Bana Israyeli bansiku bakapedwe mulawo wakupa mulumbo a naa cipaanzi cakkumi amwaka kuzwa kuzintu nzyobakajisi, kazili cibeela cakugwasyilizya bukombi busalala. Leza wakabaambila kuti: “Mwaka amwaka mweelede kubona kuti mwapa cipaanzi cakkumi cabutebuzi boonse bwamyuunda yanu.”—Deuteronomo 14:22.

 Kupa cakkumi kwakali cibeela ca Mulawo wa Musa ooyo Leza ngwaakapede bana Israyeli bansiku. Banakristo tabaceendelezyegwi a Mulawo wa Musa aboobo tabaciyandiki kunoopa cakkumi. (Bakolose 2:13, 14) Muciindi caboobo, Munakristo umwi aumwi ulapa zyakusanga “mbuli mbwaasala mumoyo wakwe, ikutali kupa kumoyo kakusiya naa cakusinikizyigwa buya, nkaambo Leza uyanda muntu uupa kumwi kakkomene.”—2 Bakorinto 9:7.

•  Kupa Cakkumi mu Bbaibbele​—“Cizuminano Cakaindi”

•  Kupa Cakkumi mu Bbaibbele​—“Cizuminano Cipya”

 Kupa cakkumi kulaambidwe ziindi zinji mucibeela ca Bbaibbele civwula kwiitwa kuti Cizuminano Cakaindi. Kanji-kanji kwaambidwe mumyaka iyakatobela kuzwa Mulawo wa Musa nowakapegwa kubana Israyeli kwiinda muli Musa. Pele, ziindi zisyoonto kwaambidwe Mulawo kautanapegwa.

Kautanapegwa Mulawo wa Musa

 Muntu wakusaanguna kupa cakkumi wakali Abram (Abrahamu). (Matalikilo 14:18-20; Bahebrayo 7:4) Cakkumi ncaakapa Abramu kumwami-mupaizi waku Salemu cakapegwa ciindi comwe buyo. Kunyina Bbaibbele mpolyaamba kuti Abrahamu naa bana bakwe bakapa cakkumi alimwi.

 Muntu wabili waambidwe mu Bbaibbele kuti wakapa cakkumi wakali Jakobo muzyukulu wa Abrahamu. Wakasyomezya Leza kuti, ikuti naa amuleleke, wakali kuyoomupa “cipaanzi cakkumi cazintu zyoonse” nzyaakali kuyoopegwa walo. (Matalikilo 28:20-22) Kweelana ambobaamba basikwiiya zyamu Bbaibbele bamwi, kweelede kuti Jakobo wakapa cakkumi eeco kwiinda muzituuzyo zyabanyama. Nokuba kuti wakacizuzikizya cikonke eeco, kunyina naakasungilizya banamukwasyi kuti abalo bacite mbubwenya.

Nowakapegwa Mulawo wa Musa

 Bana Israyeli bansiku bakapedwe mulawo wakuti kabapa cakkumi kutegwa kabagwasyilizya milimo yabo yabukombi.

•   Bakeelede kupa cakkumi ziindi zyobilo mumwaka. Cakusaanguna cakali kugwasyilizya babelesi babukombi baciindi coonse nkokuti iba Levi, kubikkilizya abapaizi, ibatakajisi nyika iibageme yakuti kabalima. (Myeelwe 18:20, 21) Ba Levi ibatakali bapaizi bakali kutambula cakkumi kuzwa kubantu alimwi bakali kusanga iziinda kubota ‘zyacipaanzi cakkumi cacipaanzi cakkumi’ kubapaizi.—Myeelwe 18:26-29.

•   Cabili, cakali kugwasya ba Levi alimwi abantu buyo ibatakali ba Levi. (Deuteronomo 14:22, 23) Mikwasyi yabana Israyeli yakali kucibelesya cakkumi eeci muziindi zyamapobwe aalubazu, alimwi mumyaka imwi cakali kwaabilwa akubacete kutegwa bacikonzye kuzumanana kupona.—Deuteronomo 14:28, 29; 26:12.

