Bbaibbele lyaamba kuti kunyema cakutalijata nkubi, kuli sikunyema alimwi akuli baabo mbali limwi. (Tusimpi 29:22) Nokuba kuti zimwi ziindi kunyema takulubide, Bbaibbele lyaamba kuti aabo bazumanana “kunyema” tabakafwutuki pe. (Bagalatiya 5:​19-​21) Bbaibbele lijisi njiisyo zikonzya kugwasya muntu kukweendelezya kunyema.

•  Sena kunyema kulilubide lyoonse?

•  Ino ndilili kunyema nokulubide?

•  Ino mbuti mbomweelede kukweendelezya kunyema?

•  Tupango twamu Bbaibbele tujatikizya kunyema

 Peepe. Kunyema zimwi ziindi takulubide. Mucikozyanyo, mwaalumi uusyomeka Nehemiya ‘wakanyema kapati’ naakamvwa kuti bakombinyina bakali kupenzyegwa.​—Nehemiya 5:6.

 Zimwi ziindi Leza ulanyema. Mucikozyanyo, kaindi bantu bakwe nobakatyola cizuminano cakukomba nguwe alikke akutalika kukomba baleza bakubeja, ‘bukali bwa Jehova bwakababukila.’ (Babetesi 2:​13, 14) Nokuba boobo, kunyema tabuli mbobube bupati bwa Jehova Leza. Lyoonse ulijisi twaambo tumupa kunyema alimwi ulakweendelezya kunyema kwakwe.​—Kulonga 34:6; Isaya 48:9.

 Kunyema kulalubila ikuti tiitwalijata naa kuti kakunyina kaambo kapati katupa kunyema, kanji-kanji eeci icicitwa abantu batalondokede. Mucikozyanyo:

•   Kaini “wakanyema kapati” ciindi Leza naakakaka cipego cakwe. Kaini wakanyema kapati mane wakasika mpajaya munyina.​—Matalikilo 4:​3-8.

•   Musinsimi Jona “wakanyema kapati” ciindi Leza naakabafwida luse bana Nineve. Leza wakamululamika Jona akumwaambila kuti ‘tiicakali kabotu kunyema boobo’ akuti wakeelede kubafwida luzyalo basizibi abaya ibakeempwa.​—Jona 3:10–​4:​1, 4, 11. a

 Zikozyanyo eezyi zitondezya kuti kubantu batalondokede, “bukali bwamuntu tabuleti bululami bwa Leza.”​—Jakobo 1:​20.

•   Amuzyibe ntenda iiliko mukunyema cakutalijata. Bamwi inga bayeeya kuti kunyema ncitondezyo cakuba anguzu. Pele masimpe ngakuti, muntu uutalijati caboola kukunyema ujisi penzi pati. “Mbuli munzi wapwaigwa, uutajisi bwaanda, mbwabede muntu uutakonzyi kulijata kuti wanyema.” (Tusimpi 25:28; 29:11) Kulubazu lumwi, kuti katucikonzya kukweendelezya kunyema, tutondezya kuti tuli basinguzu ncobeni akuti tuli basongo. (Tusimpi 14:29) Bbaibbele lyaamba kuti: “Muntu uumuka kunyema uli kabotu kwiinda muntu singuzu.”​—Tusimpi 16:32.

•   Amuleke kunyema nomutanacita cintu cikonzya kumupa kuusa. Intembauzyo 37:8 yaamba kuti “Koleka kunyema abukali; utacimwi akutalika kucita cibi.” Amubone kuti ciindi notwanyema, tulakonzya kusala, nkokuti kusala kuti tuleke kunyema ‘katutanacita cibi.’ Lugwalo lwa Baefeso 4:​26 lwaamba kuti, “amunyeme, pele mutabisyi pe.”

•   Kuti kacikonzyeka, amuzwe abusena mbomwalimvwida buyo kuti mwatalika kunyema. Bbaibbele lyaamba kuti: “Kutalisya nkondo kuli mbuli kujalwida maanzi manji; kubwesyanya kakutanatalika, kozwa buyo aawo.” (Tusimpi 17:14) Nokuba kuti cilayandika kapati kubamba twaambo cakufwambaana, nywebo alimwi ayooyo ngomwalubizyanya mweelede kukkazika moyo kamutanaabandika makani aayo.

•   Amutuzyibe twaambo twamasimpe. Lugwalo lwa Tusimpi 19:11 lwaamba kuti: “Bupampu bwamuntu bulamulesya kufwambaana kunyema.” Ncabusongo kusaanguna kuzyiba twaambo toonse twamasimpe kamutanabweza ntaamu. Ciindi notuswiilila cakubikkila maano kujatikizya kaambo kamwi, tatukanyemi.​—Jakobo 1:​19.

•   Amupailile luumuno lwamumizeezo. Mupailo ulakonzya kumugwasya kuba ‘aluumuno lwa Leza oolo lwiinda maano oonse.’ (Bafilipi 4:7) Mupailo ninzila imwi motutambula muuya uusalala wa Leza, walo uukonzya kuzyala micelo mbuli luumuno, kukkazika moyo alimwi akulilesya mulindiswe.​—Luka 11:13; Bagalatiya 5:​22, 23.

•   Amusale kabotu balongwe. Kanji-kanji tuba mbuli bantu mbotuyanzana limwi. (Tusimpi 13:20; 1 Bakorinto 15:33) Bbaibbele litucenjezya kuti: “Utanoomvwani amuntu mukali alimwi utanikweendi amuntu uunyema-nyema buyo.” Nkaambo nzi? “Kutegwa utaiyi nzila zyakwe akulinjizya mukakole.”​—Tusimpi 22:24, 25.