Bbaibbele lyaamba zintu zicitika, bukkale alimwi amicito yabantu kuti ncitondezyo ‘cakumazuba aamamanino’ alimwi zintu eezyi zitugwasya kuzyiba kuti, “mamanino aabweende bwazintu” alaafwaafwi. (Matayo 24:3) Bbaibbele lyaamba ciindi eeci kuti “mazuba aamamanino” alimwi akuti “mamanino aaciindi.”—2 Timoteyo 3:1; Daniele 8:19.

 Bbaibbele lyakasinsima kuti kwakali kuyoocitika zintu zinji aciindi comwe zyalo zyakali kuyooba “citondezyo” cituzibya mazuba aamamanino. (Luka 21:7) Atulange-lange zikozyanyo zimwi:

 Kuvwula kwankondo. Jesu wakasinsima kuti: “Cisi ciyoobukila cisinyina abwami buyoobukila bwaminyina.” (Matayo 24:7) Mbubwenya buyo, lugwalo lwa Ciyubunuzyo 6:4 lwakasinsima kujatikizya muntu wacikozyanyo uutantide abbiza wiiminina nkondo kuti wakali ‘kuyoogusya luumuno anyika.’

 Nzala. Jesu wakasinsima kuti: “Kuyooba nzala.” (Matayo 24:7) Bbuku lya Ciyubunuzyo alimwi lyakasinsima kujatikizya cikozyanyo camuntu uutantide abbiza, walo wiiminina nzala mumasena manji amunyika.—Ciyubunuzyo 6:5, 6.

 Mizuzumo yanyika mipati. Jesu wakaamba kuti kuyooba “mizuzumo yanyika mumasena aaindene-indene.” (Matayo 24:7; Luka 21:11) Eeyi mizuzumo yanyika yakali kuyoopa kuti bantu banji kabapenga alimwi akufwa kapati kwiinda mbocakabede kaindi.

 Zilwazi. Jesu waakaamba kuti kuyooba “zilwazi.”—Luka 21:11.

 Bugwebenga. Nokuba kuti bugwebenga bwaliko kuzwa kaindi, Jesu wakasinsima kuti kumazuba amamanino ‘bubi buyoovwula.’—Matayo 24:12.

 Kunyonyoona nyika. Ciyubunuzyo 11:18 yakasinsima kuti bantu “bayakwiinyonyoona nyika.” Balacita oobo munzila zinji, kutali buyo kucita zintu zibyaabi pele alimwi akunyonyoona nyika.

 Bukkale bubyaabi. Kulugwalo lwa 2 Timoteyo 3:1-4, Bbaibbele lyakasinsima kuti banji bayooba bantu “batalumbi, batasyomeki, . . . batanyoneki, basikubejelezya, batalilesyi, bakali, batayandi bubotu, basikwaaba bamwi, batalaiki, basikulitukumuna.” Bantu bayoobutondezya bukkale oobu cakaanzambwene cakuti ciindi eeci ciyakweelela kwaambwa kuti ‘nciindi cikatazya ncobeni.’

 Kwaandaana kwamikwasyi. Kulugwalo lwa 2 Timoteyo 3:2, 3, Bbaibbele lyakasinsima kuti bantu banji ‘tabanoojisi luyando lwakuzyalwa andulo’ kumikwasyi yabo alimwi bana ‘tabanoomvwidi bazyali.’

 Luyando kuli Leza luyoomana. Jesu wakasinsima kuti: “Luyando lwabantu banji luyoomana.” (Matayo 24:12) Jesu wakali kwaamba kuti bantu banji tabacinoomuyandi Leza. Mbubwenya buyo, lugwalo lwa 2 Timoteyo 3:4 lwaamba kuti kumazuba aamamanino, bantu bali boobo ‘banooyandisya zyakulikondelezya kwiinda kuyandisya Leza’

 Kuupaupa ameso mubukombi ikudumide. Kulugwalo lwa 2 Timoteyo 3:5, Bbaibbele lyakasinsima kuti bantu banoolitamizya kuti bakomba Leza pele tabanooponi kweelana azyeelelo zyakwe.

 Kumvwisya businsimi bwamu Bbaibbele. Bbuku lya Daniele lyakasinsima kuti “kuciindi cakumamanino,” banji bayooba aluzyibo lwini-lwini lwamu Bbaibbele, kubikkilizya akubumvwisya kabotu businsimi oobu.—Daniele 12:4.

 Mulimo wakukambauka nyika yoonse. Jesu wakasinsima kuti: “Makani mabotu aa Bwami aaya ayookambaukwa munyika yoonse.”—Matayo 24:14.

 Kuvwula kwabantu bafwubaazya alimwi akunyansya. Jesu wakasinsima kuti bantu banji tabakabikkili maano kucitondezya cakuti tupona kumazuba aamamanino aabweende bwazintu oobu. (Matayo 24:37-39) Kuyungizya waawo, lugwalo lwa 2 Petro 3:3, 4 lwakasinsima kuti bamwi bayoosampaula citondezyo, alimwi akucikazya cakumaninina.

 Kuzuzikizyigwa kwabusinsimi boonse. Jesu wakaamba kuti mazuba aamamanino akali kuyoolibonya kwiinda mukuzuzikizyigwa kwabusinsimi boonse oobu aciindi comwe.—Matayo 24:33.

 Inzya. Zintu zicitika munyika alimwi ambozitobelana kweelana ambozilembedwe mu Bbaibbele zitondezya kuti mazuba aamamanino akatalika mu 1914, ciindi Nkondo Yakusaanguna Yanyika Yoonse noyakatalika. Kutegwa mubone zintu zicitika munyika mbozitondezya kuti tupona kumazuba aamamanino, amweebelele kavidiyo katobela:

 Mu 1914, Bwami bwa Leza bwakatalika kulela kujulu, cintu cakusaanguna ncobwakacita nkutanda Saatani Diabolosi alimwi amadaimona aakwe kuzwa kujulu akubazumizya buyo kucita zintu zijatikizya nyika. (Ciyubunuzyo 12:7-12) Kuyunga kwa Saatani kulalibonya kwiinda muzintu zibi nzyobacita bantu calo cipa kuti mazuba aamamanino abe “ziindi zikatazya ncobeni.” 2 Timoteyo 3:1.

 Bantu banji balityompedwe akaambo kaziindi eezyi zikatazya. Balalibilika akaambo kakuti bantu mazuba aano bakaleka kukamantana. Bamwi balalibilika kujatikizya buumi bwabantu mbobunoobede kumbele.

 Nokuba boobo, bamwi ibatyompedwe akaambo kazintu zicitika munyika lino balijisi bulangizi bwakumbele. Balisinizyide kuti ino-ino Bwami bwa Leza buyoocita cintu cimwi kugwisya mapenzi oonse aali munyika. (Daniele 2:44; Ciyubunuzyo 21:3, 4) Cakukkazika moyo, balindila Leza kuti azuzikizye makanze aakwe, alimwi balawuumbulizyigwa amajwi aa Jesu aakuti: “Ooyo uuliyumya kusikila kumamanino uyoofwutulwa.”—Matayo 24:13; Mika 7:7.