Diabolosi alimwi amadaimona balabayunga bantu kapati cakuti Bbaibbele lyaamba kuti: “Nyika yoonse ili mumaanza aamubi.” (1 Johane 5:​19) Bbaibbele lilaamba nzila nzyabelesya Diabolosi kuyunga bantu.

•   Lweeno. Bbaibbele likulwaizya Banakristo ‘kukazya bucenjezu bwa Diabolosi.’ (Baefeso 6:​11) Akati kabucenjezu oobu, nkweena bantu kuti basyome kuti bantu mbabelesya mbakombi ba Leza.​—2 Bakolinto 11:​13-​15.

•   Kukomba mizimo. Diabolosi ulabeena bantu kwiinda mubaŋanga, basibamooba alimwi abaabo ibasonda. (Deuteronomo 18:​10-​12) Kubelesya misamu iikola, kuungulwa, akubelesya nzila zyakuzinzibala kuyeeya zyalo zipa kuti muntu alekele limwi kuyeeya, kulakonzya kupa kuti muntu ayendelezyegwe amadaimona.​—Luka 11:​24-​26.

•   Bukombi bwakubeja. Zikombelo iziyiisya njiisyo zyakubeja zipa kuti bantu kabatamumvwidi Jehova. (1 Bakolinto 10:20) Ibbaibbele lyaamba kuti njiisyo eezyi zyakubeja ‘ninjiisyo zyamadaimona.’​—1 Timoteyo 4:1.

•   Ikunjilwa madaimona. Mu Bbaibbele kuli zibalo izyaamba kujatikizya bantu bamwi ibakanjilwa myuuya mibi. Zimwi ziindi bantu ibakanjidwe madaimona bakoofwaazyigwa, kuba basyaataambi nokuba kulicisa beni.​—Matayo 12:22; Maako 5:​2-5.

Mbomukonzya kweeleba kweendelezyegwa a Diabolosi

 Tamweelede kuyoowa kuti madaimona alamweendelezya nkaambo Bbaibbele lilatondezya mbomukonzya kuzwidilila mukukazya Diabolosi:

•   Amwiiye mbomukonzya kuzyiba nzila zya Diabolosi ‘kutegwa mutazundwi a Saatani.’​—2 Bakolinto 2:​11.

•   Amuliiye Bbaibbele kutegwa mube aluzyibo alimwi akuzibelesya nzyomwiiya. Kubelesya nzyomwiiya kuzwa mu Bbaibbele kuyoomukwabilila kutegwa muteendelezyegwi a Diabolosi.​—Baefeso 6:​11-​18.

•   Amuzisowe zyintu zyoonse ziswaangene amadaimona. (Milimo 19:19) Eezyi zilabikkilizya nyimbo, mabbuku, zikwankwani alimwi amavidiyo aakulwaizya kukomba mizimo.