 Ino cakkumi cakali kubalilwa buti? Bana Israyeli bakali kubikka ambali cipaanzi cakkumi cabutebuzi bwabo mumwaka. (Levitiko 27:30) Kufwumbwa muntu iwakali kuyanda kupa mali kaali cakkumi muciindi cabutebuzi bwakwe, wakeelede kuyungizya cipaanzi casanu kumali aayo. (Levitiko 27:31) Alimwi bakapedwe mulawo wakuti kabapa ‘ŋombe ambelele yakkumi.’—Levitiko 27:32.

 Kutegwa kabacizyiba cakkumi cazivwubwa zyabo, bana Israyeli bakali kubikka ambali munyama wakkumi kuzwa muluba. Mulawo wakali kwaamba kuti tiibakeelede kubalanga-langa naa kubacincanya banyama aabo ibakasalidwe, nokuba kupa mali muciindi cazivwubwa zyabo. (Levitiko 27:32, 33) Nokuba boobo, cakkumi cabili icakali kunoobelesyegwa mumapobwe aamwaka cakali kukonzya kucincigwa kuba mali. Coolwe eeci cakali kubagwasya kapati bana Israyeli ibakali kweenda misinzo milamfwu kuti bakajanike kumapobwe.—Deuteronomo 14:25, 26.

 Ndilili bana Israyeli nobakali kupa cakkumi? Bakali kucita oobo mwaka amwaka. (Deuteronomo 14:22) Nokuba boobo, mwaka waciloba wakali waalubazu. Ooyu wakali mwaka wasabata, naa mwaka wakulyookezya, nobatakali kulima zisyango zili zyoonse bana Israyeli. (Levitiko 25:4, 5) Kutondezya mbowakali kuyandika mwaka ooyu, kunyina cakkumi cakali kupegwa aciindi cakutebula. Mumwaka watatu awa cisambomwe waciindi camu mwaka wa Sabata imwi-aimwi, bana Israyeli bakali kupa zyakkumi zyabo zyabili kubacete alimwi aba Levi.—Deuteronomo 14:28, 29.

 Mulandu nzi wakali kupegwa akaambo kakutapa cakkumi? Mulawo wa Musa tiiwakali kwaamba mulandu wakaliko akaambo kakutapa cakkumi. Bantu bakeelede kupa zyakkumi nkaambo bakalizyi kuti cakaliluzi kucita oobo kutali akaambo kakuti kwakali mulandu wakali kupegwa ikuti tiibapa. Bana Israyeli bakeelede kulyaambilila kuli Leza kuti bapa cakkumi alimwi akumulomba kuti abalongezye akaambo kakucita oobo. (Deuteronomo 26:12-15) Leza wakali kubona kutapa cakkumi kuti kwakali kumubbida.—Malaki 3:8, 9.

 Sena kupa cakkumi wakali mukuli uuminya? Peepe. Leza wakasyomezyede cisi kuti, ikuti kabapa cakkumi, wakali kunoobapoomweda zileleko zyakwe cakuti tiibakali kunoobulizya cintu cili coonse. (Malaki 3:10) Kulubazu lumwi, cisi cakali kunoopenga ikuti bantu tiibaleta cakkumi. Bakali kuyoosweekelwa zileleko zya Leza alimwi akutagwasyigwa amilimo njobakali kucita bapaizi aba Levi, aabo mbobakali kulekelezya.—Nehemiya 13:10; Malaki 3:7.

 Ciindi Jesu naakali anyika, bantu ibakali kukomba Leza bakeelede kunoopa cakkumi. Pele, mulawo ooyu wakamana ciindi Jesu naakafwa.

Muciindi ca Jesu

 Mucibeela civwula kwiitwa kuti Cizuminano Cipya, Bbaibbele litondezya kuti bana Israyeli bakazumanana kupa zyakkumi nomuba muciindi Jesu naakali anyika. Jesu wakazuminizya kuti bakeelede kunoopa zyakkumi, pele wakabakazya basololi babukombi, nkaambo nokuba kuti bakali kupa zyakkumi, tiibakali ‘kubikkila maano kumakani mapati aa Mulawo, nkokuti bululami, luse, alusyomo.’—Matayo 23:23.

Naakafwa Jesu

 Naakafwa Jesu, akwalo kupa zyakkumi kwakamana. Lufwu lwakwe lwakulyaaba lwakaumana Mulawo wa Musa kubikkilizya ‘akulaililwa kubweza cakkumi.’—Bahebrayo 7:5, 18; Baefeso 2:13-15; Bakolose 2:13, 14.