwi yakaamba kuti: “Buumi bantu mbobakali kupona kaindi, ciindi lufwu, koomoka, kulila, alimwi akucisa nozyakali cibeela cabuumi bwabantu, buyoonjililwa busena abuumi bupya.” Mpoonya bantu bayoopona lyoonse mane kukabe kutamani anyika, mbuli mbwaakali kuyanda Leza kuzwa kumatalikilo.—Matalikilo 1:27, 28.

 Kumatalikilo aacaandaano 21, mwaapostolo Johane wakapandulula nzyaakabona naakati: “Ndakabona julu lipya alimwi anyika mpya.” (Ciyubunuzyo 21:1) Wakabelesya maambilambali kupandulula kucinca kumaninide kwalo kwakasinsimwa mutupango twamu Bbaibbele tumbi. (Isaya 65:17; 66:22; 2 Petro 3:13) Mfwulumende ya Leza yakujulu, naa ‘julu mpya,’ iyoonjila mubusena bwamfwulumende zyabantu alimwi iyakweendelezya “nyika mpya,” nkokuti, bantu banoopona munyika.—Isaya 65:21-23.

 Ncinzi citondezya kuti cilengaano eeci caamba buumi bwaanyika? Cakusaanguna, cisyomezyo ca Leza cakatalika amajwi aakuti: “Tente lya Leza lili aabantu.” (Ciyubunuzyo 21:3) Aboobo, cisyomezyo eeci tacaambi bangelo bakkala kujulu, pele kubantu bakkala aanyika. Cabili, cilengaano cipandulula nyika mwalo ‘lufwu molutakabi limbi.’ (Ciyubunuzyo 21:4) Lufwu talunacitikide kujulu, pele lujatikizya buyo bantu ibali aanyika. (Baroma 5:14) Aboobo, cileelela kwaamba kuti kapango aaka kapandulula zintu ziyoocitika kumbele aanyika.

 Amweebelele kavidiyo aaka kutegwa mubone twaambo tupati-pati ituli mubbuku lya Ciyubunuzyo.